 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

ࢡَاوٛ کُوجٜ طٜعٜ، جَوْمِرَاوٛ وَنغَنِ عَبْرَامَ ندٜرْ کٛيْطٛلْ، وِعِمٛ‏: «تَا حُلْ، عَبْرَامَ، مِنْ وٛنِ وَوَرْدٜ مَاطَ، مِحٛکّٜتٜ مبَرْجَارِ طُوطْندِ‏!» عَبْرَامَ جَابِ‏: «جَوْمِرَاوٛ اَللَّه عَمْ، طُمٜ ندٛکَّتَ يَمْ؟ دٛنٛووٛ سَارٜ عَمْ بٛو، طُمْ عٜلِعٜزٜرْ مٛ دَمَسْ، غٛوتٛ شَکَ سُکَاࢡٜ عَمْ؞» عَبْرَامَ وِعِ ڢَحِنْ‏: «ندَا، عَحٛکَّايْ يَمْ دَࢩْغٛلْ؞ طُمْ غٛوتٛ ندٜرْ سَارٜ عَمْ، رٛنَتَمِّ؞» ندٜنْ جَوْمِرَاوٛ وٛلْوَنِمٛ وٛلْدٜ ندٜعٜ‏: «نَا کَنغْکٛ رٛنٜتٜ؞ عَمَّا غُرْتٛتٛوطٛ دِغَ مَاطَ رٛنٜتٜ؞» ندٜنْ عٛوُرْتِنِ عَبْرَامَ دِغَ ندٜرْ لَيْمَارُ مُوطُمْ، وِعِ طُمْ‏: «لَارْ عَسَمَ، لِمْ کٛودٜ تٛ عَوَاوَنْ‏! نٛنْ دَࢩْغٛلْ مَاطَ لَاتٛتٛ؞» عَبْرَامَ نُطِّنِ جَوْمِرَاوٛ؞ نغَمْ مَاجُمْ جَوْمِرَاوٛ لِمَنِمٛ طُمْ عَدِلَاکُ؞
اَللَّه وِعِ عَبْرَامَ‏: «مِنْ وٛنِ جَوْمِرَاوٛ، غُرْتِنْطٛ مَ عُرْ ندٜرْ لٜسْدِ کَلْدِيَ، نغَمْ مِمَرْنٜ لٜسْدِ ندِ نغٛنْطَ ندٜرْ مَارِ جٛنْتَ؞» عَبْرَامَ وِعِ‏: «يَا جَوْمِرَاوٛ اَللَّه، نٛيْ عَنْدِرَنْمِ مِمَرَنْ ندِ؟» عٛجَابِمٛ‏: «وَدَّنَمْ وِيغٜ نغٜ دُوࢡِ تَتِ عٜ مبٜىٰوَ نغَ دُوࢡِ تَتِ عٜ نجَوْدِرِ مبَالْدِرِ ندِ دُوࢡِ تَتِ عٜ ݠٛولَ مَسَرْ عٜ ݠٛولٜلْ؞» عَبْرَامَ وَدِّ طُمْ ڢُو؞ عٛتَعِ طُمْ شَکَ شَکَ، تِيتْنٛتِرِ تَعٜ مَاجُمْ؞ عَمَّا شٛلِّ کَمْ عٛتَعَايْ؞ جِغَاجٜ عُکِّ دٛوْ کُسٜلْ، عَمَّا عَبْرَامَ رِيوِ طٜ؞
حَا مُتْکِ نَانغٜ، طٛيْنغٛلْ تٜدُّنغٛلْ نَنغِ عَبْرَامَ، کُلْتٛرٜىٰنغٛلْ عٜ ࢩِࢡْرٜ ࢡَلٜىٰرٜ عُکَّنِمٛ؞ اَللَّه وِعِ عَبْرَامَ‏: «عَنْدُ ڢَکَتْ دَࢩْغٛلْ مَاطَ جٛوطٛتٛ ندٜرْ لٜسْدِ ندِ نغٛلْ مَرَايْ، نغٛلْ حُووَنَنْ يِمْࢡٜ مَارِ؞ ࢡٜنجَرْنَنْ نغٛلْ بٛنٜ دٜيْدٜيْ دُوࢡِ تٜىٰمٜطّٜ نَيِ؞ عَمَّا ࢡَاوٛ تٛ مِحِيتَکٜ عُمَّاتٛورٜ ندٜ نغٛلْ حُووَنْتَ طُمْ، نغٛلْ وُرْتِدِتّٛ بٜى جَوْدِ طُوطْندِ؞ عَمَّا عَنْ، عَحَوْتٛيَنْ بٜى کَاکِرَاࢡٜ مَاطَ بٜى جَمْ، عَ عُوٜتٜىٰطٛ ࢡَاوٛ ندٛتَّاکُ مبٛوطْنغُ؞ حَا يِدٜرٜ نَيَࢡْرٜ، دَࢩْغٛلْ مَاطَ لٛرٛتٛ حَا طٛ، نغَمْ جٛنْتَ حَلّٜىٰندٜ عَمٛورِعٜنْ حٜىٰوْتَايْ تَوٛنْ؞»
ندٜ نَانغٜ مُتِ، ࢩِࢡْرٜ ࢡَلٜىٰرٜ بٛو وَطِ، ندَا، ڢَيَنْدٜ يِيتٜ سُورَنْدٜ عٜ طٜمْنغَلْ يِيتٜ، سَالِ شَکَ تَعٜ کُسٜلْ غٛ؞ ࢩَلَادٜ مَاجُمْ ندٜنْ جَوْمِرَاوٛ حَࢡِّ عَلْکَوَلْ بٜى عَبْرَامَ، عٛوِعِ‏: «مِحٛکَّنْ دَࢩْغٛلْ مَاطَ لٜسْدِ ندِعِ، دِغَ مَايٛ مِصْرَ حَا مَايٛ مَنغٛ وِعٜتٜىٰنغٛ عٜڢْرَتِسْ، لٜسْدِ کٜنِعٜنْ عٜ کٜنِزِّعٜنْ عٜ کَدْمٛنِعٜنْ عٜ حٜتِعٜنْ عٜ ݠٜرٜزِّعٜنْ عٜ رٜڢَعٜنْ عٜ عَمٛورِعٜنْ عٜ کَنَانِعٜنْ عٜ غِرْغَسِعٜنْ عٜ يٜبُسِعٜنْ؞»

Sikiliza لَاتَانٛوجِ 15