Luka 11
11
Maduwa Pəbe man gə a askwaf de
(Matta 6:9-15; 7:7-11)
1Bigeɗe Yesu gək maduwa a ma s'iŋgeɗe de, adede a ahan ga, ɗu ɓile a ɗa kutəɗiya de dzakəna, wa: «Ɗuduwuna, cugɨlhəman gə maduwa ka aŋa Zhaŋ tsugəkəlhətan a ɗa kutə wuran‑a saŋa.» 2Yesu zləmkənhətənaŋa, wa: «Abə kwa ŋaŋala Askwaf ga, jena kwene, ika:
“Pəbe man, gɨlika ɗaha hay ba cecena ɗá sənede gəni sləmay aka cuɗiɗɗa,
nay i bay tsəre aka.
3Vərməna ipəɗay ba kəla mandaɗay, deyday pəɗiya man.
4Ɓushɨmənka hipe hay man,
aɗaba mene kini ma ɓushɨtəna a ɗa gə ɗa gɨmən hipe ayiməna.
Cigmene gəni aweɗe á ɗeɗimnena ba.”»
5Ɗəfkənhətənaŋade adəɓa, wa: «Gishɗay ene ka abə ɗu s'iŋgeɗe ayikunde niya i yaga ene, laka a nzə yaga ene sahan shek luvaɗ a dzaɗina, wa: “Yaga hwa, kəlu dipeŋ məŋgan, 6aɗaba yaga hwa s'iŋgeɗe ge shula, niya adiyawa, igə əŋ vərna niba.” 7Abə ɗuhan zləminhənaŋa ada adaw‑a, wa: “Wushuwa bə ɗece ŋa! Adaw i zləŋɗay, mene ma hənakakade atə wayə hwa, əŋ slebkiya bə cine a ləɗay a vərɗiyak dipeŋ.” 8Na əŋ dzakuna, gha slabak ba a ləɗay a vərɗina aɗaba yaga ene kini, aɗaba wushin ŋa saŋa ga, si ba slibkakude, le a vərɗina igə wuran i wudar ene sahan ba cecena. 9Igə ənne əŋ dzakuna ga, mbucɨna, à ɗá vərkuna. Gweshɨna, à kwá njiya. Ten mavendew, à ɗá panhəkunamiya. 10Aɗaba gha wiya mbutsəka kini, ba ɗa vərna. Gha wiya guska kini, ba njiya. Gha wiya tək mavendew kini, ba ɗa panhənamiya. 11Pəbe gəna ayikunde, abə kine ene mbutsəkənamiya kuciɗek ni, vərna azam saŋa? 12Bi mbutsəkənamiya zlay ni, wuran vərəna ardzak he? 13Ba kwene gə kwa ɗa ɓutsam takaɗe kwa səna a vərɗitəna isələmna sələmna a waghay kwan ni, sakwamba Pəbe man gə a askwaf de, vərtəna bə Shinekw Cuɗiɗɗina a ɗa gə ɗa mbuciya a ma ene de he?»
Jawapa Yesu a ɗa gə wa ge sləra i hakuma Belzebul
(Matta 12:22-30; Markus 3:20-27)
14Bigeɗe ga, Yesu ɓərkede jini nanɗin me a ɗaha ada ɗu s'iŋgeɗe ka. A aŋəde jini sahan nayede ayina ga, ɗu sahan takənmandar‑a a dzaɗay abi me ene, ɗaha hay duna ɗa ge ba s'ajipu ene. 15Amá ɗa s'iŋgeɗe ayitənde, wa: «Ɓər jini hay saŋa i hakuma Belzebul, məlmal jini hay sahan.» 16Ɗa s'iŋgeɗe zlama adəɓa ɗa gus tsaɗipəna a Yesu‑a, ɗa mbutsəkənamiya wa á mbazləlhətan alama gə nike ada askwaf‑a. 17Mbatse Yesu sənkede a dzəmŋa tan sahan, dzəktəna, wa: «Abə a gurɗay ɓile de ni, ɗaha hay ɗa ndakariya caw, ɗa ge huma a duvak tan de ga, gurɗay sahan ba mbəzaka. Adaw hay tan kini ba kugwan, ɗa təsŋa abi ɓili‑ɓiliya. 18Shetene kini abə ba wuran ndakənariya a ŋa ene ka caw mà, gurɗay ene tifke kəma cine? Əŋ dzawa kugwan saŋa, aɗaba kwene ika əŋ ɓuriyede jini hay ada ɗaha ka i hakuma Belzebul. 19Abə ənne əŋ ɓure jini hay i hakuma Belzebul mà, ɗagadikwen mà, ɗa ɓurɨtan i hakuma wiya? Kugwan ga, ba wutan aŋa à ɗá mbazləla gəni kwa ɗa mbaɗe. 20Amá əŋ ɓure jini hay sahan abi hakuma s'Askwaf. Kugwan ga, shinɨnede gəni gurɗay s'Askwaf naya ala a ma kwan de.
21«Abə ɗu nzəɗa zheke aba al is'alay ene a tsəg s'adaw ene ga, niba ɗu gə gigicka almane ene. 22Amá abə ɗu gə ndəmika wuran i nzəɗa naya a kəɗɗinaŋade ni, dzəgwika bə ga, tsəmpəna aba atə is'alay ene gə wuran ɗəfika ŋa apəna saŋa, le a hulɗitənakude atə almane ene sahan a ɗagadiyana.
23«Ɗu gə niba ayude ga, ba ɗu dawa hwa. Ɗu gə humawande ba a guɓaɗiya kini, ba ɗu putsəɗila.»
Mbəɗɗiŋa jini ala a ɗaha de
(Matta 12:43-45)
24«Abə jini nayede ada ɗaha ka ga, le a tawurɗay aba apə ɓala hay‑a, ma gə ba s'ahwam kini niba apəna saŋa, gus ma gə hadzede mbas apəna. Abə nzəka bə ga, dzawa, wa: “Agwadza əŋ mbəɗŋa adəɓa ala a adaw hwa de gə əŋ nayede saŋa.” 25Abə mbəɗiŋa ni, naya a nzəɗiya i pətɗay, i sluməɗay kalkala ga, 26mbəɗŋa adəɓa, le a hahəɗika jini hay s'iŋgeɗe gə ɗa ndimde ba wuran i zlasaw tsəre saŋa ciɓa, ɗa lɨde, ɗa zakade ede. Adede a ahan zlə ga, zaɗay ɗuhan gɨkiya agwadza ba s'izuŋŋuna.»
Higəɗay duwuna
27A aŋəde Yesu dzawa ahan sahan ga, hər s'iŋgeɗe ŋgulahaka ba ŋguləhɗay ada fuɗəɗay ɗaha hay‑a, wa: «Gədəɗɗay a hər gə wahiken, ghiriken al ené ene saŋa!» 28Amá wuran, wa: «Gədəɗɗay ga, aba ɗa gə ɗa tsukw me s'Askwaf, ɗa kutiya aba apə ahan‑a saŋa.»
Ɗaha hay ɗa mbuciya ihay gə ɗa mbazləl nzəɗa s'Askwaf
(Matta 12:38-42; Markus 8:12)
29Ɗaha hay duna ɗa fuɗɨkike ala a ma Yesu de ga, takənmandar‑a a dzaɗitəna, wa: «Ɗa zamane bəkwa saŋa dəgiya ɗa ɓutsam! Ɗa gus ba tsaɗika alama gə mbazləl nzəɗa s'Askwaf, amá à ɗá njiya ba, abə slaka apə aŋa zak gaɗaya apə Zhunas‑a zuwuna ba. 30Ba ka aŋa nzəɗa s'Askwaf zak mbazlaɗaya apə Zhunas‑a a ma ɗa Niniwe de saŋa ga, Kine ɗu səlammərzheŋ kini ǎ za ba kugunhan a ma ɗa zamane bəkwa de#Zhunas 1:17; 3:4. 31Bək sheriya ga, hər s'iŋgeɗe bay a higay Sheba de, ǎ naya a təŋɗiltəna ɗa zamane bəkwa saŋa i sheriya. Aɗaba wuran tá nay ada higay s'iŋgeɗe ka a mandar mene de a nəɗay a tsukw me Salamuŋ ɗu həŋkale. Amá səgan, na ɗu gə ndəm Salamuŋ niya akəna. 32Bək sahan ga, ɗa Niniwe à ɗá slabakude, à ɗá taŋəltəna ɗa zamane bəkwa saŋa i sheriya. Aɗaba wutan a aŋəde Zhunas laka a mbəɗɗitənande me s'Askwaf saŋa, ɗa mbəɗkakude zaɗay tan. Amá səgan, na ɗu gə ndəm Zhunas niya akəna.»
Parakka tsəre s'i zhek
(Matta 5:15; 6:22-23)
33«Niba ɗu gə hənnande akwa a lalam ni, ɗəfa a ma gə de i shiɓɗay, bi humbɨnaŋade mudak saŋa. Amá ɗa wala apə ma wulɗila ka, gəni ɗa gə ɗa like ala a kudak de, ɗa caka parakka tsəre ene. 34Aray aka kini ba wuran aŋa lalam s'i zhek aka. Abə aray aka laŋŋa ga, zhek aka ba cecena a parakka tsəre de. Amá abə aray aka al aray bə ga, zhek aka kini aba a wurek de. 35Aɗaba sahan, si kə ɗəf sləmay ba kərətta, gəni parakka tsəre gə ayikde saŋa á mbiɗka bə wurek. 36Abə zhek aka ba cecena a parakka tsəre de ni, niba ma gə maka a wurek de ga, ǎ za ba cecena a parakka tsəre de, ba ka i lalam gə abə niya mbazləlhak parakka tsəre ene saŋa.»
Yesu sləktənaŋade a Farisa hay atə malum hay me gurɗay
(Matta 23:1-36; Markus 12:38-40; Luka 20:45-47)
37A aŋəde Yesu kəɗkəla me ene ga, humas Farisa s'iŋgeɗe haka ala a ɗəfka adiyana. Wuran ane laka, zakənaŋade a ɗəfka. 38Humas Farisa ane ge ba s'ajipu apə Yesu‑a, aɗaba bunəkpəna bə te alay apə isaɗe tan‑a a pə ɗəfka. 39Mezlene Ɗuduwuna dzakəna, wa: «Kwa Farisa hay ga, kwa bunpəna dəɓa kwap hay kwan atə i ɓahan hay kwan, amá i tənday‑a ga, kwa ruhwaka al akar atə i zlasaw tsəre. 40Həŋkale kwan niba dəgiya! Askwaf gə hanək dəɓa s'away sahan mà, tənday ene kini ba wuran bə təku hənka? 41Kwene ga, virɨntəna away i tənday s'aray ɓile a talage hay, ta kwa gɨkiya ɗa laŋŋəna ba cecena.
42«Palase ayikuna kwa Farisa hay! Aɗaba sləmay minti hay atə zəɓatak, ŋa sləmay s'away gərgəra ga, kwa ɗəf zakka ene. Amá gə kwa hərkənde a jire tsəre atə micɗiya i ɗaha s'Askwaf. Ahan igə zlaya kwa gəkiya, iŋgeɗe hay kini kwa hərkinde ba.
43«Palase ayikuna kwa Farisa hay! Aɗaba kwa gus mazaɗay gə apə miya saŋa a adaw guɓaɗay hay de, kwa gus ɗa gɨkun sa apə aray ɗaha hay‑a ba cecena. 44Palase ayikuna, aɗaba kwene ba ka kwa mika ɗaha hay gə ɗa ceke ba, ɗaha hay ɗa hishke aba aŋade ayitəna, amá ɗa sənede bə saŋa.»
45Mezlene, ɗu ɓile a malum hay me gurɗay de zləmkənhənaŋa, wa: «Malum, dzaɗay aka saŋa dəgiya kə giginihmene aba atə ayiməna.» 46Yesu, wa: «Palase ayikuna kwa malum hay me gurɗay kini! Aɗaba kwa ɗəftənaŋade iɗəmɗəməna gə zlazlaɗa paɗiya ene a ɗaha hay, amá kwene ba kine s'alay kwan ɓile kini kwa ɗəfpan ba a humaɗitənande. 47Palase ayikuna, aɗaba kwa ɗisl ŋaŋasl hay ɗa mbəɗɗitənande me s'Askwaf a ɗaha hay zuwuna gə ceje hay kwan ɗa kəɗkəltan saŋa, ghaya kwa ceɗa. 48Kugwan saŋa ga, kwa mbazləl gəni kwa hiyiika sləra ceje hay kwan: Wutan ɗa kəɗkəla ɗa mbəɗɗitənande me s'Askwaf a ɗaha hay, kwene gə kwa ɗisl ŋaŋasl hay tan, ghaya kwa ceɗa! 49Aɗaba sahan tsaw, Askwaf ɗu həŋkale, wa: “Ə̌ŋ slinka ɗa mbəɗɗitənande me hwa a ɗaha hay atə ɗa slənɗay hwa ala a ma tan de, à ɗá kəɗəltəna ɗa s'iŋgeɗe ayitənde, ɗa s'iŋgeɗe kini à ɗá gɨtənka palase.” 50Kugwan ga, ba cecena ɗa mbəɗɗitənande me s'Askwaf a ɗaha hay gə ɗa kəɗkəltəna kwa ada tamandar duniya ka saŋa, munje tan aba taŋw nde a ɗa zamane bəkwa. 51Kwa ada apə munje Habila#Tamandar 4:9-10 ka, ha ala apə munje Zakari‑a gə ɗa vəɗka a dagava wutə ma vərɗina away a Askwaf de atə ma cuɗiɗɗina saŋa#2 Labaray 24:20-22. Na əŋ dzakuna ba jire, munje ɗa sahan ba cecena aba taŋw nde a ɗa zamane bəkwa!
52«Palase ayikuna kwa malum hay me gurɗay, aɗaba kwa təvika lekle paɗinme a ma nzə sənɗiyede a away. Kwene kini kwa like ba ala ede, ɗa gə ɗa gus ləɗide kini kwa ghatənŋa.»
53A aŋəde nayede ada adaw sahan‑a ga, bembec kubəktənaŋade a malum hay me gurɗay atə Farisa hay awiba, ɗa takənmandar‑a a kutəɗiya i me hay gərgərgəra, gəni á zlumɨnhətənaŋa. 54Ɗa nanika taŋw tan a ɗəgəmɗiya a me dzaɗay de, ta ɗa bərkiya apəna.
Trenutno izabrano:
Luka 11: mlr
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© (Active), Wycliffe Bible Translators, Inc. All rights reserved.