KORINTUS 1 1

1-3 # Rsl. 18:1 Utat mita jamaat i Allah kon Korintus! Moiko inoinídon i Allah mobaḻí umat-Nea sin moiko kapunyaan i Kristus Yesus, moyotakin in bayongan intau nongkon ondakadon inta nosumba kon i Tuhan naton ki Yesus Kristus, ki Tuhan monia bo ki Tuhan naton doman. Akuoi ki Paulus, bo ki utat naton ki Sostenes, mopoigum mako sinbá ki Allah, Amá naton bo ki Tuhan Yesus Kristus in umuran mobogoi in barakat bo kobiagan motompia kon i monimu. Akuoi in nomais kon surat tanaa saḷakubí rasul i Kristus Yesus inta inoiní i Allah tontaní podudui in ibog-Nea.

Barakat mita i Allah inta pinongin i Yesus Kristus

4Akuoi in umuran mosukur kon i Allah sin moiko in nokouḻídon kon totabi-Nea bo nopirisaya domandon kon i Kristus Yesus. 5Popisí in moiko bo nopirisayadon kon i Kristus, dá bayongan in yagi-yagi komintanbí mouḻí monimu. Moiko aindon inogoian in totabi motundú kon onu in kinotaauan monimu. 6Bo tua komintan mangaḻenea in moponiatabí kon naanta habar mopia i Yesus Kristus tua in totu-totuu bidon noitonop kon bonu in ginamu. 7Tuamai barakat kon i monimu in diábí modai-dait kon dodai in moiko mogoḷat mako kon koangoian i Tuhan naton ki Yesus Kristus. 8Bo ki Kristusbí doman tua inta tantú moginrigon kon gina monimu modapot kon singgai pangabisan; sahingga aka mamangoidon bui in Sia yo diá kouḻían-Nea in moiko kon taḷá tobatúmai. 9Ki Allah nogoiní kon i monimu sinbá moiko motobatúdon i Adí-Nea ki Yesus Kristus, Tuhan naton. Bo Siabí doman tua inta tantú mobogoi kon onu inta ain pinodandi-Nea.

Bobayowan kon bonu in jamaat

10Utatku mita! Podoyon kon tangoi i Tuhan naton ki Yesus Kristus, poigumonku sinbá moiko umuran mosiduduian bo mokokidongogan; donaai umuran mobobayowan. Tantúbí kotobatúon in gina bo raian. 11Sin nodaitdon inouman in ginaḷum i Kloë kon inakó, kon naanta oyúonbí in yogenggeng kon sigad monimu. 12#Rsl. 18:24 Nanaa in makusudku, kon sigad monimu oyúon in noguman, “Akuoi in dumoduduibí i Paulus,” bo oyúon doman in moguman, “Akuoi in dumoduduibí i Apolos,” bo ibanea doman in moguman, “Akuoi in dumoduduibí i Petrus,” bo ibanea mako in moguman kon, “Akuoi naa in dumoduduibí i Kristus.” 13Bá kotaauandon monimu, kon ki Kristus in tongábí tobatú, diábí nosila-silai!#1:13: Kristus in nosilai-silai: tongonumai in naska dungkuḷmai: ki Kristus in diábí motaau in mosila-silai. Ná doman tua, ki Paulus in diábí pinopopakú kon kayu pinoyotaḻempang sin motobut kon i monimu! Bo moiko in diábí binaptis kon bonu in tangoiku.

14 # Rsl. 18:8, 19:29; Rm. 16:23 Mosukur totok in akuoi sin koḻikudbí in ki Krispus bo ki Gayus in binaptisku kon sigad monimu, 15sahingga diábí in moguman kon binaptiskudon in sia sinbá mobaḻí dumoduduiku. (16#Kor.1. 16:15 Oo anta, ki Stepanus bo bayongan ginaḷumnea akuoi doman in nobaptis, aka toro-toroponkumai yo diá bidon ibanea mako in binaptisku.) 17Akuoi in pinotabá mangoi i Kristus deemanbí mamangoi mobaptis, táe mamangoibí mopotaau in Habar Mopia. Bo deemanbí doman kapandoianku tontaní in pinakéku sinbá oyúon mangaḻe in kawasa nongkon kinopatoian i Kristus nongkon kayu pinoyotaḻempang.

Kawasa bo kapandoian i Allah noiukat kon i Kristus

18Aka kon raian in intau mita inta diá mopirisaya, yo soaḷ kinopatoian i Yesus Kristus kon kayu pinoyotaḻempang tua in diábí totuu. Táe aka kon i naton inta pinosaḷamatdon i Allah, yo habar tatua totokbí in pinirisaya, kon tua in totu-totuubí aid i Allah noponiata kon kawasa-Nea. 19#Yes. 29:14 Sin kon bonu in Buk Motusi, ki Allah in noguman nanaa,

“Poyayingon-Ku in kapandoian intau mita inta mongopandoi,

bo onu in kinotaauan in intau mita inta norosikoḷa, daiton-Ku popoḻiong.”

20 # Ayb. 12:17; Yes. 19:12, 33:18, 44:25 Dá aka natua yo diá bidon in baraguna monia? Intau mita inta mongopandoi bo intau mita inta nonotaau kon bayongan in yagi-yagi? Sin pinoniatadon i Allah kon kapandoian intau kon dunia naa diábí in baragunanea!

21Sin dapot kabí in onda in kapandoian intau, yo diábí in mokopobaḻí kon inia monotaau kon i Allah. Táe popisíbí in ki Allah mobijaksana, dá noibog in Sia in noposaḷamat kon intau mita inta mopirisaya kon i-Nia naonda in nokodongog kon habar inta pinotaau nami inta inanggap in dunia naa tongá uboḷ. 22Intau mita in Yahudi mopoigum in aid mita inta mokoherang saḷaku bukti, bo intau in Yunani mopoontong in kapandoian monia. 23Kami naa in tongábí mopoyaput in habar soaḷ ki Kristus inta minatoi pinopopakú kon kayu pinoyotaḻempang. Habar tatua in nokotersinggung kon intau mita in Yahudi, dá inanggap monia diá totuu in habar tatua. 24Tongá aka kon intau mita inta ain sinoko oiní i Allah, pinomayá intau in Yahudi andeka deeman – habar tatua in totokbí in pinirisaya kon aidbí i Allah kon moponiata in kawasa bo kapandoian-Nea. 25Sin onu inta inanggap i Allah totok in moompá, yo tuabí in moḷantu-ḷantud nongkon kapandoian intau; bo inta inanggap i Allah diá mokopongonu, yo tuabí in moropo-ropot nongkon ropot in intau.

Kawasa i Allah bo kaadaan in intau

26Utat! Toropka bui monimu naonda in kaadaan monimu wakutu inoiní i Allah. Tongábí topiḻik in intau kon sigad monimu in mopandoi, ande oyúon in kawasa, ande koḷoḻitúan moḷantud kon sigad in intau moantó. 27Sin sinuodbí i Allah piniḻí in intau mita inta inanggap in dunia naa nobodok, sinbá mosia in mokopooyámai kon intau mita inta mongopandoi. Bo sinuodbí doman i Allah in momiḻí kon intau mita inta inanggap in dunia naa diá mokopongonu, sinbá mongooyá in intau mita inta mongoropot. 28Ki Allah in nomiḻí kon inta inanggap noompá, nohina, andeka inta inanggap diá moponting in dunia naa. 29Tuamai in diábí tobatúmai intau in motaau kumaḷakuang kon i Allah. 30Sin lantaranbí ki Allah, dá notobatúdon in moiko i Kristus. Bo lantaran doman kita nopirisayadon kon i Kristus dá kita in nonotaaudon kon bayongan in yagi-yagi. Siabí doman tua in nopoyotutui, nomiḻí bo notobut kon bayongan oaid naton inta diá mopia. 31#Yer. 9:24 Nanaa in pinais kon Buk Motusi, “Intau inta moibog dumodia, maníka in sia dumodia kon onu inta aindon inaidan i Tuhan.”

Trenutno izabrano:

KORINTUS 1 1: INOMOG

Istaknuto

Podijeli

Kopiraj