متى 15
15
لْعَادَاث إِي وَار د يُوْسِين شَا زِي أَربِّـي
1سّنِّي ؤُسِين-د ڒْحِزب ن يفَرِّيسِيْين ذ يمْسڒْمَاذن ن شَّرِيعَا غَار عِيْسَى زِي ثنْدِينْت ن لْقُدْس نَّان-اَس: 2"مَايمِّي يمحْضَارن نّش بطّْڒن لْعَادَاث ن ڒجْذُوْذ نّغ؟ مَايمِّي وَار سِيرِيذن شَا يفَاسّن نْسن قْبڒ مَا ٱذ شّن اَغْرُوْم."
3ئِنْدق-د عِيْسَى ينَّا-ٱسن: "إِيوَا مَايمِّي كنِّيو ثْبطَّاڒم ڒُوْصِيّث ن أَربِّـي حمَا اَذ تسْخذْمم لْعَادَاث نْوم؟ 4مِينْزِي أَربِّـي ينَّا: وقَّر بَابَاش ذ يمَّاش.#15.4 خْزَر ؤُفُوْغ (الخروج) 20:12 ذ اَفسَّار ن شَّرِيعَا ن مُوسَى (التثنية) 5:16. أَقَا ونِّي غَا يُوْكَّرن بَابَاس نِغ ذ يمَّاس، أَتَاف يتْخصَّا-يَاس اَذ يمّث.#15.4 خْزَر ؤُفُوْغ (الخروج) 21:17 ذ لْكِتَاب ن أَيث لَاوِي 20:9. 5-6وَلَكِن كنِّيو ثقَّارم بلِّي وَار يدْجِي بُو لَابُد إِ يِوْذَان اَذ وقَّرن نِغ اَذ عَاوْنن لْوَالِدِين. تْمنْيَاث نِّي إِي غَا ؤُشن إِ لْوَالِدِين نْسن اَثنْت ؤُشن إِ ثمْزِيذَا. أَمُّو كنِّيو ثْبدّْڒم ڒْمَعْنَا ن وَاوَاڒ ن أَربِّـي حمَا اَذ تݣّم مَامّش ذَاوم يعْجب ڒْحَاڒ س لْعَادَاث نْوم. 7آ لْمُنَافِقِين! قَا نَّبي إِشَعْيَا ينَّا ڒْحَقّ وَامِي خَاوم يسِّيوڒ ذݣ يِجّن ن زْمَان:
8<شَّعْب-أَ يتْوقَّر-اَيِي س وقمُّوْم وَاهَا،
مَاشَا ؤُڒ نّس يݣّْوج خَافِي.
9ئِوْذَان-أَ عبّْذن-اَيِي ذِي ڒْخَاوِي،
ڒَاحقَّاش سڒْمَاذن ثِمسْڒَايِين يدْجَان ذ ڒُوْصِيَاث ن بْنَاذم وَاهَا.>"#15.9 خْزَر إِشَعْيَا 29:13.
10ئِڒَاغَا-د عِيْسَى إِ ڒْغَاشي ينَّا-ٱسن: "صنّْطث مْلِيح، فهْمث: 11مَا ذِنِّي شَا ن ثْمسْڒَايْث يتَاذْفن اَقمُّوْم تْحَارَّام بْنَاذم؟" ينَّا-ٱسن: "لَّا، مِين د يتفّْغن زݣ وقمُّوْم اَقَا مَانَاينِّي إِݣ يتْحَارَّامن بْنَاذم."
12قَارّْبن-د غَارس يمحْضَارن نّس نَّان-اَس: "مَا ثسّْنذ بلِّي يفَرِّيسِيْين وَار ذَاسن يعْجِيب بُو ڒْحَاڒ وَامِي سْڒَان إِ وَاوَاڒ نّش؟"
13ئِنْدق-د عِيْسَى ينَّا-ٱسن: "كُڒ اَرْبِيع وَار ث يࢲُّو شَا بَابَا يدْجَان ذݣ وجنَّا اَذ ينقْڒع س يࢲوْرَان نّس. 14اجّم-ثن! نِثْنِي ذ يضَرْغَاڒن تْجَرَّان يضَرْغَاڒن. مڒَا اَضَرْغَاڒ يجَرّ اَضَرْغَاڒ، أَتَاف اَذ وْضَان س ثْنَاين إِذْسن ذِي شَان ثسْرَافْث."
15ينَّا-ٱس بُطْرُس: "فسّر-اَنغ ڒْمَعْنَا-يَا."
16ينَّا-ٱس عِيْسَى: "ؤُڒَا ذ كنِّيو عَاذ وَار ثفْهِيمم شَا؟ 17مَا وَار ثسِّينم بلِّي مِين يتَاذْفن ذݣ وقمُّوْم يتْرَاح غَار وعدِّيس، ئِتفّغ زِي دَّات؟ 18وَلَكِن مِين د يتفّْغن زݣ وقمُّوْم يتَاس-د زݣ وُوْڒ، أُو ذ مَانَايَا يتْحَرَّامن بْنَاذم. 19ڒَاحقَّاش زݣ وُوْڒ إِي زِي د تكَّانْت لْأَفْكَار ثِعفَّانِين ذ ثْمنْغِيْوْث ذ زّْنَا ذ لْفَسَاد ذ ثُوْكَّارْذَا ذ ࢲُّوْر ذ ڒْبَاطڒ. 20ذ ثِمسْڒَايِين-أَ إِݣ يتْحَارَّامن بْنَاذم، وَلَكِن مڒَا يشَّا س يفَاسّن بْڒَا مَا ثن يسِيرذ، أَتَاف وَار يتْحَارِّيم بُو بْنَاذم."
لْإِيمَان ن ثمْغَارْث ن أَيْث-كَنْعَان
21ئِكَّر عِيْسَى يُوْيُوْر سّنِّي يرُوْح غَار جْوَايه ن ثنْدِينْت ن صُوْر ذ ثنْدِينْت ن صَيْدَا. 22ثُوْسَا-د غَارس يجّن ن ثمْغَارْث زِي أَيث-كَنْعَان#15.22 ئِوْذَان ن أَيث-كَنْعَان وَار دْجِين شَا زِي أَيث-إِسْرَائِيل. ثْزدّغ ذِنِّي. تْرَاغَا ثقَّار-ٱس إِ عِيْسَى: "رْحم-اَيِي آ سِيذِي، آ مِّيس ن أَيث-دَاود! قَا يدْجِي ذَايس يجّن ن جّنّ ذ اَعفَّان يتْعدَّاب-يت اَطَّاس."
23وَار ذَاس ينِّي عِيْسَى ؤُڒَا ذ يجّن ن وَاوَاڒ. قَارّْبن غَارس يمحْضَارن نّس نَّان-اَس: "ثَمْغَارْث-أَ سُوْفغ-يت خَانغ، زِي صْبَاح نتَّاث ثْذفَّار-اَنغ ثسْغُوْيِيو خَانغ."
24ينَّا-ٱسن عِيْسَى: "قَا نش تْوَاسّكّغ-د غِير غَار يحُوْڒِيْين يودَّارن، يعْنِى يوْذَان ن أَيث-إِسْرَائِيل."
25وَلَكِن ثَمْغَارْث نِّي ثُوْسَا-د غَارس ثْسجّذ-اَس ثنَّا-ٱس: "آ سِيذِي، عَاون-اَيِي!"
26ئِنْدق-د عِيْسَى ينَّا-ٱس: "مَاشِي مَعْقُوْل اَذ يتْوَاكّس وغْرُوْم ن يحنْجِيرن اَذ يمنْضَار إِ يقْزِينن."
27ثنَّا-ٱس ثمْغَارْث نِّي: "غَارك ڒْحَقّ آ سِيذِي، وَلَكِن ؤُڒَا ذ يقْزِينن نِّي تتّن يفتْوِيتّن ن ؤُغْرُوْم إِݣ يتْوطَّان زِي طَبْڒَا ن أَيثْبَاب نْسن."
28ئِكَّر عِيْسَى ينَّا-ٱس: "شم آ ثَمْغَارْث، لْإِيمَان نّمْ يجْهذ س وَاطَّاس!" ينَّا-ٱس: "مِين ثْرزُّوْذ اَذ تَافذ." ذِي ثْسَعَّات نِّي ثْݣنْفَا يدْجِيس.
سِيذِيثْنغ عِيْسَى يسشّ اَرْبعَاڒَاف ن يرْيَازن
29ئِبعّذ سّنِّي عِيْسَى، يُوْيُوْر خ شّطّ ن ڒبْحَر ن لْجَلِيل. ئِݣَعّذ غَار يِجّن ن وذْرَار يقِّيم ذِنِّي. 30ؤُسِين-د غَارس اَطَّاس ن ڒْغَاشِي. ؤُوِين-د اَكِذْسن يزحَّافن ذ يضَرْغَاڒن ذ يزيْنُوْنن ذ ينشْرُوْفن ذ وَاطَّاس ن يمهْڒَاش نّغْنِي. سرْسن-ثن غَار يضَارن نّس يسْݣنْفَا-ثن. 31تْعجّْبن يِوْذَان نِّي وَامِي ࢲْرِين يزيْنُوْنن سَّاوَاڒن، ئِنشْرُوْفن ݣنْفَان، ئِزحَّافن ݣُّوْرن، ئِضَرْغَاڒن تْوَاڒَان. كَّرن حمْذن أَربِّـي ن أَيث-إِسْرَائِيل.
32ئِڒَاغَا-د عِيْسَى إِ يمحْضَارن نّس ينَّا-ٱسن: "نش قّْسن-اَيِي يِوْذَان-أَ. ثڒْتِيَّام زݣ وَامِي اَقَاثن اَكِذِي وَار غَارْسن شَا مِين غَا شّن. وَار خْسغ شَا اَثن سّكّغ نِثْنِي وَار شِّين شَا حمَا وَار تسْخِيفّن خ وبْرِيذ."
33نَّان-اَس يمحْضَارن نّس: "ذِي ڒخْڒَا-يَا مَانِي غَا نَاف اَغْرُوْم إِي زِي غَا نْسشّ قَاع لْعَدَد-أَ ن يِوْذَان؟"
34ينَّا-ٱسن عِيْسَى: "شْحَاڒ غَارْوم ن وغْرُوْم؟"
نَّان-اَس: "غَارْنغ سبْعَا ن ثشْنِيفِين ذ شَا ن يسڒْمَان ذ يمزْيَانن."
35يُوْمَر عِيْسَى ڒْغَاشِي اَذ قِّيمن ذِي ثْمُوْرْث. 36ئِطّف سبْعَا نِّي ن ثشْنِيفِين ذ يسڒْمَان نِّي، ئِشكَّر أَربِّـي. يرْزِي-ثن يُوْشِي-ثن إِ يمحْضَارن نّس، ئِمحْضَارن نّس فرْقن-ثن خ ڒْغَاشِي نِّي. 37مَارَّا شِّين جِّيْوْنن، شطّنْت سبْعَا ن ثقْرَابِين عمَّرنْت س يڒقُّوْزن. 38مَارَّا يرْيَازن نِّي إِݣ يشِّين نِثْنِي اَرْبعَاڒَاف إِذْسن بْڒَا ثِمْغَارِين بْڒَا يحنْجِيرن. 39وَامِي يمْسَافَاض خَاسن عِيْسَى خ ڒْغَاشي نِّي، ئِنْيَا ذݣ يِجّن ن ثْغَرَّابُوت يرُوْح غَار جْوَايه ن مَݣْدَلَى.
Trenutno izabrano:
متى 15: ريف
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi