ಮತ್ತಾಯ 26
26
ಯೇಸುನಿ ವಿರೋದ್ ಮಶ್ಲತ್ ಭಂದಾಯುತೆ
(ಮಾರ್ಕ 14:1-2; ಲೂಕ 22:1-2; ಯೋಹಾನ 11:45-53)
1ಯೇಸುನೆ ಆವಾತೆಖ್ಹಾರಿ ಬೋಲಿನ್ ಖತಮ್ ಕರಾನ ಬಾದ್ಮ, ಇನ ಶಿಷ್ಯರ್‌ನ, 2“ಬಿಜು಼ ಬೇ ದನ್ಮ ಪಸ್ಕ ಪೂಜಾ಼ ಆವ್‍ಶೆಕರಿ ತುಮೂನ ಮಾಲುಮ್; ತದೆ ಅದ್ಮಿನೊ ಛಿಯ್ಯಾನ ಶಿಲ್‌ಬೇಪರ್ ನಾಖಾನಖ್ಹಾಜೆ ಇವ್ಣಹಾತ್ಮ ದಿನಾಕ್‌ಶೆ” ಕರಿ ಬೋಲ್ಯೊ.
3ತದೆ ಗಲ್‌ಢಯಾಜಕರ್‌ಬಿ ಅಜು಼ ಶಾಣುಖ್ಹಾರು ಮಹಾಯಾಜಕ್ ಕಾಯಫನ ಮಹೇಲ್‌ಮ ಮಳೀನ್ಆಯು, 4ಯೇಸುನ ಕಿನಾಬಿ ಮಾಲುಮ್‌ಕೊಂತೆ ಇಮ್‌ ಧರೀನ್, ಮರೈನಾಕ್ಣು ಕರಿ ವಾತೆ ಕರಿಲಿದು. 5“ತೋಬಿ ಪೂಜಾ಼ನಿ ವಖ್ಹತ್‌ಮ ನಾ ಧರ್‌ನು, ಶನಕತೊ ಅಪ್ಣ ಅದ್ಮಿಮ ಕಲ್ಹಾಗಟ್ ಪಡಿಜಾ಼ಶೆ” ಕರಿ ಬೋಲಿಲಿದು.
ಬೆಥಾನ್ಯಾಮ ಯೇಸುನ ಅಬಿಷೇಕ್ ಹುಯೂತೆ
(ಮಾರ್ಕ 14:3-9; ಯೋಹಾನ 12:1-8)
6ಯೇಸು ಬೇಥಾನ್ಯಮ ಸೀಮೋನ್ನ ಘರ್‌ಮ ಥೊ, ಆ ಸೀಮೋನ್ ಅಗಾಡಿ ಖೋಡ್‍ವಾಳೊ ಹುಯಿರ‍್ಹೋಥೊ. 7ಯೇಸು ಖಾಣು ಖಾವಾನಿ ವಖ್ಹತ್‌ಮ, ಏಕ್‌ ತಯೇಡ ಘಣ ಮೋಲ್ನು ವಾನು ತೇಲ್ನ ಧೋಳ ಬಂಡಾನಿ ಶೀಶಿಮ ಲೀನ್, ಇನಾಕನ ಆಯಿನ್, ಯೋ ತೇಲ್ನ ಇನ ಮಾಥಪರ್ ರಂಚಿ. 8ಅನ ದೇಖಿನ್, ಶಿಷ್ಯರ್‌ನೆ ಖೀಜ಼್ ಕರ‍್ಯಾ, ಅಜು಼, “ಆ ವಾನು ತೇಲ್ನ ಶನ ಲುಕ್ಷಾನ್ ಕರಿ? 9ಆ ತೇಲ್ನ ಘಣ ಪೈಶಾನ ವೇಚಿನ್, ಆವಾಸ್ತೆ ಪೈಶಾನ ಗರೀಬ್‌ನ ದಿಯ್ಯೆಜಾ಼ಯಿಥೂನಿ?” ಕರಿ ಬೋಲ್ಯ.
10ಯೇಸುನೆ ಇವ್ಣೆ ಬೋಲುಕರಾತೆ ಮಾಲುಮ್ ಕರಿಲೀನ್ ಇವ್ಣುನ, “ತುಮೆ ಆ ತಯೇಡಾನ ಶನ ಖ್ಹತವ್‍ಕರಸ್ತೆ? ಅನೆ ಮಾರಖ್ಹಾಜೆ ಘಣು ಅಛ್ಛು಼ಕಾಮ್ ಕರಿರಾಖೀಸ್. 11ಗರೀಬ್ ಅದ್ಮಿಖ್ಹಾರು ಕದೇಬಿ ತುಮಾರಕನ ರ‍್ಹಿಶೆ, ಕತೋಬಿ ಮೇ ಹಮೇಶ ತುಮಾರಕನ ರ‍್ಹೀಶ್ ಕೊಯ್ನಿ. 12ಮೇ ಮರ್‌ವಾನ ಬಾದ್ಮ, ಮಾರು ಶರೀರ್‌ನ ಮಖ್ಹಾಣ್ಯು ಕರಾನಟೇಕೆ, ಅನೆ ಮಾರ ಆಂಗ್‌ತನ್‌ಪರ್ ವಾನು ತೇಲ್ನ ರಂಚಿರಾಖಿಸ್. 13ಮೇ ತುಮುನ ಖ್ಹಾಚಮಾಬಿ ಬೋಲುಸ್, ಹಿಡಿ ಜಗತ್‌ಮ ಆ ಅಛ್ಛಿ ಖಬರ್ ಕಿಜ಼್ಜ-ಕಿಜ಼್ಜ ಬೋಲಾವ್‌ಶೇಕಿ, ಹಿಜ್ಜಾ಼ ಖ್ಹಾರು ಅನೆ ಕರೀತೆ ಇನಾಬಿ ಅನಿ ಯಾದ್‌ನಖ್ಹಾಜೆ ಬೋಲ್‌ಶೆ” ಕರಿ ಬೋಲ್ಯೊ.
ಯೂದಾನೆ ಯೇಸುನ ಧೋಕೇಥಿ ಧರಿದ್ಯವಾನ ಮಾನಿಗಯೋತೆ
(ಮಾರ್ಕ 14:10-11; ಲೂಕ 22:3-6)
14ಅನ ಬಾದ್ಮ ಭಾರ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೊಥೋತೆ ಇಸ್ಕರಿಯೋತ ಯೂದಾನೆ ಗಲ್‌ಢಯಾಜಕರ್‌ಕನ ಜೈ಼ನ್, 15“ಮೇ ಇನ ಧೋಕೇಥಿ ಧರಿದಿದೋತೊ, ತುಮೆ ಮನ ಶಾತ್ ದಿಶು?” ಕರಿ ಪುಛಾ಼ಯೊ. ತದೆ ಇವ್ಣೆ ಡೋಡಿಖ್ಹ್‌ ರೂಪಾನು ಬಿಲ್ಲಾನ ಗಣೀನ್, ಇನ ದಿದು. 16ತಪ್‌ಥೊ ಯೂದ ಯೇಸುನ ಧರಿದ್ಯವಾನಿ ಬರೋಬರ್‌ನಿ ವಖ್ಹತ್‌ನಖ್ಹಾಜೆ ಜ಼ಪೂಕರ್ತೊಥೊ.
ಯೇಸುನೆ ಇನ ಶಿಷ್ಯರ್‌ನ ಜೋ಼ಡೆ ಪಸ್ಕಾನು ಖಾಣು ಖಾದೋತೆ
(ಮಾರ್ಕ 14:12-21; ಲೂಕ 22:7-13,21-23; ಯೋಹಾನ 13:21-30)
17ಖಾಟುಕೊಂತೆ ರೋಟಾನು ಪೂಜಾ಼ನ ಪಹಿಲ ದನ್ನೆ, ಶಿಷ್ಯರ್‌ ಯೇಸುಕನ ಐನ್, “ಹಮೆ ತಾರಖ್ಹಾಜೆ ಪಸ್ಕಾನು ಖಾಣನ ಕಿಜ಼್ಜಾ ತೈಯಾರ್ ಕರ‍್ನು?” ಕರಿ ಪುಛಾ಼ಯಾ.
18ತದೆ ಯೇಸುನೆ ಇವ್ಣುನ, “ತುಮೆ ಖ್ಹಯೇರ್‌ಮ ಮೇ ವತಾಳ್ಯೊತೆ ಇನಕನ ಜೈ಼ನ್ ಇನ, ‘ಮಾರಿ ವಖ್ಹತ್ ಖನ್ನೆ ಐಗೈ, ತಾರ ಘರ್‌ಮ ಮಾರ ಶಿಷ್ಯರ್‌ನ ಜೋ಼ಡೆ ಪಸ್ಕಾನು ಖಾಣು ಖವುಸ್ ಕರಿ ಗುರುನೆ ಬೋಲ್ಯೊ’ ಕರಿ ಬೋಲೊ.”
19ಶಿಷ್ಯರ್‌ನೆ ಯೇಸುನೆ ಇವ್ಣುನ ಬೋಲ್ಯೋತೆ ಇಮ್ಮಸ್ ಕರ‍್ಯಾ ಅಜು಼ ಪಸ್ಕಾನ ಖಾಣನ ತೈಯಾರ್ ಕರ‍್ಯಾ.
20ಖ್ಹಾಂಜ಼್ ಹುವ್ವಾದೀನ್, ಯೇಸು ಇನ ಭಾರ ಶಿಷ್ಯರ್‌ನ ಜೋ಼ಡೆ ಖಾಣನ ಬೇಶಿಗಯೊ. 21ಇವ್ಣೆ ಖಾಣು ಖವ್‍ಕರಾನಿ ವಖ್ಹತ್‌ಮ, ಯೇಸುನೆ ಇವ್ಣುನ, “ಮೇ ಖ್ಹಾಚಮಾಬಿ ಬೋಲುಸ್ಕಿ, ತುಮಾರಾಮ ಏಕ್‌ ಜ಼ಣೊ ಮನ ಧೋಕೇಥಿ ಧರಿದಿಶೆ” ಕರಿ ಬೋಲ್ಯೊ.
22ತದೆ ಶಿಷ್ಯರ್‌ ಖ್ಹಾರು ಘಣು ದುಖ್‌ಥಿ, “ಪ್ರಭು, ಖ್ಹಾಚಮಾಬಿ ಮೇ ಕಾಹೆ ಕೊಯ್ನಿ?” ಕರಿ ಏಕ್‌ನ ಬಾದ್ಮ ಏಕ್‌ ಇನ ಪುಛಾ಼ವಲಗ್ಯಾ.
23ಯೇಸುನೆ, “ಕೋಣ್ ಮಾರ ಜೋ಼ಡ್ಮ ಕಟೋರಿಮ ಚೋ಼ಪ್‌ಡಾಸ್ಕಿ, ಯೋಸ್ ಮನ ಧೋಕೇಥಿ ಧರಿದ್ಯವಾಳೊ” ಕರಿ ಬೋಲ್ಯೊ. 24ವಚನ್‌ಮ ಲೀಖೈರ‍್ಹೂತೆ ಇಮ್ಮಸ್, ಅದ್ಮಿನೊ ಛಿಯ್ಯೊ ಮರ್‌ಶೆ, ಕತೋಬಿ ಕೋಣ್ ಅದ್ಮಿನೊ ಛಿಯ್ಯಾನ ಧರಿದಿಶೇಕಿ, ಇನಿ ಹಾಲ್ನ ಶಾತ್ ಬೋಲು! ಯೋ ಅದ್ಮಿ ಪೈದಾ ನಾಸ್ ಹುಯುಹೊತ್ತೊ ಇನ ಅಛ್ಛು಼ ಥೂ.
25ತದೆ ಇನ ಧೋಕೇಥಿ ಧರಿದೇಣು ಕರಿ ಥೋತೆ ಯೂದಾನೆ, “ಗುರು, ಖ್ಹಾಚಮಾಬಿ ಯೋ ಮೇತೊ ಕಾಹೆನಿ?” ಕರಿ ಪುಛಾ಼ಯೊ.
ಯೇಸುನೆ ಇನ, “ತೂಸ್ ಬೋಲ್ಯೋನಿ” ಕರಿ ಜ಼ವಾಬ್ ದಿದೊ.
ಪ್ರಭುನು ಭೋಜನ್
(ಮಾರ್ಕ 14:22-26; ಲೂಕ 22:14-20; 1 ಕೊರಿಂಥ 11:23-25)
26ಇವ್ಣೆ ಖಾಣು ಖವ್‍ಕರಾನಿ ವಖ್ಹತ್‌ಮ, ಯೇಸುನೆ ರೋಟಾನ ಪಾಡೀನ್,ದೇವ್ನ ಧನ್ಯವಾದ್ ಕರೀನ್, ಇನ ತೋಡಿನ್, ಇನ ಶಿಷ್ಯರ್‌ನ ದೀನ್, “ಅಲ್ಲೇವೊ, ಅನಖಾವೊ, ಆ ಮಾರು ಶರೀರ್” ಕರಿ ಬೋಲ್ಯೊ.
27ಅನಕೇಡೆಥು ಕಟೋರಿನ ಪಾಡಿನ್, ದೇವ್ನ ಧನ್ಯವಾದ್ ಕರೀನ್, ಇವ್ಣುನ ದೀನ್, “ತುಮೆ ಖ್ಹಾರು ಅನಾಮ ಪೀಯ್ಯೊ. 28ಆ ಮಾರು ಲ್ಹೋಯಿ, ಆ ದೇವ್‌ನು ನವು ಒಪ್ಪಂದಾನನ ಮುದ್ರೊ ಮರೈಹುಯು ಮಾರು ಲ್ಹೊಯಿ; ಕೈಯೆಕ್ಕಿ ಅದ್ಮಿನು ಪಾಪ್‌ಖ್ಹಾರು ಮಾಪ್‌ ಕರಾನಖ್ಹಾಜೆ ರಂಚಾ಼ಯುತೆ ಮಾರು ಲ್ಹೊಯಿ. 29ಮೇ ತುಮೂನ ಬೋಲುಸ್ಕಿ, ಹಂಕೇಥು ಧರೀನ್, ಬಾನಿ ರಾಜ್ಯಮ ನವು ದ್ರಾಕ್ಷಿನು ರಖ್ಹ್‌ ಪಿಯ್ಯಾನ ದನ್‌ತೋಡಿ, ಅನ ಮೇ ಪಾಛೊ಼ ಪೀಶಸ್ ಕೊಯ್ನಿ” ಕರಿ ಬೋಲ್ಯೊ.
30ಅನಕೇಡೆಥು ಇವ್ಣೆ ಸ್ತುತಿನು ಗೀದ್‌ ಬೋಲಿನ್ ಆಲಿವ್ ಪಹಡ್‌ಕನ ಚ಼ಲೇಗಯ.
ಪೇತ್ರ ಝೂ಼ಟಿ ಬೋಲ್‌ಶೆ ಕರಿ ಯೇಸುನೆ ಬೋಲ್ಯೋತೆ
(ಮಾರ್ಕ 14:27-31; ಲೂಕ 22:31-34; ಯೋಹಾನ 13:36-38)
31ತದೆ ಯೇಸುನೆ ಇವ್ಣುನ, “ಆ ರಾತೆ ತುಮೆ ಖ್ಹಾರುಸ್ ಮನ ಮ್ಹೆಂದಿನ್, ಮಿಲೈಜಾ಼ಶು; ದೇವ್ ವಚನ್‌ಮ ಬೋಲುಕರಸ್ ಮೆ ಮೇಂಢ ಚ಼ರಾವವಾಳಾನ ಮರ್‌ನಾಕಿಶ್, ತದೆ ಮಂಧಾಮಾಥು ಮೇಂಢ ಛಿಡ್‌ಗರ್‌ ಹುಯಿಜಾ಼ಶೆ, 32ಕತೋಬಿ ಮೇ ಜಿವ್ತೊಹುಯಿನ್, ಉಠಾನ ಬಾದ್ಮ ತುಮಾರೇಥಿ ಅಗಾಡಿ ಗಲಿಲಾಯ ಜೈ಼ಶ್” ಕರಿ ಬೋಲ್ಯೊ.
33ತದೆ ಪೇತ್ರನೆ ಯೇಸುನ, “ಖ್ಹಾರು ಡರಿನ್, ತುನ ಮ್ಹೆಂದಿದಾತೋಬಿ ಮೇ ತುನ ಮ್ಹೇಲಿಶ್ ಕೊಯ್ನಿ” ಕರಿ ಬೋಲಾಖ್ಹತರ್,
34ಯೇಸುನೆ ಪೇತ್ರನ, “ಖ್ಹಾಚಮಾಬಿ ತುನ ಬೋಲುಸ್ಕಿ, ಆ ರಾತೇಸ್ ಮುರ್‌ಗೊ ಬಾಂಗ್‌ ದ್ಯವಾನ ಅಗಾಡಿ ತೂ ಮಾರಿ ಬಾರೇಮ, ‘ಯೋ ಮನ ಮಾಲುಮ್ ಕೊಯ್ನಿ’ ಕರಿ ತೀನ್‍ಹಲ್ಲ ಬೋಲಿಶ್” ಕರಿ ಬೋಲ್ಯೊ.
35ಪೇತ್ರನೆ, “ಮೇ ತಾರ ಜೋ಼ಡ್ಮ ಮರಾನು ರ‍್ಹಯುತೋಬಿ, ಮೆ ತುನ ಮಾಲುಮ್ ಕೊಯ್ನಿ ಕರಿ ಕೋ ಬೋಲಿಶ್‌ನಿ” ಕರಿ ಬೋಲ್ಯೊ.
ಅಜು಼ ಬಿಜಾ಼ಖ್ಹಾರ ಶಿಷ್ಯರ್‌ನೇಬಿ ಇಮ್ಮಸ್ ಬೋಲ್ಯ.
ಯೇಸು ಗೆತ್ಸೆಮನೆಮ ಪ್ರಾರ್ಥನೆ ಕರ‍್ಯೊತೆ
(ಮಾರ್ಕ 14:32-42; ಲೂಕ 22:39-46)
36ಅನಕೇಡೆಥು ಯೇಸು ಇನ ಶಿಷ್ಯರ್‌ನ ಜೋ಼ಡೆ ಗೆತ್ಸೆಮನೆ ಕರಿ ಬಾಗ್‌ನ ಗಯೊ, ಇವ್ಣುನ, “ಹಜ್ಜಾ಼ಸ್ ಬೇಖ್ಹೊ, ಮೇ ಹಿಜ್ಜಾ಼ ಜೈ಼ನ್, ಪ್ರಾರ್ಥನೆ ಕರೀನ್, ಆವುಸ್‌” ಕರಿ ಬೋಲ್ಯೊ. 37ಅಮ್ ಬೋಲಿನ್, ಪೇತ್ರ ಅಜು಼ ಜೆಬೆದಾಯನ ಛಿಯ್ಯಾವ್‍ನ ಇನಜೋ಼ಡೆ ಬುಲೈಲಿ ಗಯೊ. ತದೆ ಯೇಸುನ ಘಣು ಘಬ್ರಾವ್‍ಣಿ ಹುಯು ಅಜು಼ ಯೋ ದುಖ್‌ಥಿ ಭರೈಗೊ. 38ಅಜು಼ ಯೇಸುನೆ ಇವ್ಣುನ, “ಮಾರೊ ಜಾನ್‌ ಮರ‍್ವಎತ್ರೆ ದುಖ್‌ಮ ಛಾ಼. ತುಮೆ ಹಾಸ್‌ರ‍್ಹೀನ್, ಮಾರ ಜೋ಼ಡೆ ಹೊಷಾರಿ ರ‍್ಹವೊ” ಕರಿ ಬೋಲ್ಯೊ.
39ಅನಕೇಡೆಥು ಯೋ ಜ಼ರ ಖ್ಹಾಮ್ಣೆ ಜೈ಼ನ್, ಜ಼ಮೀನ್‌ಪರ್ ಆಡೊ ಪಡೀನ್, “ಮಾರೊ ಬಾ, ಹೋತು ಉಶೇತೊ, ಆ ವದೇಖ್ಹಾನಿ ಕಟೋರಿ ಮನ ಮ್ಹೆಂದಿನ್ ಜಾ಼ವಾನಿಘೋಣಿ ಕರ್‌! ತೋಬಿ ಮಾರಿ ಮರ್ಜಿನಿಘೋಣಿ ಕಾಹೆ, ತಾರಿ ಮರ್ಜಿನಿ ಘೊಣಿಸ್ ಹುವಾದೆ” ಕರಿ ಪ್ರಾರ್ಥನೆ ಕರ‍್ಯೊ.
40ಅನ ಯೇಸು ಯೋ ಶಿಷ್ಯರ್‌ಕನ ಆಯಿನ್, ಇವ್ಣೆ ಖ್ಹುತಾತೆ ದೇಖಿನ್, ಪೇತ್ರನ, “ಅಮ್‌ಕಿ ಶು? ತುಮೆ ಮಾರ ಜೋ಼ಡೆ ಏಕ್‌ ಘಡೀಬಿ ಹೊಷಾರಿ ರ‍್ಹವಾನ ಕೋ ಹೋಯ್ನಿಕಿ ಶು? 41ಶೋದನೆಮ ಪಡ್ಣುನಾತೆ ಇಮ್‌ ಹೊಷಾರಿ ರ‍್ಹೀನ್, ಪ್ರಾರ್ಥನೆ ಕರೊ. ಮನ್ ಛಾ಼ ಖ್ಹಾಚಸ್, ಕತೋಬಿ ಶರೀರ್‌ನ ಶಕತ್ ಪುರಾಕೊಯ್ನಿ” ಕರಿ ಬೋಲ್ಯೊ.
42ಬಿಜು಼ ಪಾಛೊ಼ ಭೇನೆಹಲ್ಲ ಜೈ಼ನ್, “ಮಾರೊ ಬಾ, ಮೇ ಆ ವದೇಖ್ಹಾನಿ ಕಟೋರಿನ ಪಿಯ್ಯಾಶೆ, ಆ ಮನ ಮ್ಹೆಂದಿನ್ ನಾ ಜಾ಼ವ್ಣುಕರಿ ತಾರಿ ಮರ್ಜಿ ಉಶೇತೊ, ತಾರಿ ಮರ್ಜಿನಿಘೋಣಿಸ್ ಹುವಾದೆ” ಕರಿ ಬೋಲಿನ್, ಪ್ರಾರ್ಥನೆ ಕರ‍್ಯೊ. 43ಅನ ಬಾದ್ಮ ಪಾಛೊ಼ ಶಿಷ್ಯರ್‌ಕನ ಐನ್, ಇವ್ಣೆ ಖ್ಹುತಾತೆ ದೇಖ್ಯೊ; ಇವ್ಣ ಡೋಳಾಮ ನಿಂದರ್‌ ಚು಼ವ್‍ಕರ್ತಿಥಿ.
44ಅನಕೇಡೆಥು ಪಾಛೊ಼ ಇವ್ಣುನ ಮ್ಹೆಂದಿನ್ ಜೈ಼ನ್, ಯೋಸ್ ವಾತೇನ ಬೋಲ್ತೊಹುಯಿನ್, ತೀನ್ನೆಹಲ್ಲ ಪ್ರಾರ್ಥನೆ ಕರ‍್ಯೊ. 45ಬಾದ್ಮ ಯೋ ಬಿಜು಼ ಪಾಛೊ಼ಫರಿನ್, ಇನ ಶಿಷ್ಯರ್‌ಕನ ಆಯಿನ್, “ತುಮೆ ಬಿಜೂ಼ಬಿ ಖ್ಹುಯಿನ್, ಅರಾಮ್‌ ಕರುಕರಾಸ್ಕಿ ಶು? ಹಂದೇಖೊ, ಅದ್ಮಿನೊ ಛಿಯ್ಯಾನ ಪಾಪಿ ಅದ್ಮಿಯೇನ ಹಾತ್‌ಮ ದೆವೈಜಾ಼ಶೆ. 46ಉಠೊ, ಜ಼ಯ್ಯೆ. ಮನ ಧೋಕೇಥಿ ಧರಿದ್ಯವಾಳೊ ಖನ್ನೆಸ್‌ ಐರ‍್ಹೋಸ್” ಕರಿ ಬೋಲ್ಯೊ.
ಯೇಸುನ ಧರ‍್ಯೂತೆ
(ಮಾರ್ಕ 14:43-50; ಲೂಕ 22:47-53; ಯೋಹಾನ 18:3-12)
47ಯೇಸು ಅಜೂ಼ಬಿ ವಾತೆ ಬೋಲುಕರಾತೆ ತದ್ದೇಸ್, ಇನ ಭಾರಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೊಥೋತೆ ಯೂದ ಹಿಜ್ಜಾ಼ ಆಯೊ.ಇನ ಜೋ಼ಡ್ಮ ಗಲ್‌ಢಯಾಜಕರ್‌ ಅಜು಼ ಶಾಣುಖ್ಹಾರು ಬೋಲಿ ಮೋಕ್‌ಲ್ಯುತೆ ಅದ್ಮಿನಿ ಏಕ್‌ ಮೋಟಿ ಝೂ಼ಂಡಸ್ ತಲ್ವಾರೆ ಅಜು಼ ಲಠ್ಠ ಧರಿಲಿನ್ ಹಿಜ್ಜಾ಼ ಆಯು. 48ಯೇಸುನ ಧೋಕೇಥಿ ಧರಿದ್ಯವಾಳೊ ಯೋ ಅದ್ಮಿನಿ ಝೂ಼ಂಡ್‌ನ, “ಮೇ ಕಿನ ಬುಚ್ಚಾ಼ ದೆವ್‌ಸ್ಕಿ ಯೋಸ್ ತುಮೂನ ಹೋಣುತೆ ಅದ್ಮಿ. ಇನ ಧರೊ!” ಕರಿ ಖ್ಹಣೇದ್ ಬೋಲಿ ದೀರಾಖ್ಯೊಥೊ
49ಇಮ್ಮಸ್ ಯೂದ ಯೇಸುನ ಖನ್ನೆ ಜೈ಼ನ್, “ಗುರು, ಶೂಲ” ಕರಿ ಬೋಲಿನ್, ಇನ ಬುಚ್ಚಾ಼ ದಿದೊ.
50ತದೆ ಯೇಸುನೆ, “ದೋಸ್, ತೂ ಕರಾನ ಆಯೋತೆ ಕಾಮ್ ಆಸ್ಕಿಶು?” ಕರಿ ಬೋಲ್ಯೊ.
ತದೆ ಇವ್ಣೆ ಖನ್ನೆ ಐನ್, ಯೇಸುಪರ್ ಹಾತ್‌ ನಾಖಿನ್, ಇನ ಧರ‍್ಯು. 51ಧರ್‌ತಾಸ್‌ನ ಯೇಸುನ ಜೋ಼ಡ್ಮ ಥೂತೆ ಇವ್ಣಾಮ ಏಕ್‌ನೆ, ಇನಿ ತಲ್ವಾರ್‌ನ ಕಾಡಿನ್, ಗಲ್‌ಢಯಾಜಕ್‌ನ ಆಳ್‌ನ ಮಾರಿನ್, ಇನು ಕಾನ್ನ ಕತ್ರಿನಾಖ್ಯೊ. 52ತದೆ ಯೇಸುನೆ ಇನ, “ತಾರಿ ತಲ್ವಾರ್‌ನ ಕಷ್‌ಬಂದ್‌ನಿ ಚ಼ಂಚಿಮ ಪಾಛು಼ ಘಾಲ್‌; ತಲ್ವಾರ್‌ಥಿ ಮಾರವಾಳು ಖ್ಹಾರು ತಲ್ವಾರ್‌ಥೀಸ್ ಮರ್‌ಶೆ. 53ಮೇ ಮಾರ ಬಾನ ಬೋಲಿಲಿದೋತೊ, ಯೋ ಮನ ಮದತ್ನಖ್ಹಾಜೆ ದೇವ್ ದೂತರ್‌ನು ಭಾರ ದಂಡ್‌-ದಳ್‌ವಾಯಿನಿ ಝೂ಼ಂಡ್‌ನ ಮೋಕಲ್‌ಶೆ ಕರಿ ತುನ ಮಾಲುಮ್ ಕೊಯ್ನಿಕಿ ಶು? 54ಕತೋಬಿ ಇಮ್‌ ಮೋಕ್‌ಲ್ಯೋತೊ, ಮನ ಅಮ್ನು ಖ್ಹಾರು ಹೋಣು ಕರಿ ವಚನ್‌ಮ ಬೋಲೈತೆ ವಾತೆ ಕಿಮ್ ಚಾ಼ಲ್‌ಷೆ?” ಕರಿ ಬೋಲ್ಯೊ.
55ಯೋಸ್ ವೇಳ್ಮ ಯೇಸು ಝೂ಼ಂಡ್‍ಭಂದೈನ್ ಆಯಿರ‍್ಹುಥೂತೆ ಅದ್ಮಿವೋನ, “ಚೋ಼ರ್‌ನ ಧರಾನಿಘೋಣಿ ತಲ್ವಾರೆ ಅಜು಼ ಲಠ್ಠ ಪಳ್ಳಿನ್‌, ಮನ ಧರಾನಖ್ಹಾಜೆ ಆಯಾಕಿ ಶು? ಮೇ ದನ್‍ರೋಜ಼್, ಮಂದಿರ್‌ಮ ಬೇಶಿನ್, ವಚನ್ ಬೋಲಿನ್ ದೇವ್‌ಕರ್‌ತೊಥೋತೆ ತದೆ ತುಮೆ ಮನ ಧರ‍್ಯಾಕೊಯ್ನಿ. 56ಕತೋಬಿ ಪ್ರವಾದಿ ಖ್ಹಾರು ಲೀಖ್ಯೂತೆ ವಚನ್ ಪೂರಹುವಾನ ಟೇಕೆ ಅಮ್ ಹುಯು” ಕರಿ ಬೋಲ್ಯೊ.
ತದೆ ತಮಾಮ್‌ ಶಿಷ್ಯರ್‌ ಇನ ಮ್ಹೆಂದಿನ್, ನಾಶಿ ಚ಼ಲೇಗಯ.
ನ್ಯಾವ್‌ನು ಪಂಚಾಯತ್‌ನ ಖ್ಹಾಮ್ಣೆ ಯೇಸುನ ಭೀರಾಖ್ಯೂತೆ
(ಮಾರ್ಕ 14:53-65; ಲೂಕ 22:54-55,63-71; ಯೋಹಾನ 18:13-14,19-24)
57ಯೇಸುನ ಧರ‍್ಯೂತೆ ಇವ್ಣೆ ಇನ ಗಲ್‌ಢಯಾಜಕ್‌ನ ಕಾಯಫನ ಘರೆ ಲೀನ್‌ಗಯು. ಹಿಜ್ಜಾ಼ ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೆ, ಅಜು಼ ಶಾಣು ಖ್ಹಾರು ಎಕ್ಟು ಹುಯಿನ್ ಐರ‍್ಹುಥು. 58ಪೇತ್ರ ದೂರ್‌ಥೋಸ್ ಯೇಸುನ ಪೀಠೆ-ಪೀಠೆ ಜಾ಼ತೊಹುಯಿನ್, ಮಹಾಯಾಜಕ್‌ನ ಘರ್‌ನ ಖ್ಹಾಮ್ಣೆನು ಬಲ್ಡತೋಡಿ ಆಯಿನ್, ಮಹಿ ಧಕೆಲ್‌ತೊ ಅಯಿನ್, ಇನಿ ಹಾಲ್ ಶಾತ್ ಉಷೆಕರಿ ದೇಕ್ಣು ಕರಿ, ಕಾವ್ಲಿನ ಶಿಪಾಯಿನ ಜೋ಼ಡೆ ಜೈ಼ನ್, ಬೇಶಿಗಯೊ. 59ತದೆ ಗಲ್‌ಢಯಾಜಕರ್‌ ಅಜು಼ ಯೆಹೂದಿ ಪಂಚಾಯತ್‌ನು ಹಿಡಿ ಅದ್ಮಿ ಶಾತ್‌ತೋಬಿ ಗಲತ್‌ ಸಬೂತ್ ಢೂಂಡಿನ್, ಯೇಸುನ ಮರೈನಾಖಿದೇಣು ಕರಿ ಕರ‍್ಯು. 60ಘಣು ಅದ್ಮಿ ಖ್ಹಾಮ್ಣೆ ಆಯಿನ್, ಯೇಸುಪರ್ ಝೂ಼ಟಿ ಸಾಕ್ಷಿಯೆ ಬೋಲ್ಯು, ತೋಬಿ ಇವ್ಣಿ ಸಾಕ್ಷಿಮ ಶಾತ್ಬಿ ಗಲತ್‌ ಮಳ್ಯುಕೊಯ್ನಿ. ಖ್ಹರ್ತಿಮ ಬೇ ಅದ್ಮಿ ಖ್ಹಾಮ್ಣೆ ಆಯಿನ್, 61“ದೇವ್‌ನು ಮಂದಿರ್‌ನ ರಡ್‌ಕೈ ನಾಖಿದೀನ್, ತೀನ್ ದನ್ಮ ಅನ ಪಾಛು಼ ಭಾಂದಾನ ಮನ ಹುವಾಸ್ ಕರಿ ಆ ಅದ್ಮಿನೆ ಬೋಲ್ಯೊ” ಕರಿ ಬೋಲ್ಯು.
62ತದೆ ಗಲ್‌ಢೊಯಾಜಕ್‌ನೆ ಉಠಿ ಭೀರಿನ್, ಯೇಸುನ, “ತೂ ಶಾತ್ಬಿ ಜವಾಬ್ ಕೋ ದೇಯ್ನಿಕಿ ಶು? ಅವ್ಣೆ ತಾರಪರ್ ಬೋಲುಕರಸ್ತೆ ಆ ಸಾಕ್ಷಿ ಖ್ಹಾಚಸ್‌ಕಿ ಶು?” ಕರಿ ಪುಛಾ಼ಯೊ. 63ಕತೋಬಿ ಯೇಸು ಖ್ಹೊಪ್ ಥೊ. ತದೆ ಮಹಾಯಾಜಕ್‌ನೆ ಪಾಛೊ಼, “ತುನ ಜಿವ್ತೊ ದೇವ್ನ ನಾಮ್‌ಪರ್‌ ಆಣ್‍ಲೀನ್, ಪುಛಾ಼ವುಸ್, ತೂ ದೇವ್‌ನೊ ಛಿಯ್ಯೊ ಕ್ರಿಸ್ತಸ್‌ಕಿಶು? ಹಮೂನ ಬೋಲ್” ಕರಿ ಬೋಲ್ಯೊ.
64ಯೇಸುನೆ ಇನ, “ತುನೇಸ್ ಬೋಲ್ಯೋನಿ; ಅತ್ರೇಸ್ ಕಾಹೆತೆ ಮೇ ತುಮೂನ ಬೋಲುಸ್ಕಿ, ಹಂಕೇಥು ಅದ್ಮಿನೊ ಛಿಯ್ಯೊ ಮಹಾನ್ ಶಕತ್‌ವಾಳಾನಿ ಖಾವಿಬಾಜು಼ಮ ಬೆಠೊರ‍್ಹಿಶೇತೆ ಅಜು಼ ಆಬ್‍ನ ವಾದ್ಳಪರ್ ಬೇಶಿನ್ ಆವ್‌ಶೇತೆ ತುಮೆ ದೇಕ್‌ಶು!” ಕರಿ ಬೋಲ್ಯೊ.
65ತದೆ ಮಹಾಯಾಜಕ್‌ನೆ ಇನ ಲುಂಗ್ಡಾನ ಫಾಡಿಲೀನ್, “ಆ ದೇವ್ನ ದೂಷಣೆ ಕರಾನಿ ವಾತೆ! ಅನೇಥಿ ಬಿಜು಼ ಖೆವಿ ಸಾಕ್ಷಿ ಅಪ್ಣುನ ಹೋಣು? ಅನೆ ದೇವ್ನ ಗಾಳೆಕರಾನಿ ವಾತೆ ಬೋಲ್ಯೋತೆ ತುಮೇಸ್ ಖ್ಹಮ್‌ಜ್ಯಾನಿ? 66ತುಮೂನ ಕಿಮ್ ದೆಖಾವಸ್?” ಕರಿ ಬೋಲ್ಯೊ. ತದೆ ಇವ್ಣೆ,
“ಆ ದೋಶಿ ಬಿಜು಼ ಮರ್‌ವಾನ ಲ್ಹಾಯಕಸ್ ಛಾ಼” ಕರಿ ಜ಼ವಾಬ್ ದಿದು.
67ಅಜು಼ ಇವ್ಣೆ ಯೇಸುನ ಮ್ಹೋಡಾಪರ್ ಥೂಕಿನ್, ಇನ ಗುಖ್ಹ್‌ತೊ ದಿದು; ಥೋಡು ಜ಼ಣು ಇನ ಕಲ್ಲಪರ್ ಮಾರಿನ್, 68“ಕ್ರಿಸ್ತ, ತುನ ಮಾರ‍್ಯೂತೆ ಕೋಣ್? ಹಮೂನ ಪ್ರವಾದ್‌ನೆ ಬೋಲ್?” ಕರಿ ಬೋಲ್ಯು.
ಪೇತ್ರನೆ ಯೇಸು ಮಾಲುಮ್ ಕೊಯ್ನಿ ಕರಿ ಬೋಲ್ಯೋತೆ
(ಮಾರ್ಕ 14:66-72; ಲೂಕ 22:56-62; ಯೋಹಾನ 18:15-18,25-27)
69ಪೇತ್ರ ಭಾರ್ ಚೌ಼ಕ್‌ಮ ಬೆಠೋಥೊ, ಹಿಜ್ಜಾ಼ ಏಕ್‌ಜ಼ಣಿ ದಾಸಿ ಇನಾಕನ ಐನ್, “ತೂಬಿ ಗಲಿಲಾಯಾನೊ ಯೇಸುನ ಜೋ಼ಡೆ ಥೋನಿ” ಕರಿ ಬೋಲಿ.
70ಕತೋಬಿ ಇನೆ, “ಕೊಯ್ನಿ, ತೂ ಶಾತ್ ಬೋಲುಕರಾಸ್ಕಿ ಮನ ಮಾಲುಮ್ ಕೊಯ್ನಿ” ಕರಿ ಖ್ಹಾರಾನ ಖ್ಹಾಮ್ಣೆ ಬೋಲ್ಯೊ. 71ಅಜು಼ ಯೋ ನಿಕ್ಳಿನ್, ಬಾಕಲ್‍ಭಣಿ ಚ಼ಲೆಗಯೊ. ತದೆ ಹಿಜ಼್ಜಾ ಥೀತೆ ಬಿಜೇಕ್ ಆಳ್‌ನೆ ಇನ ದೇಖಿನ್, ಹಿಜ್ಜಾ಼ ಥೂತೆ ಅದ್ಮಿ ಖ್ಹಾರಾನ, “ಆಬಿ ನಜ಼ರೇತ್‌ನೊ ಯೇಸುನ ಜೋ಼ಡೆ ಥೊ” ಕರಿ ಬೋಲಿ.
72ಪಾಛೊ಼ ಪೇತ್ರನೆ, “ಕೊಯ್ನಿ, ಯೋ ಅದ್ಮಿ ಕೋಣ್ ಕರಿ ಮನ ಮಾಲುಮ್ ಕೊಯ್ನಿ” ಕರಿ ಆಣ್‍ಲೀನ್, ಬೋಲ್ಯೊ.
73ಜ಼ರಘಡಿನ ಬಾದ್ಮ ಹಿಜ಼್ಜಾ ಭಿಯುಥೂತೆ ಅದ್ಮಿಖ್ಹಾರು ಪೇತ್ರಕನ ಆಯಿನ್, “ಖ್ಹಾಚ಼ಮಾಬಿ ತೂಬಿ ಇವ್ಣಾಮ ಏಕ್‍ಜ಼ಣೊ,ಕರಿ ತೂ ವಾತೆ ಬೋಲಾಸ್ತೆ ತರಿಕಾಥಿಸ್ ಮಾಲುಮ್ ಪಡಾಸ್‌” ಕರಿ ಬೋಲ್ಯು.
74ತದೆ ಪೇತ್ರನೆ, ಇನುಯೋಸ್ ಆಣ್‌ಪ್ರಮಾಣ್‌ಲೀನ್ ಯೋ ಅದ್ಮಿ ಮನ ಮಾಲುಮಸ್‌ಕೊಯ್ನಿ” ಕರಿ ಬೋಲ್ಯೊ.
ತದ್‌ನು-ತದೇಸ್‌ ಮುರ್‌ಗೊ ಬಾಂಗ್‌ ದಿದೊ. 75ತದೆ ಪೇತ್ರನೆ, ಮುರ್‌ಗೊ ಬಾಂಗ್‌ದ್ಯವಾನ ಅಗಾಡಿ, ತೀನ್‍ಹಲ್ಲ ಮಾರಿ ಬಾರೇಮ, ಯೋ ಮನ ಮಾಲುಮ್ ಕೊಯ್ನಿ! ಕರಿ ತೂ ಬೋಲಿಶ್” ಕರಿ ಯೇಸುನೆ ಇನ ಬೋಲ್ಯೊಥೋತೆ ವಾತೆನ ಯಾದ್‌ಕರಿನ್, ಭಾರ್ ಜೈ಼ನ್, ಖ್ಹಡ್‌ಕ್ಯಾಭರೀನ್ ರೋಯೊ.
Trenutno izabrano:
ಮತ್ತಾಯ 26: NTWVe23
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
The New Testament in Waghri Language © The Word for the World International and Waghri Translation Samiti, Karnataka, 2023.
ಮತ್ತಾಯ 26
26
ಯೇಸುನಿ ವಿರೋದ್ ಮಶ್ಲತ್ ಭಂದಾಯುತೆ
(ಮಾರ್ಕ 14:1-2; ಲೂಕ 22:1-2; ಯೋಹಾನ 11:45-53)
1ಯೇಸುನೆ ಆವಾತೆಖ್ಹಾರಿ ಬೋಲಿನ್ ಖತಮ್ ಕರಾನ ಬಾದ್ಮ, ಇನ ಶಿಷ್ಯರ್‌ನ, 2“ಬಿಜು಼ ಬೇ ದನ್ಮ ಪಸ್ಕ ಪೂಜಾ಼ ಆವ್‍ಶೆಕರಿ ತುಮೂನ ಮಾಲುಮ್; ತದೆ ಅದ್ಮಿನೊ ಛಿಯ್ಯಾನ ಶಿಲ್‌ಬೇಪರ್ ನಾಖಾನಖ್ಹಾಜೆ ಇವ್ಣಹಾತ್ಮ ದಿನಾಕ್‌ಶೆ” ಕರಿ ಬೋಲ್ಯೊ.
3ತದೆ ಗಲ್‌ಢಯಾಜಕರ್‌ಬಿ ಅಜು಼ ಶಾಣುಖ್ಹಾರು ಮಹಾಯಾಜಕ್ ಕಾಯಫನ ಮಹೇಲ್‌ಮ ಮಳೀನ್ಆಯು, 4ಯೇಸುನ ಕಿನಾಬಿ ಮಾಲುಮ್‌ಕೊಂತೆ ಇಮ್‌ ಧರೀನ್, ಮರೈನಾಕ್ಣು ಕರಿ ವಾತೆ ಕರಿಲಿದು. 5“ತೋಬಿ ಪೂಜಾ಼ನಿ ವಖ್ಹತ್‌ಮ ನಾ ಧರ್‌ನು, ಶನಕತೊ ಅಪ್ಣ ಅದ್ಮಿಮ ಕಲ್ಹಾಗಟ್ ಪಡಿಜಾ಼ಶೆ” ಕರಿ ಬೋಲಿಲಿದು.
ಬೆಥಾನ್ಯಾಮ ಯೇಸುನ ಅಬಿಷೇಕ್ ಹುಯೂತೆ
(ಮಾರ್ಕ 14:3-9; ಯೋಹಾನ 12:1-8)
6ಯೇಸು ಬೇಥಾನ್ಯಮ ಸೀಮೋನ್ನ ಘರ್‌ಮ ಥೊ, ಆ ಸೀಮೋನ್ ಅಗಾಡಿ ಖೋಡ್‍ವಾಳೊ ಹುಯಿರ‍್ಹೋಥೊ. 7ಯೇಸು ಖಾಣು ಖಾವಾನಿ ವಖ್ಹತ್‌ಮ, ಏಕ್‌ ತಯೇಡ ಘಣ ಮೋಲ್ನು ವಾನು ತೇಲ್ನ ಧೋಳ ಬಂಡಾನಿ ಶೀಶಿಮ ಲೀನ್, ಇನಾಕನ ಆಯಿನ್, ಯೋ ತೇಲ್ನ ಇನ ಮಾಥಪರ್ ರಂಚಿ. 8ಅನ ದೇಖಿನ್, ಶಿಷ್ಯರ್‌ನೆ ಖೀಜ಼್ ಕರ‍್ಯಾ, ಅಜು಼, “ಆ ವಾನು ತೇಲ್ನ ಶನ ಲುಕ್ಷಾನ್ ಕರಿ? 9ಆ ತೇಲ್ನ ಘಣ ಪೈಶಾನ ವೇಚಿನ್, ಆವಾಸ್ತೆ ಪೈಶಾನ ಗರೀಬ್‌ನ ದಿಯ್ಯೆಜಾ಼ಯಿಥೂನಿ?” ಕರಿ ಬೋಲ್ಯ.
10ಯೇಸುನೆ ಇವ್ಣೆ ಬೋಲುಕರಾತೆ ಮಾಲುಮ್ ಕರಿಲೀನ್ ಇವ್ಣುನ, “ತುಮೆ ಆ ತಯೇಡಾನ ಶನ ಖ್ಹತವ್‍ಕರಸ್ತೆ? ಅನೆ ಮಾರಖ್ಹಾಜೆ ಘಣು ಅಛ್ಛು಼ಕಾಮ್ ಕರಿರಾಖೀಸ್. 11ಗರೀಬ್ ಅದ್ಮಿಖ್ಹಾರು ಕದೇಬಿ ತುಮಾರಕನ ರ‍್ಹಿಶೆ, ಕತೋಬಿ ಮೇ ಹಮೇಶ ತುಮಾರಕನ ರ‍್ಹೀಶ್ ಕೊಯ್ನಿ. 12ಮೇ ಮರ್‌ವಾನ ಬಾದ್ಮ, ಮಾರು ಶರೀರ್‌ನ ಮಖ್ಹಾಣ್ಯು ಕರಾನಟೇಕೆ, ಅನೆ ಮಾರ ಆಂಗ್‌ತನ್‌ಪರ್ ವಾನು ತೇಲ್ನ ರಂಚಿರಾಖಿಸ್. 13ಮೇ ತುಮುನ ಖ್ಹಾಚಮಾಬಿ ಬೋಲುಸ್, ಹಿಡಿ ಜಗತ್‌ಮ ಆ ಅಛ್ಛಿ ಖಬರ್ ಕಿಜ಼್ಜ-ಕಿಜ಼್ಜ ಬೋಲಾವ್‌ಶೇಕಿ, ಹಿಜ್ಜಾ಼ ಖ್ಹಾರು ಅನೆ ಕರೀತೆ ಇನಾಬಿ ಅನಿ ಯಾದ್‌ನಖ್ಹಾಜೆ ಬೋಲ್‌ಶೆ” ಕರಿ ಬೋಲ್ಯೊ.
ಯೂದಾನೆ ಯೇಸುನ ಧೋಕೇಥಿ ಧರಿದ್ಯವಾನ ಮಾನಿಗಯೋತೆ
(ಮಾರ್ಕ 14:10-11; ಲೂಕ 22:3-6)
14ಅನ ಬಾದ್ಮ ಭಾರ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೊಥೋತೆ ಇಸ್ಕರಿಯೋತ ಯೂದಾನೆ ಗಲ್‌ಢಯಾಜಕರ್‌ಕನ ಜೈ಼ನ್, 15“ಮೇ ಇನ ಧೋಕೇಥಿ ಧರಿದಿದೋತೊ, ತುಮೆ ಮನ ಶಾತ್ ದಿಶು?” ಕರಿ ಪುಛಾ಼ಯೊ. ತದೆ ಇವ್ಣೆ ಡೋಡಿಖ್ಹ್‌ ರೂಪಾನು ಬಿಲ್ಲಾನ ಗಣೀನ್, ಇನ ದಿದು. 16ತಪ್‌ಥೊ ಯೂದ ಯೇಸುನ ಧರಿದ್ಯವಾನಿ ಬರೋಬರ್‌ನಿ ವಖ್ಹತ್‌ನಖ್ಹಾಜೆ ಜ಼ಪೂಕರ್ತೊಥೊ.
ಯೇಸುನೆ ಇನ ಶಿಷ್ಯರ್‌ನ ಜೋ಼ಡೆ ಪಸ್ಕಾನು ಖಾಣು ಖಾದೋತೆ
(ಮಾರ್ಕ 14:12-21; ಲೂಕ 22:7-13,21-23; ಯೋಹಾನ 13:21-30)
17ಖಾಟುಕೊಂತೆ ರೋಟಾನು ಪೂಜಾ಼ನ ಪಹಿಲ ದನ್ನೆ, ಶಿಷ್ಯರ್‌ ಯೇಸುಕನ ಐನ್, “ಹಮೆ ತಾರಖ್ಹಾಜೆ ಪಸ್ಕಾನು ಖಾಣನ ಕಿಜ಼್ಜಾ ತೈಯಾರ್ ಕರ‍್ನು?” ಕರಿ ಪುಛಾ಼ಯಾ.
18ತದೆ ಯೇಸುನೆ ಇವ್ಣುನ, “ತುಮೆ ಖ್ಹಯೇರ್‌ಮ ಮೇ ವತಾಳ್ಯೊತೆ ಇನಕನ ಜೈ಼ನ್ ಇನ, ‘ಮಾರಿ ವಖ್ಹತ್ ಖನ್ನೆ ಐಗೈ, ತಾರ ಘರ್‌ಮ ಮಾರ ಶಿಷ್ಯರ್‌ನ ಜೋ಼ಡೆ ಪಸ್ಕಾನು ಖಾಣು ಖವುಸ್ ಕರಿ ಗುರುನೆ ಬೋಲ್ಯೊ’ ಕರಿ ಬೋಲೊ.”
19ಶಿಷ್ಯರ್‌ನೆ ಯೇಸುನೆ ಇವ್ಣುನ ಬೋಲ್ಯೋತೆ ಇಮ್ಮಸ್ ಕರ‍್ಯಾ ಅಜು಼ ಪಸ್ಕಾನ ಖಾಣನ ತೈಯಾರ್ ಕರ‍್ಯಾ.
20ಖ್ಹಾಂಜ಼್ ಹುವ್ವಾದೀನ್, ಯೇಸು ಇನ ಭಾರ ಶಿಷ್ಯರ್‌ನ ಜೋ಼ಡೆ ಖಾಣನ ಬೇಶಿಗಯೊ. 21ಇವ್ಣೆ ಖಾಣು ಖವ್‍ಕರಾನಿ ವಖ್ಹತ್‌ಮ, ಯೇಸುನೆ ಇವ್ಣುನ, “ಮೇ ಖ್ಹಾಚಮಾಬಿ ಬೋಲುಸ್ಕಿ, ತುಮಾರಾಮ ಏಕ್‌ ಜ಼ಣೊ ಮನ ಧೋಕೇಥಿ ಧರಿದಿಶೆ” ಕರಿ ಬೋಲ್ಯೊ.
22ತದೆ ಶಿಷ್ಯರ್‌ ಖ್ಹಾರು ಘಣು ದುಖ್‌ಥಿ, “ಪ್ರಭು, ಖ್ಹಾಚಮಾಬಿ ಮೇ ಕಾಹೆ ಕೊಯ್ನಿ?” ಕರಿ ಏಕ್‌ನ ಬಾದ್ಮ ಏಕ್‌ ಇನ ಪುಛಾ಼ವಲಗ್ಯಾ.
23ಯೇಸುನೆ, “ಕೋಣ್ ಮಾರ ಜೋ಼ಡ್ಮ ಕಟೋರಿಮ ಚೋ಼ಪ್‌ಡಾಸ್ಕಿ, ಯೋಸ್ ಮನ ಧೋಕೇಥಿ ಧರಿದ್ಯವಾಳೊ” ಕರಿ ಬೋಲ್ಯೊ. 24ವಚನ್‌ಮ ಲೀಖೈರ‍್ಹೂತೆ ಇಮ್ಮಸ್, ಅದ್ಮಿನೊ ಛಿಯ್ಯೊ ಮರ್‌ಶೆ, ಕತೋಬಿ ಕೋಣ್ ಅದ್ಮಿನೊ ಛಿಯ್ಯಾನ ಧರಿದಿಶೇಕಿ, ಇನಿ ಹಾಲ್ನ ಶಾತ್ ಬೋಲು! ಯೋ ಅದ್ಮಿ ಪೈದಾ ನಾಸ್ ಹುಯುಹೊತ್ತೊ ಇನ ಅಛ್ಛು಼ ಥೂ.
25ತದೆ ಇನ ಧೋಕೇಥಿ ಧರಿದೇಣು ಕರಿ ಥೋತೆ ಯೂದಾನೆ, “ಗುರು, ಖ್ಹಾಚಮಾಬಿ ಯೋ ಮೇತೊ ಕಾಹೆನಿ?” ಕರಿ ಪುಛಾ಼ಯೊ.
ಯೇಸುನೆ ಇನ, “ತೂಸ್ ಬೋಲ್ಯೋನಿ” ಕರಿ ಜ಼ವಾಬ್ ದಿದೊ.
ಪ್ರಭುನು ಭೋಜನ್
(ಮಾರ್ಕ 14:22-26; ಲೂಕ 22:14-20; 1 ಕೊರಿಂಥ 11:23-25)
26ಇವ್ಣೆ ಖಾಣು ಖವ್‍ಕರಾನಿ ವಖ್ಹತ್‌ಮ, ಯೇಸುನೆ ರೋಟಾನ ಪಾಡೀನ್,ದೇವ್ನ ಧನ್ಯವಾದ್ ಕರೀನ್, ಇನ ತೋಡಿನ್, ಇನ ಶಿಷ್ಯರ್‌ನ ದೀನ್, “ಅಲ್ಲೇವೊ, ಅನಖಾವೊ, ಆ ಮಾರು ಶರೀರ್” ಕರಿ ಬೋಲ್ಯೊ.
27ಅನಕೇಡೆಥು ಕಟೋರಿನ ಪಾಡಿನ್, ದೇವ್ನ ಧನ್ಯವಾದ್ ಕರೀನ್, ಇವ್ಣುನ ದೀನ್, “ತುಮೆ ಖ್ಹಾರು ಅನಾಮ ಪೀಯ್ಯೊ. 28ಆ ಮಾರು ಲ್ಹೋಯಿ, ಆ ದೇವ್‌ನು ನವು ಒಪ್ಪಂದಾನನ ಮುದ್ರೊ ಮರೈಹುಯು ಮಾರು ಲ್ಹೊಯಿ; ಕೈಯೆಕ್ಕಿ ಅದ್ಮಿನು ಪಾಪ್‌ಖ್ಹಾರು ಮಾಪ್‌ ಕರಾನಖ್ಹಾಜೆ ರಂಚಾ಼ಯುತೆ ಮಾರು ಲ್ಹೊಯಿ. 29ಮೇ ತುಮೂನ ಬೋಲುಸ್ಕಿ, ಹಂಕೇಥು ಧರೀನ್, ಬಾನಿ ರಾಜ್ಯಮ ನವು ದ್ರಾಕ್ಷಿನು ರಖ್ಹ್‌ ಪಿಯ್ಯಾನ ದನ್‌ತೋಡಿ, ಅನ ಮೇ ಪಾಛೊ಼ ಪೀಶಸ್ ಕೊಯ್ನಿ” ಕರಿ ಬೋಲ್ಯೊ.
30ಅನಕೇಡೆಥು ಇವ್ಣೆ ಸ್ತುತಿನು ಗೀದ್‌ ಬೋಲಿನ್ ಆಲಿವ್ ಪಹಡ್‌ಕನ ಚ಼ಲೇಗಯ.
ಪೇತ್ರ ಝೂ಼ಟಿ ಬೋಲ್‌ಶೆ ಕರಿ ಯೇಸುನೆ ಬೋಲ್ಯೋತೆ
(ಮಾರ್ಕ 14:27-31; ಲೂಕ 22:31-34; ಯೋಹಾನ 13:36-38)
31ತದೆ ಯೇಸುನೆ ಇವ್ಣುನ, “ಆ ರಾತೆ ತುಮೆ ಖ್ಹಾರುಸ್ ಮನ ಮ್ಹೆಂದಿನ್, ಮಿಲೈಜಾ಼ಶು; ದೇವ್ ವಚನ್‌ಮ ಬೋಲುಕರಸ್ ಮೆ ಮೇಂಢ ಚ಼ರಾವವಾಳಾನ ಮರ್‌ನಾಕಿಶ್, ತದೆ ಮಂಧಾಮಾಥು ಮೇಂಢ ಛಿಡ್‌ಗರ್‌ ಹುಯಿಜಾ಼ಶೆ, 32ಕತೋಬಿ ಮೇ ಜಿವ್ತೊಹುಯಿನ್, ಉಠಾನ ಬಾದ್ಮ ತುಮಾರೇಥಿ ಅಗಾಡಿ ಗಲಿಲಾಯ ಜೈ಼ಶ್” ಕರಿ ಬೋಲ್ಯೊ.
33ತದೆ ಪೇತ್ರನೆ ಯೇಸುನ, “ಖ್ಹಾರು ಡರಿನ್, ತುನ ಮ್ಹೆಂದಿದಾತೋಬಿ ಮೇ ತುನ ಮ್ಹೇಲಿಶ್ ಕೊಯ್ನಿ” ಕರಿ ಬೋಲಾಖ್ಹತರ್,
34ಯೇಸುನೆ ಪೇತ್ರನ, “ಖ್ಹಾಚಮಾಬಿ ತುನ ಬೋಲುಸ್ಕಿ, ಆ ರಾತೇಸ್ ಮುರ್‌ಗೊ ಬಾಂಗ್‌ ದ್ಯವಾನ ಅಗಾಡಿ ತೂ ಮಾರಿ ಬಾರೇಮ, ‘ಯೋ ಮನ ಮಾಲುಮ್ ಕೊಯ್ನಿ’ ಕರಿ ತೀನ್‍ಹಲ್ಲ ಬೋಲಿಶ್” ಕರಿ ಬೋಲ್ಯೊ.
35ಪೇತ್ರನೆ, “ಮೇ ತಾರ ಜೋ಼ಡ್ಮ ಮರಾನು ರ‍್ಹಯುತೋಬಿ, ಮೆ ತುನ ಮಾಲುಮ್ ಕೊಯ್ನಿ ಕರಿ ಕೋ ಬೋಲಿಶ್‌ನಿ” ಕರಿ ಬೋಲ್ಯೊ.
ಅಜು಼ ಬಿಜಾ಼ಖ್ಹಾರ ಶಿಷ್ಯರ್‌ನೇಬಿ ಇಮ್ಮಸ್ ಬೋಲ್ಯ.
ಯೇಸು ಗೆತ್ಸೆಮನೆಮ ಪ್ರಾರ್ಥನೆ ಕರ‍್ಯೊತೆ
(ಮಾರ್ಕ 14:32-42; ಲೂಕ 22:39-46)
36ಅನಕೇಡೆಥು ಯೇಸು ಇನ ಶಿಷ್ಯರ್‌ನ ಜೋ಼ಡೆ ಗೆತ್ಸೆಮನೆ ಕರಿ ಬಾಗ್‌ನ ಗಯೊ, ಇವ್ಣುನ, “ಹಜ್ಜಾ಼ಸ್ ಬೇಖ್ಹೊ, ಮೇ ಹಿಜ್ಜಾ಼ ಜೈ಼ನ್, ಪ್ರಾರ್ಥನೆ ಕರೀನ್, ಆವುಸ್‌” ಕರಿ ಬೋಲ್ಯೊ. 37ಅಮ್ ಬೋಲಿನ್, ಪೇತ್ರ ಅಜು಼ ಜೆಬೆದಾಯನ ಛಿಯ್ಯಾವ್‍ನ ಇನಜೋ಼ಡೆ ಬುಲೈಲಿ ಗಯೊ. ತದೆ ಯೇಸುನ ಘಣು ಘಬ್ರಾವ್‍ಣಿ ಹುಯು ಅಜು಼ ಯೋ ದುಖ್‌ಥಿ ಭರೈಗೊ. 38ಅಜು಼ ಯೇಸುನೆ ಇವ್ಣುನ, “ಮಾರೊ ಜಾನ್‌ ಮರ‍್ವಎತ್ರೆ ದುಖ್‌ಮ ಛಾ಼. ತುಮೆ ಹಾಸ್‌ರ‍್ಹೀನ್, ಮಾರ ಜೋ಼ಡೆ ಹೊಷಾರಿ ರ‍್ಹವೊ” ಕರಿ ಬೋಲ್ಯೊ.
39ಅನಕೇಡೆಥು ಯೋ ಜ಼ರ ಖ್ಹಾಮ್ಣೆ ಜೈ಼ನ್, ಜ಼ಮೀನ್‌ಪರ್ ಆಡೊ ಪಡೀನ್, “ಮಾರೊ ಬಾ, ಹೋತು ಉಶೇತೊ, ಆ ವದೇಖ್ಹಾನಿ ಕಟೋರಿ ಮನ ಮ್ಹೆಂದಿನ್ ಜಾ಼ವಾನಿಘೋಣಿ ಕರ್‌! ತೋಬಿ ಮಾರಿ ಮರ್ಜಿನಿಘೋಣಿ ಕಾಹೆ, ತಾರಿ ಮರ್ಜಿನಿ ಘೊಣಿಸ್ ಹುವಾದೆ” ಕರಿ ಪ್ರಾರ್ಥನೆ ಕರ‍್ಯೊ.
40ಅನ ಯೇಸು ಯೋ ಶಿಷ್ಯರ್‌ಕನ ಆಯಿನ್, ಇವ್ಣೆ ಖ್ಹುತಾತೆ ದೇಖಿನ್, ಪೇತ್ರನ, “ಅಮ್‌ಕಿ ಶು? ತುಮೆ ಮಾರ ಜೋ಼ಡೆ ಏಕ್‌ ಘಡೀಬಿ ಹೊಷಾರಿ ರ‍್ಹವಾನ ಕೋ ಹೋಯ್ನಿಕಿ ಶು? 41ಶೋದನೆಮ ಪಡ್ಣುನಾತೆ ಇಮ್‌ ಹೊಷಾರಿ ರ‍್ಹೀನ್, ಪ್ರಾರ್ಥನೆ ಕರೊ. ಮನ್ ಛಾ಼ ಖ್ಹಾಚಸ್, ಕತೋಬಿ ಶರೀರ್‌ನ ಶಕತ್ ಪುರಾಕೊಯ್ನಿ” ಕರಿ ಬೋಲ್ಯೊ.
42ಬಿಜು಼ ಪಾಛೊ಼ ಭೇನೆಹಲ್ಲ ಜೈ಼ನ್, “ಮಾರೊ ಬಾ, ಮೇ ಆ ವದೇಖ್ಹಾನಿ ಕಟೋರಿನ ಪಿಯ್ಯಾಶೆ, ಆ ಮನ ಮ್ಹೆಂದಿನ್ ನಾ ಜಾ಼ವ್ಣುಕರಿ ತಾರಿ ಮರ್ಜಿ ಉಶೇತೊ, ತಾರಿ ಮರ್ಜಿನಿಘೋಣಿಸ್ ಹುವಾದೆ” ಕರಿ ಬೋಲಿನ್, ಪ್ರಾರ್ಥನೆ ಕರ‍್ಯೊ. 43ಅನ ಬಾದ್ಮ ಪಾಛೊ಼ ಶಿಷ್ಯರ್‌ಕನ ಐನ್, ಇವ್ಣೆ ಖ್ಹುತಾತೆ ದೇಖ್ಯೊ; ಇವ್ಣ ಡೋಳಾಮ ನಿಂದರ್‌ ಚು಼ವ್‍ಕರ್ತಿಥಿ.
44ಅನಕೇಡೆಥು ಪಾಛೊ಼ ಇವ್ಣುನ ಮ್ಹೆಂದಿನ್ ಜೈ಼ನ್, ಯೋಸ್ ವಾತೇನ ಬೋಲ್ತೊಹುಯಿನ್, ತೀನ್ನೆಹಲ್ಲ ಪ್ರಾರ್ಥನೆ ಕರ‍್ಯೊ. 45ಬಾದ್ಮ ಯೋ ಬಿಜು಼ ಪಾಛೊ಼ಫರಿನ್, ಇನ ಶಿಷ್ಯರ್‌ಕನ ಆಯಿನ್, “ತುಮೆ ಬಿಜೂ಼ಬಿ ಖ್ಹುಯಿನ್, ಅರಾಮ್‌ ಕರುಕರಾಸ್ಕಿ ಶು? ಹಂದೇಖೊ, ಅದ್ಮಿನೊ ಛಿಯ್ಯಾನ ಪಾಪಿ ಅದ್ಮಿಯೇನ ಹಾತ್‌ಮ ದೆವೈಜಾ಼ಶೆ. 46ಉಠೊ, ಜ಼ಯ್ಯೆ. ಮನ ಧೋಕೇಥಿ ಧರಿದ್ಯವಾಳೊ ಖನ್ನೆಸ್‌ ಐರ‍್ಹೋಸ್” ಕರಿ ಬೋಲ್ಯೊ.
ಯೇಸುನ ಧರ‍್ಯೂತೆ
(ಮಾರ್ಕ 14:43-50; ಲೂಕ 22:47-53; ಯೋಹಾನ 18:3-12)
47ಯೇಸು ಅಜೂ಼ಬಿ ವಾತೆ ಬೋಲುಕರಾತೆ ತದ್ದೇಸ್, ಇನ ಭಾರಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೊಥೋತೆ ಯೂದ ಹಿಜ್ಜಾ಼ ಆಯೊ.ಇನ ಜೋ಼ಡ್ಮ ಗಲ್‌ಢಯಾಜಕರ್‌ ಅಜು಼ ಶಾಣುಖ್ಹಾರು ಬೋಲಿ ಮೋಕ್‌ಲ್ಯುತೆ ಅದ್ಮಿನಿ ಏಕ್‌ ಮೋಟಿ ಝೂ಼ಂಡಸ್ ತಲ್ವಾರೆ ಅಜು಼ ಲಠ್ಠ ಧರಿಲಿನ್ ಹಿಜ್ಜಾ಼ ಆಯು. 48ಯೇಸುನ ಧೋಕೇಥಿ ಧರಿದ್ಯವಾಳೊ ಯೋ ಅದ್ಮಿನಿ ಝೂ಼ಂಡ್‌ನ, “ಮೇ ಕಿನ ಬುಚ್ಚಾ಼ ದೆವ್‌ಸ್ಕಿ ಯೋಸ್ ತುಮೂನ ಹೋಣುತೆ ಅದ್ಮಿ. ಇನ ಧರೊ!” ಕರಿ ಖ್ಹಣೇದ್ ಬೋಲಿ ದೀರಾಖ್ಯೊಥೊ
49ಇಮ್ಮಸ್ ಯೂದ ಯೇಸುನ ಖನ್ನೆ ಜೈ಼ನ್, “ಗುರು, ಶೂಲ” ಕರಿ ಬೋಲಿನ್, ಇನ ಬುಚ್ಚಾ಼ ದಿದೊ.
50ತದೆ ಯೇಸುನೆ, “ದೋಸ್, ತೂ ಕರಾನ ಆಯೋತೆ ಕಾಮ್ ಆಸ್ಕಿಶು?” ಕರಿ ಬೋಲ್ಯೊ.
ತದೆ ಇವ್ಣೆ ಖನ್ನೆ ಐನ್, ಯೇಸುಪರ್ ಹಾತ್‌ ನಾಖಿನ್, ಇನ ಧರ‍್ಯು. 51ಧರ್‌ತಾಸ್‌ನ ಯೇಸುನ ಜೋ಼ಡ್ಮ ಥೂತೆ ಇವ್ಣಾಮ ಏಕ್‌ನೆ, ಇನಿ ತಲ್ವಾರ್‌ನ ಕಾಡಿನ್, ಗಲ್‌ಢಯಾಜಕ್‌ನ ಆಳ್‌ನ ಮಾರಿನ್, ಇನು ಕಾನ್ನ ಕತ್ರಿನಾಖ್ಯೊ. 52ತದೆ ಯೇಸುನೆ ಇನ, “ತಾರಿ ತಲ್ವಾರ್‌ನ ಕಷ್‌ಬಂದ್‌ನಿ ಚ಼ಂಚಿಮ ಪಾಛು಼ ಘಾಲ್‌; ತಲ್ವಾರ್‌ಥಿ ಮಾರವಾಳು ಖ್ಹಾರು ತಲ್ವಾರ್‌ಥೀಸ್ ಮರ್‌ಶೆ. 53ಮೇ ಮಾರ ಬಾನ ಬೋಲಿಲಿದೋತೊ, ಯೋ ಮನ ಮದತ್ನಖ್ಹಾಜೆ ದೇವ್ ದೂತರ್‌ನು ಭಾರ ದಂಡ್‌-ದಳ್‌ವಾಯಿನಿ ಝೂ಼ಂಡ್‌ನ ಮೋಕಲ್‌ಶೆ ಕರಿ ತುನ ಮಾಲುಮ್ ಕೊಯ್ನಿಕಿ ಶು? 54ಕತೋಬಿ ಇಮ್‌ ಮೋಕ್‌ಲ್ಯೋತೊ, ಮನ ಅಮ್ನು ಖ್ಹಾರು ಹೋಣು ಕರಿ ವಚನ್‌ಮ ಬೋಲೈತೆ ವಾತೆ ಕಿಮ್ ಚಾ಼ಲ್‌ಷೆ?” ಕರಿ ಬೋಲ್ಯೊ.
55ಯೋಸ್ ವೇಳ್ಮ ಯೇಸು ಝೂ಼ಂಡ್‍ಭಂದೈನ್ ಆಯಿರ‍್ಹುಥೂತೆ ಅದ್ಮಿವೋನ, “ಚೋ಼ರ್‌ನ ಧರಾನಿಘೋಣಿ ತಲ್ವಾರೆ ಅಜು಼ ಲಠ್ಠ ಪಳ್ಳಿನ್‌, ಮನ ಧರಾನಖ್ಹಾಜೆ ಆಯಾಕಿ ಶು? ಮೇ ದನ್‍ರೋಜ಼್, ಮಂದಿರ್‌ಮ ಬೇಶಿನ್, ವಚನ್ ಬೋಲಿನ್ ದೇವ್‌ಕರ್‌ತೊಥೋತೆ ತದೆ ತುಮೆ ಮನ ಧರ‍್ಯಾಕೊಯ್ನಿ. 56ಕತೋಬಿ ಪ್ರವಾದಿ ಖ್ಹಾರು ಲೀಖ್ಯೂತೆ ವಚನ್ ಪೂರಹುವಾನ ಟೇಕೆ ಅಮ್ ಹುಯು” ಕರಿ ಬೋಲ್ಯೊ.
ತದೆ ತಮಾಮ್‌ ಶಿಷ್ಯರ್‌ ಇನ ಮ್ಹೆಂದಿನ್, ನಾಶಿ ಚ಼ಲೇಗಯ.
ನ್ಯಾವ್‌ನು ಪಂಚಾಯತ್‌ನ ಖ್ಹಾಮ್ಣೆ ಯೇಸುನ ಭೀರಾಖ್ಯೂತೆ
(ಮಾರ್ಕ 14:53-65; ಲೂಕ 22:54-55,63-71; ಯೋಹಾನ 18:13-14,19-24)
57ಯೇಸುನ ಧರ‍್ಯೂತೆ ಇವ್ಣೆ ಇನ ಗಲ್‌ಢಯಾಜಕ್‌ನ ಕಾಯಫನ ಘರೆ ಲೀನ್‌ಗಯು. ಹಿಜ್ಜಾ಼ ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೆ, ಅಜು಼ ಶಾಣು ಖ್ಹಾರು ಎಕ್ಟು ಹುಯಿನ್ ಐರ‍್ಹುಥು. 58ಪೇತ್ರ ದೂರ್‌ಥೋಸ್ ಯೇಸುನ ಪೀಠೆ-ಪೀಠೆ ಜಾ಼ತೊಹುಯಿನ್, ಮಹಾಯಾಜಕ್‌ನ ಘರ್‌ನ ಖ್ಹಾಮ್ಣೆನು ಬಲ್ಡತೋಡಿ ಆಯಿನ್, ಮಹಿ ಧಕೆಲ್‌ತೊ ಅಯಿನ್, ಇನಿ ಹಾಲ್ ಶಾತ್ ಉಷೆಕರಿ ದೇಕ್ಣು ಕರಿ, ಕಾವ್ಲಿನ ಶಿಪಾಯಿನ ಜೋ಼ಡೆ ಜೈ಼ನ್, ಬೇಶಿಗಯೊ. 59ತದೆ ಗಲ್‌ಢಯಾಜಕರ್‌ ಅಜು಼ ಯೆಹೂದಿ ಪಂಚಾಯತ್‌ನು ಹಿಡಿ ಅದ್ಮಿ ಶಾತ್‌ತೋಬಿ ಗಲತ್‌ ಸಬೂತ್ ಢೂಂಡಿನ್, ಯೇಸುನ ಮರೈನಾಖಿದೇಣು ಕರಿ ಕರ‍್ಯು. 60ಘಣು ಅದ್ಮಿ ಖ್ಹಾಮ್ಣೆ ಆಯಿನ್, ಯೇಸುಪರ್ ಝೂ಼ಟಿ ಸಾಕ್ಷಿಯೆ ಬೋಲ್ಯು, ತೋಬಿ ಇವ್ಣಿ ಸಾಕ್ಷಿಮ ಶಾತ್ಬಿ ಗಲತ್‌ ಮಳ್ಯುಕೊಯ್ನಿ. ಖ್ಹರ್ತಿಮ ಬೇ ಅದ್ಮಿ ಖ್ಹಾಮ್ಣೆ ಆಯಿನ್, 61“ದೇವ್‌ನು ಮಂದಿರ್‌ನ ರಡ್‌ಕೈ ನಾಖಿದೀನ್, ತೀನ್ ದನ್ಮ ಅನ ಪಾಛು಼ ಭಾಂದಾನ ಮನ ಹುವಾಸ್ ಕರಿ ಆ ಅದ್ಮಿನೆ ಬೋಲ್ಯೊ” ಕರಿ ಬೋಲ್ಯು.
62ತದೆ ಗಲ್‌ಢೊಯಾಜಕ್‌ನೆ ಉಠಿ ಭೀರಿನ್, ಯೇಸುನ, “ತೂ ಶಾತ್ಬಿ ಜವಾಬ್ ಕೋ ದೇಯ್ನಿಕಿ ಶು? ಅವ್ಣೆ ತಾರಪರ್ ಬೋಲುಕರಸ್ತೆ ಆ ಸಾಕ್ಷಿ ಖ್ಹಾಚಸ್‌ಕಿ ಶು?” ಕರಿ ಪುಛಾ಼ಯೊ. 63ಕತೋಬಿ ಯೇಸು ಖ್ಹೊಪ್ ಥೊ. ತದೆ ಮಹಾಯಾಜಕ್‌ನೆ ಪಾಛೊ಼, “ತುನ ಜಿವ್ತೊ ದೇವ್ನ ನಾಮ್‌ಪರ್‌ ಆಣ್‍ಲೀನ್, ಪುಛಾ಼ವುಸ್, ತೂ ದೇವ್‌ನೊ ಛಿಯ್ಯೊ ಕ್ರಿಸ್ತಸ್‌ಕಿಶು? ಹಮೂನ ಬೋಲ್” ಕರಿ ಬೋಲ್ಯೊ.
64ಯೇಸುನೆ ಇನ, “ತುನೇಸ್ ಬೋಲ್ಯೋನಿ; ಅತ್ರೇಸ್ ಕಾಹೆತೆ ಮೇ ತುಮೂನ ಬೋಲುಸ್ಕಿ, ಹಂಕೇಥು ಅದ್ಮಿನೊ ಛಿಯ್ಯೊ ಮಹಾನ್ ಶಕತ್‌ವಾಳಾನಿ ಖಾವಿಬಾಜು಼ಮ ಬೆಠೊರ‍್ಹಿಶೇತೆ ಅಜು಼ ಆಬ್‍ನ ವಾದ್ಳಪರ್ ಬೇಶಿನ್ ಆವ್‌ಶೇತೆ ತುಮೆ ದೇಕ್‌ಶು!” ಕರಿ ಬೋಲ್ಯೊ.
65ತದೆ ಮಹಾಯಾಜಕ್‌ನೆ ಇನ ಲುಂಗ್ಡಾನ ಫಾಡಿಲೀನ್, “ಆ ದೇವ್ನ ದೂಷಣೆ ಕರಾನಿ ವಾತೆ! ಅನೇಥಿ ಬಿಜು಼ ಖೆವಿ ಸಾಕ್ಷಿ ಅಪ್ಣುನ ಹೋಣು? ಅನೆ ದೇವ್ನ ಗಾಳೆಕರಾನಿ ವಾತೆ ಬೋಲ್ಯೋತೆ ತುಮೇಸ್ ಖ್ಹಮ್‌ಜ್ಯಾನಿ? 66ತುಮೂನ ಕಿಮ್ ದೆಖಾವಸ್?” ಕರಿ ಬೋಲ್ಯೊ. ತದೆ ಇವ್ಣೆ,
“ಆ ದೋಶಿ ಬಿಜು಼ ಮರ್‌ವಾನ ಲ್ಹಾಯಕಸ್ ಛಾ಼” ಕರಿ ಜ಼ವಾಬ್ ದಿದು.
67ಅಜು಼ ಇವ್ಣೆ ಯೇಸುನ ಮ್ಹೋಡಾಪರ್ ಥೂಕಿನ್, ಇನ ಗುಖ್ಹ್‌ತೊ ದಿದು; ಥೋಡು ಜ಼ಣು ಇನ ಕಲ್ಲಪರ್ ಮಾರಿನ್, 68“ಕ್ರಿಸ್ತ, ತುನ ಮಾರ‍್ಯೂತೆ ಕೋಣ್? ಹಮೂನ ಪ್ರವಾದ್‌ನೆ ಬೋಲ್?” ಕರಿ ಬೋಲ್ಯು.
ಪೇತ್ರನೆ ಯೇಸು ಮಾಲುಮ್ ಕೊಯ್ನಿ ಕರಿ ಬೋಲ್ಯೋತೆ
(ಮಾರ್ಕ 14:66-72; ಲೂಕ 22:56-62; ಯೋಹಾನ 18:15-18,25-27)
69ಪೇತ್ರ ಭಾರ್ ಚೌ಼ಕ್‌ಮ ಬೆಠೋಥೊ, ಹಿಜ್ಜಾ಼ ಏಕ್‌ಜ಼ಣಿ ದಾಸಿ ಇನಾಕನ ಐನ್, “ತೂಬಿ ಗಲಿಲಾಯಾನೊ ಯೇಸುನ ಜೋ಼ಡೆ ಥೋನಿ” ಕರಿ ಬೋಲಿ.
70ಕತೋಬಿ ಇನೆ, “ಕೊಯ್ನಿ, ತೂ ಶಾತ್ ಬೋಲುಕರಾಸ್ಕಿ ಮನ ಮಾಲುಮ್ ಕೊಯ್ನಿ” ಕರಿ ಖ್ಹಾರಾನ ಖ್ಹಾಮ್ಣೆ ಬೋಲ್ಯೊ. 71ಅಜು಼ ಯೋ ನಿಕ್ಳಿನ್, ಬಾಕಲ್‍ಭಣಿ ಚ಼ಲೆಗಯೊ. ತದೆ ಹಿಜ಼್ಜಾ ಥೀತೆ ಬಿಜೇಕ್ ಆಳ್‌ನೆ ಇನ ದೇಖಿನ್, ಹಿಜ್ಜಾ಼ ಥೂತೆ ಅದ್ಮಿ ಖ್ಹಾರಾನ, “ಆಬಿ ನಜ಼ರೇತ್‌ನೊ ಯೇಸುನ ಜೋ಼ಡೆ ಥೊ” ಕರಿ ಬೋಲಿ.
72ಪಾಛೊ಼ ಪೇತ್ರನೆ, “ಕೊಯ್ನಿ, ಯೋ ಅದ್ಮಿ ಕೋಣ್ ಕರಿ ಮನ ಮಾಲುಮ್ ಕೊಯ್ನಿ” ಕರಿ ಆಣ್‍ಲೀನ್, ಬೋಲ್ಯೊ.
73ಜ಼ರಘಡಿನ ಬಾದ್ಮ ಹಿಜ಼್ಜಾ ಭಿಯುಥೂತೆ ಅದ್ಮಿಖ್ಹಾರು ಪೇತ್ರಕನ ಆಯಿನ್, “ಖ್ಹಾಚ಼ಮಾಬಿ ತೂಬಿ ಇವ್ಣಾಮ ಏಕ್‍ಜ಼ಣೊ,ಕರಿ ತೂ ವಾತೆ ಬೋಲಾಸ್ತೆ ತರಿಕಾಥಿಸ್ ಮಾಲುಮ್ ಪಡಾಸ್‌” ಕರಿ ಬೋಲ್ಯು.
74ತದೆ ಪೇತ್ರನೆ, ಇನುಯೋಸ್ ಆಣ್‌ಪ್ರಮಾಣ್‌ಲೀನ್ ಯೋ ಅದ್ಮಿ ಮನ ಮಾಲುಮಸ್‌ಕೊಯ್ನಿ” ಕರಿ ಬೋಲ್ಯೊ.
ತದ್‌ನು-ತದೇಸ್‌ ಮುರ್‌ಗೊ ಬಾಂಗ್‌ ದಿದೊ. 75ತದೆ ಪೇತ್ರನೆ, ಮುರ್‌ಗೊ ಬಾಂಗ್‌ದ್ಯವಾನ ಅಗಾಡಿ, ತೀನ್‍ಹಲ್ಲ ಮಾರಿ ಬಾರೇಮ, ಯೋ ಮನ ಮಾಲುಮ್ ಕೊಯ್ನಿ! ಕರಿ ತೂ ಬೋಲಿಶ್” ಕರಿ ಯೇಸುನೆ ಇನ ಬೋಲ್ಯೊಥೋತೆ ವಾತೆನ ಯಾದ್‌ಕರಿನ್, ಭಾರ್ ಜೈ಼ನ್, ಖ್ಹಡ್‌ಕ್ಯಾಭರೀನ್ ರೋಯೊ.
Trenutno izabrano:
:
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
The New Testament in Waghri Language © The Word for the World International and Waghri Translation Samiti, Karnataka, 2023.