Zenɛze 15

GALA ná-minazeɠegi Abalame ta mavofodai ʋɛ

1Naama vaiti poluma, Ɠɔoɠɔ GALAGI ɓɔɛni Abalame ʋɔ segi zu, é ɠɛ ma: «Abalame, mina lua ɲɛgɛlɛin, nà ɠa gè ga è makɛ nui, ɗa-ɠulanumai ɠa wɔɔlɔ.» 2Abalame gooɠaaʋoteni, é ɠɛ ma: «Màliɠii, Ɠɔoɠɔ GALAGI, lee ɠa è feezu zèa? Tɔɔzei doun la zèa, nà-pɛlɛi wu ʋogani zeɠe nui ɠa é ga Eliyezɛɛl, Damase nui.» 3É ta laani ma mɔnɔ, é ɠɛ ma: «È la màvofoda ɓɛtɛni, zɔi sɔlɔɔgai nà-pɛlɛi wu, naa ɠa é ɠɛɛzu ga nà-pogani zeɠe nui.» 4Ɠɔoɠɔ GALAGI ɓɔɛni pɔ, é ɠɛ ma: «Ɓa-o, naa laade, é ʋa ɠɛ ɠɛɛzu ga ɗa-ʋogani zeɠe nui, kɛlɛ kɛni zɔi é ɠulazu è ɠoozu, naa ɠa a ɠɛ ga ɗa-ʋogani zeɠe nui.» 5Naa ʋolu GALA ge ɠulani la eteaʋɛ ná-seɠe ɠotai ʋoluʋɛ, é ɠɛ ma: «Geeɠɔlɔgi ɠaaʋɛ ʋɛtɛ, è somideɠaiti gaalu, ni ɗa zoo è ti ɠaalu.» É ɠɛni ma mɔnɔ: «Zekana è-mavofodaiti tiegɔi a ɠɛ la.» 6Abalame laani Ɠɔoɠɔ GALAGI la, naa naa leveni bɛ ga telebodai.

7É ɠɛni ma: «Nà ɠa gè ga Ɠɔoɠɔ GALAGI, nii é è ɠula Uul taai ʋa Ɓaɓilɔne yooi zu, gè niima yooi ve è ya ga ɗɔnɔ.» 8Abalame gooɠaaʋoteni, é ɠɛ ma: «Màliɠii, Ɠɔoɠɔ GALAGI, nà kwɛɛ ɠale ɠiteɠite ga nà sɔlɔɔsu?»

9GALA ge ɠɛni ma: «Li, è kona saʋagɔ nikɛ ɓeai zo, ta kona saʋagɔ woli zaai, ta kona saʋagɔ ʋaala sinɛ wolai, è kpɔ kpumagoi ʋa, ta poopogi, è ti ɠula ga zalaɠai.» 10Abalame naama zuaiti kpein seɠeni, é ti ʋaliʋali su, é ma zɛʋɛiti gaaʋote ɓɔɠɔ ma, é ɠɛ ga ma ɲɛkpɛ felegɔ, kɛlɛ é la ɠɛni wɔniiti baliʋalini su. 11Sua mii wɔniiti ti ɠɛni ʋuuzu ti-ma ʋoomaiti ma, kɛlɛ Abalame ti ɓɛɛni.

12Foloi liizuʋɛ, ɲiimɛni wolai leʋeni ga Abalame, dualuagi so, kpidi ɓɔii ʋɛɛ ma. 13Ɠɔoɠɔ GALAGI ɠɛni Abalame ma: «Suɠwɛɛ ga è-mavofodaiti ta ɠɛ ga seikɔɠɔma nuiti zooi taɠili su, ta ɠɛ ná ga duɔiti, ti ti zopele ɲɔu kona unnaanigɔ (400) laawu. 14Kɛlɛ nà zii naa lukpɔɠaaleʋe, nii ta duɔlai ɠɛ zeezu, naa ʋoluma, naavolo wolaiti ta yɛ ti ya, ti ɠula zeezu. 15Ɗɔun ɗa, ɗa za ziilɛigi zu, è maa ɠa ɠulu, è wɔlɔzaɠaga ʋoluma, undaanɛɛi zu. 16È-mavofodai ma yamanii naanisiɛi ɠa ʋa ʋolu ʋɛ, mazɔlɔɔ Amool nuiti ta-vaaɠaaza golai laa la dɛ zeelini.»

17Siɛgi zu foloi liini la, kpidi ɓɔii ʋɛɛni, diɠii nii é duului ɠulazu, ta sɔmɔgi é zosu, naati ti leʋeni sua ɠaaɠwɛaiti zɔɠɔzuʋɛ. 18Naama yee ná, Ɠɔoɠɔ GALAGI minazeɠeni Abalame ʋɛ, é ɠɛ ma: «Gè niima yooi kpein fea è-mavofodai ʋɛ, é zo Ezipete ɗɛ wolai ma, é zeeli ziɛ wolai Efelate ma, 19Ken nuiti ta-yooi, Kenize nuiti, Kademɔn nuiti, 20Ɠɛte nuiti, Felɛze nuiti, Lefa mavofodaiti, 21Amool nuiti, Kanaan nuiti, Giilegase nuiti, ta Yeɓuse nuiti.»

Trenutno izabrano:

Zenɛze 15: GDZ

Istaknuto

Podijeli

Kopiraj

Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi

This work is licensed under the Creative Commons Attribution-NonCommercial-NoDerivatives 4.0 International.

https://creativecommons.org/licenses/by-nc-nd/4.0/

Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.

Saznaj više o GALA Daawoo Zɛʋɛi