Gen 9
9
Cilanga ca Mlungu ni Nowa
1Mlungu ŵampele upile Nowa ni ŵanace ŵakwe ŵacalume, ŵatite, “Mŵelece ŵanace ŵajinji kuti mtupe ni mgumbale cilambo cosope capasi.#Gen 1:28 2Yinyama yosope, yijuni, ni somba tiyicimjogopa. Yosopeyi nayipelece m'myala mwenu kuti myilamuleje. 3Sambano mkukomboleka kulya nyama, mpela munamlamulile kulya ya masamba. Nampele yosopeyi kuti yiŵe yakulya yenu. 4Nambo pana cindu cimo cimkakwenela kulya, mkasimlya nyama jili jana miasi. Ngulekasya ligongo m'misimo ni mu uli umi wakwe.#Lef 7:26-27; 17:10-14; 19:26; Det 12:16, 23; 15:23 5Mundu jwalijose jwakuwulaga mjakwe tacipocela cilango. Tinjipeleka soni cilango ku cinyama cilicose cakuwulaga mundu. 6Mundu jwalijose jwakuwulaga mundu mjakwe, nombe najo awulajidwe. Pakuŵa mundu ŵapanganyidwe mcilandanicisyo ca Mlungu.#Gen 1:26; Eks 20:13
7“Nambo jemanja mkole ŵanace ŵajinji, kuti yisukulu yenu tiyitupe ni kukwanila pa cilambo cosope capasi.”#Gen 1:28
8Mlungu ŵamsalile soni Nowa ni ŵanace ŵakwe ŵacalume ŵala kuti, 9“Sambano nguŵika cilanga* ni jemanja ni pamo ni yisukulu yenu, 10ni ya umi yosope, yijuni, yinyama yakulanga ni ya mwitinji yakwe, ni yine yosope yiyakopwece m'combo ni m'mwejo. 11Cilanga canguco ni aci: Ngisinjonanga soni ya umi yosope ni mesi ga cikumba. Nditu, mesi ga cikumba ngasigajonanga soni cilambo capasi. 12Mlungu ŵatite soni kuti aci ni cimanyisyo ca cilanga cangu cangamala, cinguŵika pasikati pa une ni jemanja, ni yindu yosope ya umi yili ni jemanja. 13Nguŵika ukunje wangu m'mawunde. Nipo tiwuciŵa cimanyisyo ca cilanga cangu, pasikati pa une ni cilambo capasi. 14Ndaŵi syosope naga gakupagwa mawunde kwinani, nipo naga ukuwoneka ukunje m'mawundemo, 15tinjikumbucila cilanga cangu cimbisile ni jemanja ni yinyama yosope, cakuti cikumba ngasicijonanga soni ya umi yosope. 16Pa ndaŵi jiwukuwoneka ukunjewo m'mawunde, une tinjiwuwona, nipo tinjikumbucila cilanga cangu cangamala ca pasikati pa une ni ya umi yosope ya pa cilambo capasi. 17Celeci ni cilocesyo ca cilanga cangu cinguciŵika une pasikati pa une ni ya umi yosope ya pa cilambo capasi.”
Nowa ni ŵanace wakwe
18Ŵanace ŵa Nowa ŵiŵakopwece m'combo ŵaliji Shemu, Hamu ni Yafeti. Hamu ni ŵaliji baba ŵawo Kenani. 19Ŵanace ŵa Nowa ŵatatu ŵeleŵa, ni ŵali acinangolo ŵa ŵandu ŵa pa cilambo cosope capasi.
20Nowa ŵaliji mnamalima, juŵaliji jwandanda kupanda mpeleya. 21Lisiku line ŵamwele finyo jwa mipeleya jila ni ŵakolelwe ni ŵagonile makonope mu tenti jakwe. 22Nipo Hamu babagwe Kenani, piŵaweni baba ŵawo ali makonope, ni ŵajile kuja kwasalila acakulugwe ŵaŵili ŵiŵaliji pasa. 23Shemu ni Yafeti ŵajigele mkanjo ni kuwukoleka m'makoyo gawo ŵana ŵaŵili, ni ŵajesile citukulunyuma kuja ku tenti kukwawunicila baba ŵawo jemanjajo ali alolite kumbali, ni nganagawona makonope ga baba ŵawo. 24Nowa piŵajimwice, ŵayipikene yosope yele mwanace jwakwe jwamnondi yiŵatesile, 25nipo ŵatite,
“Alwesece Kenani!
Taciŵa kapolo jwa acalongo acimjakwe.
26Ni ŵatite soni acimbicikwe AMBUJE,* Mlungu jwa Shemu.
Kenani taŵe kapolo jwa Shemujo.
27Mlungu amkwesye Yafeti,
yisukulu yakwe tiyigaŵane upile ni yisukulu ya Shemu.
Kenani taŵe kapolo jwa Yafetijo.”
28Cili cipite cikumba ca mesi cila, Nowa ŵatemi yaka yine 350 29Ŵawile ali akwete yaka 950.
Nu markerat:
Gen 9: YAWO
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Chiyawo Bible: Buku Jeswela © Bible Society of Malawi, 2014