If you would like a copy of this version please contact info@davaraudiobibles.org

Nahali New Testament, CC-BY-SA-4.0, The Love Fellowship. Nahali New Testament, CC-BY-SA-4.0, Davar Partners International, The Love Fellowship, 2023.

Nahali New Testament

Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.

ओवतो यीशु आपणा बारा चेलाह हादिन ताह अशुद्ध आत्मापुर अधिकार आपीह काडणेन एने आखा प्रकारान दुखा-या एने कोमजोरिह हाजो केरणेन. न्या बारा चेलान नाव ज्या हेते पेल्लो शिमोन जो पतरस केरीन भी नावालाथी, एने तान बाहाक आंद्रियास, जक्कायान सोरो याकूब एने तान बाहाक यूहन्ना; फिलीप्पुस, बर्थलमय, थोमा, एने मत्ती जो चुंगी लेणार एतो, अल्फिन सोरो याकूब एने तद्दे, शिमोन कनानी एने यहूदा इस्कर्योत तान केरता जो ताह देरीविल एतो.


न्या बारा चेलाह यीशु ज्यो आज्ञा आपिन मोकल्यो का दिहरी जातीमाय जावू मा, एने शमरोनान काल्ला भी हेरामाय जाहू मा. पुण इस्राएल ने टाकायील मेंढरा मा जावो एने चालता चालता ज्यो पोरचार केरू का, “स्वर्गान राज्य आहने आव जायील हि. दुखाऱ्यो हा केरू मुरीलाह जीवतालू केरू, कुष्ठ रोग्याह शुद्ध केरू, दुष्ट आत्माह काडो, तुमूह फुकट्यो जुडील हि फुकट्यो आपो. आपणा कोंमबरामाय नाह ते होनो, नाह ते चांदी एने नाह ते रूप्या नाह ते तांबो लेवू. एने प्रिनासान केरता थेयली मा लेवू, नाह दुय फाडकान जोड नाह ते खाहडा एने नाह ते डेंग्गो लेवू काहाकाय मोंजऱ्याह तान रूटू जुडणे जुवी.”
जां काल्ला शहरान गावामाय जाहू ते पुतू केरू का योग्य माणुह कूण हि, एने जाहवोर तुमु तारीन नाह निकेलते ताहवोर ताच रीवू. एने तुमूह ता घेराम प्रवेश केरुहू ते आशीर्वाद आपतीन रिगु. जर तो घेर आशीर्वादान योग्य हि ते तुमरी शान्ति ताहारी बोणीन रेंय पुण योग्य नाहा सोतो ते तुमरी शान्ति पोशी फिरीन आवी. जो कूण तुमरो स्वीकार नाय केरी, एने तुमरी वात नाय होमली ते ता घेरामायरीन एने ता शहरामारीन निकेलतेन आपणा पायावालो मातड्यो झेटकी टाकु. मी तुमूह खेरीच केथु का, न्यायान दिह ता नगरान दशा से सदोम एने गमोरान नगरान दशा से भी जादा सहने योग्य रेंय.


“देखू मी तुमुहू मेंढरान होस कोल्योमाय मोकलथू. तान वजेसे गेयळेकान होस चेत्रो एने कबुतरा होस बोणु. पुण माणहा से सावधान रीवू, कारण ता तुमूह न्यायसभाम होप्ती, आपणा आराधनालय माय तुवाह कोडा देती. तुमूह मारीवजेसे देशधिकारीहा एने राजान ओगाण तापोर, एने अन्य जाती पोर गवाही ला केरता पोचाडाहू. जेवी ता तुमूह देरतीह तेवी कालजी केरूह मा, कि आमु काय केहू कारण जो काय तुमूह केणु हि तो ताच टायमा पोर तुमूह मालूम एय जाय.” काहाकाय बोलणार तुमु नाहं पुण तुमरा बोगवानान आत्मा तुमु मायरीन बोलीह.
“बाहाक, आपणो बायाक एने आबुक आपणो सोरा मार टाकणे केरता, एने सोरा आपणा आईक आबाकने विरुद्ध उबरीन ताह माराव टाकी. मारा नावान वजेसे आखा तुमूह तुच्छ मानती पुण जो सेवट वोर धीर देरी ताचने उद्धार एय. जेवी ता तुमूह एक नगर विताडति, ते तुमु दिहरा नगरमा नाह जाज्यो, मी तुमूह हाचलीन केथु का, तुमु माणहान सोरान इस्राएल ने आखा नगरामाय नाह फिरील रीहू ताह माणहान आव लागी.”
“चेला आपणा गुरूह रीन मोठो रेथत नाहं, एने दास आपणो मालकाह रीन मोठू नाहं रेत. चेलान आपणो गुरुन, एने दास आपणो मालकान बारबर रेणेच जुलुम हि. ता घेरान मालिकाहचे शैतान केया ते घेर वालाह काय केती”


“तावजेसे ताह बिऊ मा, कारण काय डापिल नाहं सोतो, जो उगडी नेय जाय. एने काय लिकाईल नाह सोतो, जो काय जाणाय नाय. जो मी तुमूह आंधाराम किथु, तो तुमु उजालाम किवू; एने जो तुमूह काना केरीन होमेलतेह, ताह घेरा पोरपुर चेडिन पोरचार केरो. तासे जो शरीराह घात, पुण जो आत्माह एने शरीर दुयू भी नरकाम नाश केर सकीह. तासेच बिवो काय रुप्यामाई दुय चिडा नाह वेचाते? तेभी तुमरा आबाकने इच्छे बिगीर तामायरीन एक भी जोमनि पोर नाह पोड सकीत. तुमरा मुंडान लेट्या वोर गेणायील हेते. तामुळे बिऊ मा, काहाकाय तुमु चिडासे वोदिन किमती हेते.”


“जो कूण माणहान ओगाण माहु मान लेय, मी भी ताह आपणो आबाकने ओगाण जो स्वर्गाम हि मान लेह. पुण जो माणहान ओगाण माहु नाकार देय, ताह मी भी आपणा आबाकने ओगाण जो स्वर्गाम हि नाकार देह.”


“ज्यो मा होमजहु का मी पृथ्वीपोर मेल केरावने आयील हि, मी मेल केरिनणे नाह पुण, तलवार चालवाडणे आयील हि मी ते जानकेरता आयील हि का, माणहाह तान आबाकाहन रीन, एने सोरीह आपणी आईकनसे, एने वोवडिक आपणी हाहवूक से अलग केर देव.” एने माणहान दुश्मोन ताचने घेर वाला रेती. जो माहुरीन जादा आपणा आहाक आबाकपूर प्रेम करी तो मारे लायक नाहं सोतो. जो मारेरीन जादा आपणो सोरा सोरीपुर प्रेम करने तो मारो लायक नाहं नाह सोतो एने जो आपणो क्रुस विसीन मारे पासाण चालीत नाहं तो मारो लायक नाहं सोतो. जो आपणो जीव वाचाडणे तो ताह गोमाडी, एने जो मारीवजेसे आपणो जीव गोमाडीह तो ताह जुड जाय.


“जो तुमूह ग्रहण केरी, तो माहु भी ग्रहण केरी, एने जो माहु ग्रहण केरीह, तो माहु मोकेलणाह भी ग्रहण केरीह. जो भविष्यवक्ताह भविष्यवक्ता केरीन जाणीन ग्रहण केरी, ताह भविष्यवक्तान फोल जुडी, एने जो धर्मीह धर्मी केरीन ग्रहण केरी तो, ताह धर्मा फोल जुडी. जो कूण जामरीन एका भी मारा, चेला मानीन एक गिलास थेन्डो पाणी आपीह मी खेरीच किथु, तो आपणा फोल गेमाडी नाय.”

Sikiliza मत्ती 10