ILOOWALI 11
11
Monala Babel
1Bohu-bohulio mai, babaa-ngusawalo to ngoilanggubu dunia bo obahasa tuwau wau timongolio helomake tataa-heyaalo u tutuuwauwa. 2Tou̒ timongolio helonao̒ ode utoonulalo mao̒ ode ambahu tiimuru, timongolio malei dungga todatahu tuwau to Babilonia, lapatao̒ lotitatapu mola teto. 3Timongolio malo loi̒ya ngota timongota, “Ntali ito mohutu botutela wau molumbilao̒ tunggula motoheeto.” Odi-odieelo mola timongolio o botutela duo̒lo botu lobele wau teri u mowali polemulio. 4Uali mongolio, “Dulo ito momongu kota wolo monala tuwau u bolitutui̒o demola hulungo, alihu ito mowali polu polutuo̒ wau diila tamo bubuu-ayaawa to ngoilanggubu dunia.”
5Yi malolaahei Eeya lomilohe kota wau monala u pilopo tihulo manusia. 6Lapatao̒ Tio lotahuda, “Timongolio botie ngobangusa wolo ngobahasa, wau utie heli bohulo raraan-janawalo limongolio. Diilalo mohiheo timongolio maa mambo mopohutu penu boli wolo u otohilaa limongolio. 7Opioheelio ito molaahe mola wau mopo puyoo̒to bahasa limongolio alihu timongolio diilalo mongalati ngota timongota.” 8Odi-odieelo mola Eeya lopo bubuua̒yaawa olimongolio ode ngoilanggubu dunia. Lapatao̒ malo huheli timongolio lopotihula kota boito. 9Sababu uito kota boito yilohialio tanggula Babel, kalana teto Eeya lopo puyoo̒to bahasa lo ngoa̒amila bangusa, wau lonteto timongolio pilopo bubuua̒yaawa lo Eeya ode ngoilanggubu dunia.
Wali mai lei Sem
(Boh. Taw. 1:24-27)
10Uti-utieelo wali mai lei Sem. Dulo taunu mola lapatio mao̒ taluhee daa̒, tou̒ tei Sem o umulu ngohetuto taunu, tio loo̒tapu walao̒ talolai̒ ngota tai̒lunte Arpakhsad. 11Lapatao̒ uito tio donggo tilumumula mola limo lohetuto lotaunu poli, wau loo̒tapu mai mongo walao̒ wewo.
12Tou̒ tei Arpakhsad o umulu tolo pulaa limo lotaunu, tio loo̒tapu mai walao̒ talolai̒, tanggulio Selah. 13Lapatao̒ uito tei Arpakhsad donggo tilumumula mola wopato hetuto tolo taunu poli, wau loo̒tapu mai mongo walao̒ wewo.
14Tou̒ tei Selah o umulu tolo pulu lotaunu, tio loo̒tapu mai walao̒ talolai̒, tanggulio Eber. 15Lapatao̒ uito tei Selah donggo tilumumula mola wopato hetuto tolo taunu poli, wau loo̒tapu mai mongo walao̒ wewo.
16Tou̒ tei Eber o umulu tolo pulaa pato lotaunu, wau loo̒tapu mai walao̒ talolai̒ tanggulio Peleg. 17Lapatao̒ uito tei Eber donggo tilumumula mola wopato hetuto tolo pulu lotaunu poli, wau loo̒tapu mai mongo walao̒ wewo.
18Tou̒ tei Peleg o umulu tolo pulu lotaunu tio loo̒tapu mai walao̒ talolai̒, tanggulio Rehu. 19Lapatao̒ uito tei Peleg donggo tilumumula mola dulo hetuto tio lotaunu poli, wau loo̒tapu mai mongo walao̒ wewo.
20Tou̒ tei Rehu o umulu tolo pulaa dulo taunu, tio loo̒tapu mai walao̒ talolai̒, tanggulio Serug. 21Lapatao̒ uito tei Rehu donggo tilumumula mola dulo hetuto pitu lotaunu poli, wau loo̒tapu mai mongo walao̒ wewo.
22Tou̒ tei Serug o umulu tolo pulu lotaunu, tio loo̒tapu mai walao̒ talolai̒, tanggulio Nahor. 23Lapatao̒ uito tei Serug donggo tilumumula mola dulo hetuto lotaunu poli, wau loo̒tapu mai mongo walao̒ wewo.
24Tou̒ tei Nahor o umulu dulo pulaa tio lotaunu, tio loo̒tapu mai walao̒ talolai̒, tanggulio Terah. 25Lapatao̒ uito tei Nahor donggo tilumumula mola ngohetuto mopulaa tio lotaunu poli, wau loo̒tapu mai mongo walao̒ wewo.
26Lapatao̒ tei Terah o umulu pitu lopulu lotaunu, tio loo̒tapu mai walao̒ mongo lolai̒ toulota, deu̒yito-yito tei Abram, Nahor wolei Haran.
Wali mai lei Terah
27Uti-utieelo wali mai lei Terah: Tei Terah tiyamo lei Abram, Nahor wolei Haran. Tei Haran o walao̒ talolai̒, tanggulio Lot. 28Tei Haran yilate to kambungu pilohuluta loduhulio, deu̒yito-yito Ur to Babilonia tou̒ tiyamolio donggo tumu-tumulo. 29Tei Abram lonika woli Sarai, wau tei Nahor lonika woli Milka walao̒ tabua lei Haran. Tei Haran donggo owalao̒ talolai̒ wewo tanggulio Yiska. 30Tutuulio tutu ti Sarai bintela.
31Tei Terah lololaa mao̒ kota lo Ur to Babilonia pee̒-pee̒enta wolei Abram walai̒o, tei Lot wombulio, wau ti Sarai moluhengio, deu̒yito-yito dile lei Abram. Tio o makusudu ohilaa monao̒ mola ode lipu lo Kanaa̒n. Bo yinta leidunggalo mola to Haran, timongolio lotitatapu mola teto. 32Wau totambati boito olo tei Terah yilate to umulu dulo hetuto limo lotaunu.
Nu markerat:
ILOOWALI 11: LAIGOR
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in