ಮತ್ತಾಯ 24
24
ಯೆರೂಸಲೇಮ್‌ನು ಮಂದಿರ್‌ ಬರ್ಬಾತ್ ಉಷೇತೆ ಬಾರೇಮ ಯೇಸುನೆ ಬೋಲ್ಯೋತೆ
(ಮಾರ್ಕ 13:1-2; ಲೂಕ 21:5-6)
1ಅನಕೇಡೆಥು ಯೇಸು ಮಂದಿರ್‌ನ ಮ್ಹೆಂದಿನ್ ಜಾ಼ವಾನಿ ವಖ್ಹತ್‌ಮ, ಮಂದಿರ್‌ ಭಂದೈರ‍್ಹೀತೆ ತರೀಕಾನ ಇನ ವತಾಳ್ಣು ಕರಿ ಇನ ಶಿಷ್ಯರ್‌ ಇನಾಕನ ಆಯಾ. 2ತದೆ ಯೇಸುನೆ, “ತುಮೆ ಆ ಖ್ಹಾರು ದೇಖುಕರಾಸ್‌ನಿ ಹಜ್ಜಾ಼ ಏಕ್‌ ಬಂಡಾಪರ್ ಬಿಜೇಕ್ ಬಂಡೊ ಭೀರಿಶೆ ಕೊಯ್ನಿ; ಅಖ್ಖಾಸ್ನ ರಡ್‌ಕೈನಾಖಿದಿಶೆ ಕರಿ ಮೇ ತುಮೂನ ಖ್ಹಾಚಾಮ ಬೋಲುಸ್” ಕರಿ ಬೋಲ್ಯೊ.
ವದೇಖ್ಹೊ ಅಜು಼ ಖ್ಹತಾಪ್ಣಿನಿ ಬಾರೇಮ
(ಮಾರ್ಕ 13:3-13; ಲೂಕ 21:7-19)
3ಯೇಸುನೆ ಆಲಿವ್‌ ಪಹಡ್‌ಪರ್ ಬೆಠೋಥೋತೆ ತದೆ ಇನ ಶಿಷ್ಯರ್‌ ಇನಾಕನ ಅಲಕ್‌ಥಿ ಆಯಿನ್, “ಆ ಖ್ಹಾರು ಕದೆ ಚಾ಼ಲ್‌ಷೆ? ತೂ ಆಯಿಶ್‍ತೆ ಅಜು಼ ಆ ಜಗತ್ನಿ ಖ್ಹರ್ತಿ ಹುವಾನ ಖ್ಹಣೇದ್‍ಕಿ ಶು? ಹಮೂನ ಬೋಲ್” ಕರಿ ಪುಛಾ಼ಯಾ.
4ಯೇಸುನೆ ಇವ್ಣುನ, “ಕೋಣ್‌ಬಿ ತುಮೂನ ಠಗಾವ಼್ಣುನಾತೆ ಇಮ್‌, ಜ಼ತನ್‌ಥಿ ರ‍್ಹವೊ. 5ಶನಕತೊ, ಕೈಯೆಕ್ಕಿ ಜ಼ಣು ಆಯಿನ್, ಮಾರು ನಾಮ್‌ಲೀನ್, ‘ಮೇ ಕ್ರಿಸ್ತ, ಮೇ ಕ್ರಿಸ್ತ’ ಕರಿ ಬೋಲಿನ್, ಘಣ ಅದ್ಮಿನ ವಾಟ್‌ ಭೈಕಾವ್‌ಶೆ. 6ಅತ್ರೇಸ್ ಕಾಹೆತೆ ತುಮಾರ ಖನ್ನೆ ಜಂಗ್ ಭೀಡುಕರಾತೆ ಅವಾಜ಼್ ಅಜು಼ ದೂರ್‌ಮ ಚಾ಼ಲುಕರಾತೆ ಜಂಗ್‌ನಿ ಬಾರೇಮಾನಿ ಖಬರ್ ತುಮೆ ಖ್ಹಮಜ಼್‌ಶು, ಕತೋಬಿ ಡರ್‌ಶು ನಕೊ. ಖ್ಹರ್ತಿ ಆವಾನ ಅಗಾಡಿ ಆ ಖ್ಹಾರು ಚಾ಼ಲ್ನುಸ್ ಚಾ಼ಲ್ನು. 7ದೇಖ್ಹ್‌ನ ವಿರೋದ್ ದೇಖ್ಹ್‌, ರಾಜ್ಯನ ವಿರೋದ್ ರಾಜ್ಯ ಉಟ್‌ಶೆ; ಖ್ಹಾರಿಸ್ ಬಾಜೂ಼ಮ ಕಾಳ್ದುಕಾಳ್ ಉಶೆ ಅಜು಼ ಜ಼ಮೀನ್ ಹಲ್‌ಶೆ. 8ಆ ಖ್ಹಾರು ಲಡ್ಕಾ ಪೈದಾ ಹುವಾನಿ ವಖ್ಹತ್‌ಮ ಆವಾಸ್ತೆ ಪಹಿಲಿ ಅಜಾ಼ನಿಘೋಣಿ ಹುಯಿರ‍್ಹುಸ್‍ ಎತ್ರೇಸ್.
9ತದೆ ತುಮೂನ ಧರೀನ್ ದಂಡನೆ ದೀನ್ ಮಾರ ನಾಮ್ನಖ್ಹಾಜೆ ಹರೇಕ್ ದೇಖ್ಹ್‌ವಾಳು ತುಮೂನ ವಹೇರ್‌ ಕರ್ಶೆ. 10ಯೋ ವಖ್ಹತ್‌ಮ ಕೈಯೆಕ್ಕಿ ವಿಶ್ವಾಸಿಖ್ಹಾರು ಪಿನ್‌ಮಾಟಿಜಾ಼ಶೆ; ಏಕ್‌ನ-ಏಕ್‌ ಧೋಕೇಥಿ ಧರಿದಿಶೆ ಅಜು಼ ಏಕ್‌ಪರ್‌-ಏಕ್‌ ವಹೇರ್‌ ಕರ್ಶೆ. 11ಘಣು ಜ಼ಣು ಝೂ಼ಟುಪ್ರವಾದಿ ಖ್ಹಾರು ಆಯಿನ್, ಕೈಯೆಕ್ಕಿ ಅದ್ಮಿನ ಖ್ಹಾರು ಠಗಾವ್‌ಶೆ. 12ಅತ್ರೇಸ್ ಕಾಹೆತೆ ಜಗತ್‌ಮ ಖರಾಬ್ ಜಾ಼ಖ್ಹತ್ ಹುಯಿಜಾ಼ಶೇತೆ ಇನಖ್ಹಾಜೆ ಘಣ ಅದ್ಮಿನಿ ಪ್ಯಾರ್ ಠಂಡು ಪಡಿಜಾ಼ಶೆ. 13ಕತೋಬಿ ಖ್ಹರ್ತಿತೋಡಿ ಖ್ಹಮಾಳಿಲ್ಯವಾಳಾನ ರಕ್ಷಣೆ ಲಿಶೆ. 14ರಾಜ್ಯನು ಆ ಅಛ್ಛಿ ಸಮಾಚಾರ್ ಜಗತ್‌ನು ತಮಾಮ್‌ ದೇಖ್ಹ್‌ವಾಳ ಅದ್ಮಿನ ಸಾಕ್ಷಿನಟೇಕೆ ಬೋಲಾವ್‌ಶೆ; ತದೆ ಖ್ಹರ್ತಿನದನ್‍ ಆವ್‌ಶೆ.
ಬರ್ಬಾತ್ ಕರಾವಾಳು ಖರಾಬ್ ರಾಛು಼
(ಮಾರ್ಕ 13:14-23; ಲೂಕ 21:20-24)
15“ಪ್ರವಾದಿ ದಾನಿಯೇಲ್‌ನೆ ಬೋಲ್ಯೋತೆ, ‘ಬರ್ಬಾತ್ ಕರಾವಾಳು ಗಲೀಜ಼್ ರಾಛು಼’ ಪವಿತ್ರ ಝ಼ಗೋಪರ್ ಭೀರಾವನು ತುಮೆ ದೇಕ್‌ಶು. ಅನ ಪಢವಾಳು ಅನಿ ಮತ್ಲಬ್ ಶಾತ್ ಕರಿ ಪರ್ಖಿಲ್ಯವಾದೆ. 16ಯೋ ವಖ್ಹತ್‌ಮ ಯೂದಾಯಮ ರ‍್ಹವಾಳು ಪಹಾಡೋಮ ಮಿಲೈಜಾ಼ಣು. 17ಕೋಣ್‌ತೋಬಿ ಏಕ್ಜ಼ಣೊ ಇನ ಘರ್‌ನ ಛ಼ತ್‍ಪರ್‌ ರ‍್ಹಯೋತೊ, ಯೋ ಹೇಟ್ ಉತ್ರಿನ್ ಶಾತ್‌ತೋಬಿ ಪಾಡಿಲೇಣು ಕರಿ ಘರ್‌ನ ಮಹಿ ಜೈ಼ನ್, ವಖ್ಹತ್ ಬರ್ಬಾತ್ ನಾ ಕರ‍್ನು. 18ಅಜು಼ ಕೋಣ್‌ತೋಬಿ ಏಕ್‌ ಜ಼ಣೊ ಖೇತರ್‌ಮ ರ‍್ಹಯೋತೊ, ಯೋ ಇನೊ ಝ಼ಗ್ಗೊ ಪಾಡಿಲೇಣು ಕರಿ ಪಾಛೊ಼ಫರಿ ಘರೆ ನಾ ಜಾ಼ವ್ಣು. 19ಯೋ ದನೂಮ ಬೇಜೂನಿ ಅಜು಼ ದೂದ್ ಪಿಡಾವವಾಳಿ ತಯೇಡಾವ್ನ ಉಷೇತೆ ಹಾಲ್ನ ಶಾತ್ ಬೋಲು! 20ತುಮೆ ಮಿಲೈಜಾ಼ಣುತೆ ದನ್ ಠಣ್‌ನೊ ದನ್ ನಾತೊ ಸಬ್ಬತ್‌ನೊ ದನ್ ನಾ ಹುಯಿರ‍್ಹೇಣು ಕರಿ ದೇವ್ನ ಪ್ರಾರ್ಥನೆ ಕರೊ! 21ಶನಕತೊ ಯೋ ವಖ್ಹತ್‌ಮ ಘಣು ಲತಾಡ ರ‍್ಹಿಶೆ. ಜಗತ್‌ ಉಬ್‌ಜ್ಯುತೆ ತಪ್‌ಥು ಧರೀನ್, ಹಮ್ಕೆಲಗು ಕದೇಸ್‌ ಅಮ್ನು ಲತಾಡ ಕೋ ಐರ‍್ಹೂನಿ. ಬಿಜು಼ ಖ್ಹಾಮ್ಣೆಬಿ ಕೋ ಆವ್‌ಶೇನಿ. 22ದೇವ್ ಯೋ ಖ್ಹಾರ ದನ್ನ ಕಮ್ ನಾ ಕರ‍್ಯೋತೊ, ಏಕ್‌ ಅದ್ಮಿ ಜಿನ್‌ಕುಬಿ ಬಚಿಜಾಶೆಕೊಯ್ನಿ; ಕತೋಬಿ ಇನೆ ಚೂ಼ಣಿಲಿದೊತೆ ಅದ್ಮಿನಖ್ಹಾಜೆ ದೇವ್ ಯೋ ಖ್ಹಾರ ದನ್ನ ಕಮ್ ಕರ್ಶೆ.
23ಯೋ ವಖ್ಹತ್‌ಮ ಕೋಣ್‌ತೋಬಿ ತುಮೂನ, ‘ದೇಖೊ, ಕ್ರಿಸ್ತ ಹಜ್ಜಾ಼ ಛಾ಼! ನಾತೊ, ಯೋ ಹಿಜ್ಜಾ಼ ಛಾ಼! ಕರಿ ಬೋಲ್ಯುತೊ, ಇನ ನಕೊ ನಂಬ್‌ಶು. 24ಶನಕತೊ ಝೂ಼ಟುಕ್ರೈಸ್ತರ್‌ ಖ್ಹಾರು ಅಜು಼ ಝೂ಼ಟು ಪ್ರವಾದಿಖ್ಹಾರು ದೆಖೈನ್, ಇವ್ಣೇಥಿ ಹುಯೂತೊ ದೇವ್‍ಥಿ ಚೂ಼ಣೈರ‍್ಹವಾಳನಾಬಿ ಠಗಾವಾನಖ್ಹಾಜೆ, ಅದ್ಭುತ್‌ಕಾಮ್‌ ಅಜು಼ ಅಶ್ಚರ್ಯನು ಕಾಮ್‌ಖ್ಹಾರು ಕರಿ ವತಾಳ್‌ಶೆ. 25ಖ್ಹಮ್‍ಜೊ! ಮೇ ತುಮೂನ ಆ ಖ್ಹಾರು ಚಾ಼ಲಾನ ಅಗಾಡಿಸ್ ಇನಿ ಬಾರೇಮ ಬೋಲಿರಾಖ್ಯೊಸ್.
26ಇನಾಖ್ಹಾಜೆ ಕೋಣ್‌ತೋಬಿ ತುಮೂನ, “ಹಂದೇಖೊ, ಕ್ರಿಸ್ತ ಉಜ್ಜಾ಼ಡಿ ಝ಼ಗೋಮ ಛಾ಼’ ಕರಿ ಬೋಲ್ಯೂತೊ, ನಕೊ ಚಲ್ಯಾಜಾ಼ಶು, ‘ಹಂದೇಖೊ, ಯೋ ಮಹಿನಕೋಣಾಮ ಛಾ಼’ ಕರಿ ಬೋಲ್ಯೂತೊ, ನಕೊ ನಂಬ್‌ಶು. 27ಶನಕತೊ ವಿಜ಼್‌ಳಿ ದನ್‌ನಿಕ್‌ಳಾ ಭಣೀಥು ದೆಖೈನ್, ದನ್ ಡುಬಾಭಣೀನು ಬಾಜು಼ತೋಡಿ ಚ಼ಮ್‌ಕಾಸ್ತೆ ಇಮ್ಮಸ್ ಅದ್ಮಿನೊ ಛಿಯ್ಯೊಬಿ ಆವ್‌ಶೆ.
28ಮುರ್ದು ಕಿಜ಼್ಜ ಪಡ್ಯುರ‍್ಹೇಸ್ಕಿ, ಹಿಜ್ಜಾ಼ಸ್ ಗರದ್‍ಖ್ಹಾರು ಎಕ್ಟುಹುವಾಸ್.
ಅದ್ಮಿನೊ ಛಿಯ್ಯೊ ಆವ್‌ಶೇತೆ ಬಾರೇಮ
(ಮಾರ್ಕ 13:24-27; ಲೂಕ 21:25-28)
29ಯೋ ಖ್ಹಾರು ದನ್ನು ಖ್ಹತಾಪ್ಣಿ ಖತಮ್ ಹೋತಾಸ್‌ನ, ಚಾ಼ಂದ್ ಕಾಳೊಪಡಿಜಾ಼ಶೆ, ಚ಼ಂದರ್‌ಮೊ ಉಜಾ಼ಳು ಕೋದಿಶೇನಿ, ಆಬ್‍ಪರ್‌ಥು ಶುಕ್ಕರ್ ಖ್ಹಾರು ಖಂಕರ್‌ಶೆ, ಅಜು಼ ಆಬ್‍ಮ ಛಾ಼ತೆ ಶಕತ್‌ಖ್ಹಾರಿ ಕಾಪ್‌ಶೆ. 30ತದೆ ಅದ್ಮಿನೊ ಛಿಯ್ಯಾನ ವತಾಳವಾಳಿ ಖ್ಹಣೇದ್ ಆಬ್‍ಮ ದೆಖಾವ್‌ಶೆ. ತದೆ ಧರ್ತಿಪರ್ ಛಾ಼ತೆ ತಮಾಮ್‌ ಖೂಮ್‍ವಾಳು ಛಾ಼ತಿಪರ್ ಮಾರಿಲಿಶೆ ಅಜು಼ ಅದ್ಮಿನೊ ಛಿಯ್ಯೊ ಶಕತ್‌ಥೀಬಿ, ಮಹಾನ್ ಮಹಿಮೆಥೀಬಿ ಆಬ್ನ ವಾದ್ಳಪರ್ ಆವ್‌ಶೇತೆ ಇನ ದೇಕ್‌ಶೆ. 31ಅಜು಼ ಯೋ ತುತ್ತೂರಿನೊ ಮೋಟೊ ಅವಾಜ಼್‌ಥಿ, ಇನ ದೂತರ್‌ನ ಜ಼ಮೀನ್ನಿ ಚಾರ‍್ಹೆ ಬಾಜೂ಼ಮ ಮೋಕಲ್‌ಶೆ, ಇವ್ಣೆ ಇನೆ ಚೂ಼ಣಿಲಿದೊತೆ ಇವ್ಣುನ ಆಬ್ನ ಏಕ್‌ ಬಾಜು಼ಥು ಧರಿನ್ ಬಿಜೇಕ್ ಬಾಜೂ಼ಲಗು ಎಕ್ಟು ಕರ್ಶೆ.
ಅಂಜೀರ್‌ನ ಝಾ಼ಡೇಥಿ ಅಕ್ಕಲ್ ಶಿಕಾನು
(ಮಾರ್ಕ 13:28-31; ಲೂಕ 21:29-33)
32ಅಂಜೀರ್‌ನ ಝಾ಼ಡಾನಿ ಖೇಣಿಥಿ ತುಮೆ ಅಕ್ಕಲ್‍ಶಿಕೊ. ಇನಿ ಡಾಳಿಯೆ ಹರಿಗಾರ್ ಕವ್ಳಿ ಹುಯಿನ್, ಪಾಂದ್‌ಡ ಮ್ಹೇಲಾಲಗ್ಯುತೊ ತಡ್ಕಾನ ಹಗಾಮ್‌ ಖನ್ನೆ ಐಗು ಕರಿ ತುಮೆ ಮಾಲುಮ್ ಕರಿಲೇವೊಸ್ನಿ. 33ಇಮ್ಮಸ್, ತುಮೇಬಿ ಆ ಖ್ಹಾರು ದೇಖಾನಿ ವಖ್ಹ್‌ತೆ ಯೋ ದನ್ ಖನ್ನೆಛಾ಼, ಬಾಕಲ್‍ಕನಸ್‍ ಛಾ಼ಕರಿ ಮಾಲುಮ್ ಕರಿಲೆವೊ. 34ಹಮ್ಕೆ ಜಿವ್ತು ಛಾ಼ತೆ ಅದ್ಮಿಖ್ಹಾರು ಮರ್‌ವಾನ ಮಹಿಸ್ ಆ ಖ್ಹಾರು ಚಾ಼ಲ್‌ಶೇತೆ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್. 35ಆಬ್-ಧರ್ತಿ ಮಟಿಜಾ಼ಶೆ, ಕತೋಬಿ ಮಾರಿ ವಾತೆಖ್ಹಾರಿ ಕದೇಬಿ ಮಟ್‌ಶೆಸ್ ಕೊಯ್ನಿ.
ಯೋ ವಖ್ಹತ್ ಅಜು಼ ದನ್ ಕಿನಾಬಿ ಮಾಲುಮ್ ಕೊಯ್ನಿ
(ಮಾರ್ಕ 13:32-37; ಲೂಕ 17:26-30,34-36)
36ಎತ್ರೇಸ್ ಕಾಹೆತೆ, ಯೋ ದನ್ನಿ ಬಾರೇಮ ರ‍್ಹವೊ, ಯೋ ವಖ್ಹತ್‌ನಿ ಬಾರೇಮ ರ‍್ಹವೊ, ಮಾರ ಬಾನ ಮಾಲುಮ್ ಪಣ್ಕಿ ಬಿಜು಼ ಕಿನಾಬಿ ಮಾಲುಮ್‌ಕೊಯ್ನಿ; ಪರ್‌ಲೋಕ್‌ಮ ಛಾ಼ತೆ ದೇವ್‌ನು ದೂತರ್‌ನಾಬಿ ಮಾಲುಮ್‌ಕೊಯ್ನಿ; ಛಿಯ್ಯಾನಾಬಿ ಮಾಲುಮ್‌ಕೊಯ್ನಿ. 37ನೋಹಾನ ದನ್ಮ ಚಾ಼ಲ್ಯುತೆ ಇಮ್ಮಸ್ ಅದ್ಮಿನೊ ಛಿಯ್ಯೊ ಆವ್‌ಶೇತೆ ದನ್ಮ ಚಾ಼ಲ್‌ಷೆ. 38ಕಿಮ್‌ಕತೊ, ತೋಫಾನ್ ಆವಾನ ಅಗಾಡಿ ಅದ್ಮಿಖ್ಹಾರು ಖಾತು-ಪೀತು ಹುಯಿನ್, ವ್ಯಹಾ ಕರ್ತುಹುಯಿನ್, ವ್ಯಹಾ ಕರಿದೇತುಹುಯಿನ್ ಥೂ. ನೋಹಾನೆ ಜ಼ಹಾಜ಼್‌ನ ಮಹಿ ಚ಼ಢ್ಯೋತೆ ದನ್‌ಮಾಬಿ ಇವ್ಣೆ ಇಮ್ಮಸ್ ಕರುಕರ್ತುಥು. 39ತೋಫಾನ್ನು ಪಾಣಿ ಐನ್, ತಮಾಮ್‌ನ ವವ್ಹಾಡಿಲೀನ್, ಜಾ಼ವಾತೋಡಿ ಇವ್ಣೆ ಶಾತ್ಬಿ ಮಾಲುಮ್‌ಕೊಂತೆ ಇಮ್‌ ಥೂ. ಇಮ್ಮಸ್ ಅದ್ಮಿನೊ ಛಿಯ್ಯೊ ಆವ್‌ಶೇತೆ ತದೇಬಿ ರ‍್ಹಿಶೆ. 40ಯೋ ವಖ್ಹತ್‌ಮ ಖೇತರ್‌ಮ ಬೇ ಜ಼ಣು ಕಾಮ್ ಕರ್ತು ರ‍್ಹಿಶೆ, ಏಕ್‌ಜ಼ಣಾನ ಪಾಡಿಲಿಶೆ, ಅಜು಼ ಏಕ್‌ ಜ಼ಣಾನ ಮ್ಹೆಂದಿಶೆ. 41ಬೇ ತಯೇಡ ಬೇಶಿನ್, ಘಟ್ಟಿ ದಳುಕರ್‌ಶೆ, ಏಕ್‌ನ ಪಳ್ಳಿಶೆ ಏಕ್‌ನ ಮ್ಹೆಂದಿಶೆ.
42ಇನಖ್ಹಾಜೇಸ್ ತುಮಾರೊ ಪ್ರಭು ಆವ್‌ಶೇತೆ ದನ್ ತುಮುನ ಮಾಲುಮ್‌ಕೊಂತೆ ಇನಾಖ್ಹಾಜೆ ಹೊಷಾರ್‌ಥಿ ರ‍್ಹವೊ. 43ಚೋ಼ರ್ ಆವಾನಿ ವಖ್ಹತ್ ಘರ್‌ನ ಯಜಮಾನ್ನ ಮಾಲುಮ್ ರ‍್ಹಯುಹೋತ್ತೊ, ಯೋ ಹೊಷಾರಿ ರ‍್ಹೀನ್, ಇನ ಘರ್‌ನ ಕೋ ತೋಡಾದಿದೊಹೋತ್ನಿ. 44ಇನಖ್ಹಾಜೇಸ್ ತುಮೇಬಿ ಕದೇಬಿ ತೈಯಾರ್ ರ‍್ಹೇಣು, ಶನಕತೊ ತುಮೆ ಸೋಚಾಸ್‌ಕೊಂತೆ ವಖ್ಹತ್‌ಮ ಅದ್ಮಿನೊ ಛಿಯ್ಯೊ ಆವ್‌ಶೆ.
ನಿಯ್ಯತ್‌ ಅಜು಼ ನಿಯ್ಯತ್‌ ಕೊಂತೆ ಆಳ್ನಿ ಬಾರೇಮ
(ಲೂಕ 12:41-48)
45ಇಮ್‍ಕತೊ, ಯಜಮಾನ್ ಇನ ಘರ್‌ಮ ಕಾಮ್ ಕರಾವಾಳ ಆಳ್‌ನ ಖ್ಹಾರು ಬರೋಬರ್‌ನಿ ವಖ್ಹತ್‌ಮ ಖಾಣು ದ್ಯವಾನಖ್ಹಾಜೆ ಇವ್ಣಾಪರ್ ನೇಮ್‌ಶಾಯೋತೆ ನಿಯತ್‍ವಾಳೊಬಿ ಅಕ್ಲಿಆಳ್‌ ಕೋಣ್? 46ಯಜಮಾನ್ ಆವಾನಿ ವಖ್ಹ್‌ತೆ, ಕೆಹೊ ಆಳ್‌ ಆ ಖ್ಹಾರು ಕರುಕರಾತೆ ದೇಕ್‌ಶೇಕಿ, ಯೋ ಆಳ್‌ ಧನ್ಯ ಹುಯಿರ‍್ಹೋಸ್! 47ಇಮ್ನ ಆಳ್‌ನ ಯೋ ಇನು ಖ್ಹಾರೂಸ್ ಧನ್‌-ದೌಲತ್‌ಪರ್ ಅದಿಕಾರಿಹುಯಿನ್ ನೇಮ್‌ಶಾವ್‌ಶೆ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್. 48ಕತೋಬಿ ಯೋ ಆಳ್‌ ಖರಾಬ್ ರ‍್ಹಯೋತೊ, ಇನೊ ಯಜಮಾನ್ ಒಗ್ಗಿಸ್‌ಮ ಕೋ ಆವ್‌ಶೇನಿ ಕರಿ ಇನ ಮನ್‌ಮ ಸೋಚಿಲೀನ್, 49ಇನ ಜೋ಼ಡ್ಮ ಕಾಮ್‌ಕರವಾಳ ಬಿಜಾ಼ಖ್ಹಾರ ಆಳ್‌ನ ಮಾರಲಗ್‌ಶೆ ಅಜು಼ ಪೀ ಕುಡ್‌ಕಾವ್‍ನ ಜೋ಼ಡೆ ಖಾತೊ-ಪೀತೊ ರ‍್ಹಿಶೆ. 50ತದೆ ಏಕ್‌ ದನ್ನೆ ಯೋ ಆಳ್‌ ಸೋಚಾಸ್‌ಕೊಂತೆ ದನ್ಮ ಅಜು಼ ಇನ ಮಾಲುಮಸ್ ಪಡಾಕೊಂತೆ ವಖ್ಹತ್‌ಮ ಯೋ ಇನೊ ಯಜಮಾನ್ ಐನ್, 51ಇನ ಕತ್ರೀನ್, ಟುಕ್‌ಡಾ-ಟುಕ್‌ಡಾ ಕರೀನ್, ಖೋಟ್ ದಿಲ್‌ವಾಳಾನ ನಾಖಾಸ್ತೆ ಝ಼ಗೋಪರ್ ಇನ ನಾಕ್‌ಶೆ. ಹಿಜ್ಜಾ಼ ಯೋ ರೋವ್‌ತೊ ಹುಯಿನ್, ಕರ್‌-ಕರ್‌ ದಾತ್‌ ಚಾ಼ವ್‌ಶೆ.
Trenutno izabrano:
ಮತ್ತಾಯ 24: NTWVe23
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
The New Testament in Waghri Language © The Word for the World International and Waghri Translation Samiti, Karnataka, 2023.