Text: © New Life Computer Institute Audio: ℗ 2022 Hosanna

Shekhawati 2017 NLCI (NT)  Non Drama

जद ईसु नासरत नगरी म हो, बा दिना म यहूदिआ नगरी का उजाड़ म पाणी को बतिस्मो देबाळो यहून्ना आयो। अर आ खेर परचार कर्यो क, “थे थारा पापऊँ तौबा करो! क्युं क ईस्बर नगरी को राज सांकड़ै ह।” ओ बोई मिनख ह जिकै बारां म यसाया परमेसर की खेबाळो खयो ह:
“उजाड़ म एक हलकारो हेलो मारै ह, परबु ताँई गेलो बणाओ,
अर बिको गेलो सिदो-सपाट करो।”
यहून्ना ऊँट क बाळाऊँ बणेड़ा गाबा पेरतो हो अर कमर प चमड़ा को पट्टो बांद्‍या करतो हो। बो टिड्या अर जंगली सहद खाया करतो हो। यहूदिआ दिसावर, यरदन नदि क आस-पास की झघा का अर यरूसलेम नगरी का घणकराक मिनख बिकी सुणबा बिकन गया। बे आपका पापनै मानर यरदन नदि म यहून्नाऊँ पाणी को बतिस्मो लिओ। जद बो देख्यो क बोळासारा फरिसी अर सदुकी पाणी को बतिस्मो लेबा ताँई बिकन आर्या हीं, जणा बो बाऊँ बोल्यो, “अरै सपोलो, परमेसर की सजाऊँ थे बच सको हो इ बात क बारां म थानै कूण बता दिओ? थारा करमाऊँ ओ बेरो पड़णो चाए क थे थारा हियानै पाप का गेलाऊँ फेर लिआ हो। अर थे थारा हिया म अंय्यां मना सोचो क म्हारो बाप अब्राहम ह इ ताँई परमेसर म्हानै कोनी दंडसी; क्युं क म थारूँ बोलुँ हूँ क परमेसर आ भाठाऊँ बी अब्राहम ताँई टाबर पैदा कर सकै ह। इब कुहाड़ो दरख्त की जड़्या प रखेड़ो ह, इ ताँई जखो दरख्त चोखो फळ कोनी देवै, बिनै का'टर आग म बाळ दिओ ज्यासी। म तो थानै पाणी को बतिस्मो द्‍युँ हूँ, जिऊँ ओ बेरोपाट सकै क थे थारा पापऊँ तौबा कर लिआ हो। पण जखो मेरै पाछै आबाळो ह बो मेरूँ बोळो म्हान ह; म तो बिकाळा जूता का सळू खोलबा जोगोई कोनी। बो थानै आग अर पबितर आत्मा को बतिस्मो देसी। बिको छाजळो बिकै हात म ह अर बो ग्युंआ मऊँ डूण्डळी साप करसी, ग्युंनै ओबरी म भेळा करसी पण डूण्डळ्यानै आग म बाळसी। अर बा आग बुत्तबा की कोनी।”


बि टेम ईसु गलिलऊँ यरदन किनारै यहून्नाऊँ पाणी को बतिस्मो लेबा आयो। पण यहून्ना अंय्यां बोलर बिनै रोकबा लाग्यो, “मनै तो थारै हातऊँ पबितर आत्मा को बतिस्मो लेबा की जुर्त ह अर थे मेरै कनै आया हो!” ईसु बिनै अंय्यां ओडायो, “इब तो अंय्यांई होबा दे, क्युं क जखी परमेसर चावै ह बोई आपानै करनो ह।” जणा बो बिकी बात मान लिनी। अर ईसु पाणी को बतिस्मो लेर जंय्यांई पाणी मऊँ बारनै आयो अकास खुलग्यो, अर ईसु परमेसर की पबितर आत्मानै कबूतर क रूप म आपकै उपर उतरता देख्यो। जणा अकासऊँ हेलो आयो, “ओ मेरो लाडलो बेटो ह, जिऊँ म बोळो राजी हूँ।”

Sikiliza मत्ती 3