Panagnaꞌan 39
39
Si Yusup duk anda Potiparin
1Na, binoꞌo si Yusup hap lahat Misir weꞌ meꞌ aꞌa bangsa Ismaꞌel bu pinabellihan. Binelli iye weꞌ si Potipar, dembuwaꞌ kapangandelan sultan Misirin, iye kapitan si meꞌ guwaldiya sultanin. 2Patennaꞌ si Yusup si lumaꞌ disi Potipar, amunen. Tabangan Tuhanin si Yusup hangkan magkasuddahan teꞌed kēmon meꞌ hinangannen. 3Takite Potipar weꞌ tinabangan weꞌ Tuhanin si Yusup hangkan magkasuddahan kēmon hinangannen. 4Manjari sinna iye pu si Yusup. Hangkan hinangne iye dī daraꞌakanne duk urunganne iye kapatut magbayaꞌ si kēmon daraꞌakannen. Pinangandel weꞌ ne meꞌ kēmonnen pu si Yusup. 5Kemuwe miyaꞌan iledjikiꞌan weꞌ Tuhanin si Potipar sabab si Yusup duk kēmon panyapnen si lumaꞌ duk si bulaknen magkaꞌekka. 6Pinangandel weꞌ Potipar kēmon meꞌ pangalataꞌnen pu si Yusup. Peggeꞌ laꞌi ne si Yusup, gaꞌ niyaꞌ kasusehan Potipar, iye hadja pinikilnen bang ine kabayaꞌanne kinakanin.
Na, hāp teꞌed lella si Yusup. 7Gaꞌ du tiggel anda amu Yusupin mabayaꞌ si iye duk paꞌinne, “Magulid kite.” 8Saguwaꞌ gaꞌi ngatu si Yusup duk paꞌinne si anda amunen, “Pikilun, peggeꞌ tuꞌu ku gaꞌ niyaꞌ kasusehan amukun sabab lumaꞌin. Bakas urunganne ku kapatut magbayaꞌ si kēmon pangalataꞌnen duk meꞌ daraꞌakannen. Aku pangandelannen. 9Aku duk iye saliꞌ kapatut kamihin tuꞌu si lumaꞌ inin. Gaꞌ niyaꞌ pamagesanne aku bukut hadja bang kaꞌu, peggeꞌ kaꞌu hep andanen. Gaꞌi ku makajari hinang laꞌat sā miyaꞌan, duse iyan tudju Tuhan.” 10Bisan buyuꞌ-buyuꞌne si Yusup kahabaꞌ ellew gaꞌi ngatu si Yusup paꞌulid si iye duk bisan naweꞌan iye.
11Dambuwaꞌ ellew padiyalem lumaꞌ si Yusup peggeꞌ niyaꞌ hinangne laꞌi. Gaꞌ niyaꞌ laꞌi diyalem meꞌ daraꞌakanden bisan dambuwaꞌ. 12Inagew weꞌ dende miyaꞌan semmek Yusupin duk paꞌinne, “Magulid kite.” Magubas si Yusup paluwas duk taꞌambanne semmeknen laꞌi si dendehin. 13Pag kitene weꞌ īꞌ ne lahi si Yusup duk taꞌambanne semmeknen 14lingananne meꞌ daraꞌakanden duk paꞌinne si siye, “Payamanun bi! Bakas binoꞌo weꞌ ellakun lella Hibrani miyaꞌan pitu maꞌiyaꞌ kite bi. Pikilun bi, pitu iye sōng ngulidan aku, manjari magkilahap ku. 15Pag kilahap ku taꞌambanne semmeknen si bihingku duk magubas ne iye paluwas.”
16Ubus miyaꞌan inennaꞌ weꞌ dendehin semmek Yusupin sampay tekka ellanen. 17Pag tekka ellanen inaka weꞌ ne bakas inakane si meꞌ daraꞌakanden. Paꞌinne, “Lella Hibrani bakas binellinun pitu ensiniꞌ sōng nganggagahan aku; 18bu pag kilahap ku taꞌambanne semmeknen duk magubas iye paluwas.”
19Pag inakahan weꞌ andanen weꞌ “sā īꞌ hep hinang daraꞌakannu si akuhin” inastel iye manamal pu si Yusup. 20Daꞌakne siniggew si Yusup duk kinalabusu diyalem kalabusu meꞌ pilisu sultanin. Ubus laꞌi ne si Yusup diyalem kalabusu. 21Saguwaꞌ tinabangan weꞌ Tuhanin si Yusup duk kasulutan Tuhanin si iye hangkan kahāpan nakuraꞌ guwaldiyahin pu si Yusup. 22Pinangandel weꞌ nakuraꞌ guwaldiyahin pu si Yusup kēmon meꞌ pilisu sinduwehin. Ine-ine hinangde diyalem kalabusu iye kapatasin. 23Na, peggeꞌ si Yusup ne mangantan diyalem kalabusuhin, gaꞌ niyaꞌ kasusehan nakuraꞌ guwaldiyahin peggeꞌ tabangan Tuhanin si Yusup duk magkasuddahan kēmon hinangannnen.
Trenutno izabrano:
Panagnaꞌan 39: yakV
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2019, Wycliffe Bible Translators, Inc. All rights reserved.