Mutendeko 12
12
Chiuta wakuchema Abramu
1Sono Fumu yikati kwa Abramu, “Fumamo mu charu chako, mu ŵabali ŵako na mu nyumba ya ŵawuso ndipo urutenge ku charu icho ndamkukurongora.#Mil 7.2; Heb 11.8 2Ndipo ndamkukuzgora iwe kuŵa fuko likuru. Ndamkukutumbika na kukuzga zina lako mwakuti uŵenge thumbiko. 3Ndamkuŵatumbika awo ŵakukutumbika, ndipo uyo wakukutemba ndamkumutemba. Ndipo mwa iwe mafuko ghose gha mu charu, ghamkutumbikikiramo.”#Gal 3.8
4Ntheura Abramu wakaruta nga ndi umo Fumu yikamuphalirira, ndipo Loti wakaruta nayo. Abramu wakaŵa na virimika 75, para wakafumangamo mu msumba wa Harani. 5Ndipo Abramu wakatora Sarayi muwoli wakhe, na Loti mwana wa munung'una wakhe, na vyuma vyawo vyose ivyo wakasanga, na ŵazga awo wakaŵa nawo mu msumba wa Harani.
Ŵakawuka ulendo kuruta ku charu cha Kanani ndipo wakafika. 6Sono Abramu wakadumula mukati mu charu chira, ndipo wakafika pa malo gha Shekemu, pa khuni likuru la musoro ku More. Pa nyengo yira ŵaKanani ŵakakharanga mu charu chira. 7Fumu yikawoneka kwa Abramu, ndipo yikati, “Ŵa mphapu yako ndiwo ndizamkuŵapa charu ichi.” Ntheura pa malo ghara Abramu wakayizengera jochero Fumu iyo yikamuwonekera.#Mil 7.5; Gal 3.16 8Wakasamapo pa malo ghara na kuruta ku phiri ku dera la ku mafumiro gha dazi kwa Betele, ndipo wakajintha hema lakhe, apo Betele wakaŵa ku manjiliro gha dazi ndipo Ayi ku mafumiro gha dazi. Kwenekura ndiko wakayizengera jochero Fumu na kusopa. 9Abramu wakarutilira kwenda kurazga ndipera ku mwera.
Abramu mu Eguputo
10Sono mukaŵa njara mu charu. Ntheura Abramu wakakhilira ku Eguputo kuya kapanjwako, chifukwa njara yikaŵa yikuru mu charu chira. 11Para wakaŵa pafupi kudumula mphaka ya Eguputo, Abramu wakamuphalira Sarayi muwoli wakhe kuti, “Nkhumanya kuti uli mwanakazi wakutowa. 12Para ŵaEguputo ŵamkukuwona, ŵamkuti, ‘Uyu ndi muwoli wakhe.’ Ntheura ŵamkundikoma, kweni iwe ŵamkukureka wamoyo. 13Ukaŵaphalirenge kuti ndiwe mudumbu wane. Ntheura vinthu vyamkundiyendera makora ndipo umoyo wane nawo wamkuthaskika chifukwa cha iwe.”#Mut 20.2, 26.7 14Abramu wakati wanjira mu Eguputo, ŵaEguputo ŵakawona kuti Sarayi wakaŵa mwanakazi wakutowa chomene. 15Nduna za Faro zikati zamuwona, zikamurumbira panthazi pa Faro. Ntheura Sarayi ŵakamutorera ku nyumba ya Faro. 16Faro wakamukora makora Abramu chifukwa cha Sarayi na kumupa mberere na mbuzi, ng'ombe, mbunda zanarume na zanakazi, ŵateŵeti ŵanarume na ŵanakazi, na ngamila.
17Kweni Fumu yikamusuzga na nthenda zakofya Faro na ŵa mu nyumba yakhe chifukwa cha Sarayi muwoli wa Abramu. 18Faro wakamuchema Abramu ndipo wakati, “Nchichi icho wachita kwa ine? Chifukwa uli ulije kundiphalira kuti Sarayi ndi muwoli wako? 19Kasi nchifukwa uli ukayowoya kuti ndi mudumbu wako, mwakuti ine nkhamutora kuti waŵe muwoli wane? Sono uyu muwoli wako, umutore ndipo rutanga.” 20Faro wakalangulira ŵanthu ŵakhe na za Abramu ndipo ŵakaya kamuperekezga ku nthowa, iyo na muwoli wakhe, ndiposo na vyose ivyo wakaŵa navyo.
Nu markerat:
Mutendeko 12: Tumbuka
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Bible Society of Malawi