LIRAANGA 7
7
Michelelo Mikali chia Matsi
1Mwami Nyasaye yavoolela Nuhu, “Tsia winjile mu liaro, yivi nende vandu vi inzu yoyo yosi; shichila mali khunyola, nivi vutswa wonyene wi likhola liu vulunji imbeli wanje mulikhula linu. 2Vukula tsinyama saba hali saba shia ikavila tsivulakhu imbala yosi, tsinyama tsisatsa nende tsikhali, khandi vukula tsinyama tsivili hali khavili tsindamanu shia tsinyama tsindamanu, isatsa nende ikhali yayo. 3Vakula khandi manyonyi saba mu shia manyonyi lukanu na lukanu, lisatsa nende likhali, khulomba manyonyi manyishi lukanu, katsililile khumenya mu shivala. 4Matukhu saba khurula nunundi, nzitsanga khulera imbula iliitsa khukhuva khumatukhu makhomi kane, mbasu nu vutukhu, khwononyinya vilombe viosi vili mwoyo via nalomba.” 5Nuhu yakhola shia shindu shiosi shiu Mwami Nyasaye, yali navooli akhole.
6Nuhu yali nali ni mihika tsimia sita, lwa michelelo chia matsi chitsa khulilova. 7Nuhu nu mukhali wewe, vaana vi shiyayi veve nende vakhali vavo, vinjila mu liaro khu michelelo chia matsi chivuli khuvamala. 8Shia inyama isatsa nende ikhali khurula khu tsinyama lukanu na lukanu halala ni linyonyi, ive indahi khulondokhana khu mulukha inoho indamanu, 9tsinjila mu liaro nende Nuhu, khuli Nyasaye yali namuvoolele. 10Matukhu saba nikakhavira, michelelo chia matsi chitsa.
11Lwa Nuhu yali nali ni mihika tsimia sita, khulitukhu li likhomi na saba liu mweli wa khavili, virula viosi via matsi mwilova vikukha, vilivwa viosi vi michelelo via matsi vikukha mu malesi; 12khandi imbula nikhuva mu shivala khu matukhu makhomi kane, mbasu nu vutukhu. 13Khulitukhu lilala lienelo, Nuhu nende mukhali wewe, na vaana vavo vavaka vi shiyayi nende vakhali vavo, vinjila mu liaro. 14Vinjilamu na shia inyama yumbulimu lukanu na lukanu khulondokhana khukavila yayo, miruku chiosi chiu khuvaaya khulondokhana khu tsikavila chiatsio, shia shilombe shimolanga hasi khulondokhana khukavila yashio, khandi shia linyonyi khulondokhana khukavila yalio, shia shilombe shiosi shili ni tsimbaha. 15Shia shilombe shili mwoyo, shisatsa nende shikhali lukanu na lukanu vinjila mu liaro nende Nuhu, 16khuli Nyasaye yali namuvoolele; khandi Mwami Nyasaye namwikalila mukari.
17Michelelo chia matsi chiatsililila khuvaho khumatukhu makhomi kane, khandi matsi nikava manyishi muno, khulomba liaro khwelema ikulu wa matsi. 18Matsi kitsula muno, ma liaro nilielema khwikulu khwa matsi. 19Matsi kitsula muno, khali nikakhunikha vikulu vikali viene; 20matsi katsililila khwitsula muno khutukha lwa kakhunikha vikulu nikavivira tsimita saba. 21Vilombe viosi vili mwoyo khulilova viakhutsa -- shia linyonyi, shia inyama, khandi shia mundu wosi. 22Shia shindu shiosi shili nu vulamu shiakhutsa. 23Mwami yiira vilombe vili mwoyo viosi mu shivala -- vandu, tsinyama, na manyonyi. Vandu vayarika vonyene vali Nuhu nende yavo vali nivali naye mu liaro. 24Matsi karemeela khulilova khumatukhu imia indala na makhomi karanu.
Trenutno izabrano:
LIRAANGA 7: LLLPRO
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© The Bible Society of Kenya, 2013