ɄLʉfingo ʉLʉpia mu njovele ja Kɨvwanji

Lɨno, aVafalisayi vakapʉlɨka imhola sa Yesu kuuti, ikwofugha na kuuva na vavʉlanɨsɨvua vinga kukila ʉYohani ʉMwofughi. Neke ʉYesu jʉjuo naalyofwighe, looli avavʉlanɨsɨvua vaake ve vano valyale vikwofugha. ɄYesu ye apʉliike kuuti imhola saake sipʉlɨkiike, akavʉʉka mʉ kɨghavo ɨkya Yudea palɨkɨmo na vavʉlanɨsɨvua vaake, akagomoka kʉ kɨghavo ɨkya Galilaya. Ye vigomoka kʉ Galilaya, lʉkavoneka kuuti, kwevʉle ʉvʉfumbue ʉvwa kʉkilila mʉ kɨghavo ɨkya Samalia, pe vakakila ɨsɨla ɨjio.
Pe vakafika mʉ lɨkaaja ɨlya Sikali lɨno lyale mʉ kɨghavo ɨkya Samalia. Ɨlɨkaaja ɨlio lɨlyale piipi nʉ mʉghʉnda ghʉno ʉYakovo alyampeliile ʉmwanaake ʉYosefu. Apuo pwekɨlyale ɨkɨtiimu kɨno kɨkatambʉlwagha kɨtiimu kya Yakovo. ɄYesu akikala palʉbale pa kɨtiimu ɨkio kuuti apʉʉme, ʉlwakʉva alyakatiile nʉ lʉghendo. Ʉnsiki ʉghuo ghwale ghwa kavalɨlo aka ntanda pamwisi.
Avavʉlanɨsɨvua vaake vakalʉta kughʉla ɨkyakʉlia, ʉYesu akajigha mwene pa kɨtiimu. Pe akiisa ʉmʉkɨjʉʉva jʉmonga kunegha amalenga pa kɨtiimu kɨla. Ʉmʉkɨjʉʉva ʉjuo alyale Nsamalia. ɄYesu akamʼbʉʉla akati, “Nisʉʉma amalenga nɨnyue.” Ʉmʉkɨjʉʉva jʉla ʉNsamalia akamwamʉla akati, “Ʉve ʉlɨ Mʉyahudi, ʉne nɨlɨ Nsamalia, lwandaani ghusʉʉma amalenga kʉlyʉne?” Alyajovile enendɨɨkɨ, ʉlwakʉva aVayahudi navalyale vʉhangɨlanɨsi na Vasamalia.
ɄYesu akamwamʉla akati, “Ghwale ʉkagʉlaghe sino ʉNgʉlʉve ilonda kʉkʉkʉpeela na kuuti neene veeni ne jʉno nɨkʉkʉsʉʉma amalenga, ngale ʉsʉmile ʉne. Ʉne nale nɨkʉkʉpeela amalenga ghano ghikʉvapeela avaanhu ʉvwʉmi.” Ʉmʉkɨjʉʉva jʉla akamwamʉla ʉYesu akati, “Ghwe ntwa, ɨkɨtiimu kɨtali fiijo, ʉve nʉlɨ nʉ lʉghoji nambe ɨkya kʉneghela amalenga, lɨno ʉkʉghaagha kʉʉghi amalenga aghuo, ghano ghikʉvapeela avaanhu ʉvwʉmi? Ʉnkʉʉlʉ ghwitu ʉYakovo alyatʉpeliile ɨkɨtiimu ɨkɨ. Ʉmwene na vanaake vanywile amalenga agha kɨtiimu ɨkɨ palɨkɨmo ni fidɨmua fyake. Lɨno ʉve ndepoonu ʉlɨ mʼbaha kukila ʉYakovo?”
ɄYesu akamwamʉla akati, “Ʉmuunhu ghweni jʉno inyua amalenga gha kɨtiimu ɨkɨ, ikwʉmɨlua kange, neke ʉmuunhu jʉno inyua amalenga ghano nɨkʉmpeela ʉne, naangʉmɨlue lʉsiku. Kyangʼhaani amalenga ghano nɨkʉmpeela ghiiva nkate mwa mwene, kiiva kɨnʼdwivu kya malenga, ghikʉmpelagha ʉvwʉmi vʉno navusila lʉsiku.” Pe ʉmʉkɨjʉʉva jʉla akansʉʉma ʉYesu akati, “Ghwe ntwa, ʉmheele amalenga aghuo, nɨleke pikwʉmɨlua, kange nɨleke kukwisa apa, kunegha amalenga!”
ɄYesu akamʼbʉʉla akati, “Lʉtagha, ʉkankemeele ʉmʉghoosi ghwako, ghwise naghwo apa.” Akamwamʉla akati, “Ʉne nɨlɨ nsila mʉghoosi.” ɄYesu akamʼbʉʉla akati, “Ʉjovile se seene kuuti ʉlɨ nsila mʉghoosi, ʉlwakʉva ʉlyatolilue na vaghoosi vahaano, ghwope jʉno ghukukala naghwo lɨno, naghwako. Ʉjovile isa kyangʼhaani.”
Ʉmʉkɨjʉʉva jʉla akamwamʉla akati, “Ghwe ntwa, nivona ʉve ʉlɨ mʼbɨli. Avakʉʉlʉ viitu valyale vikʉmwɨmɨka ʉNgʉlʉve pa kɨdunda ɨkɨ ɨkya Gelasimu, neke ʉmue mwe Vayahudi mwiti, kʉ Yelusalemu kwe kʉno kʉnoghiile kʉkʉmwɨmɨka ʉNgʉlʉve.”
ɄYesu akamʼbʉʉla akati, “Ghwe mʉkɨjʉʉva ʉve, ghwɨtɨkaghe sino nijova, ghukwisa ʉnsiki ghʉno namʉkʉmwɨmɨkagha ʉNgʉlʉve ʉNhaata pa kɨdunda ɨkɨ, nambe kʉ Yelusalemu. Ʉmue mwe Vasamalia mʉkʉmwɨmɨka ʉNgʉlʉve jʉno namʉnkagwile, neke ʉsue twe Vayahudi tʉkʉmwɨmɨka ʉNgʉlʉve jʉno tʉnkagwile. Nijova ʉluo, ʉlwakʉva ʉNgʉlʉve ɨkʉvapoka avaanhu kukilila kʉ Vayahudi. Lɨno ʉnsiki ghukwisa, kange ghʉfikile, pano avaanhu vano vikʉmwɨmɨka ʉNgʉlʉve ʉNhaata mʉ vwakyangʼhaani, vikʉmwɨmɨkagha mʉlwa kʉlongosivua nʉ Mhepo ghwake na vʉle vulʉngɨka ʉvwakyangʼhaani vwake. ɄNgʉlʉve ʉNhaata ilonda avaanhu vano vikʉmwɨmɨka enendɨɨkɨ. ɄNgʉlʉve ghwe Mhepo, avaanhu vano vikʉmwɨmɨka ʉmwene, vanoghiile kʉkʉmwɨmɨka mʉ ngʉfu isa Mhepo ghwake na mʉ vwakyangʼhaani.” Ʉmʉkɨjʉʉva jʉla akamwamʉla akati, “Nɨkagwile kuuti ʉMesiya, jʉno ghwe Kɨlɨsite, ikwisa. Iliiva isile, ilikʉtʉvʉʉla sooni.” ɄYesu akamʼbʉʉla akati, “Ʉne, ne jʉno nijova nuuve, neene Mesiya.”
Ʉnsiki ʉghuo avavʉlanɨsɨvua vaake vakagomoka, vakadegha kyongo kuvona ʉYesu ijova nʉ mʉkɨjʉʉva. Neke nakwealyale mʉ vavʉlanɨsɨvua jʉno alyamposisie ʉYesu kuuti, “Ghulonda kɨki kwa mwene?” Nambe kuuti, “Kɨki ghujova naghwo?”
Ʉmʉkɨjʉʉva jʉla akalʉleka pala pala ʉlʉsaaji lwake ʉlwa malenga, akalʉta kʉ kɨkaaja, akavavʉʉla avaanhu akati, “Mwise mʉlole ʉmuunhu jʉno ambʉlile sooni sino nɨvombile. Asi, ʉmuunhu ʉjuo ndepoonu iiva ghwe Kɨlɨsite?” Avaanhu ye vapʉliike isio, vakavʉʉka pa kɨkaaja apuo, vakalʉta kʉno kwale ʉYesu.
Avaanhu vala ye vakyale kufika, avavʉlanɨsɨvua vaake vakava vikʉmʼbʉʉla ʉYesu viiti, “Ghwe Mʼbʉlanɨsi, ʉlie ɨkyakʉlia.” Ʉmwene akavamʉla akati, “Ʉne nɨlɨ nɨ kyakʉlia kɨno ʉmue namʉkɨkagwile.” Avavʉlanɨsɨvua vaake vakatengʉla kuposania viiti, “Asi, kʉlɨ muunhu isile kʉkʉmʉletela ɨkyakʉlia?”
ɄYesu akavavʉʉla akati, “Ɨkyakʉlia kyango ʉne, kwe kʉvomba isa vughane vwa Nhaata jʉno asungʼhile na kumala ɨmbombo jaake. Kwelʉle ʉlʉjovo lʉno lwiti, ‘Ghasighiile ameesi ghane kupeta.’ Neke ʉne nɨkʉvavʉʉla niiti, lolagha avaanhu vʉle vilɨngʼhanisie kukwʉpɨla ɨlɨsio lya Ngʉlʉve, lʉlɨ ndavʉle ifiinu mʉ maghʉnda vʉle fyelile, fighuula kupetua. Ghwope jʉno ipeta ikwʉpɨla ʉlʉhombo lwake, ʉmpeto ve vaanhu vano vikwʉpɨla ʉvwʉmi ʉvwa kʉvʉsila kʉsila. Apuo jʉno ivyala na jʉno ipeta vooni vivisagha nʉ lʉkeelo palɨkɨmo. Kwelʉle ʉlʉjovo lʉno lwiti, ‘Jʉmonga ivyala, ʉjʉnge ipeta.’ Ʉlʉjovo ʉluo lwa kyangʼhaani. Ʉne nɨvasungʼhile ʉmue kupeta fino namʉhangajɨkiile. Avange vakavombile ɨmbombo ɨnhalamu, ʉmue mupeta vwɨmɨla ɨmbombo jaave.”

AVasamalia vinga ava mʉ lɨkaaja lɨla ɨlya Sikali, vakamwɨtɨka ʉYesu, ʉlwakʉva valyapʉliike sino alyajovile ʉmʉkɨjʉʉva jʉla kuuti, “Ʉmuunhu ʉjuo ambʉlile sooni sino nɨvombile.” Pe aVasamalia vala vakafika pano pwale ʉYesu, vakampelepesia kuuti ikale palɨkɨmo na veene, pe akikala mʉ lɨkaaja ɨlio ifighono fivɨlɨ. Avaanhu vinga fiijo vakamwɨtɨka ʉYesu vwɨmɨla ɨlɨsio lyake. Vakamʼbʉʉla ʉmʉkɨjʉʉva jʉla vakati, “Lɨno, nakwekʉti tʉmwɨtiike ʉmuunhu ʉjʉ vwɨmɨla si sino ʉtʉvʉlile ʉve, looli tʉmwɨtiike, ʉlwakʉva tʉpʉliike jʉsue sino ajovile. Kange tʉkagwile kuuti, kyangʼhaani ʉmuunhu ʉjʉ ghwe Mpoki ghwa vaanhu vooni.”


Ifighono fivɨlɨ ye fikilile, ʉYesu akavʉʉka mʉ lɨkaaja ɨlya Sikali akalʉta mʉ kɨghavo ɨkya Galilaya. ɄYesu alyoliike kuuti, ʉmʼbɨli naikwoghopua na vaanhu ava mʉ kɨkaaja kyake. Avaanhu ava kʉ Galilaya valyamwʉpiile ʉYesu, ʉlwakʉva valyasivwene sooni sino alyavombile kʉ kyɨmɨke ɨkya Pasaka kʉ Yelusalemu. Kʉ kyɨmɨke ʉkuo voope kwevalyale.
ɄYesu akalʉta kange kʉ kɨkaaja ɨkya Kana mʉ kɨghavo ɨkya Galilaya. Kʉ kɨkaaja ɨkio kwe kʉno alyahambwisie amalenga kuuva lʉhʉʉje. Kwealyale ʉmʉlongosi jʉmonga ʉghwa silikali kʉ Kapelenaumu. Ʉmʉlongosi ʉjuo ʉmwanaake alyale ntamu. Ye apʉliike kuuti ʉYesu isile kange kʉ Galilaya kuhʉma kʉ Yudea, akalʉta kʉkʉmpelepesia ʉYesu kuuti alʉte kʉ Kapelenaumu, ansosie ʉmwanaake, ʉlwakʉva ʉmwanaake ʉjuo ghʉlyale ghukova. ɄYesu akamwamʉla akati, “Ʉmue, namʉnganyɨtɨke kɨsila kʉfyagha ifivalɨlo ni fidegho!” Ʉmʉlongosi jʉla akamwamʉla akati, “Ghwe Mʉtwa, nɨkʉkʉsʉʉma, tʉvʉʉke ʉnsosie ʉmwanango pano akyale pifua.” ɄYesu akamʼbʉʉla akati, “Vujagha, ʉmwanaako asokile.” Akɨtɨka amasio gha Yesu, akavʉʉka ivuja.
Ʉmʉlongosi jʉla ye alɨ mʉ sɨla ivuja, akatangʼhana na vavombi vaake, vakamʼbʉʉla vakati, “Ʉmwanaako asokile, nkafu.” Pe akavaposia akati, “Asokile ʉnsiki ghʉlɨku?” Aveene vakamwamʉla vakati, “Asooka pamihe pamwisi, akavalɨlo aka lekelalʉbale.” Ʉviise ghwa mwana jʉla akakagʉla kuuti asooka ʉnsiki ghʉla ghʉla ghʉno ʉYesu ajova kuuti, “Ʉmwanaako asokile.” Pe ʉmwene palɨkɨmo na vaanhu vooni ava mʉ nyumba jaake vakamwɨtɨka ʉYesu. Ɨkɨdegho ɨkio kyale kɨvalɨlo kya vʉvɨlɨ kɨno alyavombile ʉYesu kʉ Galilaya ye ahʉmile kʉ Yudea.

Sikiliza Yohani 4