1Akabambu Akolongu 5
5
Kuandaa kusenga Nyumba jaka Sapanga
2Majambu gi Ipindi 2:1-18
1Najombi Hilamu bambu nkolongu juku Tilu, jojwabii nkosi uka Daudi, ejamanya kubanga Solomoni ndi bambu nkolongu badala ja atati baki, jwaatuma akatumisi baki kwaki. 2Najombi Solomoni annzibua bambu nkolongu Hilamu kwa malobi ganga, 3“Gumanyiki kubanga atati bangu Daudi ngasebawesiki kunsengee Bambu Sapanga, Sapanga waki, nyumba jukundumbali, kwa ndaba ja ngondu jingi jejakomana na akabaja bu nndema wapambipi mbaka Bambu Sapanga pajunhenga jwaawesa. 4Lakini sajenu, Bambu Sapanga, Sapanga wangu, junhengiki ndama sulukwali pandu poti. Ngasemi na akabaja wala ngasembata mang'aliku. 5Ndi hamwi kunsenge Bambu Sapanga, Sapanga wangu, nyumba jukundumbali. Ngati Bambu Sapanga ejaalagila atati bangu kupwaaga, ‘Mwana waku jonanhenga jutama pi kiteu saku su ulongosi ndi jojinzengila Nyumba jaka Sapanga!’ 6Ndienu walagalakia bandu baku annzekuliya mikongu ji mielezi juku Lebanoni. Bandu bangu bajiunga pamu na bandu baku mu lihengu heli, nanepani naalepa atumisi baku kulengana na ewipwaga, ndaba ngati egumanyiki, ngamundu jokapi kwitu jojumanyiki kuseku mikongu ngati mwanganya mwa Asidoni.”
7Hilamu jwatoguli ngamaa ejamanya majambu haga kuhuma kwaka Solomoni, japwaga, “Bambu Sapanga julumbalika kipindi senze, sukumpeke Daudi mwana jojubii nu umanyi ukulongusa nndema nkolongu gongo.” 8Ndienu, Hilamu jumpelakia Solomoni majambu, kupwaga, “Nagajopiki majambu gaku, na ngiti nugupekia mikongu joti ji mielezi ni mikongo ji miboleshi jewijipala. 9Bandu bangu biikusanya mipendi nukugahele kuhuma ku Lebanoni mbaka kunhanga nkolongu nukugakonga mapungu mapungu gajebalaa panani ja masi mbaka pandu pawiimbwagila. Hoku nagabopula nawehapa wagajopa. Ku upandi waku wehapa wiimbekia posu kwa ndaba ja bandu bangu.”
10Ndipala, Hilamu ampekia Solomoni mipendi joti yi mikongu ji mielezi ni miboleshi jejapala, 11najombi Solomoni ampekia Hilamu inganu madebi laki ibeli na elupu alubaini na mahuta gaamboni madebi mia ibeli kila saka, kwa ndaba ja kwalea bandu bunyumba jaki.
12Ndienu, Bambu Sapanga ampekia Solomoni umanyi ngati eandagila. Kwabiya nu lukwali kati jaka Solomoni na Hilamu na batenda kujetangane kati jabu.
13Bambu nkolongu Solomoni jakusanya bandu elupu selasini kuhuma pandu poti pu nndema uku Izilaeli, na ahenga mahengu gukulamiswa, 14ambeka Adonilamu jubiya jojujemale. Jwabagulana bandu haba makundi matatu, kila likundi bandu elupu komi, jagapelika makundi haga kwa zamu, mwei gumu ku Lebanoni na miei jibeli kunyumba. 15Solomoni jwabii kabee na bandu baatoto misigu elupu sabini na baabasa malimu kwiitombi elupu semanini, 16pamu na akakilongosi elupu itatu na mia tatu bababiya ajemale lihengu heli nu kwaalongo baahenga lihengu boti. 17Kwa malagalaki gaka bambu nkolongu bayembula malibu makolongu na gaamboni, ili kugabasa kwa ndaba jukusenge nsingi wa Nyumba jaka Sapanga. 18Ndienu akapundi baka Solomoni na baka Hilamu na bandu ba musi uku Gebali baandiya malibu ni imbau yukusenge Nyumba jaka Sapanga heji.
Nu markerat:
1Akabambu Akolongu 5: MaBV
Märk
Dela
Jämför
Kopiera
Vill du ha dina höjdpunkter sparade på alla dina enheter? Registrera dig eller logga in
The New Testament in Matengo Language ©The Word for the World International and Matengo Language Translation, 2020. All rights reserved.