Lwiikö 24

Zezwii yɛ glu 'wlʋ

(Matie 28.1-10; Maakö 16.1-8; Zaa 20.1-10)

1'Dimasi a 'zɔkpɔ 'pii 'mö, 'n ngwlɩ 'la yiɛ kpöö wa pi a‑a 'wʋ 'libhï, 'n wa yiɛ ‑mä Zezwii a lesikpë 'wʋ mö. 2Wa ghlɛɛ ‑mä, wa lɛ 'bhöö 'lɛ, kpiyi 'kädɛɛ wa ‑gbanɩ a‑a lesikpëa nuë 'wʋʋ, ɛ ‑cɩanɩ. 3'N wa yiɛ ‑mä lesikpëa 'mö plɛ, ‑maa, ‑Alowli Zezwii a ‑gäzɛɛ 'nɩɛ ‑mä ‑wʋ. 4Wa'aa sɛ wa 'kä 'zʋä ‑yi. ‑Maa wa lɛ zʋ a sɛ'ɛ cuu, nɩkpa 'sɔ 'nɩgbö ‑lɛ. 'Wa ‑banɩɩ, yɩ lɩ tenyii 'mö. 5Ngwlɩɩ 'yuëë 'ylɩmöö, wa 'wuë nganɔ a za, 'wlu glu wa glɛɛ. 'N nɩkpaa yuëë 'dɩ 'nyɛ nɩɩ: «‑Ɔ ‑bhölɩɛ, 'saa bhä 'n a tɛlɔ bhä mä'ä ‑gäzɩɩ jijo'wʋ sɛ? 6Ɔ'ɔɔ mä'ä ‑wʋ. Ɔ yɛ glu 'wlʋ. Ɔ ‑wʋ a‑a ‑bhlɛ ‑mä Galilee‑bhölɩɩ 'mö a wɛlɩɩ ɔ 'nyanyɩ a‑a, a'bhï a nɩ ligbaniɛ yɩ ‑ka 'wʋ. 7Sɛ'ɛ ɔ gbä a‑a nɩɩ, Nɩkpɛ a 'Yu, wa yo 'nyinylolinʋwa kä'mö plɩnɩ, wa yo su 'klʋ kʋnɩ, ɔ yi 'ku. ‑Maa ɔ ‑kä 'ku 'wë a ylɩɩ a tanɛɛ 'mö, ɔ yi glu 'wlʋ. ‑Sɩbhä ɔ 'nanyɩɛ bhä'ɛ 'dɩ 'nyɛɛ?» 8'N wa yiɛ ‑lɛ a wɛlɩ 'la 'wʋ ligbanɩ. 9'N wa yiɛ ‑mä 'wlʋ, Zezwii 'a ‑gänɩwaa kʋgbä‑bhʋlʋ ‑kpɔ ‑nyɛ 'ɔ nɩkpa ‑muë'la 'wuë 'sɔ, 'n wa yuëë tɩtɩ 'la 'wuë 'nyɛɛ mö. 10Madalaa a 'ylikwii Malii mɔ, Zaanɩ mɔ, 'n Zaakö a ‑da Malii, wa ‑nyɛ ngwlɩ ‑muë'la 'sɔ, wa 'wuë, mʋa möä Zezwii 'a tietiewaa tɩtɩ 'la 'nyɛɛ. 11‑Maa wa 'nyʋää ‑sɩbhä 'dɩɩ, 'yuëwɛlɩ a sɛ wa 'libhiɛ 'wʋ, wa 'niɛ dlɩ 'wʋ ‑kä. 12‑Maa Piɛlɩ ɔbhlɩ, 'wʋ ɔ ‑sɔɔ cuu, 'n ɔ yiɛ sɛkpɛ 'wʋ 'libhï, 'n ɔ yiɛ ‑mä lesikpëa 'wʋ mö. Ɔ ghlɛɛ ‑lɛ a nuë 'wʋʋ, 'n ɔ yiɛ 'wlu sɛ bhlɩ. ‑Maa lokuu wa 'pä a‑a ‑gäzɛɛ yɔwʋʋ, yɩ 'yize 'mö ɔ yɩɛ 'ylɩmö. 'N yɩ yoo ngli yɩa 'n ɔ yiɛ 'wlu sɩbhä.

Zezwii yɛ ɔnyɩ 'ɔ ‑gänɩwaa a gla'mö a ‑nʋä 'sɔ 'ylimö tulanɩ

(Maakö 16.12-13)

13‑Lɛ a zlɩ 'la ‑bhʋlʋ ‑kpɔ 'mö, Zezwii 'a ‑gänɩwaa a gla'mö a ‑nʋä 'sɔ, mʋa 'bhöönɩɛ ‑mä Zeluzalɛɛmö, ‑glɔ ‑bhlʋ wa laa Emawiisɩ, wa ‑wʋ ‑mä mö dɔ'wʋ. Glɔ 'la, 'kwili kʋgbä'sɔ 'wʋ a sɛ wʋ ‑wʋä. 14Nɩkpa 'la, wa ‑wʋä mö dɔ'wʋʋ, 'saa 'plɩɛ da'a 'wuë a wɛlɩɩ 'mö wa 'yokoyokonɩɛ 'mö. 15Wa ‑wii 'mö 'yokoyokonɩ dɔ'wʋ, 'n Zezwii a'bhë yuëë yɔwʋ ghlɛ, ɔ ‑nyʋä 'sɔ 'n wa yiɛ yɔwʋ mönɩ. 16Wa yiloo 'wʋ, ‑maa wa 'nɔɔ yɩbhlɩnɩ. 17'N Zezwii yuëë nimï 'yɩbhä, ɔ lɛ naa: «'Saa‑gbʋ, a bhïla bhä mä'ä 'yio 'wʋ 'nɩ?» Wa 'sɔ ‑kpɔ 'n wa yiɛ 'nɩgbö, 'n wa yiɛ swɩ yɔwʋ sɛ bhlɩ. 18Wa gla'mö a ‑nɔ ‑bhlʋ wa laa Kleopasɩ, ɔ lɛ naa: «'Ɔ! 'Saa 'plɩɛ ‑mä ylɩ nɩ 'mö Zeluzalɛɛmö 'wʋʋ, ‑na 'yize, ‑nmö 'nia'aa ‑yi.» 19Ɔ lɛ naa: «‑Nn'n! 'Saa 'plɩ bhä mä'ä 'wʋ 'nɩ?» Wa lɛ naa: «Nɩkpɛɛ wa laa Nazalɛɛtɩ a Zezwii, 'saa wa nɔɔ 'wlu, mö ‑a gaaa. Nɩkpɛ 'la, Lagɔ a 'möbhïlanɩnyɔ 'kɔdɔɔ ɔ glɩnɩ a‑a. Lagɔ nʋnɔɔ libho 'mö. Nɩkpaa 'wuë yɩbhlɩnɩ sɛ nɩɩ, 'ɔ nʋnʋlii ‑nyɛ 'ɔ bhïlawɛlɩɩ 'sɔ, Lagɔ a'bhë 'mö ‑mä yɩ 'bhöönɩ a‑a. 20‑Maa nɩkpɛ 'la, ‑a'a Lagɔbʋbɔwaa a 'kifiea ‑nyɛ ‑a'a 'kädɩɩ 'sɔ, ‑gɔmlɩwaa 'mö wa plɩnɔɔɔ kä'mö, wa lɛ naa, ‑gɔmlɩwaa nɩ 'lɩbhɔ ɔ 'kä 'ku 'n wa yoo su 'klʋ kʋnɩ. 21Sɛ ‑a pä a‑a ‑abhlɩ dlɩ a dɔ'wʋ, nɩkpɛ 'la, ‑abhʋa Yizlaɛlɩ a ‑nʋa, ‑a ‑tɔnɩ a 'mö Lagɔ tianyɩ 'wʋ ɔ ‑kanyɩ galɛ 'mö ‑sɛ. ‑Maa dlɩ yɛ nuë yie. Sɛ ɔ 'maa 'kä a 'ku 'wë a 'ylɩ a tanɛɛ zɩ'ɛ. 22‑Aa gla'mö a ngwlɩ ‑mumuë, mʋa ‑sanyɩ'ɛɛ wabhlɩ zɩ'ɛ zuzu ‑gömö. 'Zɔkpɔ 'pii 'mö wa ‑sɔɔ 'wʋ, 'n wa yiɛ ‑mä lesikpë 'wʋ mö. 23‑Maa wa möä, wa'aa ‑gäzɛɛ ‑mä lesikpëa 'mö ghlɩ. Wa yiɛ, wa lɛ wa 'yɩ Lagɔzuzuku 'ylɩmö 'n yɩ yuëë 'dɩ 'nyɛ nɩɩ, Zezwii ‑bhölɩ. 24Ngwlɩɩ nyɩanyɩɛ ‑sɩbhä 'dɩɩ, 'n ‑a 'bhɩa ‑mumuë yiɛ ‑mä lesikpëa 'mö 'ylɩmöä mö. Sɛɛ ngwlɩɩ nyɩanyɩ a‑a 'dɩɩ, wa lɛ yɩ ‑wʋ ‑sɩbhä, ‑maa Zezwii a'bhë wa 'nɔɔ 'ylɩmö.» 25Wa gbää sa'aa, 'n Zezwii a'bhë yuëa'aa 'dɩ 'nyɛ, ɔ lɛ naa: «'Ɔɔ! Nɩkpanyɩ, 'nyɩɛsɛ a 'tɛɛ 'yukwli 'mö. ‑Sɩbhä a za, Lagɔ 'a 'möbhïlanɩwaa a wɛlɩɩ, a 'niɛ dlɩ 'wʋ ‑kä. 26‑Maa Puënyɔɔ Lagɔ ‑sɛɛ ‑lɛ, zwɩ 'la 'mö ɔ 'nɩɛ a bhä ɔ 'kä zi 'wë, ɔ 'kä 'ɔ 'ghïlinɔɔ 'wʋ 'libhï ‑a?» 27Zezwii gbää sa'a wa dɛ 'wëë, Lagɔ 'a 'bɔgʋʋ 'mö a wɛlɩɩ 'wuë ‑yɩ bhïlaa ɔ dɛɛ, 'n ɔ yuënyɩɛ dlɩ ‑gömö ‑sɛsɛnɩ. Tɛɛnɩ ‑mä Moyizɩ 'a Lagɔbɔgʋʋ 'mö ‑këë, ‑n 'kä ‑mä Lagɔ 'a 'möbhïlanɩwaa 'wuë a ‑nɩɩ 'mö ghlɛ. 28‑Glɔɔ wa mö a‑a 'möö, wa ghlɛɛ ‑lɛ wʋ nuë 'wʋʋ, Zezwii 'plɩplɩsɛ ɔ 'zʋä. 29'N wa yoo 'yio 'wʋ ‑sɛ, wa lɛ naa: «‑A bhiamö, yi ‑n ‑kanyɩ yɔwʋ gʋʋ, ‑maa zlɩ yɛ fäla.» 'N ɔ yiɛ 'wʋ nglu, 'n wa yiɛ 'ligbë 'mö mö. 30Wa ghlɛɛ ‑mää, 'n wa yiɛ sɛ glɩ wa 'kä li. 'N Zezwii yiɛ 'fɔlɔbhë 'wʋ 'libhï, 'n ɔ yiɛ a za Lagɔ bhälɩ, 'n ɔ yeaa 'mö ‑dɩdɩnɩ 'n ɔ yuënyɩɛ yowʋ 'nyɛ. 31Ɔ 'nyʋänyɩɛ yowʋ cuu, 'n 'wa yilaa yiɛ do 'n wa yoo yɩbhlɩnɩ. ‑Maa wa lɛ zʋ a sɛ'ɛ, ɔ'ɔa'a ‑lɛ ‑wʋ. 32Wa lɛ: «‑Aaa, sɛ'ɛ yɩ ‑wʋä 'mö zaa, nza ɔ ‑wʋnyɩ a‑a ‑mä 'yio 'wʋ Lagɔ 'a 'bɔgʋʋ 'mö a wɛlɩɩ dlɩ ‑gömö ‑sɛsɛnɩ dɔ'wʋʋ, 'n ‑aa dilaa 'wlɔnɩ a‑a 'mö.»

33'N wa yiɛ 'wʋ ‑sɔ cuu, 'n wa yiɛ 'wlu sɩbhä, 'n wa yiɛ ‑mä Zeluzalɛɛmö mö. Wa ghlɛɛ ‑mä, wa lɛ 'bhöö 'lɛ, Zezwii 'a ‑gänɩwaa kʋgbä‑bhʋlʋ ‑kpɔ ‑nyɛ wa 'bhɩa ‑muë'la 'sɔ, wa yɩbhä ‑mä 'wlu. 34'N ‑wa yɩbhä a‑a ‑mä 'wlu yuëë 'dɩ 'nyɛ nɩɩ: «Zezwii yɛ ‑tiamö glu 'wlʋ. Simɔɔ Piɛlɩ kɔ 'ylɩmö.» 35Wa gbää sa'aa, ‑wa 'bhöönɩ a‑a ‑mä Emawiisɩ, 'n wa yi'ɛɛ wabhlɩ 'tɩtɩ ‑sɛmö. Sɛ yɩ 'plɩplɩnɩɛ ‑mä 'yio 'wʋ 'mö, 'n wa ghlɛɛ glɔ sɛɛ Zezwii ‑dɩdɩnɩɛ 'fɔlɔ 'mö, 'wë 'n wa yoa'aa yɩbhlɩnɩɩ, ‑lɛ a wɛlɩ 'la 'wuë, yɩ tɩtɩɩ 'mö wa ‑sɛɛ.

Zezwii yɛ 'ɔ ‑gänɩwaa 'wuë ɔnyɩ 'ylimö tulanɩ

(Matie 28.16-20; Maakö 16.14-18; Zaa 20.19-23)

36Wa ‑wʋ ‑bhlɛ bhïla dɔ'wʋ, wa lɛ zʋ a sɛ'ɛ cuu, ‑lɛ wa 'wuë a jijo'wʋ, Zezwii a'bhë 'nɩgbö ‑lɛ. 'N ɔ yuëë bhälɩ, ɔ lɛ naa: «'Pʋpʋɛ nɩ ghlanyɩ 'wʋ!» 37Wa 'wuë 'n nganɔ yuëë köbha, wa ‑tɔnɩ ‑zele wa yɛ 'ylɩmö. 38‑Maa Zezwii lɛ naa: «Sɛ yɩ ‑wʋ ɔ 'mö 'n nganɔ lɩbhanyɩ bhä sa'a, 'n gʋgɔgʋgʋ ‑wʋanyɩ bhä sa'a dila zɛmö 'nɩ? 39A yɩlɩɛ ‑ka 'na kätɩkpöö ‑nyɛ 'na kplɩɩ 'sɔ 'wʋ, ‑amö Zezwii ‑amö yɩɛ ‑tiamö. A'bhï a ‑yi sɛ nɩɩ: ‑Zele 'nɩɛ kpökpa ‑kä, a'aa 'kwa 'mö ‑kä. ‑Maa a nɩ zɩɩɩɛ ‑ka kɛ.» 40'N ɔ yuëë 'ɔ kätɩkpöö ‑nyɛ 'ɔ kplɩɩ 'sɔ 'ylimö tulanɩ. 41‑Maa zuzuu 'bhuëëë ‑gömö 'n 'mäna yuëë 'gämö 'wlu 'mänanɩ, zaa wa dɔ'wʋ, ɛ 'kä ‑bhɩɛ 'yɛla 'mö a ‑li 'yize. 'N Zezwii yuëë 'dɩ 'nyɛ nɩɩ: «A nɩ nyɩaaa ‑ka lililu!» 42'N wa yoo zibhïkïbhë 'nyɛ, a ‑lɛlɛ. 43'N ɔ yeaa 'wʋ 'libhï, wa 'yila 'klʋ 'n ɔ yeaa li. 44Ɔ lɛ naa: «Dɛ n ‑wʋnyɩ a‑a ‑bhlɛ jijo'wʋʋ, sɛ'ɛ n nyanyɩ a‑a 'dɩ nɩɩ, Lagɔbɔgʋʋ 'mö a wɛlɩɩ 'wuë ‑yɩ bhïlaa na dɛɛ, yɩ yi 'yli 'wlʋnɩ. ‑Mä Moyizɩ 'a Gböö a 'bɔgʋʋ 'mö, ‑mä Lagɔ 'a 'möbhïlanɩwaa 'a 'bɔgwɩɩ 'mö, 'n ‑mä Lagɔ 'a 'nglɩghlimanɩlwɩɩ a 'bɔgʋʋ 'mö a wɛlɩɩ 'wuë ‑yɩ cɛlɩɛ ‑mä, yɩ yi 'yli 'wlʋnɩ.» 45Sa'a ɔ gbää 'n ɔ yuëë wɛlɩ 'la 'wuë sasɛ dlɩ ‑gömö ‑sɛsɛnɩ 'n wa yiɛ 'mö 'nʋ. 46Ɔ lɛ naa: «Sɛ'ɛ yɩ cɛlɩɛ ‑mä Lagɔ 'a wɛlɩɩ a 'bɔgʋʋ 'mö nɩɩ: Puënyɔɔ Lagɔ ‑sɛɛ ‑lɛ, ɔ yi 'zwɩ zi, ɔ yi 'ku, ‑maa ɔ ‑kä 'ku 'wë a ylɩɩ a tanɛɛ 'mö, ɔ yi glu 'wlʋ. 47-48Wɛlɩ 'la, a'bhï a 'yi 'ylɩmö. Sɛ'ɛ yɩ cɛlɩ'ɛɛ ‑mä nɩɩ, Puënyɔ 'la a 'nglɩ 'mö, wa nɩ 'nyɛ 'bhlɩbhëa 'wuë 'dɩ nɩɩ, wa nɩ ligba wa 'kä 'wa ‑lizokuu kɛ'mö ‑sɛ, nzɩɩ ɔ 'kä yɩ gbʋʋ 'yi 'tatinɩ. ‑Lɛ a dɩ 'la, mä'ä yɩ 'kää Zeluzalɛɛmö tɛɛnɩ ‑këë yɩ 'kä bhlɩɩ 'wuë ‑gömö ghlɛ. 49‑Maa na'bhë, 'saa na dɩba gbä a‑a ɔ 'kanyɩ 'nyɛɛ, n yi 'nglɩ ‑kä a yu ghlɩ. Miɛ nɩɩ, Lagɔ 'a 'mötɛɛnɔɔ wʋ yi ‑mä ghäyɩ 'wʋ 'bhöönɩ, wʋ yeanyɩ ‑gömö yi. Zaa, a nɩ tɩ ‑bhlɛ mä'ä glɔ 'mö 'bhöö, ‑maa ‑lɛ a 'mötɛɛnɔ 'la, a nɩ ‑kʋnuu.»

Zezwii yɛ ‑mä Lagɔ yɔwʋ mö

(Maakö 16.19-20)

50Ylɩ ‑mɛmɛɛ ‑bhlʋ 'mö, 'n Zezwii yiɛ 'ɔ ‑gänɩwaa 'wʋ 'libhï, 'n wa yiɛ ‑mä glɔ 'mö 'bhöö, 'n wa yiɛ ‑mä Betanii a ‑glɔɔ yɔwʋ mö. 'N ɔ yiɛ swɩ 'wlu 'libhï, 'n ɔ yuëë 'nyu 'pä. 51Ɔ ‑wuë 'nyu 'pä dɔ'wʋ, wa lɛ zʋ a sɛ'ɛ, ɔ 'bhuë yɔwʋ, ɔ ‑wʋ ghäyɩ mö dɔ'wʋ. 52'Ɔ ‑gänɩwaa wabhlɩ, wa bʋbɔɔ 'wëë, wa 'wuë 'mäna, 'n wa yiɛ Zeluzalɛɛmö 'bɩwʋ mö. 53'Bhöönɩa'a ‑lɛ, ‑mä Lagɔbudu 'Kɔdʋʋ 'mö, ‑mä wa ‑wʋä 'kwädlɩ 'n wa 'ghlimanɩɛ Lagɔ a 'nglɩ.

Trenutno izabrano:

Lwiikö 24: bet

Istaknuto

Podijeli

Kopiraj

Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi

Saznaj više o BdG2

Lwiikö 24

Popularni biblijski stihovi iz
Lwiikö 24

Slušaj Lwiikö 24

Biblija:

Bété, Guiberoua

Prevod: BdG2 - bet

Lwiikö 24

Lwiikö 24

Popularni biblijski stihovi iz Lwiikö 24

Slušaj Lwiikö 24

Biblija:

Bété, Guiberoua

Prevod: BdG2 - bet

Lwiikö 24

Popularni biblijski stihovi iz
Lwiikö 24