Luk 7
7
Kɛsɨmɛkpa ka oniretua Rom
1Ndi Jisɔs ɔkɨlɔ wɛ kɛlam fɛb nchi ɔra ɔlama ra edimɛlɛ ani fɛb mba wa tumɛ wa dima mɔ, odulɔ Kapanɔm. 2Kɛgbɔ achi, ɛfɔnɔ oniretu ajuaraku a Rom nwu ɔfɔnɔ orin nwu ɔdada mɔ, gbɔ ɔjɔlɛ ebiebi ta ɔnɨŋɔ ba. 3Oniretu nwu okɨlo dim ɔbaŋa Jisɔs, otigɛ anintɨmini akɔratu a Ju, wa dulɔ mɨnɛ waka dɛ Jisɔs ɔwa gban orin ɔwɛn. 4Wa dulɔ wa kɔga Jisɔs, wa ka dɛ mɔ ebiebi ɔwa gban orin oniretu ɔbɛ, “Kum efuufu anyaŋa odumini nwu rɛfɔ! 5Na ɔfɔnɔ rɛda ra ani kɛfɨrɔ kɛchɨl, mɨnɛ ori ɛtɔa nyɔm a Jus ɛyɨl.” 6Ra rɛfɔ adifɛ, Jisɔs ɔtɔrɛ bɛ. Ndi Ɛbɨrɔkpabi ƆKƆKƆ ebokula ɛtɔ, oniretu ajuaraku nwɛn otigɛ achɛmɔ abɛn wa ka kani mɔ na, “ƆKƆKƆ, ka wulɔnɛ ɛkpaju eyi awɔ irɨmantɔla kɔkantɔ kokum. 7Ami mbi liwɔ ntuni nwu nwɔŋa nyimo wu, gbɔ jani kɔɔ remu, mɨnɛ orin owum kɨn ɔtama ɛgbanɛlɛ. 8Kum ami oni nwu ɔra irɨmantɔla nsɨm, mɨnɛ mfɔnɔ ajuaraku irɨmantɔla iyɨm. Nkana wunɛ na, ‘Dɔŋ,’ mɨnɛ odulɔ; odudu, ‘Wɔ,’ mɨnɛ ɔwɔ. Nkana orin owum na sii mbu, mɨnɛ osibɛ.”
9Ndi Jisɔs ɔkɨlo dim birɛ mbi, ɛkpaju ɛwɛ mɔ, ɔfagɛlɛnɛ ɔkani ani mba wara wa tɔra mɔ na, “Nkani wun raikpɛ, mbɨri chɛ ɛdɔɔ kɛsɨmɛkpa nchifa tum ra Isɨrɛl.” 10Mɨnɛ ndi achɛmɔ oniretu ajuaraku nwu wa kɨlɛ ra ɛtɔ oniretu ajuaraku nwɛn, wa ka chɛ na orin nwɛn ɛkpaju ɛjani mɔ.
Jisɔs ofilɛ wɔna odumini ɔwani ekur ra rɔbɔ
11Ɔnyɛgɛ reyi, Jisɔs akɨla atɔramɔ wa dulɔ kɛfɨrɔ nchi wa yinɔ Nen, mɨnɛ ɔkɨmkɨm rɛkau ra ani esii rɛtɔrɛ kɛdɔŋ. 12Ndi wa bokula okegere kɛfɨrɔ nchɛn, wa chɛ ani wa tura obuburɛ wa jaga ramɔ, kele ka wɔn odumini a ɔwani ekur, rɛkau ra ani esii rɛtɔra ɔwani nwɛn. 13Ndi ƆKƆKƆ ɔchɛ ɔwani nwɛn, ɔfɔnɔ maA̵fɨbɔ ramɔ, ɔkani mɔ na, “Fuɛnɛ rɔbɔ!” 14Kadi odulɔ ɔka kpɨm ofega nwu wa tura obuburɛ nwɛn, atura obuburɛ wa barɔ. Ɔlamɔ na, “Oririn, ami nkani wu, tɨmɔnɛ!” 15Oririn nwɛn nwu ɔbaba otumetumɛ ɔmɔmɛ, ɔbɨnɛ ɔlama ra ani, kadi Jisɔs otibɔ ramɔ ɔnyɛ mika ɔwɛn.
16Abɛ fɛb ɛrau esibɛ, mɨnɛ wanyɛ Ɛbɨrɔkpabi ɛkalɛlɛ. Wa lamɔ na, “Ɔkɨmkɨm ɔlamaremu ra Ɛbɨrɔkpabi ɔjag ra kɛdɔŋ kɛchɨl! Ɛbɨrɔkpabi ɛwɔ ɛwa nani aniabɛn.” 17Kɔkani abaŋa Jisɔs kɔ yanɛ fɛb ra Judia akɨla ɔfɨrɔ odudu.
Jisɔs ra ayilarotumɔ mba Jɔn otigɛ
18Atɔra Jɔn ɔwaani mani wa kani mɔ abaŋa fɛb a birɛ mbi Jisɔs osia. Rɛfɔ adi, Jɔn oyinɔ atɔramɔ afaa, 19Otɨgɛ bɛ ɛkpa Jisɔs wa ka bɨb mɔ na, “Awu mɔ ara ƆKƆKƆ nwu ɔnɨŋɔ wɔɔ, din rerigɛ jɛnɔ ra oni odudu?” 20Ndi wawɔ wa kɔga Jisɔs, wa kani mɔ na, “Jɔn ɔwaani mani otigɛ wul rɛwa bɨb wu na, ‘Awu mɔ ara oni nwu ɔnɨŋɔ wɔɔ, din rɛrigɛ jɛnɔ ra oni odudu?’ ”
21Ra kɛgbɔ achi, Jisɔs ɔnyɛ ani esii ɛgbanɛlɛ ra rifɛn rɨbɛ nkɨmkɨm, mɨnɛ osi obia roifɛ wɔ jagɔ wɔ gbɛ ani, asɨlajɛnɔ esii mɨnɛ wa chɛ ɛtɨma. 22Kadi ɔkani ayilarotumɔ mbɛn na, “Ri mulɛnɛ rika kani Jɔn bumbu ri chɛ mɨnɛ ridimɔ, asɨlajɛnɔ wa chɛ ɛtɨma, ɔkpɔg wɔ chɛŋɛ, ani richɛriwur wa ruu nɛ wa wanɛ, alaga ratuŋ wa dim, abuburɛ wa filɛ ra rɔbɔ, mɨnɛ nkani Bɨrika Kɛlam nyɛ rikpag. 23Ɛmɔlɛmɔlɛ ɛfɔnɔ ani mba abɔ wa bi fumɔ mɛ rɛfɔ ra birɛ mbi nsia.”
24Kɛgbɔ nchi arin a Jɔn wa kɨlodu, Jisɔs ɔbɨnɛ ɔlama ra rɛkau ɔbaŋa Jɔn na: “Ridulɔ kumka ifɨrifɨr rikachɛ bu? Iguanjɔgaya nyi roifɛ rofuga? 25Mambum kadi bɛ ridulɔ rika chɛ? Oni nwu ɔrɔnɛ alili ibɔwɛ? Inyii, ani mba wa ruanɛ bɨrika ibɔwɛ nyi ifɔnɔ reju mɨnɛ wa jia rokpin wa tuma ra ɛtɔ rɛkɨm! 26Gbɔ ridulɔ rikachɛ bu? Ɔlamaremu ra Ɛbɨrɔkpabi-ɛ? Inyii, nkani wun, osiŋɛ ɔlamaremu ra Ɛbɨrɔkpabi. 27Amɔmɔnla mwu wa chɛrɛ nachɛ:
“ ‘Ami kɨn tigɛ oyilarotumɔ owum ɛkparoisɔ ewun,
nwu ɔnɨŋɔ mɔlɛ ɛtɨma ɔnyɛ wun.’
28Nkani wun, ra kɛdɔŋ kani mba awani wa malɔ, oni tum wunɛ ɔda nwu ogbuga osiŋɛ Jɔn. Gbɔ tum egbigbɛd oni ra rɛkɨm ra Ɛbɨrɔkpabi ogbuga osiŋɛ mɔ.”
29Ndi ani fɛb akɨla atama ntubatuba gɔmɛn wa dimɔ birɛ mbi, wa kani na Ɛbɨrɔkpabi ɛgbɛra ɛlɔɛlɛ Ibina iyɛn, kum Jɔn mɨnɛ osii bɛ ichɛŋa ɛfɔrafɔra. 30Gbɔ Farɛsi akɨla Akɔga Ibina Mosis wa bi yilɛ wa tama etiŋitiŋi Ɛbɨrɔkpabi abaŋa bɛ, kum wa bi yilɛ Jɔn osi bɛ ichɛŋa ɛfɔrafɔra. 31Jisɔs ɔlamɔ na, “Nluma ani kɛsɛ nchi ra bu? Abɛ wara amɔm bu? 32Wara amɔm mbɔn mba wa tumɛ ra ifa karɛ wa yina achɛmɔ:
“‘Rɛ wɛɛ ofɨriko rɛnyɛ wun
gbɔ ribi tugɔ;
rɛkɔnɔ ichɛrɔ rɔbɔ,
gbɔ ribi sɔ.’
33Kum Jɔn ɔwaani mani ɔwɔ obi jɛ kɔjɛ, obi ŋɔ matug, rikani na, ‘Ɔfɔnɔ kebia roifɛ.’ 34Wɔna Oni ɔwɔ, ojia mɨnɛ oŋua, ‘Gbɔ rilamɔ na nfa oni rɛdɔg akɨla obuma matug, ɔchɛmɔ atama ntubatuba gɔmɛn akɨla asia obia.’ 35Gbɔ kɛgbɛrakɔtag kɛkɔgɛlɛnɛ jaa ra rokpin ra ani mba wa tɔrɛ chɛ.”
Jisɔs ɔfɔrɛ ɔwani obia ratag ɔbɛn mɨnɛ ɔkɔgɛ Farɛsi abaŋa rɛda
36Olua Ibina wunɛ ɔdɛ Jisɔs na odulɔ ɔka jɛ kɔjɛ kodidɛ ramɔ, rɛfɔ adifɛ Jisɔs odulɔ ra ɛtɔa Olua Ibina nwɛn ɔka tumetumɛ ɔjɛ kɔjɛ. 37Ndi ɔwani nwu ɔra osia obia ra kɛfɨrɔ achi ɔgbɛra na Jisɔs ɔra ojia kɔjɛ ra ɛtɔ-a Olua Ibina, otimɔ ikpɨma alabasta nfi manɔ mma ma dɔmɛ kɛnyam. 38Kadi ɔwa bar ekpirɨmɔ ra ikad a Jisɔs osua. Iyɛn ibɨbala ra ikad a Jisɔs, ɔfɔnayɛ ra dɨlɔ ridɛn, ɔbama ra ikad iyɛn, mɨnɛ ɔwaga yɛ manɔ mma ma dɔmɛ kɛnyam.
39Ndi Olua Ibina Ɛbɨrɔkpabi nwu oyinɔ Jisɔs kɔjɛ ɔchɛ bumbu ɔwani nwu osii, ɔlamɔ ra etimɔ ɛyɛn na, “Abɔ odumini nwu ɔra ɔlamaremu ra Ɛbɨrɔkpabi, nla ɔgbɛra bumbu ɔwani nwu ɔra, nwu ɔkpɨma mɔnla, kum ɔra osia obia ratag.”
40Jisɔs kadi ofini mɔ na, “Saimɔn, nfɔnɔ bumbu nduga nkani wu.”
Ɔkani na, “Kani mɛ Ɔkɔgakɔga.”
41Jisɔs ɔkani mɔ na, “Ani afaa bɛ wa yɨba ɔfɔrani agbuga kɔfɔr. Wunɛ ɔyɨba mɔ dinariɔs #7:41 Dinariɔs Nfa ogbuga rotumɔ nwu wa kpia oni rotumɔ ra reyi. igot ifaa asɛ ɛtɨn ɛtan (500), nwuka ɔyɨba mɔ ɛtɨn ɛfaa asɛ juu. 42Ndi abɛ afaafaa wabi yɛ wa kɔrɔ mɔ agbuga abɛn, ɔtɨmɔnɛ ɔnyɛ bɛ. Nwun mɔnla ɔfɔnɔ rɛda ramɔ osiŋɔ faŋandi?”
43Saimɔn ofini na, “Oni nwu ɔtɨmɔnɛ ɔnyɛ nwu kɔfɔr kɔkɛn kɔgbuga kosiŋɔ.”
Jisɔs ɔkani mɔ na, “Akɨbi kɛlam olili.”
44Kadi Jisɔs ochimini ɔnɨŋɔ ɔwani nwɛn, mɨnɛ ɔkani Saimɔn na, “Achɛ ɔwani nwu-ɛ? Nwɔ ra ɛtɔ eyi, abinyɛ mɛ mani nru ikad, gbɔ ɔwani nwu oyogi ikad iyɨm ra iyɛn, mɨnɛ ɔfɔn yɛ ra dɨlɔ ridɛn. 45Awu abi bami rami, gbɔ bɨnɛ kɛgbɔ nchi nnɔlɔ nfa, ɔwani nwu obɨri fuɛnɛ mɛ ɛlɛlɛ, ɔbama ra ikad iyɨm. 46Awu abi waa mɛ manɔ ma Olif retu, gbɔ amɔ ɔwaga manɔ mma ma dɔmɛ kɛnyam ra ikad iyɨm. 47Afɛdɛ nkani wu na obia ratag ɔwani nwu mbu wɔ yawɔ yau, wa fɔrɛ bɛ, kum ɔkɔgɛlɛ mɨnɛ ɔfɔnɔ rɛda rɛdɛnɔ. Gbɔ oni nwu wa fɔrɛ egbigbɛd, ɔkɔgala egbigbɛd rɛda.”
48Kadi Jisɔs ɔkani ɔwani nwɛn na, “Wa fɔrɛ wu obia ratag obu.” 49Kadi ani mba wara wa jia kɔjɛ afɛ wa ta wa lama ra kɛdɔŋ kɛbɛ na, “Wɛnɛmɔ nla, nwu ɔfɔnɔ nsɨm ɔfɔrɛ obia ratag.” 50Jisɔs ɔkani ɔwani nwɛn na, “Kɛsɨmɛkpa kechi kɛ nani wu; dɔŋ ra fuɛɛ.”
Trenutno izabrano:
Luk 7: Olulumo-Ikom
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©️2024 Luke Initiative for Scripture Translation