Budu: Neta 2021 WBT (NT) Non Drama

Budu: Koya 2021 WBT (NT) Drama

Budu: Koya 2021 WBT (NT) Non Drama

Mbise ɔngɔ, Yeso ambuɗito akʉ ɨngbɔɔ, ambʉtapʉa amondu ʉ yapuu yɛɛ ɨja, ambʉɓʉya anʉ Kapelenaumu amati ʉ gʉlʉ ngia i꞉nye kyɨa‑ɛɛ. Ɓambʉka nʉ jakɛsɨ mʉngana apɛɛ angɔ 'ukwaise ekoo ʉ ɓʉkwaɨ. Kʉna baya ngiindaɓʉ, Yeso ambusigio jakɛsɨ ngiinanɨ ɓɔ: « Chɨka igue‑gue! Wuliso 'ʉtʉma! Ɓʉɓɨɓɨ ngiɓʉsɔɔ ɓʉ꞉napɨa ɛɓɔ pɨanɨ. »
Kija ɓapananakɨa ɓʉ mapanʉ ngana ngana ɓambʉyakanaka ati ʉndaɓʉ ɓɔ: « Mombi ngiakɛ akʉzɨaka Asʉɓɨɨ! »
Ɨkyɛmɨngana, Yeso a꞉mbɨa moni ngika ɓi꞉nye kutunguo amati ʉ mɨtʉma ngiindaɓʉ tʉkʉ mbɨaa. Kija a꞉ɓuɓukuo ɓɔ: « Ikanzi yɨ itungwio yɛɛ ɓɨɓɨ tɨmanɨ iya nanayɔ ɓwanɨ? Ɨmanɨ ya ɓʉkaɨ, gʉ kusigo ɓɔ: ‹ Ɓʉ꞉napɨa ɓʉɓɨɓɨ ngiɓʉsɔɔ pɨaa ›, gʉ yɛmɔ kusigo ɓɔ: ‹ Maa, kɨndaka? › Mbɨeni iɗo ɓɔ Mwana ngia ʉ Mombi anʉ ʉpanʉ kʉpɨa ɓʉɓɨɓɨ akʉ ɨtaka ngia. » Kija Yeso a꞉sigio jakɛsɨ ngiinanɨ ɓɔ: « Maa! Chɨka ɓʉkwaɨ ngiɓʉsɔɔ, wambʉtʉa andɔɔ! »
Kija mombi ngiinanɨ a꞉máa, ambʉsa yangɔ.
Ati ngia ungbutu wʉ ɓombi wa꞉na nayɔ moni ngikʉnanɨ, kija ya꞉ɓukiso kʉ ʉɓa. Ɓambubibiso Asʉɓɨɨ ngia a꞉nzo ɓombi ʉpanʉ wɔɔ kyɨɛ ikanzi yɨ moni ngikʉnanɨ.


Iya Yeso a꞉ʉngwa nanɨ akʉ i꞉nye‑ɔɔ, ɛyɔ tiga kʉɓaa ɨngbaa, ambʉna ndɔmbɛ mʉngana ino ɓɔ Matayɔ 'uwei akʉ bilo ɔɔ lipise manzanza. Gʉ Yeso nayɔ ɓɔ: « Matayɔ! Nakpata! » Kʉ nɨma ngiinanɨ ambʉmáa, ambʉmʉkpata.
Mbise ngiinanɨ, Yeso ambʉsa ɔɔ Matayɔ andei kʉdyakaka. Ɓandɔmbɛ ɓɔɔ ɓulipise manzanza ɓaja ɨzɔ nʉ ɓombi ɓʉ ɓʉɓɨɓɨ ɓambukumunio kʉ ananɨ. Ɓambuwulo ɨzɔ nʉ ɔɔ Yeso nʉ ɓakpataka ngiɓangɔ ɓʉ kyɛɛ kʉdyakaka. Iya Ɓafalisayɔ ɓa꞉na moni ngikʉnanɨ, gʉ ɛɓɔ nʉ ɓakpataka ngiɓangɔ ɓɔ: « Jʉtanɨ‑zʉ mʉpananakɨa nguʉndɛnʉ wakʉdyakaka ɨzɔ nʉ ɓandɔmbɛ ɓɔɔ lipise manzanza, nʉ ɓombi ɓʉ ɓʉɓɨɓɨ? »
Iya Yeso a꞉kɔ nayɔ moni ngikʉnanɨ, ambusigo ɓɔ: « Ɓombi ɓɔɔ ɓʉmbʉmʉ ɓambakakyɨa nʉ taa yɨ mʉnganga. Ɨkyɛmɨngana, tʉkʉ ɓombi ɓʉ ɓakwisikiso ɓaakyɨa nʉ taa yangɔ! Kʉ ɓwanɨ, seni kupimiso inyi yɨ moni ngika Asʉɓɨɨ a꞉sigo‑ɔɔ ɓɔ: ‹ Ɛmɛ maabaya nadɨndɨ mombi ngia aanɨa ɓangɛ ikoko kʉɓaa mombi ngia aanzo 'ʉtʉmbɨa. › Jʉ ɛmɛ ma꞉kakɔmʉ kusoko ɓombi ngiɓa ɓa ɓaɓʉkwananakɛ, ɨkyɛmɨngana ma꞉ka kusoko ɓombi ɓʉ ɓʉɓɨɓɨ. »


Mbise ɔngɔ, ɓakpataka ngiɓa ɓʉ Yʉanɨ ɓambʉka anambamba ʉ Yeso. Gʉ ɛɓɔ nayɔ ɓɔ: « Isu nʉ Ɓafalisayɔ kaatáa idyo akʉ wati taa. Jʉtanɨ ɓakpataka nga ɓʉsɔɔ ɓambakatáa yɨndaɓʉ idyo? » Yeso ambuɓutisio ɓɔ: « Yakyananakɨa ɨkyɨkyɨɓʉmʉ tanɨ ɓɔ ɓombi ngiɓa ɓa꞉ɓusoko akʉ ʉmbɔ wʉ chɨkana ɓaɓio akʉ ikoko, ati ngia ɓa‑zʉ‑ɔɔ ɨzɔ nʉ ɔɔ swaɨ ʉ moi kʉtaa? Ya꞊ɓio nʉ ɓisi mʉngana iɓa ɓa꞊ɓungwisio‑ɔɔ swaɨ ʉ moi, ati ngiinanɨ ɓa꞊kwanana tiga kʉtáa idyo akʉ wati.
Mombi gʉkʉ mʉngana ambʉkʉkwanana kukutoko ɨdɔdɔkɔ yɨ ɨpʉkʉ nʉ ɨɗaka yɨ ɨtakɨ‑takɨ. Jʉ ɨɗaka ngia yɨ ɨtakɨ‑takɨ yanatʉa ɨdɔdɔkɔ tʉkʉ ɓʉ hua, kija ihoo yɛngɔ ya꞊ka tiga ɨja nadɨndɨ. Kʉndʉ ɓambʉkʉkwanana kuto vinyo wʉ ɨtakɨ‑takɨ amati ʉ lɨkɔchɔ lʉ jɛnɛ jɛnɛ, Jʉ ɓʉkyɨeni ɓwanɨ, vinyo ngiinanɨ anatʉa lɨkɔchɔ lʉ jɛnɛ jɛnɛ ngilʉnanɨ tʉkʉ ɓʉ hua, kija vinyo ayabuo akɛsɨ. Abana lɨkɔchɔ ngilʉnanɨ latambɨa tiga kʉ tambɨanɨ. Yɨkwanana ɓuto vinyo nga wʉ ɨtakɨ‑takɨ, kʉ amati ʉ lɨkɔchɔ lʉ ɨtakɨ‑takɨ. Kʉ ɓwanɨ, kumbo ɓepini ngiinanɨ kʉ uɓomu uɓio 'ʉpɨmakɨɛ tʉkʉ iɗo! »


Ati ngia Yeso inye‑zʉ‑ɔɔ naɓɔ tʉkʉ kʉngakɨa moni ngikʉnanɨ, ngama ʉ Ɓayuda mʉngana ambʉka kʉgbʉkʉmɨa muwuu apɛɛ angɔ. Gʉ ɛyɔ nayɔ ɓɔ: « Mwana ngiasɛmɛ ɔɔ moi u꞉wu tʉkʉ ɨtakɨ‑takɨ ngia. Abana ɓwanɨ kititi, ambʉ́ wʉka‑zʉ nayɔ tʉkʉ kʉnapɨa lɨkɔndɔ ambʉ ʉjʉkana tʉkʉ jʉkananɨ. » Kija Yeso nʉ ɓakpataka ngiɓangɔ ɓambʉʉngwɨa kɨnda kʉsa kʉkpata ngama ngiinanɨ.
Moi mʉngana i꞉nye nʉ kweso yɛɛ ɓʉɛ miniki amati ʉ mugo kumi nʉ kapɨnɨ. Moi ngiinanɨ ambʉɗʉana ambise ʉ Yeso, ambuɓoto 'ʉtʉ wʉ ɨpʉkʉ nguangɔ. Jʉ i꞉nye kʉyakanaka akʉ 'ʉtʉma ɓɔ: « Muɓoteni gʉtʉ tʉkʉ ɨpʉkʉ ngiangɔ, ma꞊hɨa tʉkʉ hɨaa. » Iya a꞉muɓoto nayɔ, Yeso ambʉnɨtana, ambʉmʉna, gʉ ɛyɔ nayɔ ɓɔ: « Mwana asɛmɛ, chɨka igue‑gue! Baya ngiisɔɔ yɨnahiiso hiisoo. » Tʉkʉ nɨma ngiinanɨ, moi ngiinanɨ ambʉhɨa.
Mbise ɔngɔ, Yeso ambʉɓʉya tiga ɔɔ ngama ngiinanɨ andei. Nani, ambʉna ɓombi ɓʉ mbáa ɓi꞉nyeni kʉmba mbáa ʉkʉ didima, ɨzɔ nʉ ungbutu wʉ ɓombi nga wɔmɔ amati ʉ gbongbo ʉ ndɨa ɓʉ hɔɔ.
Gʉ Yeso naɓɔ ɓɔ: « Inu, ɓʉeni aɓei! Mwana ɔɔ moi ngiakɛ uwokɔmʉ! Ʉkwaa tʉkʉ tɔɔ! » Iya ɓombi ɓa꞉kɔ nayɔ ɓwanɨ, ɓambufaniso nayɔ nʉa. Ɓambʉɓʉa kʉ ɓuɓomu aɓei, Yeso ambukumunio ambɛnɨ. Ambuɓoto mwana ɔɔ moi ngiinanɨ ɨkɔndɔ. Kʉ nɨma ngiinanɨ, mwana ɔɔ moi ambʉʉngwa ɨkʉʉ.
Ɨsaʉ ngiinanɨ yambʉnadaa gɨpa kʉ uɓomu.

Ati ngia Yeso ɔ꞉ngwɨa tiga‑ɔɔ kɨnda kʉsa, ɓombi ɓɔɔ ɓuchwiye mesu ɓapɨnɨ ɓambufaniso nayɔ kpata mbise nʉ nachokoo ɓɔ: « Kikiliki! Mwana ʉ mwana ʉ Daudi! Tɨnɨa ɓaka ikoko! »
Iya Yeso a꞉ɓʉya nayɔ andei, ɓombi ɓɔɔ ɓuchwiye mesu ngiɓʉnanɨ, ɓambʉka anambamba angɔ. Kija Yeso aɓusigio ɓɔ: « Ajʉ nanʉ baya tʉkʉ kingono ɓɔ ɛmɛ makwanana ninu kuhiiso ɓiɛ? » Gʉ ɛɓɔ nayɔ ɓɔ: « Oo Makʉʉɓɨɨ! Kanʉ baya ɓwanɨ! » Tʉkʉ nɨma ngiinanɨ, Yeso ambuɓoto mesu ngikʉndaɓʉ, ambuɓusigio ɓɔ: « Yɨkyɨanɨa ekoo ʉndɛnʉ ngbanga tʉkʉ nʉ baya ngiindɛnʉ. » Gbɛgbɛ tʉkʉ ananɨ, mesu ngikʉndaɓʉ kambʉgananɨa. Gʉ Yeso naɓɔ ɓɔ: « Kpɔ kpɔ kpɔ, nɔɔɓɨakɔmʉ mombi gʉkʉ mʉngana moni ngikʉnanɨ. » Ɨkyɛmɨngana, iya tʉkʉ ɓa꞉ʉngwa nanɨ, ɓambufaniso ɓɨakɨa ɨsaʉ yɨ Yeso amati ʉ gɨpa ngiinanɨ kʉ uɓomu.

Ati ngia ɓombi ɓapɨnɨ ngiɓa Yeso a꞉ɓuhiiso ɓi꞉nye tiga‑ɔɔ kʉsa, ɓambʉka ɓata nʉ mombi ʉ 'ʉtʉma wʉ abɨa mʉngana apɛɛ angɔ iya 'ʉtʉma wʉ abɨa wa꞉muikiso ijangi ngia yambikinye yaka. Yeso ambiso ijangi ngiinanɨ 'ʉtʉma wʉ abɨa, kija a꞉faniso yaka. Moni ngikʉnanɨ ka꞉mbangɨa ungbutu wʉ ɓombi kʉ ɓuɓomu. Gʉ ɛɓɔ ɓɔ: « Kambʉnakɔmʉ sina ikanzi yɨ moni ngikakɛ kʉkyananakɨa anʉ Ɨsalaɛlɛ aka! »
Ɨkyɛmɨngana, Ɓafalisayɔ ɓambusigo ɓɔ: « Akiso mɨtʉma yɨ ɓabɨa tʉkʉ nʉ angu ʉ ngama ʉ ɓabɨa. »

Yeso ambʉɓaɓaka amati ʉ ɓagʉlʉ kʉ ɓuɓomu, nʉ lɨkʉmbʉ lɔɔ ɗɛ ɗɛ ɗɛ kʉ liɓomu. Mʉa kʉ uɓomu aka i꞉nye ɓa‑ɔɔ, i꞉nye kyɨa kʉpanɨa amati ʉ lɨkáa lʉ nɨta ngila lʉ Ɓayuda, kʉɓɨakɨa ɓombi Ɨsaʉ yɛɛ Iɗo yɨ Ɓʉngama ngiɓa ɓa ekoo ʉ ɓisi. I꞉nye kuhiiso mɨgbʉ yɨ ɓakwisikiso kʉ iɓomu, nʉ ɓombi ɓɔɔ ɓʉjʉnganakɛ kʉ ɓuɓomu.
Ati ngia Yeso a꞉na‑ɔɔ tiga ungbutu wʉ ɓombi, ambʉɓʉnɨa ikoko jʉ ɓi꞉nye ɓundokoneni ndokonoo, nʉ ɓambikinye tii ɓata nʉ angu kʉ ɓwanɨ. Ɓi꞉nye ndʉ ɓakɔndɔlɔ ngiɓa ɓambʉkɔmʉ nʉ mʉpɨmakɨa. Kija a꞉sigio ɓakpataka ngiɓangɔ ɓɔ: « Masɔɔ ka maja akʉ watɨnɨ, ɨkyɛmɨngana, ɓombi ɓʉ kuu ɓa ɗɛkɛkɛ. Kʉ ɓwanɨ, teni makʉʉ ʉ masɔɔ ɓɔ ʉtʉma ɓombi ɓʉ kuu akʉ watɨnɨ kʉbʉa masɔɔ ngikangɔ. »

Lyssna på Matayɔ 9