Yohana 3
3
Yesu bu Nikodimu
1A̱yanyet a̱ yin shyi ban yei Nikodimu. A̱ yin yet a̱gba̱dang ka̱yat ba̱nyet Yahuda ka ban yei ba̱nyet Farisa na ni. 2A̱ bu nyyai a̱ ba di Yesu a̱ta̱tuk ka̱tuk ka̱yaan, a̱ bu hywa di Yesu, “Malam, zi bvwo a yet a̱ntyok zzek nyyai di Ka̱za. A̱yin a̱n shyi a̱ ni maai yya a̱cecet nkyang a̱ni ba, se a̱yin nu Ka̱za ka shyi ba̱ nu ni.”
3Yesu a̱ hywa da̱ nu, “Ka̱ryong a̱mi n ni na̱ tyyei. A̱yin a̱n shyi a̱ maai ryi Dityok Ka̱za ba, se ba bo ku byin nkrang a̱hwa.”
4Nikodimu a̱ ku zzim a̱ hywa, “A̱kukwo a̱yin a̱ ni yya ni a̱n brek a̱ si nwa i ka̱hwa a̱na nu ba bo ku byin nkrang a̱hwa?”
5Yesu a̱ hywa da̱ nu, “A̱kpak a̱ssi n ni na̱ tyyei, ki ba byin a̱yin i ryen ba̱shekwot bu Tswa Ka̱za ba, a̱ byyi ryen a̱ ryi Dityok Ka̱za ba! 6A̱yin nu ba byin i ryen a̱neywu ni a̱ yet a̱nying a̱neywu; a̱yin nu ba byin i ryen Tswa Ka̱za ni a̱ yet a̱nying Tswa Ka̱za. 7Ryok yya ka̱hat ho n hywa da̱ nwan se ba bo ya tyei nkrang a̱hwa ba. 8Wun hywap tyei ka̱bvwa ka kun cat i. A na hok swrap nkpa na, ma a bvwo ka̱rek ka kun nyyai ni ba, da̱ nwan ba bvwo ka̱rek naat nkpa ka ba. A̱mi kun dyi ba̱ a̱yin nu Tswa Ka̱za zi byin ni.”
9Nikodimu a̱ hywa da̱ nu, “Ku ni cong ni n dyi a̱mi?”
10Yesu a̱ hywa, “Ka̱t! Nwan bu yet a̱gba̱dang malami Isreila nu, a hok ba̱ryat bani maai baa? 11Ka̱ryong a̱mi n na̱ tyyei, zi ryat kyang a zi bvwo ni bu kyang a zi ka̱n dyi ni, ma sa̱rei nyin yi rak hok ba̱ryat njit ba. 12N ya kok bu nkyang a shyi i ka̱sa ka ni, nyin ba shim ba; yi ni yya ni n shim nying Tazwa na? 13Brak, a̱yin a̱n shyi a̱ ka̱n nat Tazwa ba, se ba̱ nzuk Ka̱won A̱neywu ka n ba nyyai Tazwa ka ni.”
14Ka̱sak ka Musa na̱ yin yrek ryik a an tswa ka̱yit ji ni, dolet ba ma̱n yrek Ka̱won A̱neywu a̱mi meyang. 15Rot ba̱nyet ba a̱ wrak ka̱ryong da̱ nu ni ba ga shya sucet wityak. 16Rot ka̱sak ka Ka̱za kan cat ka̱sa ka ba̱t i, nkpa n byyi kan wrak Ka̱won nka ka bu ka̱yring, rot ba̱nyet ba a̱ ka̱ san ni ba bo kwi ba, ma a̱ ga shya sucet ka̱u di tyak. 17Rot Ka̱za a̱ tom Ka̱won nka ka ka bu yya ka̱sa ka shirya ba, ma ka bu yet a̱ntyok ka̱ san.
18A̱yin nu a̱ san Ka̱won ka ni a̱ byyi nwa shirya ba. Ma a̱yin nu a̱ ka̱ rak ni ba wa ka̱n ku tyak shirya ji, rot a̱ rak san Ka̱won Ka̱za ka a̱ yet bu ka̱yring ni. 19Kyang a ba di shirya ji ni ku naa ni: ka̱bvwa sai a̱ nwa i ka̱sa ka, ma ba̱nyet ka̱sa ba a̱ wa cat ryin a̱ ra̱u ka̱bvwa sai ka rot a̱ka̱tukyya mba nu. 20A̱yin nu a̱ yya a̱ka̱tuk ni a̱ rak ka̱bvwa sai ka; da̱ naat i ka̱bvwa sai ka ba, rot a̱ cat ba ryi a̱ka̱tukyya nu nu ba. 21Ma a̱yin nu a̱ shyi yya kyang a yet ka̱ryong ni a̱ cong i ka̱bvwa sai ka ba ga ryi nkyang a na̱ yya ni yet nying Ka̱za.
Dolet na̱ hwung, nzuk n ywwai
22Ba bu tyak, Yesu bu ba̱pfong nu ba ba̱ mba swak bu ba̱hwa a̱ brek a̱ nat i ka̱byen Yahudiya. Na̱ si yen da ka̱ram ka̱ yemi ba̱ mba a̱ yya ba̱nyet baptisma. 23Yohana a̱ ma̱ yin yya baptisma nu ka̱bvwa ka ban yei Ainon ni shishrek bu Salim, rot ba̱shekwot a̱ yin shyi ka̱ yemi ba̱gingang. Ba̱nyet a̱ cong na̱ ba̱ yya baptisma nu. 24(Ka̱ram iya ba ka̱n tyyi Yohana a jaru nu ba.)
25Ba̱pfong Yohana ba̱yaan a̱ nwa a̱cecet ba̱ a̱ntyok ba̱nyet Yahuda a̱yaan tazwa tada ya tssu. 26Ba brek a̱ nat di Yohana a̱ si hywa da̱ nu, “Malam, a yring a̱tuba a̱ywu a yin shyi ba̱ nu ma̱nyyi Urdun ka ni e? A̱tuba nu a yin za tyyei ba̱ryat nu ba ni e? A̱ shyi i yya baptisma naani, koyan a̱ cong da̱ nu.”
27Yohana a̱ hywa da̱ mba, “A̱yin a̱ maai byyi kyang ba, se a̱yin nu Ka̱za ka ku ryi ni. 28Nyin ma yi bvwo n ya tyyei, nzuk n yet Kristi nu ba, nzuk n yet ba̱ a̱kwak-ka̱son nu a̱mi. 29A̱ntyok nyreng a̱mi a̱ byyi ka̱neyang ka. A̱kpondang u a̱ sseng a̱za̱gbang a̱yring a̱ zzong a̱pfo, ka̱ram ka na̱n hok diwan a̱ntyok nyreng ti ni a̱ ni hok ansham ba̱gingang. A̱mi rya nzuk a kun sai. 30A̱ ni shyi i hwung, ma nzuk n ni shyi bu i ywwai.”
A̱tuba nu a̱ ba nyyai Tazwa ni
31A̱yin nu a̱ nyyai Tazwa ni a̱ shii a̱ ra̱u koyan. A̱yin nu a̱ nyyai i ka̱sa ka ni a̱ yet a̱nying ka̱sa nu, nkyang a na̱ ryat i yet bu nying ka̱sa brak. A̱yin nu a̱ nyyai Tazwa ni a̱ ra̱u koyan. 32A̱ tyyei kyang a na̱ ryi a̱ bo hok ni, ma ba a̱yin nu a̱ san ba̱ryat nu ba ni. 33A̱yin nu a̱ san ba̱ryat nu ba ni a̱ tyyei ka̱sak ka Ka̱za kan yet a̱ntyok ka̱ryong ni. 34A̱yin nu Ka̱za ka tom i a̱ tyyei ba̱ryat Ka̱za ba, rot Ka̱za a̱ ku ryi sa̱rei Tswa nka ji. 35A̱tyyi nu a̱ gwai Ka̱won ka ba̱gingang; rot a̱mi a̱ tyyi sa̱rei nkyang a an bvak nka. 36A̱yin nu a̱ san Ka̱won ka ni a̱ byyi sucet wityak; ma a̱yin nu a̱ rak hok Ka̱won ka ni a̱ byyi sucet ba, se bu diryen Ka̱za nti swat a̱za̱ nu.
Trenutno izabrano:
Yohana 3: kaj
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2011, Wycliffe Bible Translators, Inc. All rights reserved.