Yohanes 2
2
Hi Yesu mowolihi uwai mewali anggoroꞌ
1Liu roꞌando, katoꞌo uwaꞌ posusaꞌ pepohamoko i bolaꞌ Kana i woiꞌ Galilea. Inoꞌna hi Yesu uwaꞌ woꞌo i posusaꞌa tiꞌo. 2Hi Yesu hante topeguruNahi niwowoihi woꞌo nolou pe posusaꞌa tiꞌo. 3Kolentuꞌara mosusaꞌ, nokoꞌukoihi anggoroꞌ, katoꞌo inoꞌna hi Yesu nolou merapiꞌ sulungi pe hi Yesu, notiꞌi, “Ukomo angoroꞌo.”
4Notiꞌi hi Yesu, “Inoꞌ, hapo tungkaihama hinaꞌ itiꞌikiꞌA? Handoaꞌi tene tempona Kupomombaha kuasaꞌKa.”
5Angkana, inoꞌna hi Yesu mampatiꞌikihi topajama i posusaꞌa tiꞌo, notiꞌi, “Hapolu to hingkiꞌ Norumbaꞌkikei hi Yesu, hangangaa ipetuntuikei!”
6I posusaꞌa tiꞌo, uwaꞌ oni onu potomua uwai to kodeꞌ. Potomua uwai tiꞌo biasana niꞌohii uwai to hingkiꞌ nipakeꞌ mewaheꞌ motuntuni adaꞌra toYahudi. Koworiꞌna ohina potomua uwai tiꞌo, kira-kira hanatu liteꞌ i haꞌanu potomua uwai. 7Hi Yesu mampatiꞌikihi topajama tiꞌo, “Iꞌohikei potomua uwai tiꞌo hante uwai.” Katoꞌo roꞌohimo mpuꞌu ropobuhaꞌ. 8Uko tiꞌo, Notiꞌikihi, “Tembuꞌi hangkiuꞌ, hei ikomikikei tadulako posusaꞌ.” Rotembuꞌmo mpuꞌu honiꞌi rokomi nolou pe tadulako posusaꞌ.
9Tadulako posusaꞌa tiꞌo mampetomiꞌ uwai to rokomi. Hamboaꞌi motobe hibali uwai biasa, tewolihimo mewali anggoroꞌ. Angkana hawaꞌi nobahaꞌ koka imbona humei anggoroꞌ tiꞌo, to pobahaꞌ topajamanalu, koꞌukona mampetomiꞌ anggoroꞌ tiꞌo, nowowoimo tomaꞌani to nipohamoko, 10hei notiꞌi “Biasana motuntuni adaꞌta, anggoroꞌ to motomiꞌ hangangaa niꞌinu medulu i posusaꞌa. Ane nihorikimoꞌi maꞌinu, honiꞌiwae niꞌinu to hawaꞌi rahi motomiꞌ. Angkana ingko, ipokamuri reꞌi anggoroꞌ to motomiꞌ mpololeke.”
11Tiꞌomo pepongkane hi Yesu mowali tandaꞌ kuasaꞌ. Nowali tiꞌo i bolaꞌ Kana i woiꞌ Galilea. Moliu i tanda kuasaꞌ tiꞌo, Io mampopebahaꞌ komanobaꞌNa, horiana topeguruNahi mepoꞌohi pe Io.
12Uko posusaꞌa tiꞌo, hi Yesu hante lekiꞌna topeguruNahi, inoꞌNa hante hineeꞌNahi, nolouhi pe bolaꞌ Kapenau, hei meꞌohaꞌhi itoꞌo haꞌumbora mini.
Hi Yesu mobue topobaluꞌ-baluꞌ ka Tambina Pueꞌ Ala
(Mat. 21:12-13; Mrk. 11:15-17; Luk. 19:45-46)
13Hingkiꞌ mehupaꞌmo tempone ando ngkodeꞌ agama Yahudi to nitiꞌi ando Posusaꞌ Pokalintora toYahudi. Io horiana noloumo hi Yesu pe Yerusale. 14Kohupaꞌralu i tanobaꞌa Tambina Pueꞌ Ala, Noꞌokiꞌ toaꞌ to mampobaluꞌ gapiꞌ, gimba hei tinti kokou. Uwaꞌhi woꞌo topotopu#2:14 Motopuhi doiꞌ Roma mewali doiꞌ to wadi ropakeꞌ mobaiari sima i Tambina Pueꞌ Ala. doiꞌ to mahura itoꞌo. 15Konoꞌokiꞌnalu hi Yesu lekiꞌ-lekiꞌne tiꞌo, mowalimo pelabehiꞌ ka koloroꞌ Nopopobue lekiꞌ-lekiꞌna gapiꞌra hei gimbara ka Tambina Pueꞌ Ala. Nobolingkotaꞌ meja potopuare doiꞌ, koꞌukoana tehawori doiꞌre. 16Uko tiꞌo, Notiꞌikihi pe topobaluꞌ-baluꞌ tinti kokou, “Polaimokei! Ikomimokei lekiꞌne tiꞌo, inioꞌ ipopewalikei tambiNe UmoꞌKu mewali pobaluꞌ-baluꞌami!”
17Rokolowoimo topeguruNahi hapo to teꞌukiꞌ i lali suraꞌ Mangkolehi to mantiꞌi waheꞌe:
“Makaja koKupotanaꞌne TambiMu Pueꞌ,
iomo to mampomolaho lalingKu.” (Mas. 69:10)
18Mepongka katoꞌo, tadulako-tadulakora toYahudi mampatiꞌiki hi Yesu, “Ane uwaꞌ mpuꞌu kuasaꞌMa mowalia hatoꞌo, Iponoꞌokiꞌkika haꞌanu tandaꞌ kuasaꞌ!”
19Notiꞌi hi Yesu, “Ikerokei Tambine Pueꞌ Ala hieꞌe, hingkiꞌ Kuꞌaro i lali tolu ando.”#2:19 palaihana: Ane nirokoꞌA, hingkiꞌ tuwuꞌA huliꞌ i lali tolu ando.
20Rotiꞌi toYahudi pe Io, “Iba mpuluꞌ oni ntoꞌa Tambine Pueꞌ noꞌaro#2:20 Tambina Pueꞌ Ala tiꞌo maranga mpololeke. Mepongka noꞌaro Datu Herode ngkodeꞌ toꞌa 20 ka handoaꞌi tene hi Yesu nipoꞌanaꞌki, hei mewali i toꞌa 64 uko ka konipoꞌanaꞌkina hi Yesu (64 M). toaꞌ, hingkiꞌ Ingko lekemo moꞌaro i lali tolu andolu?”
21Kotuꞌuana, wotana hadoduoNa to notungkai hi Yesu i tempona mantiꞌi Tambina Pueꞌ Ala. 22#Mas. 16:10I kotuwuꞌna huliꞌ hi Yesu, hongkoꞌ rokolowoi topeguruna lolitaNe tiꞌo, honiꞌi ropoꞌohi hapo to teꞌukiꞌ hampiha i lali Suraꞌ Mangkolehi, hei hapo to notiꞌi hi Yesu.
Hi Yesu pobahaꞌ lalina lekiꞌ-lekiꞌna toaꞌ
23Kolentuꞌana hi Yesu i Yerusale motuntuni ando Posusaꞌ Pokalintora toYahudi, woriꞌ toaꞌ mepoꞌohi koꞌIona Datu to mamposalamaꞌ, alaꞌ pangkiꞌhi tandaꞌ-tandaꞌ kuasaꞌ to Nowali. 24Angkana hawaꞌhi nopoꞌohi hi Yesu, alaꞌ Nobahaꞌ hapo to i laline lekiꞌra toaꞌ. 25Hawaꞌi paralu nilolita pe Io noniuꞌ waliana manusiaꞌ, alaꞌ Nobahaꞌmo umbiꞌ hapo to i laline toaꞌ.
Trenutno izabrano:
Yohanes 2: LAILJE
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
2017 Indonesian Bible Society (Lembaga Alkitab Indonesia)