Lukas 20
20
Peꞌitano noniuꞌ kuasaꞌna hi Yesu
1I hampiha tempo, hi Yesu mepoturuꞌ hei mampowute Kareba Moromiꞌ pe toaꞌ to woriꞌ to morampu i Tambina Pueꞌ Ala. Katoꞌo, mehupaꞌhi woꞌo tutuꞌ tadulako mpenomba hante guru agamana toYahudi hei tua-tua toYahudihi. Meꞌitanomohi pe hi Yesu rotiꞌi, 2“Itiꞌikika ka imbo kuasaꞌMa mowali lekiꞌ-lekiꞌna tiꞌo. Himo to mampaꞌaniKo kuasaꞌ tiꞌo?”
3Mehoniꞌ hi Yesu, “Aku woꞌo meꞌitanoꞌA pe ingkei. 4Ka imbo kuasaꞌne hi Yohanes moriu toaꞌ? Ka Pueꞌ Ala, ba ka toaꞌ?”
5Mororapaꞌmohi tadulakore toYahudi tiꞌo, rotiꞌi haduo hei haduo, “Hohumbomo kotohoniꞌne? Ane totiꞌi ka Pueꞌ Ala kuasaꞌNe, hingkiꞌ Notiꞌikiki, ‘Ane watoꞌoꞌi, mahamporeꞌi hinaꞌ hawaꞌkei mepoꞌohi pe hi Yohanes?’ 6Angkana ane totiꞌi ka toaꞌlu kuasaꞌne, hingkiꞌ rowatuiki toaꞌ to woriꞌ, alaꞌ iohi mepoꞌohi hi Yohanes tiꞌo haduo nabi.” 7Mewaliꞌ rohoniꞌ, “Hawaꞌi kibahaꞌ.”
8“Ane watoꞌoꞌi, hawaꞌkei hingkiꞌ Kutiꞌiki koka imbone kuasaꞌKa mowali lekiꞌna tiꞌo!”
Pandiriꞌ noniuꞌ topajama i kineteꞌ anggoroꞌ
9Uko tiꞌo, hi Yesu mampowute halangkaꞌ pandiriꞌ pe toaꞌ to woriꞌ notiꞌi, “Uwaꞌ haduo toaꞌ to mohoꞌoni kineteꞌna hante anggoroꞌ. Tumpu kineteꞌ tiꞌo moharoi haꞌumbora toaꞌ topajama kineteꞌna. Alaꞌ io hingkiꞌ molai nolou pe bolaꞌ ntaniꞌna, hei hingkiꞌ morue meꞌohaꞌ inoꞌo. 10Wutemo tempona morupuꞌ wuaꞌ anggoroꞌ, nohowoꞌimo haduo hawiꞌne nolou merapiꞌ dolaꞌna pe topajama kineteꞌna. Angkana topajama kineteꞌ tiꞌo mokondo hawiꞌna hei ropopahuliꞌ ntooꞌ. 11Uko tiꞌo, tumpu kineteꞌ tiꞌo mohowoꞌi womo hawiꞌna koroduona. Wutemo itoꞌo, rokondo woꞌo nipokohili hei ropopahuliꞌ ntooꞌ. 12Uko tiꞌo, nirumbaꞌ womo haduo hawiꞌna to kotolu duona. Wute itoꞌo, rokondo woꞌo hei ropelubaꞌ pe huwali kineteꞌ.
13Uko tiꞌo, notiꞌi i lalina tumpu kineteꞌ tiꞌo, ‘Hapo to hangangaa kuwali? Aginamo anaꞌku to kupokarima kurumbaꞌ nolou. Bateꞌna hingkiꞌ ropengkoruꞌi.’
14Angkana, i tempora topajama kineteꞌ pangkiꞌ anaꞌna tiꞌo, morapaꞌmohi rotiꞌi, ‘Anaꞌ tiꞌo aginamo torokoꞌ hantaromoꞌi mewali tumpu kineteꞌ, hei toroa kineteꞌne hante lekiꞌ-lekiꞌna ohina.’ 15Katoꞌo rohokiꞌmo mpuꞌu anaꞌne tiꞌo, hei rokomi nolou pe huwali kineteꞌ honiꞌi rorokoꞌ.”
Uko tiꞌo, nopeꞌitanoki hi Yesu, “Ane mahuliꞌi tumpu kineteꞌ tiꞌo, hapo to hingkiꞌ nowali pe topajama kineteꞌ tiꞌo? 16Bateꞌna ako morokoꞌ topajamana kineteꞌna, hei kineteꞌna hingkiꞌ nopaꞌanikihi toaꞌ ntaniꞌna.”
Korohorina toaꞌ to woriꞌ lolita pandiriꞌ tiꞌo, iohi mampatiꞌiki hi Yesu, “Anioꞌ nopewali tiꞌo!”
17Angkana hi Yesu mampenotohi Notiꞌi, “Hapo palaihane lolita hieꞌe to teꞌukiꞌ i lali Suraꞌ to Mangkolehi:
‘Watu to notube topoꞌaro tambi,
watu tiꞌo to mewali pahurahana tambi.’ ” (Mas. 118:22)
18Notiꞌi womo hi Yesu, “Lekiꞌ-lekiꞌna toaꞌ to monawuꞌ i womboꞌ watu tiꞌo hingkiꞌ morutu. Hei hihimo to nokoꞌonoꞌi watu tiꞌo hingkiꞌ morere.”#20:18 hi Yesu nipandiriꞌ hibali watu. Palaihana, hihimo to mosapuaka Yesu hingkiꞌ pahua pehuku.
Pobaiari sima
19Guru-guru agama hante tutuꞌ-tutuꞌ tadulako mpenomba robahaꞌ koꞌiora to notungkai hi Yesu i lali lolita pandiriꞌNa hingkonia. Iomo hinaꞌ uwaꞌ tungkaihare mohokiꞌ hi Yesu i tempo tiꞌo. Angkana hawaꞌhi podehoꞌ, alaꞌ mangkorokaꞌhi toaꞌ to woriꞌ. 20Katoꞌo, mampaliꞌhi tempo to moromiꞌ, hei morumbaꞌhi haꞌumbora duo toaꞌ nolou pe hi Yesu mampaliꞌ komasalaꞌna lolitaNa hingkeꞌna noꞌuwaꞌ lalane rokomiꞌi pe gubenuruꞌ Roma hei nibutusi i hinarona hei nitarungkuꞌ. Toaꞌ to nirumbaꞌ tiꞌo, hantoniꞌ mampetoromiꞌluhi alaꞌ tungkaihara hingkiꞌ mampokonawuꞌ hi Yesu. 21Kohupaꞌra i hi Yesu rotiꞌi, “Guru, kibahaꞌ komaniuꞌne lolitaMu hei lekiꞌ-lekiꞌna pepaguruMu. MepaguruKo ikomaniuꞌna motuntuni peleihana Pueꞌ Ala, hei hawaꞌko mampopoꞌoriꞌori toaꞌ. 22Iomo hinaꞌ meꞌitanoka, motuntuni aturana pepoꞌohinta, ba hangangaa mobaiariki sima pe datu ba hawaꞌi?”
23Angkana nobahaꞌlu hi Yesu tungkaihane lalira to kodake. Iomo hinaꞌ Notiꞌikihi, 24“PohumeikiꞌA dulu doiꞌ peraꞌ! Lentena hihimo hante konaꞌna hihimo to uwaꞌ i doiꞌ hieꞌe?”
Mehoniꞌhi, “Lentena hante konaꞌna datu ngkodeꞌ.”
25Notiꞌi hi Yesu, “Ane watoꞌoꞌi, ipaꞌanikikei Datu Ngkodeꞌ hapo to hangangaa nipaꞌaniki, hei ipaꞌanikikei woꞌo Pueꞌ Ala hapo to hangangaa nipaꞌanikiꞌI.” 26Koꞌukoana hawaꞌi uwaꞌ komasalaꞌne lolitaNa to rohua i hinarona toaꞌ to woriꞌ. Monondiiꞌluhi alaꞌ lemeniahi pahori pehoniꞌNa.
Peꞌarona to mahi
27Uko tiꞌo, uwaꞌhi haꞌumbora toaꞌ ka paratei Saduki to hupaꞌ pe hi Yesu. ToSaduki iomo hadolaꞌ tadulako agama Yahudi to hawaꞌhi mampoꞌohi toaꞌ to mahi hingkiꞌ nipatuwuꞌ huliꞌ. 28Rotiꞌi toSaduki pe hi Yesu, “Guru, hi Musa moꞌukiꞌ i lali suraꞌ atura pepoꞌohinta waheꞌe, ane haduo tomaꞌani mahi angkana hawaꞌi uwaꞌ anaꞌne, halali hampemolona hangangaa hamoko hante erana tobembaꞌmo tiꞌo, hingkeꞌna uwaꞌ muleꞌne halalina to mahimo. 29Mewaliꞌ, uwaꞌhi pitu topohalali, lekiꞌ-lekiꞌra tomaꞌani. To kokokaꞌ, mohantambi. Hawaꞌi tene uwaꞌ anaꞌre, mahimo. 30Hineꞌna mampohantambi tobembaꞌ tiꞌo. Hawaꞌi tene uwaꞌ anaꞌre, mahimo woꞌo. 31Watoꞌo woꞌo to mewali ikotolu wute pe to kopituna. 32Koꞌukoana mahimo woꞌo towoweꞌe tiꞌo. 33Mewaliꞌ, i ando kotuwuꞌna huliꞌ to mahi, hihimomo maꞌanine towoweꞌe tiꞌo? Alaꞌ pitumohi to mampohantambiꞌi.”
34Mehoniꞌ hi Yesu, “Toaꞌ to tuwuꞌ i duniaꞌ, nipohamokohi, 35angkana toaꞌ to masipatoꞌ pahua dolaꞌra i duniaꞌ to wolaꞌ hei to nopatuwuꞌhi huliꞌ Pueꞌ Ala, hamboaꞌmohi mohamoko. 36Kotuwuꞌra hibali kotuwuꞌna malaꞌeka alaꞌ hawaꞌhi hingkiꞌ pahua komahia. Iohi tiꞌo anaꞌna Pueꞌ Ala, alaꞌ Pueꞌ Ala mopatuwuꞌhi huliꞌ.
37Hi Musa hadoduona mampokononto toaꞌ to mahi hingkiꞌ nipatuwuꞌ huliꞌ. Tunturaka hieꞌe noꞌukiꞌ i lali suraꞌna hi Musa, noniuꞌ wulaꞌi rui to noꞌoka api. I tempo tiꞌo, Pueꞌ mantiꞌi, ‘Akumo Pueꞌ Ala to ropenombai hi Burahima, hi Isaki hante hi Akoꞌ.’#20:37 Kel. 3:6. 38Io handoꞌio Pueꞌ Alana toaꞌ to mahi, angkana Pueꞌ Alana toaꞌ to tuwuꞌ, alaꞌ i hinarona Pueꞌ Ala, lekiꞌ-lekiꞌna toaꞌ tontona tuwuꞌ.”#20:38 Lekiꞌ-lekiꞌna toaꞌ: Palaihana toaꞌ to menomba pe Pueꞌ Ala. Kehapoꞌi wotalokaꞌ mahi angkana tanuanaꞌ tontona tuwuꞌ. Rm. 8:11.
39I tempo tiꞌo, haꞌumbora guru agama mantiꞌi pe hi Yesu, “Guru, tuꞌu mpololeke to Itiꞌi.” 40Uko tiꞌo, hawaꞌi uwaꞌ to podehoꞌ mampeꞌitanoki ba hapo-hapo pe hi Yesu.
Datu Topohompoꞌ iomo muleꞌna hi Daudi
41Katoꞌo, hi Yesu meꞌitano pe iohi notiꞌi, “Mahamporeꞌi hinaꞌ ingkei mantiꞌi Datu Topohompoꞌ iomo muleꞌna datu Daudi? 42Alaꞌ hi Daudi hadoduona mampokononto Datu Topohompoꞌ iomo Pueꞌ to nopenombai. I lali suraꞌ Masmur, notiꞌi hi Daudi waheꞌe,
Pueꞌ Ala mololita pe Pueꞌku to kupenombai, notiꞌi,
‘Mahuramoko tinaꞌ i koanangKu, 43wute Kupopengkoruꞌhi lekiꞌ-lekiꞌne poniꞌmu pe Ingko.’#20:43 Mas. 110:1
44Mewaliꞌ, ane Datu Topohompoꞌ iomo muleꞌna hi Daudi, mahamporeꞌi hinaꞌ nopenombai hi Daudi hei nowowoi Pueꞌ?”
Majaga-jagakei hante guru agamara toYahudi
45Kolentuꞌara tene toaꞌ to woriꞌ mampehoromua lolitaNa, notiꞌi hi Yesu pe topeguruNa, 46“Majaga-jagakei, inioꞌkei motuntuni waliara guru agamana toYahudi. Iohi rolei matengkaꞌ mampetoꞌele-ele mopakeꞌ baduꞌ to kurauꞌ, hei dokoꞌhi niꞌadaꞌi i pobaluꞌ-baluꞌa hei dokoꞌhi mahura i pahura to i hinaro i tambi penombaha hei i posusaꞌa. 47Mobagiuꞌhi tobembaꞌ hante morompoꞌi tambira. Iomo hinaꞌ hantoniꞌhi mekokae morue-rue motutuꞌi waliara to kodake. Angkana monontomo iohi hingkiꞌ pahuahi pehuku to madori!”
Trenutno izabrano:
Lukas 20: LAILJE
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
2017 Indonesian Bible Society (Lembaga Alkitab Indonesia)