Ruth 3
3
Nakata
Ruth Malikhuni Israelmiun pitkuhinginik uikhakhiuktuk
1Kinguagun Naomium Ruth ukallautiyaa, “Uikhamik pivlutin ihumayukhaugaluaktunga munagiyauhimakuvlutin. 2Puiguktailiyyavan Boas, tapfuma kivgain angnauyun havakatigikpagatin ilaa ilaguhegimaatigut. Unukpan mukpauyakhainik havangniaktuk. 3Takki uakpaglutin tipigiktumik atuglutin ilingnik annugaklutintauk pinektumik. Takki upaglugu Boas havagvianun #3:3 Mukpauyakhait nauthimayun kipiyaukpata havaktit kektukpagain mukpauyakhainat amiekuvlugit. takupkaktailutilli ilingnik tapfumunga negiguektinagu. 4Hiniviginiaktaalu tautuglugu aahin hinaakhilgaktillugu nallagin itigaita haniani ulikhimalutinlu. #3:4 Uvani Judeamiut pitkuhikakpaktun imaitumik, inuk nuliakhimayuk tukutpan nutagakangitillugu nulianga pitkuyauyuk uinikikuvlugu uigiyagaluata nukaanik nutaganikuvlugulu tukungayuk piyyutigilugu. Huliyakhangniglu ukagviginiaktaatin.”
5Ruth ukaktuk, “Ukaktangnik tamainik piniaktunga.”
6Talva Ruth havagvingmungaktuk hakiami ukaktainik malikhuni. 7Boaslu akeatugami kuviatakpiaktuk, mukpauyakhait katihimayun haangani hinigahualekhuni. Hinilektillugu Ruthium nipliyuitumik upaktaa nallavluni itigaita haniani. 8Unuk kitkani Boas tupaktitaugami makituk kuglukhuni takugamiuk angnak hiniktillugu itigami haniani. 9Ukaktuglu, “Kinauvin?” kiuyaa angnam, “Ruthiuyunga, ilaa ilaguhegigangma kanikiyamik munagiyakhagiyangma ihumaliuyyavutillu nulianikuvlutin uvamnik.”
10Boas ukangmiyuk, “Atangum naamaktitpaglutin taimaitumik ukautigangma nagutkiyauyutin tayya tapfumanga hakian munagivagaluaktillugu, uikhakhiuniagunakhigavinli angunmik allamik kinamiklunin. 11Ihumaaluktailutin Ruth, Bethlehemiun tamangmik nagunahugimaatin piyumayangnik pinialektunga. 12Itkumayuk ilaguhegigapkin munagiyakhagiyagin, angun hamanimiutagli kanikiyauyugaluak ilingnun uvamnin. 13Uvamnitlait tayya uvlaakunlu tamna inuk ukaktaga ilaguhium piyakhaanik malingniakpan naamaktuk, taimaliungitpatli uvanga himaukhiniagiga. Takki nallagin aitailutin taakpiaktillugu.”
14Talva itigaita haniani nallangmiyuk makituni kaulgaktinagu tapfuminga Boas pitkuingman inuit ilihimakunagit angnak havagvigmungangman. 15Boasim pitkuyaa Ruth, “Kalikut kaityuk hamna ililugu.” Taimaliungman tatakpiaktaa mukpauyakhainik 50 paundnik nangmiutivlugu angilgaktuk angnak. 16Aahin aigami hakiami apegimani, “Kanuitpakpin?” uniutiyaa tamainik angutim ikayukpangmagu, 17ukakhuni, “Tuniyanga ukuninga mukpauyakhainik tunihiviuhimaitumik utekunanga ilingnun.”
18Naomi kiuyuk, “Utakingnaglutin Ruth ilihimangniagavin piniaktukhauyumik Boas malingnialengman ihumagiyaminik.”
Nu markerat:
Ruth 3: Sperry
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
©1972 Canadian Bible Society