Matewos 15
15
Abani Meeni Tuma
(Mar. 7:1-13)
1Esseen orfo Yerusalemun yeese Museni tumaasi assinynyanawa Ferisawini meena Yesusniki tai'sesere: 2«Ne nawoosakito awuni boor'a kur'uni meeni dubbiyooson aatefeso? Muu meesefe kabaasik kushubesiison aane masesefewa» yisete.
3Yesus wolgire: «Nitto dubbiyooson oodakwa iyaat awuni boor'a Ha'oosi ajajinon aatfetiso? 4Ha'oos: ‹Abanesinnawa intoneesonna ulfinsuwa. Ababaasin wedey intobaason me'a bar kitunak sholsifawa› yifawa. 5Sinuntano nitto isa asu ababaasin wedey intobaason: ‹Ta nittok imana argasuuson Ha'oosik maba zagira imingwa› iyaanane; 6‹Es asus ababaasin wedey intobaason ulfinsunak aane sholsifawa› yifeti. Es bari boor'a nitto dubbiyooson oodakwa iyaat Ha'oosi kaamanon aatfetiwa. 7Sinnoy sinne bestefe nitto raajju Isayyas ekka yire nitto chowaasik makena raajiis futowa.
8« ‹Han daraas noono noonobaasiktu taan ulfinsifewa,
sinuntano nibbaas tayistan wokawa.
9Asu tumena tumaason Ha'oni tuma zagire assifaafe;
shima shiipho shiiphesefewa› » yi.
Asuni Kiinsifa Wuzaas
(Mar. 7:14-23)
10Tusire dey Yesus daraasin hang barki teegere: «Odotiwa! Dey yaadatotiwa! 11Asunin kiinsifaas noonosin kesfa bartano noonosi girifa bartawa.»
12Estan nawoni meya barki yeesere: «Ferisawini meya han ne maketa kaamaason odesere nibbesiissi kejfaan tuusa'setemato aritoso?» yisete. 13Yesus wolgire: «Samaki Abataas toknoyna akakiltiis zuuttera waaterwa. 14Baasso aaftishu dey aaftishuni meyanon zoonsir sinete boor'a beytiwa. Aaftishu aaftishusin zoonsifaanane hepere gawusitu gandosonewa.»
15Phexiros dey Yesusnin: «Besoson kotta innok makowa» yi. 16Yesus wolgire: «Nitto dey hashneen kar'a aane yaadatowetinoso? 17Noonosi girifa bar zuuttera kataassi kamo aatta gero kesfanamato aane aruwetinoso? 18Sinuntano asuni noonosin kesfa bar nibsintu kesfawa. Asunin dey kiinsifaas es barwa. 19Mangunon safaro, asunin woru, soolo, gerkesa, wiiso, esha zaalni mako, asuni sunni mangsu zuuttera asuni nibsintu kesfawa 20Asunin kiinsifaas dey es bartano kushu masonoy muustawa.»
Kene'aki Mashkasuni Amanto
(Mar. 7:24-30)
21Yesus estan kesse Tirosni katamaassinawa Sidonani katamaassina hami. 22Estak isa kene'aki mashkasu Yesusniki yaara: «Dawitni Naa Daamiiso! Naanaas kiina ayyanak oottera akamanon mettedifar sinna boor'a taak kenashtefaywa» yit chaagi.
23Sinuntano Yesus isa wuzane wolgunoy shaakki. Es kabaasik nawobaasakito barki tai'sere: «Han asus inno orfoose yaafaafa chaaget faar sinna boor'a geggessifaywa» yit mamussete. 24Yesus wolgire: «Ta wostera yaanaas fantunimato tishire fe Israelni meyaktano oomni meyak aane yootwa» yi.
25Sinuntano asus yaara wochobaassi kaa'nera: «Daamiiso! Taan argasaywa» yi.
26Sinuntano Yesus barik wolgire: «Naanggotaasi daabbonon ephphe kanak ha'u aane sholsifawe» yi. 27Bar dey wolgira: «Futowa, Daamiiso! Kanaasikitonu daambaysakitoni sillawotan zigtefa fufuntoosontu maasefawa» yi.
28Es kabaasik Yesus wolgire: «Han asuse! Amantonees akamawe. Sholeta bar neek sinungwe» yi. Nawubaas dey es sa'atiistak fari.
Yesus Showo Mettannin Fati
29Yesus estan kabire Galiilaki baarisi tesha yeere den aamaasta kesse hamme di. 30Showo asuni meya laafaasakitonin aaftishusakitonin engitiisin, nibtaatosakitoninnawa oom showo mettanni meyanonna ephpheteshshere basa wochoossi kunusseten bar dey baassotin fati. 31Es bari boor'a daraas nibtaatoos wollefeen, laafaas farifeen, engitiis kaanne kutifeen, aaftishuus biifeen biisere diinqok Israelni Ha'ooson galattesete.
Yesus Acheech Kum Asunin Maasi
32Yesus nawobaasakitonin teegere: «Daraas taneen ane keez wona feeshete sinna boor'a muusone wuza aafa sinna boor'a baassok kenashtefawungwa; uguntak makak mikishere gandosonoytemato afurbesiise gafkuk aane sholefatwa» yi.
33Nawobaasakito dey: «Eekin han effatena daraasin gausuni tusha han ichma daassik ayin dananirinso?» yisete. 34Yesus: «Apun daabbonso nittoki faari?» yi. Baasso dey: «Naafun muuma daabbonewa garo garo kiisku kurxumminetu innokik faarwa» yisete. 35Esseen orfo daraas daasta duusonek ajaje. 36Naafun muuma daabboosewa garo garo kiisku kurxummiise asin ephphe Ha'o galattefaat batte nawobaasakitonik imi. Baasso dey daraasik woshete. 37Zuuttambesiise meesere gawuseten fu'te battooson naafun masa zuutisete. 38Meese baasso mashkasusewa naanggotaase faadtonoynaron acheech kum arqasu sinone. 39Daraasin geggessinanneen orfo goonuussi diire Megdon yiste daa hami.
Trenutno izabrano:
Matewos 15: YemsaNTL
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
The Word for the World Northern Africa