Mewari 2010-2017 NLCI; Non-Drama (NT)

Mewari 2010-2017 NLCI; Drama (NT)

किंकी भी रचना करबाऊँ पेल्या बचन हो अन बचन परमेसर का हाते हो अन वो बचनइस परमेसर हे। किंकी भी रचना वेबाऊँ पेल्या बचन परमेसर का हाते हो। बचनऊँईस परमेसर दनियाँ की हारी चिजाँ बणई अन बचन का बना कई भी चीज ने बणईगी। बचन मेंईस जीवन हो अन वो जीवन मनकाँ का वाते उजितो हो। वो उजितो अंदारा में चमकतो रेवे हे अन अंदारो वींने कदी ने बजा सक्यो।
परमेसर आपणाँ आड़ीऊँ आपणाँ एक दूत ने खन्दायो जिंको नाम यहुन्नो हो। यहुन्नो भी वीं उजिता की गवई देबा ने आयो, ताँके हाराई वींकी हुणन उजिता पे विस्वास करे। वो खुद तो उजितो ने हो, पण उजिता की गवई देबा आयो हो। वो उजितो हाँचो हे, ज्यो हाराई मनकाँ ने उजितो में लाई, वो दनियाँ की नजराँ में आरियो हो।
वो बचन अणी दनियाँ मेंईस हो अन परमेसर वणीऊँस दनियाँ बणई, पण दनियाँ का लोगाँ वींने ने ओळक्यो। वो आपणाँ लोगाँ का बसमें आयो अन पण वणा वींने ने ओळक्यो। पण जणा भी वींने मान्यो अन वींपे विस्वास किदो, वाँने वणी परमेसर की ओलाद वेबा को हक दिदो। परमेसर की ओलाद वेबा का वाते वीं मनक की मरजी का मस देहऊँ ने जनम्याँ, पण वीं तो परमेसर की मरजीऊँ आत्मिक रूप में जनम्याँ।
अन बचन देह रूप धारण लिदो अन दया अन हाँचऊँ भरियो-पुरयो वेन आपणाँ बचमें वास किदो। आपाँ वींकी अस्यी मेमा देकी, या बापू परमेसर का एकाएक बेटा की मेमा ही।
यहुन्ने वींका बारा में गवई दिदी अन हेलो पाड़न क्यो के, “यो वोईस हे, जिंको बखाण में किदो हे के, ‘ज्यो मारा पाच्छे आरियो हे, वो माराऊँ मोटो हे, काँके वो मारा जनमबा के पेल्याँई मोजुद हो।’”
वाँकी दया की भरपईऊँ आपाँ हाराई ने आसिरवाद पे आसिरवाद मल्या। आपाँने नेम तो परमेसर मूसाऊँ दिदा, पण दया अन हाँच ईसू मसीऊँ मल्यो। परमेसर का कदी कणी दरसण ने किदा, बेस एकाएक बेटो ज्यो खुद परमेसर हे अन वाँका खोळा में हे, वणी वाँने आपणाँ पे परगट किदा।

जद्याँ यरूसलेमऊँ यहूदी अदिकारी जद्याँ याजकाँ अन लेवीयाँ ने यहुन्नाऊँ ओ पूँछबा के वाते खन्दाया के, “थूँ कूण हे?”
तद्याँ वणी हुदोई खोलन के दिदो के, “मूँ मसी ने हूँ।”
तद्याँ वणा वींकाऊँ पूँछ्यो, “तो थूँ कूण हे? कई, थूँ एलियो हे?”
यहुन्ने वाँने जवाब दिदो, “ने, मूँ वो ने हूँ।”
तो वणा पूँछ्यो, “कई थूँ परमेसर का आड़ीऊँ बोलबावाळो हे?”
वणी क्यो, “कोनी।”
तद्याँ वणा वींकाऊँ पूँछ्यो, “तो पछे थूँ हे कूण? माँने बता, ताँके माँ माँने खन्दाबावाळा ने बता सका के, थूँ थाँरा खुद का बारा में कई केवे हे?”
जस्यान यसाया परमेसर का आड़ीऊँ बोलबावाळा लिक्यो हो, वींके जस्यान यहुन्ने वाँकाऊँ क्यो,
“मूँ काँकड़ में एक हाका करबावाळा की वाणी हूँ के,
‘थाँ परबू का वाते गेलो हुदो करो।’”
ईं मनक फरीसियाँ का आड़ीऊँ खन्दाया तका हा। अणा वींकाऊँ ओ सवाल किदो के, “यद्याँ थूँ मसी ने हे, अन ने एलियो, अन ने परमेसर का आड़ीऊँ बोलबावाळो हे, तो पछे मनकाँ ने बतिस्मा कई लेबा ने देवे हे?”
यहुन्ने वाँकाऊँ क्यो, “मूँ पाणीऊँ बतिस्मो देरियो हूँ, पण थाँका बचमें एक मनक हे, जिंने थाँ ने जाणो हो। अन ज्यो मारा केड़े आबावाळो हे। मूँ वींकी पगरख्याँ का कसणा खोलबा के जोगो भी ने हूँ।”
ईं हारी बाताँ यरदन नंदी के पेली पार बेतनियाँ में वीं, जटे यहुन्नो बतिस्मा देतो हो।

आगले दन यहुन्ने ईसू ने आपणाँ आड़ी आवता तका देकने क्यो, “ओ परमेसर को उन्यो हे, ज्यो दनियाँ का लोगाँ का पापाँ ने आपणाँ ऊपरे ले लेई। ओ वोईस हे, जिंका बारा में ओ क्यो हो के, ‘एक मनक मारा केड़े आबावाळो हे, ज्यो माराऊँ मोटो हे, काँके वो मारा जनमबा के पेल्याँई मोजुद हो।’ अन पेल्याँ मुँई वींने ने ओळकतो हो, पण ईं वाते पाणीऊँ बतिस्मो देतो आरियो हूँ, ताँके इजराएल देस का मनक वींने ओळक सके।”
पछे यहुन्ने आपणी गवई दिदी के, “में आत्माने परेवड़ा की तरियाँ आकासऊँ उतरती तकी देकी अन वाँ वाँका ऊपरे आन ठमगी। मूँ तो वींने ओळकतो ने हो, पण परमेसर मने पाणीऊँ बतिस्मो देबा का वाते खन्दायो, वणा मने क्यो, ‘थूँ पुवितर आत्माने उतरती अन किंके ऊपरे रकती तकी देकी, ओ वोईस मनक वेई, ज्यो पुवितर आत्माऊँ बतिस्मो देई।’ में अणा बाताँ ने वेती तकी देकी अन गवई दूँ हूँ के, ‘ओईस परमेसर को पूत हे।’”

दूजे दन यहुन्नो अन वींका चेला मूँ दो जणा वटे ऊबा हा। अन वणी ईसू ने देकन ज्यो वाँका नकेऊँ जारियो हो क्यो, “देको, ओ परमेसर को उन्यो जारियो हे।”
जद्याँ वाँ दुई चेला वींने आ केतो तको हुण्यो, तो वीं ईसू का पाच्छे चाल पड़्या। ईसू पाच्छा फरन वाँने पाच्छे आवता तका देकन वणाऊँ क्यो, “थाँ कई होदरिया हो?”
तो वणा क्यो, “हो गरुजी, थाँ कटे रेवो हो?”
ईसू वाँने क्यो, “आवो अन देक लो।” अन वीं वाँका हाते चालबा लागा। वाँकाणी देक्यो के, वीं कटे रेवे हे। वीं दन वीं वींका हातेईस रिया, काँके वीं दाण हाँजका की च्यार बजरी ही।
वीं दुई यहुन्ना की बाताँ हुणन ईसू का पाच्छे चालबा लागा हा, वाकाँमें एक समोन पतरस को भई अन्दरियास हो। वणी पेल्याँ आपणाँ भई समोनऊँ मलन क्यो, “माँने मसी मलग्यो हे।” मसी को मतलब चुण्यो तको। पछे अन्दरियास समोन ने ईसू का नके लायो।
ईसू वींने देकन क्यो के, “थूँ यहुन्ना को छोरो समोन हे, पण थूँ केफा नामऊँ जाण्यो जाई।” केफा जिंने पतरस भी केवे हे, ज्याँको मतलब छाट भी वेवे हे।

दूजे दन ईसू गलील जाबा का वाते ते किदो अन फिलिपुस मलग्यो तो वींने क्यो, “मारा पाच्छे चाल।” फिलिपुस, अन्दरियास अन पतरस का नगर बेतसेदा का रेवासी हो। फिलिपुस नतनएलऊँ मल्यो अन वणीऊँ क्यो के, “जिंको बखाण परमेसर का आड़ीऊँ बोलबावाळा किदो अन मूसे आपणाँ नेमा में क्यो हो, वो माँने मलग्यो हे। वो युसुप को छोरो नासरत को रेबावाळो ईसू हे।”
नतनएल वणीऊँ क्यो, “कई हव चीज भी नासरतऊँ निकळ सके हे?”
फिलिपुस वणीऊँ क्यो, “चालन खुदई देक ले।”
ईसू नतनएल ने आपणाँ आड़ीऊँ आवतो तको देकन वाँका बारा में क्यो, “देको, यो हाँचो इजराएली हे, ईंमें कई खोट ने हे।”
नतनएल ईसुऊँ पूँछ्यो, “थाँ मने कस्यान ओळको हे?”
ईसू वींने जवाब दिदो के, “फिलिपुस थने बलायो वणीऊँ पेल्याँ में थने देक्यो, जद्याँ थूँ अंजीर का रूँकड़ा का रेटे बेटो तको हो।”
नतनएल वाँने जवाब दिदो, “हो गरुजी, थाँ परमेसर का पूत हे। थाँ इजराएल को राजा हे।”
ईसू वींने क्यो, “में ज्यो थने क्यो के, में थने अंजीर का रूँकड़ा के रेटे देक्यो, कई थूँ ईं बात की वजेऊँ विस्वास करे हे? तो थूँ आगे भी अणीऊँ मोटा-मोटा काम देकी।” ईंके केड़े ईसू वाँने क्यो, “मूँ थाँकाऊँ हाँची केवूँ हूँ के, थाँ हरग ने खुलो तको अन परमेसर का हरग-दुताँ ने मनक का पूत (ईसू) पे उतरता अन चड़ता तका देको।”

Sikiliza यहुन्ना 1