Luka 21
21
Sur Hamta Ar Mwala Kughung
(Mat 12:41-44)
1Antə Yesu haptə kərari ka wutə mjir gəna akwa pu cautər ɗa akwa vəi pwi kwaba akwa mbwar vəngkər səli. 2Antə tsa wutə mwala kughung laga na ngguɗi akwa pu anini suɗa akwa vəi hamta su. 3Antə tsa pəla, “Jiri I akwa pəla ala giri, mwala kughung ngəni na ngguɗi an pu kwaba na hang ta shanga mambila mji. 4Kamnyar arɗa shanga ɗa kətsəkətsa akwa gənar ɗa, ka hamta cautər ɗa kəgari. Amma ar mwala ni akwa ngguɗikurərni, antə tsa hamta shanga su, an kurkura su tə tsa kəgari akwa ndzəndziyirni.”
Mda Ata Sə Ndlamta Mbwar Hyel
(Mat 24:1-2; Mar 13:1-2)
5Sakatə mjirthlipərni laga akwa ngkər laku tə mdə dəɓatə mbwar vəngkər səli ka pelayeri na ɓɗakɓɗaku, kəga cautayeri tə mdə hamta aka Hyel ni, antə Yesu pəla, 6“Shanga suayeri ngəni tə giri akwa wulari ni, saka ata sə si tə pela wala duku aɗi ata sə mbila ata kəra nvwa ni kula mdə huzamta wa.”
Bwaniyayeri Na Ata Sə Hara Akəmata Kurər Duniya
(Mat 24:3-14; Mar 13:3-13)
7Antə da yu ni abbər, “Maləm, nawa antə suayeri ngəni ata sə hara ri? Tsuwa man ata ndzi seɗar shanga suayeri ngəni abbər da abaka hara nə ri?”
8Antə Yesu pəla, “Ka giri hara hangkal ta mji asə pwaktəmta giri. Kamnyar mji hang ata sə si akwa thləmi ka pəla, ‘I an tsa!’ Tsuwa ka da pəla abbər, ‘Saka ku hara!’ Giri aɗiya nu ɗa wa. 9Tsuwa wala ma sakatə giri ku nggatə mji akwa mpa, kəga haptər hangkal, giri aɗiya thlivər wa. Kamnyar dwali ka suayeri ngəni baɗitə hara, amma sakar kurari aɗi hara katagu wa.”
10Antə tsa ləkəma ka pəla ala ɗa abbər, “Tsəɗi ata sə mpa ka tsəɗi nvwani, ka kuthlikur mpa ka kuthlikur nvwani. 11Di ata sə kənggərantədzi ka duna, tsuwa mi ka shilku ata sə hara akwa vəyayeri zumzum. Tsuwa mda ata sə wutə sur thlivərantə mdə hang, kəga surndatə na ol'ola na ata səghəi akwar amtazi. 12Amma akəmata shanga suayeri ngəni ahara, da ata ngkəi giri, ka da hara bwani ala giri, ka mwantə giri akwa mbwar vəngkər səli ka akwa pərsəna. Da ata mwantə giri akəma kuthlyayeri ka gwamnayeri kamnyar thləmi. 13Ngəni ata kəlar ala giri sakar hara seɗa ala ɗa ata kəri. 14Antə peri giri hangkala giri, giri aɗiya huvə damitədzi ata kəra laku tə giri ata sə hamta amsa ala ɗa wa. #Luk 12:11-12 15Kamnyar I ata na ala giri ndər tə giri ata pəlari japu ka ɗəɗukur, natə mda aɗi wala pal akwa nca dawayeri ar giri na ata mzhi thləthlatə ka giri wala pəla su damwa zum ta ar giri ni wa. 16Har mji na ya giri, ka maɗama' giri, ka yangkura giri, ka pazhayeri ar giri, ata sə ɓəli giri. Da ata sə tsəgəi mji laga akwa nca giri. 17Shanga mji ata sə nggəlar giri kamnyar na. 18Amma wala shishir kəra giri duku aɗi ata sə sha wa. 19Ka giri thləthlatə gyang antə giri ata sə mbantə mpika giri.”
Yesu Gari Ata Kəra Ndlar Urushalima
(Mat 24:15-21; Mar 13:14-19)
20 “Amma ma sakatə giri ku wutə Urushalima ku kalaktədzi ka sojayeri, ka giri sənda abbər mda abaka ɓdləmta ni. 21To, sakanda ka mji na akwa Yahudiya hwi mwari akwa garayeri, ka mji na akwa bərni hwi ləɓəla, tsuwa mji na akwa kauya aɗiya ləkwa bərni wa. 22Kamnyar virayeri ngəni an virər ntə dawa, kamnyar nghyaɓəla shanga su na ku rəbutədzi akwa kakaɗər Hyel. 23Sha ku wutə mwanki na ka dza ɗa suɗa, ka mwanki na ka maɗa' ata hili akwa saka ndaga! Kamnyar bwani na mwavər ata sə hara akwa tsəɗi ni, tsuwa Hyel ata sə ncantə ɗəffə bwarbwarkur arni ata kəra mji ngəni. 24Mda ata sə tsəgəi mji laga ka katsakar, ka mwantə mji laga tsuwa akwa pərsəna akwa shanga tsəɗiyayeri. Antə mji na aɗi mjir Yahudi wa ata sə ntsəntsartə Urushalima, har ka vədza aka sakatə sakar mji na aɗi mjir Yahudi wa ni ku nghyantədzi.”
Sakar Səyir Ɓzər Mda
(Mat 24:29-31; Mar 13:14-27)
25 “Tsuwa mda ata sə wutə suayeri na ata thlivərantə mda ata dza pci, ka thliya, ka sasəlkayeri. Akwa duniya tsuwa mji ata sə ləkwa bwani, ka ndəndatədzi kamnyar thlivər kuraka manda kəga mpar yimi. #Kəl Yah 6:12-13 26Mji ata sə thləvamtadzi kamnyar thlivəra, ka yakata ata kəra suayeri na akwa hara aka duniya ni. Kamnyar Hyel ata kənggərantə shanga suayeri na amtazi. 27Sakanda antə da ata sə wutə Ɓzər Mda akwa si akwa dlamba ka kuthlikur ka səli na ola. #Kəl Yah 1:7 28Ma sakatə giri ku wutə suayeri ngəni ku baɗitə hara, ka giri ɗəmhədzi ɓɗaku, kamnyar sakar mbantədzər giri ku hara kudzəha.”
Sur Thlipa Ata Kəra Nfur Kamnda
(Mat 24:32-35; Mar 13:28-31)
29Antə Yesu ngkər ala ɗa karapu laga abbər, “Wul giri nfur kamnda ka shanga nfwayeri damwa. 30Kəlara sakatə giri ku wutə thlaliyir ɗa ku baɗitə ɗəɗa, giri ku sənda abbər vəya ku hara kudzəha. 31Tsu apani tsuwa ma sakatə giri ku wutə suayeri ngəni akwa hara, ka giri sənda abbər kuthlikurər Hyel ku hara kudzəha.
32 “I akwa pəla ala giri jirkur, mjir zaman ngəni aɗi ata mtəgəmtadzi wa, tar ma shanga suayeri ngəni ku hara. 33Vəi na amtazi ka duniya ata sə kura, amma ndərayeri arna aɗi ata kur cap wa.”
Ka Giri Səka Ka Ndzi Ɗəmhəɗəmhari
34 “Amma ka giri hara hangkal ka kəra giri! Giri aɗiya zhari ka səmsu, ka wika, ka dzamər ndzəndziyir duniya ni, kətə hangkala giri wa. Kamnyar ma apani wa, vir nda ata sə si ata kəra giri kakər 35apa kilang akwa dərku. Kamnyar tsa ata si ata kəra shanga mji na ata kəra akwa duniya. 36Amma ka giri ndzi ɗəmhəɗəmhari tədəku kəlara saka, akwa hara adduwa kamnyar ka giri wutə dunar msərantədzi akwa shanga suayeri na ata sə hara ni, tsuwa ka giri sə thləthlata akəma Ɓzər Mda.”
37Tədəku viri Yesu akwa thlipa akwa mbwar vəngkər səli ni, ma tahaku ku hara tsa ana mwari akwa Gar Nfur Zaitun ka tsa pəi anda. #Luk 19:47 38Antə ɗəɗəpə mbing shanga mji ana si adzə ni akwa mbwar vəngkər səli kamnyar ngga surthlipərni.
Nu markerat:
Luka 21: KNB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.