This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.

Shwe Palaung

 This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association. 

အခိင်ဒီန် ရောမဧကရာဇ်ဩဂုတ္တုနီန် ထုက်ပျြံတ်အမိင် ကဲပ်စြာင်း တကဲအီဂေါည်ခြူမ် ပ်ုန်အူပ်ဘြောင်ရောမအီန်ဘာယာကဲနီန် တောန်အီး။ ခိင်ဇူႈကဲကဲပ်စြာင်းနီန် ကုရေနိဟည်ပဲန်ပွံတ်ဟောခံမ်း ကပီုန်ဆီးရီးယားဂဲ။ တောန်အီးမာ် ဟည်ႎီရ်ဒိုႇပရဝ် ကနာည်နံင်ဟံပ်လီပ်ခေဲင်စြာင်း။ ဂေါႇဘည်ဒီန် ယောသပ် နီန်မာ် လည်လေႈဟာဝ်းပွံတ်ဒါႇကီုင်း ဂါလိလဲနာဇရက် ဂေါႇအ်ုန်မိုႈအီယိူဝ်ႇဒေဲႈ တခြိူဝ်းမျိုးဟောခံမ်းဒါဝိဒ် ပကပီုန်ယုဒ ကီုင်းဗက်လင် ကနာည်နံင်ဟံပ်စြာင်း။ ခိင်ဟာဝ်းအ်ုန်ပဒီန် ယောသပ်နီန် အ်ုန်ဟာဝ်းတောပ်ကဝ်အီကစာပ်အူန်းတအ်ုန် အီဟောည်ႇမိူဝ်ႈဆာန်ထေ အ်ုန်အီဇီုဝ်မာရိ။ ခိင်ဟောည်ႇရောတ်ဂါရ်ပဒီန် ဂေါႇမိုႈဟည်စာ်မ်းခိင်ပျေဲႈ မာရိ ဟောည်ႇ ပျေဲႈပွံတ် ကောန်အီမာည်းအူအီး။ ခိင်ဒီန် ဂေါႇမိုႈဂါရ်အာဝ်မိူဝ်ႈဒီအီတ် ဒီရလှဝ် ဘ်ုပ်ဒါဂြူကပ်ုရ်ကောန်ဒဲႇဒီန် ဒဲႈအ်ုန်အီတ်ခေဲင် ကလေဲႇမံက်။ ခီမှိူဝ်ဒီန် ကဲအီဟျံင်ဆိုဘြည်ဂဲ စီဟျံင်ပ္လေႈဆိုဘြည်ကဲဟောမ် ပတကြာက် အရာပ်ဗဲတ်လီန်။ ဟောည်ႇဒီန် ကန်ုမ်ဒေဝါ စဝ်ဖြားအူပါး ရောတ်စာ်မ်းပွံတ် ရအာည်ႇဂဲအူစာ်န်း အရော်င်တဂိုးစဝ်ဖြားမာ် ပ္လါင်ဟိူဝ်ကပါ်ႇကပံန်ကဲ ကဲအီဟျံင်ဆိုကဲဒီန် ကံပ်ဘယ်အာမ်း ကဒိုန်း။ ဟောည်ႇဒီန် ကန်ုမ်ဒေဝါဒါႈတကဲ “ပဲမည်ယောအေ့။ အောမိုႈအီတိူဝ်ႈတိုန်းဆဒါင်မှိူမ်ဆဒါင်ချှီႇ တတိုအီးဂဲပါ်ဒိုႇဒိုည်ႇ။ ဘာည်းအဒိူဝ်နီန် မိုႈဆငည်းချှီႇ ဆငည်းမျြံ တ် မေရှိယ ဟည်ပျေဲႈကောန်ပကီုင်း ဟောခံမ်းဒါဝိဒ်ယာ့်။ အ်ုန်ဒါႈဆာ်ပဲယိူဝ်း ကောန်ဒဲႇပကီုင်းဗဲတ်လီန် ဒါဂြူကပ်ုန်အီတ်ခေဲင်ကလေဲႇမံက် ပဲနံင်နံပ်အူန်းအ်ုန်။” ကန်ုမ်ဒေဝါဂဲမာ် လေႈပဆျှိုည်မျို့တော်a တိူဝ်ႈကနေဲႈဖါ်ႈဂုင်စဝ်ဖြား “ယဲတိူဝ်ႈကနေဲႈ ဂုင်စဝ်ဖြား အီဂေါည်ပဆျှိုည်မျို့တော်ယာ့်။ ဒဲႈတိုအီးဂေါည်တေဲင်ကံမ်ဖာကဲနီန် ဘိူန်းဒိုႇဆာယာယေန်ငံင်စဝ်ဖြား။” ႎါည်းဟောည်ႇႎီရ်ကန်ုမ်ဒေဝါကဲ ႎီရ်ဆျှိုည်မျို့တော် ကဲအီဟျံင်ဆိုကဲဒီန် လည်က္လာင်းခနားကဲ အယ်ဟာဝ်းပကီုင်း ဗဲတ်လီန် ကနာည်နံင်ဟာဝ်းတိူရ်ႈ ဘည်မိုႈဘည်ဘာည်း ပ်ုန်တံမ်းအူန်းစဝ်ဖြား။ ဘိူဝ်လည်လေႈဟာဝ်းကဲဒါႇဒီန် ကဲစီဟာဝ်းယိူဝ်းပွံတ် ယောသပ်၊ မာရိ ကာည်း ကောန်ဒဲႇအီအီတ်ခေဲင်ကလေဲႇမံက်။ ႎါည်းဟောည်ႇယိူဝ်းဒေဲႈကဲ တကောန်ဒဲႇယေရှုနီန် ကဲက္လာင်းပွံတ်တိုအီးရဝ်ကဲတငါဝ်း ဘည်က္လာင်းနှဲကန်ုမ်ဒေဝါဂဲ တဘည်မိုႈကောန်ဒဲႇနီန်။ ကဲအီတငါဝ်းကြောႈပ်ုန်က္လာင်း ကဲအီဟျံင်ဆိုကဲနီန်မာ် ဟည်အာမ်းဒိုႇတောန်အီး။ မာရိမာ် နောႈလှူႈနောႈလှောႈတဂေန်းထာပ် အိုရ်ဆီုင်ဇူႈယိူဝ်းတကန်ုမ်ဒေဝါ ဘည်ကဆီုဝ်ကဆဲင်တောပ် ယေရှု။ ကဲအီဟျံင်ဆိုကဲနီန်မာ် ဟည်ႎီရ်ဟာဝ်းဘိုးပတကြာက် တိူဝ်ႈကနေဲႈဂုင်တော် စဝ်ဖြားကဲပါ်ဒိုႇဒိုည်ႇ ကာည်း ႎီရ်က္လာင်း ဘည်မှိူမ်အာမ်း ပ်ုန်က္လာင်းဒေဲႈကန်ုမ်ဒေဝါကဲ။ ႎါည်းဟောည်ႇပျေဲႈအ်ုန်နိုက် တာရ်ဆငည်း ဟည်ရောတ်အခိင် ရေဲန်ဒေဲႈမံင်ဂလာ ဆိုႇကတောႇအင်္ဂါ အရေဖျားလှီးbကောန်ဒဲႇနီန် တောပ်ဘည်ပ်ုန်နှဲအူန်းခေဲင် ကျာမ်းမောရှေ၊ မာရိ ကာည်း ယောသပ်စီဒါႈ တောပ်လိူည်ဘည်က္လာင်း ကန်ုမ်ဒေဝါကဲ ဆီုင်အာည်ႇမိူဝ်ႈအ်ုန် တဆာန်ထေ စီပဲန်ကဲဒဲႈအ်ုန်ဇီုဝ် ယေရှု။ ႎါည်းဟောည်ႇကဲတဆငည်းရေဲန်မံင်ဂလာဆပဲဆငါးc တောပ်ဘည်ကျာမ်းပ်ုန်ဟောအူန်းမောရှေဒီန် ကနာည်နံင်ကာပ်လှူတစဝ်ဖြား ကူန်မာအ်ုန် စီတောႇဒေဲႈအ်ုန် ပကီုင်းဂျေရုဆလင်။ လိုကာပ်လှူတောပ်ဘည်ပ်ုန်ဒါႈခေဲင်ပံပ်ကျာမ်း “တောန်ကောန်တံင် ကောန်အီမာည်း လိုကာပ်အာပ်တစဝ်ဖြား” ကာည်း လိုလှူဆီမ်းအပ္လိုည်အာရ်တို ဆာ်အာဝ်မိုႈ ဆီမ်းချှိုးအာရ်တို။ ခိင်ဒီန် မိူဝ်ႈတိုအီးအူအီး အ်ုန်ဇီုဝ်ရှုမောင် ဂေါည်ပကီုင်းဂျေရုဆလင်။ အ်ုန်မိုႈတိုအီး ရေဲန်ပ်ုန်လိုပ်ုန်အုင်ဖြား မိုႈတိုအီးတငါဝ်း တြားတော်ပ်ုန်ဟောစဝ်ဖြား။ ဂေါႇမိုႈ အ်ုန်ဂီုည်နှံက်ရဲ့ ပ်ုန်ကဇောည်စဝ်ဖြား ရဲင်ပ်ုန်နံင်ဒဲႈစဝ်ဖြား တခြိူဝ်းမျိုးအစ္စရေး စီပဲန်ငျာန်တော်စဝ်ဖြားနီန် လေႈဇူးပွံတ်အ်ုန် စီက္လာင်းဒါႈ “မည်းအာဝ်မိုႈမ တိုအီးနံင်ယံမ်းဟာဝ်း အာဝ်ဘိူန်းကံန်တော မေရှိယ?” ခိင်ကဲတောႇဒေဲႈကောန်ဒဲႇဒီန် ခေဲင်ဗိမာန်တော် ကနာည်နံင်ရေဲန်ကာပ်လှူကံန်တော မာရိ ကာည်း ယောသပ် တောပ်ဘည် ဆီန်တြားတော် (ပညက်တော်) ငျာန်တော်စဝ်ဖြား ဟည်ယီုဝ်နှဲဒေင် ကနာည်နံင်လီပ်ရှုမော်င်ခေဲင်ဗိမာန်တော်ဒီန်။ ဟောည်ႇဒီန် ရှုမော်င်ဟည်ငျကောန်ဒဲႇယေရှုဒီန် ခေဲင်တည်းအ်ုန် စီတိူဝ်ႈကနေဲႈ ဂုင်တော်စဝ်ဖြား ဘာည်းနီန် “စဝ်ဖြား၊ တောပ်ဘည်ကတိတော် ပ်ုန်ဒဲႈမည်း ပ္လိုတ်ခွါင်းဒဲႈအောယံမ်းဟာဝ်း ယေန်ငံင်အောႏ။ ဂေါႇမိုႈအောဟည်ယိူဝ်းတိူရ်ႈ ကညာကနာည်နံင်ကဇောည်တတိုအီးကဲ ကဝ်ပ်ုန်ပ္လေႈတိုန်းစဝ်ဖြားအယ်။ ဘည်က‌ေႎရဲန်ဒဲႈ ကနာည်တိုအီးဂဲ ဒဲႈအ်ုန်လှာက် တကုင်အီးဟံရ် ဒဲႈအ်ုန်ပ္လါင် တတိုအီးဒီန် အ်ုန်ဒါႈတစဝ်ဖြား မိုႈအီနံင်တိူဝ်ႈဒိူည်းဒေဲႈ ဘုင်အသရေ ကနာည်ခြိူဝ်းမျိုးအစ္စရေးမည်း၊ ပဲန်ဖါ်ႈလာ်ဒါ အရော်င်ပ္လါင် ကနာည်နံင် လှာက်တချား တခြိူဝ်းမျိုးအီဟံရ်ဂဲ။” ရှုမော်င်ဟည်အာမ်း ႎါည်းဟောည်ႇယိူဝ်းအ်ုန်တတငါဝ်း ဘည်မိုႈကောန်ဒဲႇယေရှုနီန် တမာရိ ကာည်း ယေသပ်။ ရှုမော်င် မှာန်းဆုဒဲႈဖါ်ႈတဂါရ် အ်ုန်ဒါႈတမာရိ “စဝ်ဖြားရံရ်ႈဒဲႈကောန်မည်းပဲန် ခြိူဝ်းမျိုးအစ္စရေး ကနာည်နံင်ကကာႈ တိုအီးတငါဝ်းကြောႈဖြား ကာည်း တိုအီးအာဝ်တငါဝ်းကြောႈဖြား။ ပ်ုန်ကယေင်ပ်ုန်အာန်းအ်ုန် နံင်လိူရ်ႈတချာ ခေဲင်နောႈတိုအီးဂဲ၊ ဆာ်အယ်ဒါႈ အ်ုန်နံင်ကတူႈ မိူဝ်ႈအီနံင်ဆံင်ခံတ်အ်ုန် ပ္လေဖိူမ်မည်းနံင်ဆဝ်း ကံပ်နှေရ်အီဒါဘိုတ်ပဲတ် ဘြူႈ။” အရာပ်ဒီန် ကဝ်အီမိုႈကောန်အီပ်ုန် ဖနိုည်လ ခြိူဝ်းမျိုးအာရှာ အာရိယာတိုအီးမှိူမ် အန္နမာ် ဂေါည်အူန်းပဒီန်။ ႎါည်းဟောည်ႇခံတ် အ်ုန်ဂေါည်တောပ် အီမာည်းအ်ုန် ဘြည်ပူရ်ဆန်ုမ်။ ကဇေန်နီန် အ်ုန်ဟည်မိုႈယာကမာည်း အဆာက်အ်ုန်မာ်ဟောည်ႇဂံတ် ဘိူန်းတာရ်ကိူရ်လေႈဖိုန်ဆန်ုမ်။ ခိင်မှောမာ် အ်ုန်အာဝ်လေႈဒါႇ ဗိမာန်တော် ဂေါည်လိူည်ခေဲင်အီဒီန် ဂြူပ်ဖြား၊ အ်ုန်မိုႈအီႎဲႈပ်ုန်ဟောမ်တောန်မှိူဝ် တောန်ဆငည်း။ ဆာ်အ်ုန်ရောတ်စာ်မ်း ခေဲင်ဗိမာန်တော် အ်ုန်တိူဝ်ႈကနေဲႈပွံတ် ဂုင်စဝ်ဖြား ခိင်ယိူဝ်းအ်ုန် တကောန်ဒဲႇယေရှုဒီန်။ တိုအီးခေဲင်ကီုင်းဂျေရုဆလင် ကဲအီးဒါ့်မောင် ဘည်ကဇောည်နီန် ဂီုည်က္လာင်းဘည်မိုႈ ကောန်ဒဲႇယေရှု။ ႎါည်းဟောည်ႇရေဲန် ယောသပ် ကာည်း မာရိတ ဆီန်တြားတော် (ပညက်တော်) စဝ်ဖြားဒီန် ဂါရ်ႎီရ်ပွံတ်နာဇရက် ပဂေါည်ဂါင်ဂါရ် ကပီုန်ဂါလိလဲယာ့်။ ခိင်ကောန်ဒဲႇဒီန် ဟောည်ႇဒါင်း ခေါခေါခါႇခါႇ ငျာန်ပိင်ငျာမာ်ချဲမ် အ်ုန်ဘိူန်းဒေခါမ်စာဆုပ်ုန်ဒဲႈစဝ်ဖြားယာ့်။ မာရိ ကာည်း ယောသပ် ကျာင်းဒေဟာဝ်း ပကီုင်းဂျေရုဆလင် ကနာည်နံင်ရေဲန် ပ္လေါည်ပသခါ တောန်ဆန်ုမ်တောန်ဆန်ုမ်။ ယေရှုဘိူန်းအဆာက် အူကိူရ်လေႈအာရ်ဆန်ုမ် ကဲဟာဝ်းဒိုႇဒိုည်ႇ ပကီုင်းဒီန် ကနာည်နံင်ရေဲန်ပ္လေါည်တော်ပသခါဒီန်။ ခိင်ပ္လေါည်ပသခါဒီန်d ဟည်ဟောည်ႇ ကူန်မာအ်ုန်ဟည်ႎီရ် အာဝ်နံပ်မိုႈတ ယေရှုဒီန် ဒါ့်ဂေါည်ပကီုင်းဂျေရုဆလင်။ ကဲထာင်မိုႈ ယေရှု ႎီရ်တောပ်ရဘံန်းကဲ ခေဲင်ဂီုန်းတိုအီး ရဒေင်ဟာဝ်းကဲ ကံပ်မိုႈနိုက်အူဆငည်း။ ဂေါႇမိုႈကဲဟည်ဟြီုက် ယေရှု ခနားခြိူဝ်းမျိုးကဲအာဝ်ယိူဝ်း ကဲႎီရ်ႎီရ်ဘိုး ပကီုင်းဂျေရုဆလင် ကနာည်နံင်ဟြီုက်အ်ုန်။ ဟောည်ႇလှေင်အိုည်ဆငည်း စီယိူဝ်းလာ် အ်ုန်အံက်ခနား ဆြာလံပ်ဖာဆာခြိူဝ်းဂျူးကဲ ခေဲင်ဗိမာန်တော်။ တောန်အီးယိူဝ်းဒေတငါဝ်းကြောႈစဝ်ဖြားယေရှုနီန် မိုႈဒိုႇအီအာမ်း ငျာန်ပိင်ငျာအ်ုန် ကာည်း ဘည်ကြောႈပ်ုန်ႎီရ်ပ္လါန်အ်ုန်။ ယောသပ် ကာည်း မာရိဟည်အာမ်း ခိင်ယိူဝ်းဂါရ် တစဝ်ဖြားယေရှု ကဝ်အီမိုႈမာ “ကောန်၊ ဆေဘာည်းမည်းစီရေဲန်တေဲင်ယဲဘည်နီန်? ယဲဟြီုက်မည်း နောႈကံပ်မှည်။” စဝ်ဖြားယေရှု စီႎီရ်ပ္လါန် “ဆေဘာည်းပဲစီဟြီုက်အော? ပဲအာဝ်နံပ်မိုႈ တအောဂေါည်လိူည် ပဂါင်တော်ကူန်?” မိုႈလိူည် ပ်ုန်ဆိင်ဒါႈ စဝ်ဖြားယေရှုနီန် အာဝ်လှံန် မ တနောႈကဲ။ စဝ်ဖြားယေရှုနီန် အ်ုန်တငါဝ်းကြောႈ ယောသပ်ကာည်း မာရီ စီတောပ်ႎီရ်ဘိုး ဂါရ် ပကီုင်းနာဇရက်။ မာအ်ုန်ဂီုည်တဂေန်း ဇူႈပွံတ်ခိင်ယိူဝ်းအ်ုန် တကန်ုမ်ဒေဝါ ကံပ်ရောတ်ပွံတ်ပ်ုန်ကဆီုဝ်ကဆဲင် ဘည်မိုႈစဝ်ဖြားယေရှု။ ဟောည်ႇဒီန် ခိင်ဟောည်ႇဒါင်း စဝ်ဖြားယေရှု ငျာန်ပိင်ငျာမာ်နိုက် ခေါခါႇမာ်ပဲန် ဆုပ်ုန်ဒဲႈစဝ်ဖြားမာ်ဘိူန်း ပ်ုန်ညှူမ်ပ်ုန်အုင်တိုအီးဂဲမာ် ဘိူန်းဒိုႇ။

Sikiliza Luke 2