متّی 8

یِسُوع اِک کوڑھے نُوں شفا دیندا اے

1تے جد اوہ اوس پہاڑوں اُتریا بتھیرے لوک اوہدے مگر ٹُر پئے۔ 2تے ویکھو اِک کوڑھے اگّے ہو کے اوہنوں سجدہ کر کے آکھیا خُداوندا جے تُوں چاہیں تے مَینُوں پاک صاف کر سکنا ایں۔ 3تے ہتّھ وَدّھا کے اوس اوہنوں چُھوئیا تے آکھیا مَیں چاہناں آں۔ تُوں پاک صاف ہو جا۔ تے اوسے ویلے اوہدا کوڑھ صاف ہوگیا۔ 4تے یِسُوع اوہنوں آکھیا خبردار کِسے نُوں نا دسیں۔ پر جا کے اپنا آپ کاہِن نُوں وکھا۔ تے جیہڑی نذر مُوسیٰ نے ٹھیرائی اے۔ چڑھا۔ تاں جو اوہناں لئی گواہی ہوئے۔

یِسُوع اِک رُومی صُوبیدار دے نوکر نُوں شفا دیندا اے

5تے جد اوہ کَفرنحُوم وِچ اَپڑیا اِک صُوبیدار اوہدے کول آیا۔ تے اوہدی مِنّت کر کے آکھیا پئی۔ 6اَے خُداوند میرا نوکر جھولے دا ماریا گھر وِچ پیا ڈاہڈا تڑپھدا اے۔ 7تے اوس اوہنوں آکھیا مَیں آ کے اوہنوں چَنگا کراں گا۔ 8تَد صُوبیدار جواب دِتّا۔ خُداوند مَیں ایس لائق کِتّھوں ہویا پئی تُوں میری چھت ہیٹھاں آویں؟ پر نِرا کلام کر تے میرا نوکر چَنگا ہو جائے گا۔ 9کیوں جو مَیں وی نوکر ہاں۔ سپاہی میرے حُکم وِچ نیں۔ تے مَیں اِک نُوں آکھنا آں پئی جا تے اوہ جاندا اے۔ تے دُوجے نُوں آ۔ تے اوہ آؤندا اے۔ تے اپنے غلام نُوں پئی ایہہ کمّ کر۔ تے اوہ کر دا اے۔ 10تے یِسُوع ایہہ سُن کے تعجُّب کِیتا۔ تے اوہناں نُوں جیہڑے مگر مگر آوندے سن آکھیا۔ مَیں تُہانوں سَچ آکھنا آں پئی اِسرائیل وِچ دی مَیں اینا اِیمان نئیں ویکھیا۔ 11تے مَیں تُہانوں آکھنا آں پئی بتھیرے چڑھدیوں تے لہندیوں آؤن گے تے ابرہام تے اِضحاق تے یعقُوب دے نال اسمان دی بادشاہی وِچ بَیٹھن گے۔ 12پر بادشاہی دے فرزند باہر لے ہنیرے وِچ سُٹّے جان گے۔ اوتھے رونا تے کچیچیاں وٹنا ہوئے گا۔ 13تے یِسُوع صُوبیدار نُوں آکھیا۔ جا تے جِہیا تُوں یقِین کِیتا اوہی تیرے لئی ہوئے۔ تے اوہ نوکر اوسے گھڑی چَنگا ہوگیا۔

یِسُوع بتھیرے لوکاں نُوں شفا دیندا اے

14تے یِسُوع پطرس دے گھر وِچ آ کے اوہدی سَس نُوں تاپ نال پَیاں ہویاں ویکھیا۔ 15تے اوہنے اوہدا ہتّھ چُھوئیا تے تاپ لیَہہ گئی۔ تے اوس اُٹھ کے اوہدی سیوا کِیتی۔ 16تے جد شام پئی لوک بتھیریاں بد رُوح چمبڑیاں ہویاں نُوں اوہدے کول لے آئے۔ تے اوس اوہناں رُوحاں نُوں کلام ای نال باہر کڈھ دِتّا تے ساریاں بِیماراں نُوں چَنگا کِیتا۔ 17تاں جو اوہ گلّ جیہڑی یسعیاہ بنی آکھی سی پُوری ہوئے۔ پئی اوس آپ ساڈیاں ماندگِیاں لے لئیاں۔ تے ساڈیاں روگاں نُوں چُک لیا۔

یِسُوع پیچھے چَلّن دے خواہش مند لوک

18تے جد یِسُوع اپنے چَوفیرے بڑی خلقت ویکھی تَد اوس پار چَلّن دا حُکم دِتّا۔ 19تے اِک فقِیہ اگّے ہو کے اوہنوں آکھیا۔ اَے اُستاد جِتّھے کِتّھے تُوں جائیں مَیں تیرے مگر چلاں گا۔ 20تے یِسُوع اوہنوں آکھیا لُومبڑِیاں کول گھورنے تے وَا دیاں پنچھیاں کول آہلنے۔ پر اِبنِ آدم کول تھاں نئیں اے جِتّھے سِر دھرے۔ 21تے شاگِرداں وِچوں اِک ہور نے اوہنوں آکھیا۔ خُداوندا اجازت دے مَیں پہلاں جا کے اپنے پئیو نُوں دفناواں۔ 22پر یِسُوع اوہنوں آکھیا میرے مگر ٹُر آ۔ تے مُردیاں نُوں اپنے مُردے دفناں دے۔

یِسُوع طوفان نُوں روک دیندا اے

23تے جد اوہ بیڑی اُتّے چڑھیا اوہدے شاگِرد اوہدے مگر آئے۔ 24تے ویکھو سمُندر وِچ ایڈی ہنیری آئی پئی بیڑی ٹَھلّاں وِچ لُکدی جاندی سی۔ پر اوہ آپ سُتّا پیا سی۔ 25تے اوہناں کول آ کے اوہنوں اُٹھایا تے آکھیا خُداوندا بچا۔ اسی مر چلّے آں۔ 26تے اوس اوہناں نُوں آکھیا اَے تھوڑے اِیمان والیو! تُسی ڈر دے کیوں ہو؟ تَد اوس اُٹھ کے وَا تے سمُندر نُوں جِھڑکیا تے بڑا امن ہوگیا۔ 27تے اوہ لوک تعجُّب کر کے آکھن لگّے پئی ایہہ کِس طرح دا بندہ اے پئی وَا تے سمُندر وی اوہدی مَن دے نیں۔

یِسُوع دو بندیاں نُوں جِنہاں وِچ بدرُوحاں سن شفا دیندا اے

28تے جد پار جا کے اوہ گدرینِیاں دے دیس وِچ اَپڑیا اوہنوں دو بندے جِنہاں وِچ بدرُوحاں سن۔ قبراں وِچوں نِکل کے آ مِلے تے اوہ اَیڈے ڈاہڈے سن پئی کوئی اوس راہوں لنگھ نئیں سی سکدا۔ 29تے ویکھو اوہناں چِیک مار کے آکھیا۔ اَے خُدا دے پُتر تیرا ساڈے نال کِیہ واسطہ؟ تُوں ویلے توں پہلاں ای سانُوں دُکھ دین نُوں ایتھے آگیا ایں؟ 30تے اوہناں توں دُراڈے بتھیرے سُؤراں دا اِجّڑ چُگدا سی۔ 31سو بدرُوحاں ایہہ آکھ کے اوہدی مِنّت کِیتی جے تُوں سانُوں کڈھناں ایں تے سانُوں اوہناں سُؤراں دے اِجّڑ وِچ گھل دے۔ 32تے اوس اوہناں نُوں آکھیا جاؤ۔ تے اوہ نِکل کے سُؤراں وِچ جاوڑیاں۔ تے ویکھو سارا اِجّڑ ڈھائے اُتّوں سمُندر وِچ سِر توڑ بھجیا تے پانی وِچ ڈُب مریا۔

33تَد چران والے نَسّ گئے تے نگّر وِچ جا کے سارا حال دسیا۔ تے نالے بدرُوحاں والیاں دا حال وی۔ 34تے ویکھو سارا شہر یِسُوع نُوں اگّوں والی مِلن نُوں نِکلیا تے اوہنوں ویکھ کے اوہدی مِنّت کِیتی پئی ساڈیاں حداں توں باہر ٹُرجا۔

Nu markerat:

متّی 8: pan2020

Märk

Dela

Kopiera

Vill du ha dina höjdpunkter sparade på alla dina enheter? Registrera dig eller logga in

Punjabi New Testament, Revised 2020

Revised Edition

Computer Typeset Edition.

Revised Edition of Punjabi New Testament 1952

The Punjabi New Testament text may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the title of the copyright page of the work as follows:

Scripture taken from the Punjabi New Testament, Revised 2020,

Used by Permission of The Pakistan Bible Society

For the use of text more than 25% of the work in which intended to quote, Please take prior permission.

Cover design, Composed and typeset by the CAP Department of the Pakistan Bible Society

PAKISTAN BIBLE SOCIETY

LAHORE, PAKISTAN

Lär dig mer om پنجابی نواں عہد نامہ نظرثانی شدہ چھپائی