Populära bibelverser från Jenesis 27

Dela

Prea blong mi, we God bambae i mekem we graon bambae i givim ol gudgudfala kakae long yu blong yu yu no sot long kakae, mo we skae bambae i givim gudfala wota long yu, blong yu no sot nating long waen. Prea blong mi, we ol man blong ol narafala kantri bambae oli wok blong yu, mo we ol man blong ol narafala ples bambae oli bodaon long yu. Prea blong mi, we yu bambae yu bos long ol brata blong yu, mo we olgeta bambae oli bodaon long yu. Prea blong mi, we man we i singaot trabol i kam long yu, trabol bambae i kasem hem, be man we i askem blong God i blesem yu, God bambae i blesem hem.”

Nao Esao i talem se, “Hemia namba tu taem nao we hem i giaman, i stil long mi. Hem i no karem nem ya Jekob blong nating nomo. Fastaem, hem i tekem raet blong holem ol samting ya we mi nomo mi gat raet long hem from we mi fasbon. Mo naoia, hem i tekem ol samting ya we yu yu wantem askem long God blong i givim long mi. ?I no moa gat sam samting i stap we yu no talemaot yet, we yu save askem long God blong i givim long mi, blong blesem mi?”

Nao papa blong hem i talem se, “Pikinini blong mi. Ples blong yu bambae i no stap klosap nating long graon ya we bambae i givim ol gudgudfala kakae, mo long ples ya we skae bambae i givim gudfala wota long hem. Ples blong yu bambae i stap longwe long hem. Oltaem, bambae yu stap faet, long naef blong faet, blong yu save kasem kakae blong yu, blong yu stap laef, mo yu bambae yu slef nomo blong brata blong yu. Be taem yu girap agens long hem, hem bambae i no moa save holem yu, yu bambae yu aot long han blong hem.”

Be Esao i stap askem bakegen long papa blong hem se, “?Papa, olsem wanem? ?Hemia nomo tok we yu yu gat blong blesem man? !Plis yu blesem mi tu!” Nao hem i stap krae bigwan.