Vengo: Yigisǝ nwi mǝkee mǝfimǝ maŋ Ghaŋ Veŋoo New Testament

Yigisǝ nwi mǝkee mǝfimǝ maŋ Ghaŋ Veŋoo

Maa vənzi və mbi, yigi nə luu shɔ. Yigi yɔ́ nə luu shɔ ghɔ Nwi. Yigi yɔ́ nə luu sheꞌ Nwi. Nyə nə luu ghɔ Nwi shù fɨ maa vənzi və mbi. Vətɔ vənshə fɨ mbi nə fùu fɨ maa yigi yɔ́. Tuu fa kee lùu shɔ faŋ ŋkə nə kee fùu fɨ maa yigi yɔ́ me. Məbwey lùu taa yigi yɔ́. Məbwey ghɔ́ lùu yaa məley, yɨsə sɨ vɨɨ ley. Məley ghɔ́ bee maa vəshəŋ və mfiŋsə. Luu nə, mfiŋsə sɔ́ kee jìa məley ghɔ́ me.
Wə mɔ́ꞌ nə fùu, faŋ nə tɔ̀ŋ Nwi tɔ̀ŋ ŋwə. Yizii wə ghɔ́ nə luu Jɔn. Ŋwə jwi fɨ̀ꞌtə nu Nwi, kɨ twelə ŋiꞌ məley kɔ́ tɨ́ vɨɨ, tɨ́ kaꞌ vɨɨ vənshə nùŋ fwisə vəŋ maa məley ghɔ́. Nshɨ-tɔ Jɔn nə kee lùu məley ghɔ́ me. Ŋwə nə jwì sheꞌ laa yi jwi twèlə nu məley kɔ́. Məley ghɔ́ lùu məley yinsəŋ faŋ ŋwə yɨ sɨ vɨɨ vənshə ley. Ŋwə nəə jɨjwi mbi maa yighee yɔ́. Wə ntɨə faŋ ŋwə lùu məley yinsəŋ ghɔ́ nə, nə luu taa mbi. Nwi nə bɔ̀ŋ mbi, shɔ̀ɔ fɨ ghɔ ŋwə. Luu nə, mbi kee kɨ̀ɨ nə ŋwə me. Nɨniŋ, ŋwə nə jwì shɨ ŋwə, ŋkee mbii vɨɨ kee bìŋ ŋwə me. Nə biŋ sheꞌ way vɨɨ bìŋ ŋwə, nùŋ fwisə vəŋ maa ŋwə. Nɨniŋ, ŋwə yɨ vɨɨ mbɨə faŋ vəŋ nùŋ fwisə vəŋ maa ŋwə, luu vaŋ Nwi, buꞌ faŋ vəŋ nə nùŋ fwisə vəŋ maa yizii yi. Nɨniŋ, nə bì Nwi bi vəŋ. Nu kɔ́ kee ndɔ̀ fɨ maa məbi wə fɨ taa mənshi me, tɨꞌnə me fɨ maa ŋkawnə wə mənsaw me, tɨꞌnə me fɨ maa mbɨꞌtə wə mənsaw me.
Yigi yɔ́ nə kìasə gù wə, shi taa ŋwaa nsiŋ. Yia ye feenə wi, faŋ tɨta Nwi nə kɔ̀ tɨ́ ŋwə, buꞌ laa ŋwə lùu yigɨꞌ Wee Nwi. Ŋwə kee gəŋsə vɨɨ dɨdɨꞌ, ndɔ lùu wuu yinsəŋ. Ŋwə nə jwì nɨniŋ, Jɔn twelə nu ki kɔ́, gisə nəŋay laa, «Ye wə ntɨə faŋ mə nəə gisə buꞌ ŋwə. Ŋwə shɔ̀ɔ mə, faŋ ŋwə kɔlə jwì fɨ yiba jɨŋ mə nə. Ŋwə nə lùu shɔ maa yighee njyə faŋ mə nə kee ta lùu mbi me.» Ŋwə nəə kee gəŋ saŋ-nsiŋ ghee ghee, buꞌ laa gəŋsə lwàŋ taa fwi ŋwə. Mose nə də ntɨsə Nwi tɨ́ nsiŋ. Gə̀ fɨ maa Yeso Kristo faŋ lùu məley ghɔ́, ŋwə jwi də̀ nu məkee gəŋsə, nə nu yinsəŋ nɨzi. Tuu wə nə kee ta yè Nwi nə yisɨ me, tɨ̀ lɨꞌ sheꞌ yigɨꞌ Wee Nwi, faŋ ŋwə lùu yɨ fwi tɨta Nwi. Ŋwə jwi də̀ tɨ́ nsiŋ faŋ Nwi lùu.


Shi mɔ́ꞌ vɨɨ kwalə və vɨɨ Jus fɨ ntɨꞌ Jerusalem nə tɔ̀ŋ vɨɨ məfeꞌ Nwi vəmɔ́ꞌ, nə vɨɨ Levi tɨ́ Jɔn, laa vəŋ jwi bitə tɨ́ ŋwə laa ŋwə lùu ndə? Vɨɨ vɔ́ jwi yɨ ŋwə, bìtə nu kɔ́ tɨ́ ŋwə, ŋwə bəŋsə nu yinsəŋ, kee sɨ̀ɨ ba me, laa yi kee lùu Kristo, wuu məbweysə vɨɨ me. Vəŋ bitə tɨ́ ŋwə laa, «A kee luu Kristo ghɔ́ me, buu a lùu ndə? A luu Elias mu?» Ŋwə bəŋsə laa bey. Vəŋ laa ŋwə lùu nshiiŋii-sɔghɔ wì, faŋ vɨ kɨꞌ ŋwə nə mu? Ŋwə laa bey. Vəŋ baa bìtə tɨ́ ŋwə laa ŋwə lùu ndə? «Baw yia kii bəŋsə fɨ ghɔ ghɔ, tɨ́ kaꞌ yia gə nàysə tɨ́ vɨɨ mbɨə faŋ vəŋ nə tɔ̀ŋ yia nə. A sii gì laa kə maa nshɨ-tɔ wə?» Jɔn bəŋsə tɨ́ vəŋ laa,
«Mə lùu gɨ wə faŋ nyə luꞌ fɨ tɔɔ waꞌsə laa,
vɨ bɔŋsə jɨɨ Nwi, nyə neꞌtə.» Ŋwə nə gi yigi yɔ́ sheꞌ faŋ ŋkə lùu taa ŋwaꞌlə Aysaya, nshiiŋii-sɔghɔ wì. Vɨɨ ntɔŋsə vɔ́, faŋ vəŋ nə bitə nɨniŋ nə, nə luu fɨ taa nwaa vɨɨ Farisii. Vəŋ baa bìtə tɨ́ ŋwə laa, «Sii yɨ kə, a kɔ muu mə Nwi tɨ́ vɨɨ, faŋ a kee lùu Kristo ghɔ́ me, tɨꞌnə me lùu Aysaya me, tɨꞌnə me lùu nshiiŋii-sɔghɔ wì me?» Jɔn bəŋsə tɨ́ vəŋ laa, «Luu sheꞌ muu mə Nwi faŋ mə kɔ tɨ́ vɨɨ. Nɨniŋ, wə mɔ́ꞌ tɨ̀ŋ taa ŋwaa viŋ faŋ ŋwə kwàlə shɔ̀ɔ mə, faŋ viŋ kee kɨ̀ɨ nə ŋwə me. Ŋwə lùu wə ntɨə faŋ ŋwə taa jwì fɨ yiba jɨŋ mə, faŋ mə kee bee kùꞌnə maa məkeꞌtə kuu gɔsə wi me.» Nu kɔ́ nə gay ntɨꞌ Betani, yiba muu mə Jordan, maa shəŋ ŋkɨə faŋ Jɔn nəə kɔ muu mə Nwi shɔ tɨ́ vɨɨ nə.


Fu kɨ lee Jɔn ye Yeso faŋ ŋwə jwi yɨ ŋwə, gì tɨ́ vɨɨ laa, «Ye wə ŋwə̀. Lùu bi-njɨɨ Nwi, faŋ ŋwə biꞌ vənu vəbwəvə mbi! Lùu wə ghɔ́ faŋ mə nəə gisə buꞌ ŋwə nə, laa wə mɔ́ꞌ faŋ ŋwə nə luu vɨsɨ fɨ ghɔ mə, ndɔ jwì fɨ yiba mə, buꞌ laa ŋwə nə luu shɔ faŋ mə nə kee ta lùu shɔ me. Nshɨ-tɔ ŋwaa nə kee kɨ̀ɨ nə ŋwə me. Luu nə, mə jwi kɨ kɔ muu mə Nwi tɨ́ vɨɨ laa vɨɨ Isirayl ndɔ kɨɨ nə ŋwə.» Jɔn baa gi tɨ́ vɨɨ ntee laa yi yè faŋ Zwitə Ley Nwi siꞌ jwì fɨ taa yizɔ yaa bɔŋsə, siꞌ jwì, này tɔ Yeso, gòꞌsə shɔ. Jɔn nə gì laa, «Mə yaa kee kɨɨ nə ŋwə me. Luu nə, Nwi faŋ ŋwə nə tɔ̀ŋ mə laa mə jwi kɨ kɔ muu mə Nwi tɨ́ vɨɨ nə, gì shee kɔ̀ŋ ŋwə laa, «Wə ntɨə faŋ a ndɔ ye Zwitə Ley Nwi siꞌ jwì dùꞌ taa ŋwaa ŋwə, buu wə ghɔ́ lùu wə ntɨə faŋ ŋwə ndɔ kɨ kɔ Zwitə Ley Nwi tɨ́ vɨɨ.» Mə ye nɨniŋ, buu naysə ntee laa wə ghɔ́ lùu Wee Nwi.»

Fu baa kɨ lee Jɔn duꞌ yifi ghɔ vɨ vɨɨ məzwetə nu ki vəbɔɔ, kɨ ye, yè Yeso faŋ ŋwə toꞌ, shɔ̀ɔ fɨ yifi. Ŋwə ndeynə, gì laa, «Viŋ ye bi-njɨɨ Nwi yɔ́ nə!» Vɨɨ məzwetə nu ki vɔ́ vəbɔɔ zɔ nɨniŋ, bèꞌsə Yeso. Yeso kiasə ŋwaa wi yiba, ye vəŋ faŋ vəŋ nə jɔmə ŋwə nə, ŋwə bitə tɨ́ vəŋ laa vəŋ kəə kə? Vəŋ gi tɨ́ ŋwə laa, «Rabi, a shi fə?» Ŋiꞌ Rabi lùu laa wuu mədeesə kwalə. Ŋwə gi tɨ́ vəŋ laa vəŋ jwi ye. Vəŋ gə yè shəŋ ŋkɨə faŋ ŋwə nəə shi shɔ, ghɔ vɨ vəŋ duꞌ tay. Yighee nə luu yaa vəshɨshwi yighuŋ. Wə muꞌ fɨ taa ŋwaa vɨɨ vì vəbɔɔ nə, faŋ vəŋ nə zɔ̀ nu Yeso fɨ ghɔ Jɔn, bèꞌsə ŋwə nə, nə luu Andru, weenshu Saymon Pita. Ŋwə bɨ yè weenshu wi Saymon, gì tɨ́ ŋwə laa vəŋ yè Kristo. Ŋiꞌ yizii Kristo lùu laa, wə faŋ Nwi fɔ̀ɔlə ŋwə. Nɨniŋ, Andru ndi weenshu wi, ghɔ ŋwə gə yɨ Yeso. Yeso ye Saymon, gì tɨ́ ŋwə laa, «A lùu Saymon, wee Jɔn, vɨ taa kɨ tii ghɔ nə Sifas.» Yizii Sifas luu sheꞌ yizii Pita faŋ lùu laa yighɔsə.
Fu baa kɨ lee, Yeso nə kəə gə̀ shɨ Galilii, ye Filip, gì tɨ́ ŋwə laa, «Beꞌsə mə!» Filip nə ndɔ fɨ ntɨꞌ Betsayda, shɨ Galilii, faŋ luu ntɨꞌ Andru ghɔ Pita nɨzi. Fɨkɨꞌ Filip ye Nataniel, gì tɨ́ ŋwə laa, «Yia yè wə ntɨə faŋ Mose nə nshiisə-ŋii sɔghɔ nə nyɔꞌ kɔ̀ŋ ŋwə taa ŋwaꞌlə Nwi. Lùu Yeso, wuu Nazaret, wee Josef.» Nataniel gi tɨ́ ŋwə laa, «Kaꞌ nu jəə ndɔ fùu fɨ ntɨꞌ Nazaret mu?» Filip gi tɨ́ ŋwə laa ŋwə jwi ye. Nataniel jwi yɨ Yeso. Yeso ye ŋwə, gì tɨ́ ŋwə laa, «A luu wuu Isirayl yinsəŋ, nu məbweꞌsə wə kee lùu taa fwi ghɔ me.» Nataniel bitə tɨ́ Yeso laa ŋwə sii kɨ̀ɨ nə yi fɨ fə? Yeso bəŋsə tɨ́ ŋwə laa, «Yighee njyə faŋ Filip nə kee ta tìi ghɔ me, mə nə duꞌtə mə ye ghɔ ŋiꞌ tɨ taŋ fig.» Nataniel bəŋsə tɨ́ ŋwə laa, «Rabi, a lùu Wee Nwi. A luu fwàŋ vɨɨ Isirayl.» Yeso bəŋsə tɨ́ ŋwə laa, «A bìŋ mə, buꞌ laa mə nii gì tɨ́ ghɔ laa mə yè ghɔ ŋiꞌ tɨ taŋ kì. A taa kɨ ye vənu vəkwalə faŋ mbə shɔ̀ɔ nu kɔ́.» Yeso kɨ nii baa gì tɨ́ vəŋ laa, «Viŋ zɔ! Mə gì ŋkee nu yinsəŋ tɨ́ viŋ laa viŋ ndɔ ye faŋ yizɔ ŋaꞌnə, nshiisə-ŋiisə Nwi koꞌ baa siꞌ maa Wuu yinsəŋ Nwi.»

Sikiliza Jɔn 1