ᓗᒃ 3
3
ᒠᓐ ᐅᓯᑲᐃᑕᒐᐤ ᑲ ᑭᒐᔅᒋᒧᑦ
ᒪᑎᔪᐤ 3.1-12; ᒪᕐᒃ 1.1-8; ᒠᓐ 1.19-28
Luke 3.1-6 (Advent-2 Year C)
1ᐊᓂᔭ ᐸᐳᓂᔨᒡ ᐱᑕᑕᒡ ᑕᑐᓴᑉ ᐱᐳᓇ ᑲ ᐃᔅᐱᔅ ᒋᓴᐅᒋᒪᐅᑦ ᑕᐃᐱᕆᔭᔅ ᓯᓴᕐ ᑲ ᐃᓯᓂᐧᑲᓱᑦ, ᑈᓐᑎᔭᔅ ᑈᓚᑦ ᒪᒂᒡ ᒋ ᓂᑲᓂᔅᑲᒐᐤ ᐊᓐᑕ ᒍᑎᔭ ᐊᔅᒋᒡ ᐊᑯ ᐊᕈᑦ ᐊᓐᑕ ᑲᓕᓕ ᐊᔅᒋᒡ ᑲ ᓂᑲᓂᔅᑲᒐᑦ, ᐊᑯ ᐎᐧᑲᓂᓴ ᐊᕈᑦ, ᐱᓕᑉ ᑲ ᐃᓯᓂᐧᑲᓱᔨᒋ ᐊᓐᑕ ᒋ ᓂᑲᓂᔅᑲᒐᔪᐛ ᐃᑐᕆᔭ ᑭᔭ ᑐᕋᑯᓇᐃᑎᔅ ᑲ ᐃᓯᓂᐧᑲᑕᔨᒋ ᐊᔅᒋᔭ᙮ ᐊᑯ ᓚᐃᓴᓂᔭᔅ ᑲ ᓂᑲᓂᔅᑲᒐᑦ ᐊᓐᑕ ᐊᐱᓕᓐ ᑲ ᐃᓯᓂᐧᑲᑕᔨᒡ ᐊᔅᒋᔪᐤ᙮ 2ᒪᒂᒡ ᒪᒃ ᑭᔭ ᐊᓇᔅ ᑭᔭ ᑲᔭᐸᔅ ᒋ ᒋᓴᐊᔭᒥᐊᐅᒋᒪᐅᒡ᙮ ᐊᐅᒄ ᒪᒃ ᐅᔭᔪᐤ ᒪᒂᒡ ᒠᓐ, ᓴᑲᕋᔭ ᐅᑯᓴ ᐊᓐᑕ ᐸᐧᑯᑎᔅᑭᒥᑲᒡ ᒋ ᑕᐤ᙮ ᐊᑯᑕ ᒪᒃ ᐊᓐᑕ ᑲ ᐎᑎᒪᑯᑦ ᒋᓴᒪᓂᑐᐛ ᑕᓐ ᒋᐸ ᐃᓯ ᑭᒐᔅᒋᒧᐤ᙮ 3ᒠᓐ ᒪᒃ ᒥᓯᐛ ᒋ ᐃᑐᑕᐤ ᐊᓂᔭ ᐊᔅᒋᔪᐤ ᒥᒋᒪ ᒠᕐᑕᓐ ᓯᐱᒡ ᑲ ᑎᑯᓂᔨᒡ ᐊ ᑭᒐᔅᒋᒪᑦ ᐊᐛᔪᐛ ᒐᒋ ᒂᔅᑲᑎᓯᔨᒋ ᑭᔭ ᒐᒋ ᓯᑲᐃᑐᐛᑭᓄᔨᒋ ᒋᓴᒪᓂᑐᐛ ᒐᒋ ᐛᐸᔨᑎᒪᑯᒡ ᐅᒥᒋᑥᐅᓄᐛᐛ᙮ 4ᐛᔅ ᐊᐃᓴᔭ, ᐊᓂᔭ ᐅᒋᔅᒋᐛᐃᒐᓱᐤ ᒋ ᐃᑎᓯᓇᐊᒧᑯᐱᓇ ᒋᓴᒪᓂᑐᐛ ᐅᑦ ᐃᔨᒧᐅᓂᔨᒡ,
ᑕᐤ ᐊᐛᓐ ᐊ ᑕᑈᑦ ᐊᓐᑕ ᐸᐧᑯᑎᔅᑭᒥᑲᒡ ᐊ ᐃᔅᒋᔄᑦ,
“ᐊᔭᔅᑯᐎᔅᑕᒺᐧᒄ ᐅᑎᐸᔨᒋᒐᐤ ᒪᔅᑭᓇᔪᐤ ᒐ ᐱᒧᑕᑦ ᑭᔭ ᑯᐃᔅᑯᒧᑕᐛᐧᒄ᙮
5ᐊᓐ ᒪᒃ ᒪᔅᑭᓄᐤ ᐊᓐᑕ ᒐ ᐊᑎ ᐅᐛᔭᒡ, ᒋᐸ ᒥᔪᒧᑕᑭᓄᐤ, ᑭᔭ ᐊᓐᑕ ᐱᔅᑯᑎᓇᒡ ᐊ ᐃᑎᒧᒡ ᐊᓐ ᒪᔅᑭᓄᐤ ᒋᐸ ᑕᐱᔅᑯᒐᐃᑭᓄᐤ ᐊᓐ ᐱᔅᑯᑎᓇᐤ ᒐᒋ ᐅᒋ ᒥᔪᒧᒡ ᐊᓐ ᒪᔅᑭᓄᐤ᙮
ᐊᑯ ᒪᒃ ᐊᓐᑕ ᐊ ᐛᐛᒋᓯᒧᒡ ᐊᓐ ᒪᔅᑭᓄᐤ, ᒋᐸ ᑯᐃᔅᑯᒧᑕᑭᓄᐤ ᑭᔭ ᐊᓐᑕ ᐊ ᒥᒋᒡ, ᒋᐸ ᒥᔪᑕᑭᓄᐤ᙮
6ᐊᑯ ᒪᒃ ᒥᓯᐛ ᐃᔪᒡ ᒐ ᐛᐱᒪᒡ ᐅᐱᒪᒋᐃᐛᐛ, ᐊᓂᔭ ᒋᓴᒪᓂᑐᐤ ᑲ ᐸᒋ ᐃᑎᓴᐛᑦ᙮”
ᐊᔪᐅᒄ ᐅᔭ ᑲ ᐃᑎᓯᓇᐊᒧᑯᐱᓇ ᐊᓂᔭ ᐊᐃᓴᔭ᙮
Luke 3.7-18 (Advent-3 Year C)
7ᒥᒐᑦ ᒪᒃ ᐃᔪᒡ ᒋ ᓂᑐᐛᐱᒪᐅᒡ ᒠᓇ ᒐᒋ ᓯᑲᐃᑕᑯᒡ ᐊᑯ ᒂ ᐃᑎᑯᒡ, “ᒧᔭᒻ ᑕᑈ ᒋᓇᐱᑯᒡ ᐊ ᐃᑕᔨᑕᑯᓯᔭᒄ᙮ ᒋᑦ ᐃᑕᔨᑕᓇᐛᐤ ᐊ ᒐᒋ ᒋᑎᓯᒧᑎᒺᒄ ᒋᓴᒪᓂᑐᐤ ᓂᑲᓐ ᐅᑦ ᐊᐧᑯᔪᐛᓱᐅᓐ, ᐊ ᓯᑲᐃᑕᑯᔭᒄ ᐊᑲ ᒪᒃ ᐎ ᒂᔅᑲᑎᓯᔭᒄ᙮ 8ᒋᐸ ᒂᔅᑲᑎᓯᓇᐛᐤ ᑭᔭ ᒐ ᓄᒂᒡ ᑕᑈ ᓇᔅᒡ ᐊ ᓂᑭᑎᒪᒄ ᒋᒥᒐᑎᓯᐅᓄᐛᐛ᙮ ᑭᔭ ᐊᑲᐎᔾ ᐃᑕᔨᑎᒧᒄ ᒐᒋ ᒋᑎᓯᒧᑎᒺᒄ ᒋᓴᒪᓂᑐᐤ ᐅᑦ ᐊᐧᑯᔪᐛᓱᐅᓐ ᒥᒄ ᐊᓂᔭ ᐊᑉᕋᐊᒻ ᐊ ᑕᑦ ᐊ ᐅᒋᔭᒄ᙮ ᒋ ᐎᑎᒪᑎᓇᐛᐤ, ᒋᓴᒪᓂᑐᐤ ᒋᑭ ᒋ ᐃᑐᑐᐛᐤ ᐅᔭᔪᐛ ᐊᓯᓂᔭ ᑲ ᐃᑎᐱᔨᒋ ᒐᒋ ᐅᒋ ᐅᓯᐊᑦ ᐊᑉᕋᐊᒪ ᐅᑦ ᐊᐛᓯᒥᔪᐛ᙮ 9ᐛᔅ ᒧᔭᒻ ᓴᔅ ᐊ ᐊᔭᔅᑯᔅᑕᒡ ᐊᑭᑕᔅᒄ ᐊᐅᒄ ᒐ ᐃᓯᓇᒂᒡ ᒐ ᓇᑥᑲᐛᑭᓄᐅᑦ ᐊᓐ ᒥᔅᑎᒄ ᐊᓐᑕ ᐊ ᐅᑎᐱᐅᑦ᙮ ᐛᔅ ᑕᑐᐤ ᒥᔅᑎᒄ ᐊᑲ ᒥᔪ ᒥᓂᓱᐅᑦ ᒋᑭ ᓇᑥᑲᐛᑭᓄᐤ ᑭᔭ ᒋᑭ ᒥᑐᔅᑕᐛᐱᓇᑭᓄᐤ ᐃᔅᑯᑕᒡ᙮” ᐊᔪᐅᒄ ᐅᔭ ᑲ ᐃᔅᒋᔄᑦ ᒠᓐ᙮
10ᐊᑯ ᒪᒃ ᐊᓐᒡ ᐃᔪᒡ ᒋ ᑯᒂᒋᒪᐅᒡ ᒠᓇ ᐊ ᐃᑕᒡ, “ᑕᓐ ᒪᒃ ᒐ ᐃᑎᔭᒡ ?” 11ᒂ ᐃᑕᑦ, “ᐊᐛᓐ ᐊ ᓂᓯᓂᔨᒋ ᐅᑦ ᐊᑯᐸ ᐸᐃᒄ ᐊᓂᔭ ᒋᐸ ᒥᔭᐤ ᐊᐛᔪᐛ ᐊᑲ ᐊᔭᔨᒋ, ᒪᒃ ᑭᔭ ᒥᒋᒥᔪᐤ ᐊ ᐃᔭᒂ ᒋᐸ ᐊᓯᒪᐤ ᐊᐛᔪᐛ ᐊᑲ ᐅᒥᒋᒥᔨᒋ᙮”
12ᐊᑯ ᒪᒃ ᐊᓐᒡ ᑲ ᒪᒧᓴᒋᓇᒡ ᒋᓴᐅᒋᒪᐤ ᓱᓇᔭᔪᐤ ᑲ ᐃᑕᐱᑎᓯᒡ, ᒋ ᐸᒋ ᐃᑐᑕᐅᒡ ᒐᒋ ᓯᑲᐃᑐᐛᑭᓄᐅᒡ, ᐊᑯ ᒂ ᐃᑕᒡ ᒠᓇ, “ᒋᔅᑯᑎᒪᒐᓱᐤ, ᑕᓐ ᓂᐸ ᑎᓇᓐ ᓂᔭᓐ ?” 13ᒋ ᐃᑕᐤ ᒪᒃ, “ᐊᑐᒡ ᐎ ᐃᐛᒃ ᒋᐸ ᐅᒋ ᐅᑎᓇᓇᐛᐤ ᓱᓇᔭᐤ ᒥᒄ ᐊᓐ ᑕᓐ ᐊᔅᐱᔅ ᓂᑐᐛᔨᑕᑭᓄᐅᒡ᙮”
14ᐊᑯ ᒪᒃ ᐊᓯᒪᑭᓂᓯᒡ ᑭᔭ ᐊᐅᑯᓐ ᑲ ᐃᓯ ᑯᒂᒋᒐᒧᒡ, “ᓂᔭᓐ ᒪᒃ ᐎ ᑕᓐ ᓂᐸ ᑎᓇᓐ ?” ᒠᓐ ᒋ ᐃᑕᐤ, “ᐊᑲᐎᔾ ᐊᔨᐧᑭᒥᐃ ᐊᐛᓐ ᒐᒋ ᒥᔨᔅᒃ ᓱᓇᔭᔪᐤ ᑭᔭ ᐊᑲᐎᔾ ᓂᑐᐎᔾ ᐃᓯ ᒪᒥᓯᒻ ᐊᐛᓐ᙮ ᒋᐸ ᓇᐊᔨᑕᓇᐛᐤ ᐊᓐ ᐊ ᐃᔅᐱᔅ ᒋᓯᐧᑲᑯᐅᔭᒄ᙮”
Luke 3.15-17,21-22 (Epiphany-1 Year C)
15ᐊ ᐸᑐᐛᒡ ᒪᒃ ᒠᓇ ᐊ ᑭᒐᔅᒋᒧᔨᒋ ᐊᓐᒡ ᐃᔪᒡ, ᓴᔅ ᓇᔅᒡ ᒋ ᐸᓱᐛᔨᒪᐅᒡ ᙭ᑕ ᒐ ᑎᑯᓯᓂᔨᒋ, ᐊᑯ ᒂ ᒪᒥᑐᓇᔨᒪᒡ ᒠᓇ ᐊ ᔭᐅᒂᓂ ᐊᓂᔭ᙮ 16ᐊᑯ ᒠᓐ ᒂ ᐎᑎᒧᐛᑦ ᐊ ᐃᑕᑦ, “ᒥᓯᐛ ᐊ ᑎᓯᔭᒄ ᓂᐱᒡ ᓂᔾ ᒋ ᓯᑲᐃᑕᑎᓇᐛᐤ, ᒥᒄ ᒪᒃ ᑯᑎᒃ ᐊᐛᓐ ᒋᑭ ᑎᑯᓯᓐ ᐃᐛᒃ ᐊ ᒋᔅᑕᔨᑕᑯᓯᑦ ᐃᔅᐱᔅ ᓂᔾ᙮ ᐎᔾ ᒪᒃ ᒋᑭ ᓯᑲᐃᑕᑯᐛᐤ ᑲ ᐸᔭᒋᓯᔨᒋ ᐊᒐᒂ, ᑭᔭ ᐃᔅᑯᑕᔪᐤ᙮ ᓇᒪ ᒪᒃ ᐛᐛᒡ ᓂᑦ ᐃᔅᐱᑕᔨᑕᑯᓯᓐ ᒐᒋ ᐊᐱᐧᑯᓂᒧᒡ ᐅᒥᔅᒋᓇ᙮ 17ᐅ ᒐ ᑎᑯᓯᐧᒃ ᒧᔭᒻ ᓇᐸᐤ ᑲ ᐸᔭᒋᑕᑦ ᐸᒂᓯᑭᓂᒥᓇᑎᒂ ᒋᑭ ᐃᑕᔨᑕᑯᓱᐤ᙮ ᐊᓂᔭ ᐸᒂᓯᑭᓂᒥᓇᑎᒂ ᐊᓐᑕ ᐊᔅᑕᓱᐅᒋᐛᐱᒡ ᒋᑭ ᐃᓯ ᒪᐅᒋᑕᐤ᙮ ᐊᑯ ᐊᓂᔭᔪᐛ ᐊᓐᑕ ᑲ ᐱᐱᐅᔅᑕᔨᒋ ᐊᑲ ᐎᔭᔅ ᒋ ᐃᑕᐱᑎᓂᔨᒋ ᒋᑭ ᐃᔎᓯᒻ, ᐊᓐᑕ ᒐ ᐊᑲ ᓂᑕ ᐊᔅᑐᐛᔨᒡ ᐃᔅᑯᑕᔪᐤ᙮”
18ᒠᓐ ᒪᒃ ᓂᓇᐧᑯᐤ ᒥᓐ ᒋ ᐃᓯ ᐃᔭᒂᒥᒪᐤ ᐃᔪᐛ ᐊᔪᐤ ᐊ ᑭᒐᔅᒋᒪᑦ ᒥᔽᒋᒧᐅᓂᔪᐤ᙮
ᒠᓐ ᑲ ᒋᐸᐛᑭᓄᐅᑦ
19ᒥᒄ ᒪᒃ ᒠᓐ ᐃᔅᐱ ᑲ ᐊᓏᔨᒪᑦ ᐊᓂᔭ ᒋᓴᐅᒋᒪᐤ ᐊᕈᑕ ᐊᓂᔭ ᐊ ᐎᒋᒪᔨᒋ ᐎᐧᑲᓂᓴ ᐎᐎᔪᐛ, ᐊᕈᑎᔭᔅ ᑲ ᐃᓯᓂᐧᑲᓱᔨᒋ, ᑭᔭ ᑲ ᐊᔨᒧᑎᒺᑦ ᒥᓯᐛ ᒐᒂᔪᐤ ᑕᓐ ᑲ ᐃᓯ ᒥᒋᑐᑎᒥᔨᒋ, 20ᐊᕈᑦ ᒋ ᐃᑎᓱᐛᐤ ᒐᒋ ᒋᐸᐛᑭᓄᔨᒋ ᒠᓇ᙮ ᐅᔭᔪᐤ ᒪᒃ ᑲ ᐃᑎᑦ, ᐊᑐᐎᔅ ᒋ ᐅᓯᑎᒪᓱᐤ ᐊᓂᔭ ᑕᓐ ᓴᔅ ᑲ ᐃᓯ ᒥᒋᑐᑎᒧᐛᒂ᙮
ᑲ ᓯᑲᐃᑐᐛᑭᓄᐅᑦ ᒋᓴᔅ
ᒪᑎᔪᐤ 3.13-17; ᒪᕐᒃ 1.9-11
Luke 3.15-17,21-22 (Epiphany-1 Year C)
21ᐃᔅᐱ ᒪᒃ ᒥᓯᐛ ᐊᓐᒡ ᐃᔪᒡ ᑲ ᓯᑲᐃᑐᐛᑭᓄᐅᒡ, ᐊᑯ ᑭᔭ ᐎᔾ ᒋᓴᔅ ᒂ ᓯᑲᐃᑐᐛᑭᓄᐅᑦ᙮ ᒪᒂᒡ ᒪᒃ ᐊ ᐊᔭᒥᐊᑦ ᒋ ᐅᒋ ᔪᑕᐱᔪᐤ ᒋᒋᒋᓯᒄ, 22ᑲ ᐸᔭᒋᓯᔨᒋ ᐊᒐᒂ ᑲ ᐅᒋ ᔭᓯᔅᑕᑯᑦ ᒋᓴᔅ ᒧᔭᒻ ᐅᒥᒥᐤ ᐊ ᐃᓯᓇᑯᓯᔨᒋ᙮ ᐊᑯ ᒂ ᐅᒋ ᐸᑕᑯᓯᑦ ᐊᐛᓐ ᐊᓐᑕ ᐅᒋ ᒋᒋᒋᓯᑯᒡ ᐊ ᐃᔅᒋᔄᑦ, “ᐊᐅᒄ ᐅ ᒋᔾ ᓂᑯᔅ ᑲ ᓴᒋᐃᑕᓐ ᑭᔭ ᓇᔅᒡ ᑲ ᓂᓇᐊᔨᑎᒥᐃᔨᓐ᙮”
ᒋᓴᔅ ᑕᓐᑕ ᑲ ᐃᑎᔅᑲᓇᓯᑦ
ᒪᑎᔪᐤ 1.1-17
23ᒋᓴᔅ ᒪᒃ ᓴᓯᑲᓐ ᒋ ᓂᔅᑐᔪᐛᐳᓇᓱᐤ ᐃᔅᐱ ᑲ ᒋᒋᐱᔨᑦ ᑕᓐ ᑲ ᐎ ᐃᑕᐱᒋᐃᑯᑦ ᒋᓴᒪᓂᑐᐛ᙮ ᒋ ᐃᑕᔨᒥᑯᐤ ᒪᒃ ᐊᐛᔪᐛ ᐊᐅᑯᓐ ᐊᓂᔭ ᑎᐱᔨᐛ ᐅᑕᐎᔭ ᐊᓂᔭ ᒍᓯᐸ᙮ ᐅ ᒪᒃ ᒍᓯᑉ, ᐃᓚᐃ ᒋ ᐃᓯᓂᐧᑲᓱᔪᐛ ᐅᑕᐎᔭ᙮
24ᐃᓚᐃ ᒪᒃ ᒪᑕᑕ ᒋ ᐅᑕᐎᔪᐤ, ᐊᑯ ᒪᑕᑦ, ᓕᐸᐃᔨᒋ ᒋ ᐅᑕᐎᔪᐤ, ᓕᐸᐃ ᒪᒃ ᒪᓪᑭᔨᒋ ᒋ ᐅᑕᐎᔪᐤ, ᐊᑯ ᒪᓪᑭ, ᒐᓇᐃᔨᒋ ᒋ ᐅᑕᐎᔪᐤ, ᒐᓇᐃ ᒪᒃ ᒍᓯᐸ ᒋ ᐅᑕᐎᔪᐤ᙮
25ᒍᓯᑉ ᒪᒃ ᒪᑕᑕᔭᓴ ᒋ ᐅᑕᐎᔪᐤ, ᐊᑯ ᒪᑕᑕᔭᔅ, ᐊᒥᓴ ᒋ ᐅᑕᐎᔪᐤ, ᐊᒥᔅ ᒪᒃ ᓇᐅᒪ ᒋ ᐅᑕᐎᔪᐤ, ᐊᑯ ᓇᐅᒻ, ᐃᔅᓕᔨᒋ ᒋ ᐅᑕᐎᔪᐤ, ᐃᔅᓕ ᒪᒃ ᓇᑲᐃᔨᒋ ᒋ ᐅᑕᐎᔪᐤ᙮
26ᓇᑲᐃ ᒪᒃ ᒪᑕ ᒋ ᐅᑕᐎᔪᐤ, ᑭᔭ ᒪᑦ, ᒪᑕᑕᔭᓴ ᒋ ᐅᑕᐎᔪᐤ, ᒪᑕᑕᔭᔅ ᒪᒃ ᓴᐃᒥᓇ ᒋ ᐅᑕᐎᔪᐤ, ᓴᐃᒥᓐ ᒪᒃ ᒍᓴᑲ ᒋ ᐅᑕᐎᔪᐤ, ᑭᔭ ᒍᓴᒃ, ᒍᑕᔨᒋ ᒋ ᐅᑕᐎᔪᐤ᙮
27ᒍᑕ ᒪᒃ ᒍᐛᓇᓇ ᒋ ᐅᑕᐎᔪᐤ, ᐊᑯ ᒍᐛᓇᓐ, ᕋᓴᔨᒋ ᒋ ᐅᑕᐎᔪᐤ, ᕋᓴ ᒪᒃ ᓯᕈᐸᐸᓚ ᒋ ᐅᑕᐎᔪᐤ, ᑭᔭ ᓯᕈᐸᐸᓪ, ᓴᓪᑎᔭᓚ ᒋ ᐅᑕᐎᔪᐤ, ᓴᓪᑎᔭᓪ ᒪᒃ ᓇᕆᔨᒋ ᒋ ᐅᑕᐎᔪᐤ᙮
28ᓇᕆ ᒪᒃ ᒪᓪᑭᔨᒋ ᒋ ᐅᑕᐎᔪᐤ, ᑭᔭ ᒪᓪᑭ, ᐊᑎᔨᒋ ᒋ ᐅᑕᐎᔪᐤ, ᐊᑎ ᒪᒃ, ᑯᓴᒪ ᒋ ᐅᑕᐎᔪᐤ, ᑭᔭ ᑯᓴᒻ ᐊᓪᒪᑕᒪ ᒋ ᐅᑕᐎᔪᐤ, ᐊᓪᒪᑕᒻ ᒪᒃ, ᐊᕋ ᒋ ᐅᑕᐎᔪᐤ᙮
29ᐊᑯ ᒪᒃ ᐊᕐ, ᒐᓱᐛᔨᒋ ᒋ ᐅᑕᐎᔪᐤ, ᒐᓱᐛ ᒪᒃ ᐃᓕᐃᓴᕋ ᒋ ᐅᑕᐎᔪᐤ, ᐊᑯ ᐃᓕᐃᓴᕐ, ᒠᕆᒪ ᒋ ᐅᑕᐎᔪᐤ, ᒠᕆᒻ ᒪᒃ ᒪᑕᑕ ᒋ ᐅᑕᐎᔪᐤ, ᐊᑯ ᒪᑕᑦ, ᓕᐸᐃᔨᒋ ᒋ ᐅᑕᐎᔪᐤ᙮
30ᓕᐸᐃ ᒪᒃ ᓯᒥᐅᓇ ᒋ ᐅᑕᐎᔪᐤ, ᑭᔭ ᓯᒥᐅᓐ, ᒍᑕᔨᒋ ᒋ ᐅᑕᐎᔪᐤ, ᒍᑕ ᒪᒃ ᒍᓯᐸ ᒋ ᐅᑕᐎᔪᐤ, ᑭᔭ ᒍᓯᑉ, ᒠᓇᒪ ᒋ ᐅᑕᐎᔪᐤ, ᐊᑯ ᒠᓇᒻ, ᐃᓚᔭᑭᒪ ᒋ ᐅᑕᐎᔪᐤ᙮
31ᐃᓚᔭᑭᒻ ᒪᒃ ᒪᓕᔭᔨᒋ ᒋ ᐅᑕᐎᔪᐤ, ᑭᔭ ᒪᓕᔭ, ᒪᓇᔨᒋ ᒋ ᐅᑕᐎᔪᐤ, ᒪᓇ ᒪᒃ ᒪᑕᑕᔨᒋ ᒋ ᐅᑕᐎᔪᐤ, ᑭᔭ ᒪᑕᑕ, ᓇᐃᑕᓇ ᒋ ᐅᑕᐎᔪᐤ, ᓇᐃᑕᓐ ᒪᒃ ᑎᐱᑕ ᒋ ᐅᑕᐎᔪᐤ᙮
32ᑎᐱᑦ ᒪᒃ ᒐᓯᔨᒋ ᒋ ᐅᑕᐎᔪᐤ, ᑭᔭ ᒐᓯᔾ, ᐅᐸᑕ ᒋ ᐅᑕᐎᔪᐤ, ᐅᐸᑦ ᒪᒃ ᐳᐊᓴ ᒋ ᐅᑕᐎᔪᐤ, ᑭᔭ ᐳᐊᔅ, ᓴᓪᒧᓇ ᒋ ᐅᑕᐎᔪᐤ, ᐊᑯ ᒪᒃ ᓴᓪᒧᓐ, ᓇᓱᓇ ᒋ ᐅᑕᐎᔪᐤ᙮
33ᓇᓱᓐ ᒪᒃ ᐊᒥᓂᑕᐸ ᒋ ᐅᑕᐎᔪᐤ, ᐊᑯ ᐊᒥᓂᑕᑉ, ᐊᑦᒥᓇ ᒋ ᐅᑕᐎᔪᐤ, ᐊᑦᒥᓐ ᒪᒃ ᐊᕐᓂᔨᒋ ᒋ ᐅᑕᐎᔪᐤ, ᑭᔭ ᐊᕐᓂ, ᐊᔅᕈᓇ ᒋ ᐅᑕᐎᔪᐤ, ᐊᔅᕈᓐ ᒪᒃ ᐸᕋᓴ ᒋ ᐅᑕᐎᔪᐤ᙮
34ᐸᕋᔅ ᒪᒃ ᒍᑕᔨᒋ ᒋ ᐅᑕᐎᔪᐤ, ᑭᔭ ᒍᑕ, ᒐᑭᐸ ᒋ ᐅᑕᐎᔪᐤ, ᒐᑭᑉ ᒪᒃ ᐊᐃᓯᑲ ᒋ ᐅᑕᐎᔪᐤ᙮ ᐊᐃᓯᒃ ᒪᒃ ᐊᑉᕋᐊᒪ ᒋ ᐅᑕᐎᔪᐤ, ᑭᔭ ᐊᑉᕋᐊᒻ, ᑕᕋᔨᒋ ᒋ ᐅᑕᐎᔪᐤ, ᑕᕋ ᒪᒃ ᓇᐅᕋ ᒋ ᐅᑕᐎᔪᐤ᙮
35ᓇᐅᕐ ᒪᒃ ᓴᕈᑲ ᒋ ᐅᑕᐎᔪᐤ, ᐊᑯ ᒪᒃ ᓴᕈᒃ, ᕆᐅᐊ ᒋ ᐅᑕᐎᔪᐤ, ᕆᐅ ᒪᒃ ᐸᓚᑲ ᒋ ᐅᑕᐎᔪᐤ, ᑭᔭ ᐸᓚᒃ, ᐃᐳᕋ ᒋ ᐅᑕᐎᔪᐤ, ᑭᔭ ᐃᐳᕐ, ᓯᓚᔨᒋ ᒋ ᐅᑕᐎᔪᐤ᙮
36ᓯᓚ ᒪᒃ ᑲᐃᓇᓇ ᒋ ᐅᑕᐎᔪᐤ, ᑭᔭ ᑲᐃᓇᓐ, ᐊᕐᐸᑭᓴᑕ ᒋ ᐅᑕᐎᔪᐤ ᐊᕐᐸᑭᓴᑦ ᒪᒃ ᓴᒪ ᒋ ᐅᑕᐎᔪᐤ, ᑭᔭ ᓴᒻ, ᓄᐛᔨᒋ ᒋ ᐅᑕᐎᔪᐤ, ᓄᐛ ᒪᒃ ᓚᒪᑲ ᒋ ᐅᑕᐎᔪᐤ᙮
37ᓚᒪᒃ ᒪᒃ ᒪᑐᓯᓚᔨᒋ ᒋ ᐅᑕᐎᔪᐤ, ᑭᔭ ᒪᑐᓯᓚ, ᐃᓄᑲ ᒋ ᐅᑕᐎᔪᐤ, ᐃᓄᒃ ᒪᒃ ᒐᕋᑕ ᒋ ᐅᑕᐎᔪᐤ, ᒐᕋᑦ ᒪᒃ ᒪᐊᓚᓕᓚ ᒋ ᐅᑕᐎᔪᐤ, ᒪᐊᓚᓕᓪ ᒪᒃ ᑲᐃᓇᓇ ᒋ ᐅᑕᐎᔪᐤ᙮
38ᑲᐃᓇᓐ ᒪᒃ ᐃᓄᓴ ᒋ ᐅᑕᐎᔪᐤ, ᑭᔭ ᐃᓄᔅ, ᓴᑕ ᒋ ᐅᑕᐎᔪᐤ, ᓴᑦ ᒪᒃ ᐊᑕᒪ ᒋ ᐅᑕᐎᔪᐤ᙮ ᐊᑯ ᒪᒃ ᐊᑕᒻ, ᒋᓴᒪᓂᑐᐛ ᒋ ᐅᑕᐎᔪᐤ᙮
Nu markerat:
ᓗᒃ 3: ᓇᔅᑲᐱ
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada