Populära bibelverser från Jenesis 18

Dela

Mi mi Hae God ya. ?Yutufala i ting se i gat samting i stap we i strong tumas, mi mi no save mekem? Mi talem finis se long nekis yia, bambae mi mi kam luk yutufala bakegen long taem ya we mi mi talem, mo long taem ya, Sera bambae i gat wan pikinini boe blong hem.”

Nao hem i stap tingting se, “Mi mi olfala finis, mi no moa save harem gud blong slip wetem man. Mo man blong mi tu i olfala finis.” Nao hem i stap laf long tingting blong hem.

Ol pikinini ya we bambae oli kamaot biaen long hem, bambae oli plante we plante, bambae oli kam wan strongfala laen* ya. Mo bambae mi mi yusum man ya olsem rod blong mi, blong blesem ol man blong olgeta narafala kantri.

Nao Ebraham i kam klosap long hem, i askem long hem se, “?Olsem wanem? ?Sipos yu panisim ol man blong ples ya, bambae yu spolem olgeta man evriwan? ?Bambae yu kilim ol man nogud wetem ol stret man tu? ?Sipos i gat fifti man i stap long taon ya we oli stap mekem i stret nomo, yu ting se bambae yu mas spolem olgeta man blong taon ya? Mi mi ting se yu save letem olgeta man blong taon ya oli stap laef, blong sevem fifti man ya we oli stap mekem i stret.

Nao Hae God i talem se, “Sipos mi faenem we i gat fifti man i stap long Sodom ya we oli stap mekem i stret nomo, bambae mi letem olgeta man blong taon ya oli stap laef from fifti man ya.”