Matyu 3
3
Jon Naan Igunẽdiya Tamo Naab Dodok Fenen
(Mak 1:1-8; Luk 3:1-18; Jon 1:19-28)
1Sain anĩ bun, Jon naan igunẽdiya tamo isin, gerere tuan Judia teneub bun biya od wogõ ye fen, 2iweig iron, “Wauĩ falei gei, ere nigin, saa tano mogo melsak.” 3Tamo enĩ nigin profet Asaia eig ye wogõ yen,
“Ait taka gerere tuan iweig iron,
‘Odug nẽ naab dodok gei,
in naab madur gei.’”#Asaia 40:3
4Jon ne gabar are kamel siwi, ĩ gaar gabar nem lũ diwan anim luwa gu fedig. Yogon saaf totobi nin te ado. 5Tamo kayau Jon wagen guru difen, idi Jerusalem, Judia teneub ganan, Jordan naan kalilĩ fiya anĩ adok bun temeleid. 6Idi neid mosor yaor difele di, Jon Jordan naan igunẽdin.
7Anĩ ere, ĩ naan iguneĩd mog, Farisia tamo, Sadusia tamo geid musei disi di, ileid fen, ĩ idi irokenẽdin, “Ã, gogour sane gere tar! Didi isiyouf anĩ wal ge fen, uyagauf nigin aim irokenein? 8Wauĩ falei gef are, age fiya gen faat biya ũ gouf. 9Ã aug nigin kisi to eig ye irõf, ‘Abraham nemã tamamã.’ Aya arokeneik, meein eneidi bun Negur sã irõ di, Abraham gere tar wowã douf. 10Safor aayũ gariyan mogo ibodok, aayũ ganan faat biya to yuk, are itu ira ken, yã malan irãf.
11“Wauĩ falei gef nigin, aya naan nem naan aguneik, anĩ ere, taka ĩ aya dumeun isiyouf, ĩ megeir barikã aya wal fiya, ayam yogon ye su inukeis kenẽya kisi feleya sã.#3:11 Juda neid tobonunã anĩ, sain tamo yana ado isi di, idi neid kabĩ tamo in ye su nẽ malũ biru difedig. Ĩ Awa Uur Fateul yã ado nem naan iguneĩf. 12Ĩ susu fiya nẽ fok iman ado, ĩ yogon susu fiya nẽ mayã waĩ fouf, yogon wit biya are wit fõ bun kuruf fen, wit ido yã mala faimud bun an irãf.”
Jon Jesus Naan Igunen
(Mak 1:9-11; Luk 3:21, 22)
13Anĩ bure fele di, Jesus Jonem naan igunẽf nigin Galili tamal Jordan naanũ isin. 14Anĩ ere, Jon Jesus gudũ fiye ken, iron, “Onom aya naan igunaya, ere nigin aya garan usif?”
15Jesus aiten yalen, “Arokonok nem ago. Negur nẽ madur bagai anĩ ganan kisi falauf nigin ada age tafouf, are biya.” Age ye di, Jon dõf age fen.
16Jesus naan yale bure fel fen, kaisã bagai ĩ naanũ tamal fã yen. Agef mog bagai, saa ilun bobog kã fele di, ĩ lof mog, Negur nẽ Awa Uur, ninã kuburir gen Jesus muduren isi, lalan ifenen. 17Ait taka saa ilun iweig iron, “Eĩ neu Kesu, ĩ nigin aya wau laa fedig, ĩ nigin aya wau kulĩ yedig.”
Trenutno izabrano:
Matyu 3: dad
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2011, Wycliffe Bible Translators, Inc. All rights reserved.