Mutendeko 23
23
Sara wakufwa ndipo wakusungika
1 Sara wakakhara virimika 127. 2Wakafwira mu msumba wa Kiriyati Ariba (ndiyo Heburoni) mu charu cha Kanani. Abrahamu wakamulira na kumutengerera Sara.
3Abrahamu wakawukapo panthazi pa chitanda cha muwoli wakhe, ndipo wakati ku ŵaHiti, 4“Ine ndine mulendo na wakupanjwa mukati mwinu. Ndaŵeya, ndipaniko malo mu charu chinu, mwakuti ndisungepo muwoli wane.”#Mil 7.16; Heb 11.9-13
5ŴaHiti ŵakamuzgora Abrahamu, ŵakati, 6“Mutipulike, sekuru withu. Ndimwe nduna ya mazaza mukati mwithu. Sungani muwoli winu ku mararo ghali ghose gha mararo ghithu, gheneagho ngaweme kwakuruska. Palije na yumoza mwa ise uyo wati wakane kumupani dindi lakhe, nanga nkhumukanizgani kuti musungemo muwoli winu.”
7Abrahamu wakawuka ndipo wakasindama panthazi pa ŵaHiti, ŵanthu ŵa mu charu chira. 8Iyo wakati kwa iwo, “Ndipulikani, usange mukukhumba kuti ndisunge muwoli wane kuno, mundiŵeyerereko kwa Efuroni mwana wa Zohara, 9kuti wandiguliske mphanji yakhe ya Makipela, iyo yili ku umaliro wa munda wakhe. Wandiguliske pa mtengo wenecho panthazi pinu, mwakuti ghaŵenge chiharo chane chakusungapo ŵakufwa.”
10Sono Efuroni muHiti wakakhara pamoza na ŵaHiti ŵanyakhe pa chipata cha msumba. Iyo wakamuzgora Abrahamu uku ŵanthu wose pa chipata ŵakutegherezga. 11“Chara, sekuru wane, kweni pulikani, ine ndimupaninge munda, pamoza na mphanji iyo yili mwenemumo. Nkhumupirani panthazi pa ŵanthu ŵakwithu kuti musungepo muwoli winu.”
12Penepapo Abrahamu wakasindama panthazi pa ŵanthu ŵa charu chira. 13Iyo wakayowoya kwa Efuroni uku ŵanthu ŵara ŵakupulika, wakati, “Usange ukuzomera, nkhuŵeya undipulike. Nditi ndikupe ndarama za mtengo wenecho wa munda. Uzipokerere kuti ndisunge muwoli wane mwenemumo.”
14Efuroni wakamuzgora Abrahamu, wakati, 15“Sekuru wane, ndipulikani. Charu icho mtengo wakhe ndi ndarama za siliva 400. Aka nkhanthu kachoko chomene pakati pa ine na imwe? Sunganipo muwoli winu.” 16Abrahamu wakazomerezgana na Efuroni. Ntheura wakamupimira Efuroni uzitu wa ndarama za siliva, izo wakazizunura uku ŵaHiti ŵakupulika, zakukwana 400, kwakuyana na umo ŵamalonda ŵakapimiranga ndarama.
17Ntheura ndimo malo gha Efuroni, agho ghakaŵa ku Makipela, ku mafumiro gha dazi kwa Mamure, ghakaŵira gha Abrahamu. Mu malo agha mukaŵa munda, mphanji na makuni ghose gha mu munda ura. 18Ivi vikaperekeka kuŵa chiharo kwa Abrahamu panthazi pa ŵaHiti, na panthazi pa wose awo ŵakaŵa pa chipata cha msumba.
19Pamanyuma pa ichi, Abrahamu wakasunga Sara muwoli wakhe mu mphanji ya munda wa Makipela, ku mafumiro gha dazi kwa Mamure (ndiyo Heburoni) mu charu cha Kanani. 20Ntheura munda na mphanji iyo yili mwenemumo, vikaperekeka na ŵaHiti kwa Abrahamu kuŵa chiharo chakhe chakusungapo ŵakufwa.
Nu markerat:
Mutendeko 23: Tumbuka
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Bible Society of Malawi