Susumo 6
6
Pyɛ́ vyes mwasi
1-2Bemat ba hwo gwɛ̌ hɛn pyak e jey. E jeng yane mo, nèy lagwi na di behwong de ba tɔs a bemat o ba sé bezɛrɛ mo, ko na kasa a bato nɛ vinde na tɛ̀ yey na yɛn, na ne ra weneng mɛn. 3Ko Dagwi Darwey a ye, “Ma rɔda to tik mwasi, na a nàra kwen nesheneshey wɛt, yaga yɛ a sé wo reku. Ma rɔda tik ɛ a ros, na a dal neshey naga na kuru baba (120) wɛt.” 4E jeng yane mo, ko vɔk e jeng cak arɔng, ba sɛ̀ bemat de ba sé hwɔk e jey. Yɛn vɛ, à yere de behâ bemat ba tɔs a nèy lagwi. Yɛn vɛ, à beras vê raane de ba vɔk gbɔng za.
5Dagwi Darwey a di pyɛ́ vyês bemasi ya kat, mwa bare na tomong mɛn ba sé ves zɔng kayɛ jeng. 6Ko a lashe yey, a ye tɔk ano de a yong mwasi. Pyɛ mo ya shɔk a yɛ yey ding-ding, 7ko a ye, “Ma rɔda wey na bemasi e jey, bemasi mwa na ngyāma, na benon, yaga yey hom ye lashe hɛ de ma yong ɛn.” 8Ko Nowa a sɛ̀ nerat e bayîs Dagwi Darwey.
Rehâ Nowa
9Rehâ Nowa a remo: Nowa á sè cik, á sila gyat e sangal na bemât jeng mɛ, ko á sè sangal e ji nesa na Dagwi. 10A vɔk nèy bewen netat: Shɛm, na Ham tanga Yafɛt.
11Ko bwang bemât mwa ba sé beves e bayis Dagwi, ba ragas neves kagwa, ko ba kyɛ́ ɛn gyeng badu. 12Dagwi a di jey, ko ya ga lashe hɛ, yaga mwa bemat bá sè sangal e ji neves zɔng. 13A yâng Nowa, “Ma ga tɛ̀ e yey hom, na me yɛnɛ na bemasi mwa. Ma sé kyè wɔ̀ wey na yɛn, mwa na jey, yaga tomong ves mɛn ba kat e jey. 14Yong a to mō gwokundung na cɔ́gɔt yê gbarak, de gwô sè a hwo sede dwa-nshi. Tɛ̀ bezɔrɔk e ji gwɛ, ko hwo lolom ji mo na bama mo na kwolta. 15Yong gwɛ nelis o mita naga na kuru batungun (150), netes o mita kuru baba na vɛ betungun (25), ko nelis o vɔk e rak o mita kuru na vɛ betungun (15). 16Jeng de hwô yong pyɛ banga gwokundung o, gwɛ̌ rebit mita e tē mo, na ye se garang. Yong gwɛ na gwo vɔk lɔ̂ vwel o, na hê tē, ko hê netat he sè hê yɛnɛ mo, ko hwo tɛ̀ rwi mo e hagât gwɛ. 17Yaga di, ma sé kyè wɔ tomo na gbɔng tɛmɛ-nshi e ra jey, na ne wey na kayɛ pyɛ cen. Kayɛ pyɛ e jey yê ku. 18Ko ma rɔda wuna sira e tē hom na hwo; hwà rɔda yel e ji gwokundung o, hwo, na nèy mō, na hwā mō, tanga behâ nèy mō bê wuna hɛn na hwo. 19Jut e ji kayɛ pyɛ́ cen, na hwo yel na bibya e ji gwokundung o, tik na ye sè rwas na hwā mó, na ye sangal cen tanga hwo. 20Kavɛ benon e yerê vɛ, kayɛ ngyāma na yas e yerê yɛ, na mwa pyɛ́ gabaga e yerê yɛ bibya, yê vey e ji mo na hwo, yaga na yɛ̄ bin nàra cen. 21Ko hwo, hwô jut yerê pyɛ́ de bê re yaga hwo tanga yɛn, yaga na hwo tanga belɔ mō tanga yɛ̄, yin a bin sɛ̀ pyɛ̂ re min.”
22Nowa a ra yɛnɛ̂ pyɛ̂ mwa de Dagwi a nɔng ɛ nu, na a ra.
Nu markerat:
Susumo 6: bomBI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust