Tshibangidilu Diumvuija
Diumvuija
— Mukanda wa kumpala wa mu Mukanda wa Mvidi Mukulu ke mukanda wa “Tshibangidilu,” bualu udi utumanyisha malu a ku mbangilu wa bintu bionsu, mbangilu wa buloba, wa bantu ne wa Tshisamba tshia bena ditaba.
Badi mua kutapulula mukanda ewu mu bitupa binene bibidi:
I. Tshit, tshia 1 too ne tshia 11: mu tshitupa etshi badi bandamuna ku nkonku idi bantu badiela matuku onsu: buloba butudi tusomba mbufume penyi? Tshidi muntu ne bua kuenza panu ntshinyi? Mudi bantu misangu mivule kabayi bumvuangane bimpe mbishi? Bantu badi mua kudienza tshintu tshimue anyi? Kadi katuena mua kujadika bimpe bikondu bivua malu a kale adibu batulondela mu tshitupa etshi enzeka nansha.
II. Tshit, tshia 12 too ne ku tshia 50: mu tshitupa tshibidi etshi badi batumanyisha muvua Mvidi Mukulu ukeba kusungidila bantu: udi ubikila bankambua ba kumpala ba bena Izrayele bua bamuambuluishe mu mudimu wende wa kupandisha bantu. Bankambua aba ke Abrahame (12.1—25.18), tatuende wa bena ditaba, udi uleja bantu bonsu mudibu mua kutumikila Mvidi Mukulu. Nkambua muibidi ke muanende Izake, muisatu ke Yakobe, muikulu wa Abrahame (25.19—37.1). Yakobe neapete kabidi dina dikuabu dia Izrayele. Yozefe, umue wa ku bana ba Yakobe, (37.2—50.26) neikale nkambua wa bisamba bibidi (Efrayime ne Menashe). Yozefe neabikile tatuende ne bana babu bua baye kusomba mu ditunga dia Ejipitu. Mukanda wa Tshibangidilu udi utulongesha nangananga bivua Mvidi Mukulu muenze. Udi utujadikila ne: Mvidi Mukulu mmufuke bintu bionsu. Bionsu bidiye muenze bidi bileja Lumu luende. Kadi bu mudiye mufuke bionsu, bionsu bidi ku bumfumu buende. Ku ndekelu, mukanda udi utumanyisha ne: Mvidi Mukulu nealame amu kulama bantu bende kabidi neabambuluishe. Nanku mu mukanda mujima badi batumanyisha nangananga mudimu udi Mvidi Mukulu ukuata: udi udimanyisha kudi bantu bende, ubaludika mu malu a panu. Mvidi Mukulu udi musue bua bantu bakuate nende mudimu, bamuitabe, bitabe mudiye ne bua kukumbaja bivuaye mulaye, batumikile mikenji yende. Nanku mu mukanda ewu, mbafunde malu a kale avua bena Izrayele badianjila kulondelangana mukana. Mukanda ewu udi utumanyisha muvua bantu aba bitaba Mvidi Mukulu, utubela kabidi bua tuikale bena ditaba.
Nu markerat:
Tshibangidilu Diumvuija: TSH96
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Bible avec Livres Deutérocanoniques en Tshiluba © Société Biblique de la R. D. Congo, 1996