Иоанн 1
1
1 бетӀер
Байбихьи
1Бищунго цебе букӀана РагӀи. РагӀи Аллагьасда аскӀоб букӀана. РагӀи букӀана Аллагьлъунги. 2Бищунго цебе гьеб Аллагьасда аскӀоб букӀана. 3Гьеб РагӀудалъун бижана кинабго. Бижарабщиналъул щибниги бижичӀо гьеб гьечӀого. 4Гьелъулъ букӀана чӀаголъи. Гьеб чӀаголъи букӀана гӀадамазе Нурлъун. 5Гьеб Нур бецӀлъуда кунчӀун буго, бецӀлъиялда гьеб Нур киданиги къезабизе кӀвечӀо.
6Гьале Аллагьас витӀун вачӀана ЯхӀя абулев чи. 7Гьев вачӀун вукӀана халкъалда цебе гьеб Нуралъе нугӀлъи гьабизе, гьесухъги гӀенеккун, киналго гьелда божизелъун. 8ЯхӀя живго Нур вукӀинчӀо, гьев вачӀун вукӀана гьеб Нуралъе нугӀлъи гьабизе. 9Гьеб ккола дуниялалде бачӀараб хӀакъаб Нур. Гьелъ гвангъизавун вуго щивав чи. 10Гьеб Нур бачӀун букӀана гьелдалъун жиб бижараб дуниялалде, амма гӀаламалда гьеб лъачӀо. 11Жиндирго халкъалъухъе вачӀун вукӀана Нурлъун вугев чи, жиндирго халкъалъ гьев къабул гьавичӀо. 12Амма жив къабул гьавуразе ва жинда божаразе гьес рес кьуна Аллагьасул лъималлъун рукӀине. 13Лъилниги биялдасан, лъилниги черхалдасан яги бихьинчиясул гьаваялдасан лъугьарал лъималлъун рукӀине гуро рес кьураб, Аллагьасул лъималлъун рукӀинейин.
14РагӀи инсанлъун лъугьана, баркаталъул ва хӀакъабщиналъул цӀурав инсанлъун лъугьун, нижеда цадахъ чӀана. Нижеда бихьана гьесул кӀодолъи – Инсул цохӀо вугев Васасул кӀодолъи.
15Гьесул хӀакъалъулъин ЯхӀяца бицунеб букӀараб. ЯхӀяца ахӀулеб букӀана: «Дида хадув вачӀунев дидаса гӀемерго тӀадегӀанав кколилан дица бицунеб букӀарав чи вуго гьев. Дидасаги цеве вукӀиндалин гьев тӀадегӀанав вугев!» 16Гьесул баркаталъул гьарзалъиялъин баркаталда хадубги баркат щвараб нижее. 17Къанун Мусахъ битӀун бачӀана Аллагьас, баркатги хӀакъабщинабги МасихӀ ГӀисадасан загьирлъана. 18Аллагь киданиги лъиданиги вихьичӀо, амма кидаго Инсудаса ватӀалъуларев цохӀо вугев Васасдалъун вихьизавуна гьес живго.
ЯхӀя аварагас жиндиргоги ГӀисалги бицунеб буго
19Иерусалималдаса ягьудияз кашишзабиги левиталги мун щивилан гьикъизе ритӀун рачӀараб мехалъ, жиндирго хӀакъалъулъ нугӀлъи гьабун, 20гьес инкар гьабичӀо, гьев мукӀурлъана – жив МасихӀ гурилан мукӀурлъана ЯхӀя. 21Гьедин батани, Иляс аварагищха мунилан гьикъана гьез. Гурилан жаваб кьуна ЯхӀяца. Мун аварагищилан гьикъараб мехалъги гурилан абуна гьес. 22Ахиралда гьез гьикъана:
– Щивха мун? Ниж дуда аскӀоре ритӀарал гӀадамазда щибилан нижеца бицинеб? Дуцаго щивлъун мун рикӀкӀунев?
23ЯхӀяца жаваб кьуна:
– Дун вуго, Ишая аварагас абухъе: «БетӀергьанасе нух къачӀайилан авлахъалда ахӀдолев вугев чи!»
24Гьел рукӀана фарисеяз ритӀарал гӀадамал. 25Гьез гьикъана:
– Мун МасихӀги гурев ватани, Илясги гурев ватани, аварагги гурев ватани, гьал гӀадамал лъадалъ ччун щайха дуца гьазул мунагьал чурулел ругел?
26ЯхӀяца жаваб кьуна:
– Дица нуж, мунагьал чуризе лъадалъ ччун рахъун, рацӀцӀад гьарулел руго, амма халкъалда гьоркьов вуго цо Чи. Нужеда лъаларо гьев. 27Дида хадув вачӀунев вуго гьев. Гьесул хьитил рухьен бичизецин мустахӀикъав гьечӀо дун.
28Гьеб гара-чӀвари ккана Иордан гӀурул доб рахъалда бугеб Бетаниялда. Гьенир лъадалъ ччун рахъулел рукӀана ЯхӀяца гӀадамал.
«Гьале дов Аллагьасул КьегӀер»
29Нахъисеб къоялъ ГӀиса жиндаго аскӀове вачӀунев вихьидал, ЯхӀяца абуна:
– Гьале дов – гьаб гӀаламалъул мунагь тӀаде босун къурбанлъун лъугьине бугеб Аллагьасул КьегӀер. 30Дида хадув вачӀунев дидаса гӀемерго тӀадегӀанав кколилан дица бицунеб букӀарав чи вуго гьав. Дидасаги цеве вукӀиндалин гьав тӀадегӀанав вугев! 31Дида лъалароан гьав, Исраилил халкъалъе гьав загьирлъизе гӀоло, гьел лъадалъ ччун рахъун рацӀцӀад гьаризе вачӀун вуго дун.
32ЯхӀяца нугӀлъи гьабун абуна:
– Дида бихьана зобалаздасан Илагьияб РухӀ, миккидул сураталда боржун бачӀун, гьесухъе рещтӀунеб ва гьесулъ хутӀулеб. 33Дида гьебмехалдаги лъачӀо гьев. Амма лъадалъ ччун рахъун гӀадамал рацӀцӀад гьаризе дун витӀарас дида абуна: «Илагьияб РухӀ жиндихъе рещтӀунев ва жиндихъ гьеб хутӀулев чи вихьила дуда. Гьев ккола Илагьияб РухӀалдалъун гӀадамал чуризе вачӀарав чи». 34Гьеб дида бихьана, гьединлъидал дица нугӀлъи гьабулеб буго гьав Аллагьасул Вас вукӀиналъе.
ГӀисал тӀоцересел муридал
35Нахъисеб къоялъ ЯхӀя жиндирго кӀиго муридасда цадахъ вугеб мехалъ, 36цевесан унев ГӀисахъги валагьун, гьес абуна:
– Гьале Аллагьасул КьегӀер.
37Гьеб рагӀидал ЯхӀял кӀиявго мурид ГӀисада хадур ана. 38Нахъехун вуссун валагьарав ГӀисада гьел жиндаго хадур рачӀунел рихьана.
– Нужее щиб къваригӀун бугеб? – ан гьикъана ГӀисаца гьезда.
ГӀисада гьезги гьикъана:
– Я, Рабби! («МугӀалим» абураб магӀна буго гьеб рагӀул.) Дур чӀей, яшав киб бугеб? – абун.
39Жинда хадур рачӀани лъалин нужеда гьебилан жаваб кьуна ГӀисаца. (СагӀат ункъо тӀубараб заман букӀана гьеб.) Гьел ГӀисада хадур гьесул бакӀалде ана ва тӀубараб къоялъго гьенир чӀана.
40ЯхӀяца бицаралъухъ гӀенеккун, ГӀисада хадур аразул цоясда цӀар Андрей букӀана. Гьев вукӀана Симон Пётрил вац. 41ТӀадвуссун щваравго, Симонги валагьун, Андрейица бицана нижеда МасихӀ ватанилан. (Грек мацӀалда Христосилан абула гьесда.) 42Гьес Симон ГӀисахъе вачана. Гьесухъ валагьун ГӀисаца абуна:
– Мун вуго Иоаннил вас Симон. Дуда цӀар букӀине буго Кефа (грек мацӀалда Пётр)#1:42 «Кьуру» абураб магӀна буго гьеб кӀиябго рагӀул. .
Филиппги НатанаэлгиГӀисада хадур уна
43Нахъисеб къоялъ Галилеялде ине хӀукму гьабуна ГӀисаца. Гьес Филипп валагьана ва жинда хадув вачӀайилан абуна. 44Пётрги Андрейги гӀадин, Филиппги Бетсаида шагьаралдаса вукӀана. 45Натанаэл валагьун, Филиппица абуна Мусал къануналдаги цогидал аварагзабазул ТӀухьдуздаги жиндир хӀакъалъулъ хъван букӀарав чи ватанин жидедаян. Гьев вугин Назареталдаса Юсупил вас ГӀиса. 46Назареталда сахав чи вахъуневищилан абуна Натанаэлица. Мунго а дов вихьизеян абуна гьесда Филиппица. 47Натанаэл вачӀунев вихьараб мехалъ ГӀисаца абуна:
– Гьав вуго дов унго-унгояв жугьутӀав, жинца киданиги хӀилла-рекӀкӀ гьабуларев.
48– Дуда дун кисан лъалев? – ан гьикъана Натанаэлица.
– Филиппица мун витӀилалдего инжиралъул гъотӀокь гӀодов чӀун вихьана дида мун, – ян абуна ГӀисаца.
49Натанаэлица абуна:
– Я, Рабби! Мун вуго Аллагьасул Васги, Исраилил халкъалъул ПарччахӀги!
50ГӀисаца абуна:
– Инжиралъул гъотӀокь вихьанилан дица абидалищ дуца диде иман лъураб? Гьелдасаги хӀикматал ишал гӀемер рихьила дуда.
51Цоги ГӀисаца гьесда абуна:
– ХӀакълъун абулеб буго дица дуда: дуда зобал кӀирикьулел рихьила ва гьенисан ГӀадамил Лъимадухъе рачӀунел-унел Бичасул малаикзабиги рихьила.
Nu markerat:
Иоанн 1: АварАК
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Институт перевода Библии, 2005-2023
