لوقا 21
21
صَّذَقَا ثَمقّْرَانْت ن يِجّن ن ثَاجَّاڒْث
1ئِخْزَر عِيْسَى يتْوَاڒَا تْوَاجَر مَامّش تݣّن صَّذَقَا نْسن ذِي صّنْدُوْق ن ثمْزِيذَا ثَمقّْرَانْت. 2ئِࢲْرَا عَاوذ يجّن ن ثَاجَّاڒْث ذ ڒْمسْكِينَا وَاهَا ثݣَّا ذِنِّي ثْنَاين يصُوْلْدَان. 3ينَّا: "أَقَا تسْڒَام ڒْحَقّ: ثَاجَّاڒْث-أَ ذ ڒْمسْكِينَا وَاهَا ثݣَّا ذِي صّنْدُوْق كْتَار زِي مِين ݣِّين مَارَّا ينّغْنِي. 4مِينْزِي مَارَّا ينّغْنِي ؤُشِين زِي مِين خَاسن يزَايْذن ذ اَݣْڒَا. نتَّاث لَّا، وَاخَّا ذ ڒْمسْكِينَا وَاهَا ثْصدّق مَارَّا مِين ثعْڒم."
لْعَلَامَاث ن ڒفْنَا ن دُّنشْت
5شَان يِوْذَان سَّاوَاڒن خ ثمْزِيذَا ثَمقّْرَانْت قَّارن مشْحَاڒ ثصْبَاح، ثْزوّق س وزْرُو اَصبْحَان أُو س صّذْقث.
ئِنْدق-د عِيْسَى ينَّا-ٱسن: 6"ثِمسْڒَايِين-أَ إِي تْوَاڒَام قَا اَذ د يَاس يجّن ن نْهَار وَار ذَا يتْغِيمِي ؤُڒَا ذ يجّن ن وزْرُو خ ونّغْنِي، مَارَّا مَانَايَا اَذ ينهْذم."
7سّقْسَان-ث نَّان-اَس: "آ لْمُعَلِّم، مڒْمِي غَا يوْقع مَانَايَا؟ مِين ثعْنَا لْعَلَامَا نِّي خْمِي عْڒَاين غَا وقْعنْت ثْمسْڒَايِين-أَ؟"
8ينَّا-ٱسن: "حْضَام يخف نْوم حمَا وَار كنِّيو يخدّع حَدّ. أَطَّاس إِي د غَا يَاسن س يِيسم ينُو زَعْمَا اَذ ينِين قَا نش ذ لْمَسِيح! عَاوذ اَذَاوم ينِين قَا ڒْوقْث ثُوْوض-د! وَلَكِن كنِّيو يتْخصَّا وَار ثن تذْفِيرم شَا. 9خْمِي غَا ثسْڒَام خ لْحُرُوْب ذ لْفِيتْنَاث وَار تݣّْوْذم شَا مِينْزِي ثِمسْڒَايِين نِّي لَابُد اَذ وقْعنْت ذ اَمزْوَارُو. وَلَكِن دُّنشْت-أَ عَاذ وَار ثْفنِّي شَا."
10ينَّا-ٱسن: "دُّوْلَا اَذ تهْجم خ دُّوْلَا، لْممْلَكَا اَذ تهْجم خ لْممْلَكَا. 11أَذ يوْقع زِّنْزَال يمْغَر ذݣ وَاطَّاس ن يمُوشَان. أَذ يِيڒِي جُّوْع ذ ڒهْڒَاشَاث ذ وَاطَّاس ن ثْمسْڒَايِين يسَݣّْوَاذن، ذ لْعَلَامَاث ذ ثِمقّْرَانِين ذݣ وجنَّا.
12قْبڒ إِ مَارَّا مَانَايَا اَكنِّيو طّْفن، أَكنِّيو عدّْبن، أَكنِّيو سلّْمن إِ ثمْزِيذَاوِين نْسن. أَكنِّيو حبْسن، أَكنِّيو جَرّن غَار يزدْجِيذن ذ لْحُكَّام عْلَاحْسَاب يسم ينُو. 13مَانَايَا اَغَارْوم يِيڒِي ذ يجّن ن لْفُوْرْصَا إِ شْهَاذث. 14بْڒَا مَا ٱذ تيْسِيم اَمْنُوْس ذ اَمزْوَارُو ذِي ڒَعْقُوْڒَاث نْوم مِينْزِي غَا ثْدَفْعم خ يِيخف نْوم. 15لَّا، أَذَاوم ؤُشغ اَوَاڒن ذ ڒفْهَامث حمَا مَارَّا يِنِّي كِذْوم يتْمنْغَان وَار زمَّرن شَا اَخَاوم د اَرّن. 16أَكنِّيو زّنْزن لْوَالِدِين نْوم ذ أَيْثْمَاثْوم ذ ڒحْبَاب نْوم ذ يمدُّوْكَاڒ نْوم، أَذ نْغن ڒبْعَاض زَّايْوم. 17أَكنِّيو عِيفّن مَارَّا يوْذَان عْلَاحْسَاب يسم ينُو. 18وَاخَّا اَمنِّي وَار يوطِّي ؤُڒَا ذ يج وزُطُّو زݣ وزدْجِيف نْوم. 19س صّْبَار نْوم اَتَاف اَذ تْنجْمم.
لْعَلَامَاث ن وهْذَام ن ثنْدِينْت ن لْقُدْس
20مڒَا ثࢲْرِيم ثَنْدِينْت ن لْقُدْس نّْضن-اَس-د ڒْعَسْكَار، أَقَا اَذ تسّْنم بلِّي عْڒَاين اَذ تْنهْذم. 21ڒخْدّنِّي يِنِّي يدْجَان ذِي ثْمُوْرْث ن يَهُوْذِيَا يتْخصَّا اَذ اَروْڒن غَار يذُوْرَار؛ ذ يِنِّي يدْجَان ذِي لْقُدْس يتْخصَّا اَذ اَروْڒن غَار بَارَّا؛ ذ يِنِّي يدْجَان ذݣ يمَرْجعِيون يتْخصَّا وَار تِيذْفن شَا غَار لْقُدْس. 22أَقَا ڒِيَّام نِّي ذ ڒِيَّام ن وعْمُوْذ، أَذَايْسن يكمّڒ مَارَّا مِين يُوْرِين ذِي لْكُتُب ن لْأَنْبِيَا. 23يَا تَمَارَا خ ثمْغَارِين نِّي إِي غَا يِيڒِين س يعدِّيسن ذݣ وُوْسَّان نِّي ذ ثِنِّي يسُّوْطُوْضن! مِينْزِي ذِي ثْمُوْرْث-أَ اَذ يوْقع يجّن ن وعدّب ذ اَمقّْرَان ذ وغْضَب خ شَّعْب-أَ. 24أَثن نْغن س ڒسْيُوْف، أَثن اَوِين ذ يمحْبَاس غَار مَارَّا ڒݣْنُوْس. سّنِّي يِنِّي وَار يدْجِين شَا زِي أَيث-إِسْرَائِيل اَذ هذْمن لْقُدْس اَڒ غَا فْنَانْت لْأَوْقَات نْسن.
25أَذ د مظْهَارنْت لْعَلَامَاث ذ ثِمقّْرَانِين ذِي ثْفُوْشْت ذ ثْزِيرِي ذ يِيثْرَان. ذِي ثْمُوْرْث، ڒݣْنُوْس اَذ يِيڒِي ذَايْسن اَمْنُوْس مِينْزِي وَار فْهِيمن شَا إِ سّْدَع ن ڒْمُوْجَاث ن ڒبْحَر. 26أَذ سخْفن يِوْذَان س ثِيݣّْوْذِي ذ ومْنُوْس خ مِين يتوْقِيعن ذِي دُّنشْت مِينْزِي مَارَّا يِنِّي يجهْذن ذݣ وجنَّا اَثن يسنْهزّ أَربِّـي. 27ڒخْدّنِّي إِي غَا ࢲرن مِّيس ن بْنَاذم يهوَّا-د ذݣ وسيْنُو س لْعَظَمَا ذ جّْهذ نّس يمْغَارن. 28خْمِي غَا يبْذَا اَذ يوْقع مَانَايَا، بدّث سْݣَعّذث اَزدْجِيف نْوم مِينْزِي عْڒَاين اَذ تْنجْمم."
ڒْمَعْنَا ن ثْشجَّارْث ن ثَازَارْث
29ئِسِّيوڒ اَكِذْسن عِيْسَى س يِجّن ن ڒْمَعْنَا ينَّا-ٱسن: "خْزَرث غَار ثْشجَّارْث ن ثَازَارْث ذ مَارَّا ڒْشجُّوْر. 30غِير ڒفْرُوْع نّس اَذ حبّْبن اَذ ݣّن ثِيفْرَاي اَتَاف اَذ تسّْنم يَالَّاه اَنبْذُو يقَارّب-د. 31أَمنِّي ؤُڒَا ذ كنِّيو، خْمِي غَا ثࢲرم ثِمسْڒَايِين-أَ يتوْقِيعن اَتَاف اَذ تسّْنم إِلَّا ڒْمُلْك ن أَربِّـي يُوْذس-د. 32أَقَا تسْڒَام ڒْحَقّ: ئِوْذَان ن ڒْوقْث-أَ وَار تْمتِّين شَا اَڒ غَا يوْقع مَارَّا مَانَايَا. 33أَذ يفْنَا وجنَّا ذ ثْمُوْرْث، وَلَكِن اَوَاڒن ينُو وَار فنِّين شَا عمَّارْص.
34مَا ثخْسم اَذ تشّم ؤُڒ نْوم؟ حْضَاث يخف نْوم زِي لْمَدّْلَا ن سّكْرَا ذ وَاطَّاس ن شّْرب ذ ڒهْمُوْم ن دُّنشْت-أَ. قَا اَذ د يَاس نْهَار نِّي اَنݣَّارُو عْلَاغَفْلَا اَم يِجّن ن ثخْشفْث. 35نْهَار نِّي اَذ يطّف مَارَّا يِنِّي يدْجَان خ ثْمُوْرْث. 36حْضَاث، ࢲَادْجم ذِي مْكُڒ ڒْوقْث حمَا اَتَاف ثْزمَّرم اَذ تْنجْمم زِي مَارَّا مِين غَا يوقْعن اَذ تْبدّم زَّاث إِ مِّيس ن بْنَاذم."
37كُڒ نْهَار عِيْسَى يتْرَاح يسڒْمَاذ ذِي ثمْزِيذَا ثَمقّْرَانْت. س دْجِيڒث يتْرَاح يسْنُوْسَا ذݣ وذْرَار ن زِّيتُوْن. 38مَارَّا يوْذَان تْرَاحن غَارس زِيش غَار ثمْزِيذَا ثَمقّْرَانْت حمَا اَذ صنّْطن إِ وَاوَاڒ نّس.
Trenutno izabrano:
لوقا 21: ريف
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi