If you would like a copy of this version please contact info@davaraudiobibles.org

Bodo Parja New Testament, CC-BY-SA-4.0, The Love Fellowship. Bodo Parja New Testament Audio Bible, CC-BY-SA-4.0, Davar Partners International, The Love Fellowship, 2023.

Bodo Parja New Testament

Bodo Parja Bible (ବ୍‌ଡ଼୍ ହ୍‌ର୍‌ଜା) by The Love Fellowship is licensed under Creative Commons Attribution-ShareAlike 4.0 License.

ଯୀଶୁ ଇ ସ୍‍ବୁକ୍‍ତା କ୍ଇ ସ୍‌ରାଇଲା ହ୍‌ଚେ ଗାଲିଲୀ ଜିଲାକେ ଜାଇ, ଯର୍ଦନ୍ ଗାଡାର୍ ସେହାଟି ବାଟ୍ ରିଲା ଯିହୁଦା ଜିଲାର୍ ସ୍‍ନ୍ଦିୟେ ଆଇଲା। ଆରେକ୍‌, ବେସିଲକ୍ ଯୀଶୁର୍ ହ୍‌ଚେ ହ୍‌ଚେ ଆଇଲାଇ, ଆରେକ୍‌ ସେ ସେତି ସେମ୍‍ନ୍‍କାର୍ ରଗେ ହ୍‌ଣି ସେମ୍‌ନ୍‌କେ ବ୍‌ଲ୍‌କ୍‍ଲା।
ଇତାର୍‍ଗିନେ ଫାରୂଶୀମ୍‍ନ୍‍ ତାର୍ ଲ୍‌ଗେ ଆସି ତାକେ ପରିକ୍ୟା କ୍‍ରି ହ୍‌ଚାର୍‌ଲାଇ, “ଜୁଇ କାତାର୍ ଗିନେ ହେଁ ନିଜାର୍ ମାଇଜିକେ ଚାଡ୍‌ହ୍‌ତାର୍ ଦେତାର୍, କାଇରି ଅଣ୍ଡ୍‍ରାମ୍‍ନ୍‌‍କାର୍ ଗିନେ ନିଆଇ?” ସେ ଉତର୍‍ଦିଲା, “ତୁମିମ୍‍ନ୍ କାଇରି ଦ୍‌ରମ୍ ଶାସ୍‌ତର୍ ଲ୍‌ଗେ ଇରି ହ୍‍ଳି ନ୍‌କେରାସ୍ ଯେ, ‘ତିଆର୍ କ୍‍ଲା ଲକ୍ ଆଗେହ୍‍ଣି ସେମ୍‍ନ୍‍‍କେ ଅଣ୍ଡ୍‍ରା ଆର୍ ମାଇଜି ଟକିକ୍‌ରି ତିଆର୍ କ୍‍ଲା,’”
ଆରେକ୍‌ କଇଲା, “ଇତାର୍‍ଗିନେ ଅଣ୍ଡ୍‌ରାହିଲା ଉବା ଆୟାକେ ଚାଡିକ୍‌ରି ନିଜାର୍ ମାଇଜି ଟକି ସ୍‍ଙ୍ଗ୍‍ ର୍‌ଇଦ୍, ଆର୍ ସେ ଦୁଇ ଲକ୍ ଗଟେକ୍ ଗ୍‌ଗାଳ୍ ଅଉତି। ଇତାର୍ ଲାଗି ସେମ୍‍ନ୍ ଆରେକ୍‌ ଦୁଇ ଲକ୍‌ନାଇ, ମ୍‍ତର୍ ଗଟେକ୍ ଗ୍‌ଗାଳ୍ ଅଇଆତ୍‌ତି। ତ୍‍ବେ ଇଶ୍ୱର୍‌ ଯାକେ ହେଁ ମିସାଇ ଆଚେ, ସେ ଅଣ୍ତ୍‌ରା ଆର୍ ମାଇଜିକେ କୁଇଲକ୍ ହେଁ ବିନେ ନ୍‌କେରା।”
ସେମ୍‌ନ୍ ତାକେ ହ୍‌ଚାର୍‌ଲାଇ, “ତ୍‍ବେ ମୋଶା କାଇତାକ୍ ଚାଡ୍‌ହ୍‌ତାର୍ ଦେଇ ମାଇଜି ଟକିକେ ଚାଡ୍‍ତାର୍ ଗିନେ ଆଦେଶ୍ ଦିଲା?” ଯୀଶୁ ସେମ୍‍ନ୍‍‍କେ କଇଲା, “କାଇତାକ୍ ତୁମାର୍‌ମ୍‌ନ୍‌କାର୍ ମ୍‌ନାର୍ ଅଟୁଆର୍ ଲାଗି ମୋଶା ତୁମୁକ୍‌ମ୍‌ନ୍ ନିଜାର୍ ନିଜାର୍ ମାଇଜିକେ ଚାଡ୍‍ତାର୍ ଗିନେ ଆଦେଶ୍ ଦିଲା, ମ୍‍ତର୍ ଆଗେହ୍‍ଣି ସେନ୍‍କ୍‌ରି ନ୍‌ରିଲା। ମ୍‍ତର୍ ମୁଇ ତୁମୁକ୍‍ମ୍‌ନ୍‍କେ କ୍‌ମ୍‌ଲେ, ଯେ କେ ନିଜାର୍ ମାଇଜିକେ ଦାରିକାମାର୍ ଦସ୍ ଚାଡି ବିନ୍ ଦସେ ଚାଡେଦ୍, ଆର୍ ବିନ୍ ମାଇଜିକେ ବିବା କ୍‍ରେଦ୍, ସେ ଦାରିକାମ୍ କ୍‍ରେଦ୍।”
ଚେଲାମ୍‌ନ୍ ତାକେ କଇଲାଇ, “ଯଦି ଗଟେକ୍ ମାଇଜିକେ ତାର୍ ଅଣ୍ଡ୍‌ରା ଚାଡ୍‌ହ୍‌ତାର୍ ଦେଇଦ୍, ତ୍‍ବେ ସେ ଅଣ୍ଡ୍‌ରା ସେ ମାଇଜିକେ ବିବା ନ୍‌କ୍‍ରତାର୍‌ ବ୍‍ଲ୍।” ମ୍‍ତର୍ ଯୀଶୁ ସେମ୍‌ନ୍‍କେ କଇଲା, “ସ୍‌ବୁଲକ୍ ବିବା ନଅଇ ରେମ୍ ନ୍‍ହାର୍‍ତି, ମ୍‍ତର୍ ମାପ୍‌ରୁ ଜାକେ ଜାକେ ଶ୍‌କ୍‌ତିଦିଲାଆଚେ ସେମ୍‌ନ୍ ବିବା ନଅଇ ରେମ୍ ହାର୍‍ତି। କାଇତାକ୍ କେ କେ ଆୟାର୍ ଗର୍ବେ ହ୍‍ଣି ବେଜୁ ଅଇ ଜ୍‍ର୍‍ନ୍‌ ଅଇଲାଇ ଆତ୍‍ତି, ଆର୍ କେ କେ ମାନାଇମ୍‌ନ୍‌କାର୍ ଲ୍‌ଗେହ୍‌ଣି ବେଜୁ କ୍‌ରାଇ ଅଇଲାଇ ଆତ୍‍ତି, ଆରେକ୍‌, ଆର୍ କେ କେ ସ୍‌ର୍‌ଗ୍‌ ରାଇଜର୍ ଗିନେ ନିଜ୍‍କେ ନିଜ୍‍କେ ବେଜୁ କ୍‌ଲାଇ ଆତ୍‍ତି। ଜୁଇଲକ୍ ଇରି ବୁଜୁକେ ହାର୍‍ତି, ସେ ଲକ୍ ବୁଜ।”


ସେଡେବ୍‌ଳ୍ ଯୀଶୁ ଜ୍‌ନ୍‌କ୍‌ରି ହିଲାମ୍‌ନ୍‍କାର୍ ଉହ୍‍ରେ ଆତ୍ ସ୍‍ଙ୍ଗାଇ ପାର୍‌ତେନା କ୍‍ରେଦ୍, ଇତାର୍‍ଗିନେ ଲକ୍‍ମ୍‍ନ୍ ହିଲାମ୍‌ନ୍‍କେ ଯୀଶୁର୍ ଲ୍‌ଗେ ଆଣ୍‌ତି ରିଲାଇ। ମ୍‍ତର୍ ତାର୍ ଚେଲାମ୍‌ନ୍ ଆଣ୍‌ତି ରିଲା ଲକ୍‌ମ୍‍ନ୍‌କେ ଦ୍‍ମ୍‍କାମ୍‌କେ ଲାଗ୍‍ଲାଇ। ମ୍‍ତର୍ ଯୀଶୁ କଇଲା, “ହିଲାମ୍‌ନ୍‍କେ ମର୍‍ଲ୍‌ଗେ ଆସୁକେ ଦିଆସ୍, ସେମ୍‌ନ୍‍କେ ମର୍‍ଲ୍‌ଗେ ଆସୁକେ ମ୍‌ନା କ୍‍ରାନାଇ, କାଇତାକ୍ ସ୍‌ର୍‌ଗ୍‌ ରାଇଜ୍‍‍ ଅନ୍‌କାର୍ ହିଲାମ୍‍ନ୍‍କାର୍ ହର୍।” ଆର୍, ଯୀଶୁ ସେମ୍‍ନ୍‍କାର୍ ଉହ୍‍ରେ ଆତ୍ ସ୍‍ଙ୍ଗାଇ ଆଶିର୍‌ବାଦ୍‌‌କ୍‌ରି ସେତିହ୍‍ଣି ଉଟିଗ୍‌ଲା।


ଆର୍ ଦ୍‌କା, ଏକ୍‍ଲା ଦନୀ ବେଣ୍ତିଆ ଯୀଶୁର୍ ଲ୍‌ଗେ ଆସି ହ୍‌ଚାର୍‌ଲା, “ଏଗୁରୁ, ନ୍‌ସେର୍‌ତା ଜୀବନ୍ ହାଉତାର୍ ଗିନେ ମୁଇ କୁଇ ସ୍‌ତ୍‌କାମ୍ କ୍‌ରିନ୍ଦ୍?” ଯୀଶୁ ତାକେ ଉତର୍‍ଦିଲା, “ଇଶ୍ଵର୍‍କେ ଚାଡି ଆର୍ କେ ହେଁ ସ୍‌ତ୍‌ନାଇ। ମ୍‍ତର୍ ତୁଇ ଯଦି ନ୍‌ସେର୍‌ତା ଜୀବନେ ହୁରୁକେ ମ୍‌ନ୍ କ୍‍ରୁଲିସ୍, ତ୍‍ବେ ମାପ୍‌ରୁର୍ ଆଦେଶ୍ ସ୍‌ବୁ ମାନ୍।”
ସେ ତାକେ ହ୍‌ଚାର୍‌ଲା, “କାଇ କାଇ ଆଦେଶ୍?” ଯୀଶୁ କଇଲା, “ଇରି ସ୍‌ବୁକାମ୍, ମାନାଇ ମାରାନାଇ, ଦାରିକାମ୍ କ୍‍ରାନାଇ, ଚର୍‍କାମ୍ କ୍‍ରାନାଇ, ମିଚ୍ ସାକ୍ଷି ଦିଆସ୍‌ନାଇ, ଉବା ଆର୍ ଆୟାକେ ଲାଡ୍‌କ୍‌ରା। ଆରେକ୍‌, ତୁମାର୍ ହ୍‍ର୍‍ସା ଲକ୍‌ମ୍‍ନ୍‌କେ ଲାଡ୍‌କ୍‌ରା।”
ସେ ଦ୍‍ଙ୍ଗ୍‍ଳା ଯୀଶୁକେ କଇଲା, “ଇ ସ୍‌ବୁ ଆଦେଶ୍ ମୁଇ ମାନିକ୍‌ରି ଆସୁଲେ, ଆର୍ କୁଇ ଆଦେଶ୍ ମୁଇ ମାନ୍‌ତାର୍ ବାକି ଆଚେ?” ଯୀଶୁ ତାକେ କଇଲା, “ଯଦି ତୁଇ ସିଦ୍ ଅମ୍‍କେ ମ୍‌ନ୍ କ୍‍ରୁଲିସ୍, ତୁଇ ଯାଇ ନିଜାର୍ ସ୍‌ବୁକିଚି ବିକିକ୍‌ରି ଗ୍‌ରିବ୍ ମ୍‌ନ୍‌କେ ଦାନ୍‍କ୍‍ର୍, ତ୍‍ବେ ତୁଇ ସ୍‌ର୍‌ଗ୍‌ ଲ୍‌ଗେ ଦନ୍ ହାଉସି। ତାର୍ ହ୍‌ଚେ ମର୍ ଚେଲା ଅମ୍‌କେ ମର୍‍ହ୍‌ଚେ ଆଉ।” ମ୍‍ତର୍ ଇକ୍‍ତା ଶୁଣି ସେ ଦ୍‍ଙ୍ଗ୍‍ଳା ଲକ୍‍ମ୍‍ନ୍ ଦୁକ୍ ଅଇ ବାରିଗ୍‍ଲା, କାଇତାକ୍ ତାର୍ ଲ୍‌ଗେ ବେସି ଦ୍‌ନ୍ ସ୍‌ମ୍‌ପତି ରିଲି।
ସେଡେବ୍‍ଳ୍ ଯୀଶୁ ନିଜାର୍ ଚେଲାମ୍‍ନ୍‍କେ କଇଲା, “ମୁଇ ତୁମୁକ୍‌ମ୍‌ନ୍ ସ୍‌ତ୍ କ୍‌ମ୍‌ଲେ, ଗଟେକ୍ ଦନୀଲକ୍ ବେସି କ୍‌ଷ୍ଟେ ସ୍‌ର୍‌ଗ୍‌ ରାଇଜେ ହୁରେଦ୍। ଆର୍ ଗଟେତର୍ ମୁଇ ତୁମୁକ୍‍ମ୍‌ନ୍‍କେ କ୍‌ମ୍‌ଲେ, ଇଶ୍ଵରାର୍ ରାଇଜେ ଦନୀ ଲକାର୍‌ ଗିନେ ଜ୍‌ମ୍‌କେ ବେସି କ୍‌ଷ୍ଟ, ମ୍‍ତର୍ ସୁତ୍‍ଲି କାଣାକେ ଦେଇ ଉଟ୍ ଜାତାର୍ ସ୍‍ହଜ୍।”
ଯୀଶୁର୍ ଚେଲାମ୍‌ନ୍ ଇରି ଶୁଣି କାବାଅଇ କଇଲାଇ, “ତ୍‍ବେ କେ ଉଦାର୍‌ ହାମ୍‍ହାରେ?” ଯୀଶୁ ସେମ୍‍ନ୍‍‍କେ ବ୍‌ଲ୍‌କ୍‍ରି ଦ୍‍କି କଇଲା, “ଇରି ଅନ୍‌କାର୍ କାମ୍ ଜାଇରି କି ମାନାଇ କ୍‌ରୁନାହାରେ, ମ୍‍ତର୍ ଇଶ୍ୱର୍‌ ଇରିସ୍‌ବୁ କ୍‍ରୁହାରେ।” ସେଡେବ୍‌ଳ୍ ପିତର୍ ଯୀଶୁକେ ଉତର୍‍ଦିଲା, “ଦ୍‍କ୍, ଅମିମ୍‍ନ୍ ତର୍ ଚେଲା ଅମ୍‍କେ ସ୍‌ବୁକିଚି ଚାଡିଦିଲୁ। ଅମିମ୍‍ନ୍ ତ୍‍ବେ କାଇରି ହାମା?”
ଯୀଶୁ ସେମ୍‌ନ୍‍କେ କଇଲା, “ମୁଇ ତୁମୁକ୍‌ମ୍‌ନ୍ ସ୍‌ତ୍ କ୍‌ମ୍‌ଲେ, ଜ୍‌ଡେବ୍‌ଳ୍ ନ୍ଉଆ କ୍‍ରି ତିଆର୍ ଅଇଲା ରାଇଜେ, ମୁଇ ମାନାଇ ହିଲା ନିଜାର୍ ସନ୍‌ମାନାର୍ ସିଂହାସନେ ବ୍‍ସିନ୍ଦ୍, ସେଡେବ୍‍ଳ୍ ମର୍‍ହ୍‌ଚେ ହ୍‌ଚେ ଆସିଆଚାସ୍ ଯେ ତୁମିମ୍‍ନ୍, ତୁମିମ୍‍ନ୍ ହେଁ ବାରଗଟ୍ ସିଂହାସନେ ବ୍‍ସିକ୍‍ରି, ଇସ୍ରାଏଲ୍ ଦେଶାର୍ ବାରଗଟ୍ ଦ୍‍ଳ୍‍କେ ଶାସନ୍ କ୍‍ରାସ୍।
ଆରେକ୍‌, ଯେ କେ ମର୍ ନାଉଆର୍ ଗିନେ ଗ୍‍ର୍ କି ବାଇସି କି ବେଣ୍‍ସି କି ଉବାସି କି ଆଇସି କି ନିଜାର୍ ହିଲା ଟକି କି ଜମି ଚାଡେଦ୍, ସେ ବେସି ଗୁଣ୍ ଆଶିର୍‌ବାଦ୍‌ ହାଇଦେ, ଆରେକ୍‌, ନ୍‌ସେର୍‌ତା ଜୀବନାର୍ ଅଦିକାରି ଅଇଦ୍। ମ୍‍ତର୍ ଆଗେ ରେତା ବେସିଲକ୍ ହ୍‌ଚେ ଅଉତି ଆର୍ ହ୍‌ଚେ ରେତା ବେସିଲକ୍ ଆଗେ ଅଉତି।”

Lyssna på ମାଥିଉ 19