Traducción bíblica: Toba © Sociedad Bíblica de Argentina, 2012 Grabación de Toba ℗ 2017 Hosanna

Toba Qom - 2012 Edition (NT) Non Drama

Toba Qom - 2012 Edition (NT) Drama

Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.

Co'ollaq saxanaxa da qaỹo'ot 'enauacna,
qaq nale'ena da huo'o So Na'aqtac.

Qaq se'eso Na'aqtac hueta'aguet
Ñim Lo'onatac 'Enauacna,
qaq So Na'aqtac nacheñi
Ñim Lo'onatac 'Enauacna.

Qaq Ñim Lo'onatac 'Enauacna co'ollaq ỹo'ot 'enauacna,
nache So Na'aqtac hueta'aguet Ñimaye.

Qaq Ñim Lo'onatac 'Enauacna co'ollaq
ỹo'ottacna, nache ỹachegoxotchigui
So Na'aqtac 'enauac nam ỹo'otpi.
Qaq 'enauac nam huo'o, qaica ca saq
chegoqchigui So Na'aqtac.

Qaq se'eso Na'aqtac, nacheso so
chegoqchigui da nca'alaxa,
qaq de'era nca'alaxa, nachera da
yo'oqoolec naqa'en na shiỹaxauapi.
Qaq de'era yo'oqchiguiñi,
damaye icoỹarelec na napalaxa,
qaq na napalaxa saishet da ỹalamat.

Huo'o so ỹale maye lamaxashec Ñim Lo'onatac 'Enauacna, somaye le'enaxat Juan. Qaq somaye anac, da yaqto' ỹa'axatem na shiỹaxauapi de'era, yaqto' 'enauac na shiỹaxauapi ishet da ỹa'amaqten de'era yo'oqchiguiñi. Qaq so Juan saishet da nacheso som yo'oqchiguiñi, somaye anac da yaqto' ỹachaxan de'era yo'oqchiguiñi. Qaq som ỹoqta 'eesa da yo'oqchiguiñi mashe nvira ana 'alhua, nacheso nagui so icoỹarelec 'enauac na shiỹaxauapi.

Qaq se'eso Na'aqtac
nale'ena da hueta'a ana 'alhua.
Qaq na'aictaxa da Ñim Lo'onatac 'Enauacna
ỹachegoxotchigui co'ollaq ỹo'ot ana 'alhua,
qalaxaye nam huetalec ana 'alhua
saishet da ỹaconeguet.
Qaq So Na'aqtac anaỹa ana 'alhua,
qalaxaye na lauo' le'ecpi saishet da ỹaconeguet.

Qalaxaye nam ỹaconeguet
qataq ỹa'amaqten,
qaq nachena na ỹoqta 'itchiguiñi da
llalaqpi Ñim Lo'onatac 'Enauacna.

Qaq namayepi nagui ỹataqta
llalaqpi Ñim Lo'onatac 'Enauacna,
chegoqchigui da maiche
lhuennataxa Ñimaye,
qaq saishet da nachera da maiche
lhuennataxa na shiỹaxauapi.

Qaq se'eso Na'aqtac
qomi' hueta'agueta,
'eeta'am ca 'oonolec da shenaqta.
Qataq qomi' sauanaqchigui da
la'añaxac maye maiche lalamaxat
som 'oonolec Llalec Ñim Lo'onatac 'Enauacna,
cha'aye qomi' ỹachaxanalo
'enauac da lsoxoyec qataq da 'eesa lataxac.

Qaq so Juan ỹa'axattac co'ollaxa, 'eeta':
«'Era da aỹem sa'axatta'aguet co'ollaq sheeta': ‹Huo'o ca aỹem nca'attaueegue, qaq que'eca aỹem nca'attaueegue, camaye aỹem napacalec, cha'aye nale'ena da huo'o co'ollaq saxanaqca aỹem.›»
Qaq 'enauac da shenaqta saconaxaguet dam chochaq huañi lsallaxa, qaq nachera dam lqouagaxanaqtaic maye nacalec lỹa da qomi' ỹanema. Na namaxasoxonaxacpi co'ollaq ỹan Ñim Lo'onatac 'Enauacna, qalaq chegoqchigui naqa'en so Moisés, qalaxaye dam lqouagaxanaqtaic qataq dam 'eesa lataxac, damaye chegoqchigui So Jesucristo. Qaica ca ishet da nma'ai' da ila'a Ñim Lo'onatac 'Enauacna, qalaxaye so 'oonolec Llalec maye ỹataqta neto'ot Ñimaye, Somaye nacheso so qomi' ỹauattonaxanaxaneque Ñimaye.


Qaq 'era da la'aqtaxanaxac so Juan, co'ollaq so lataxala'pi na judiopi ỹauo'o so lamaxashecpi chegoqchiguiña ye Jerusalén, nam ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq na leviitapi da yaqto' nqo'ona qataq inat so Juan da chaq negue't somaye. Nache so Juan 'enapeco':

–Aỹem ỹataqta ñechoxotta da saishet da nachaỹem Lca'aguishec Ñim Lo'onatac 'Enauacna maye qaiuattaique.

Nache somayepi ỹe'eguelaxalec da inat, 'eeta':

–Qaq ¿chaq negue't 'am qone'? ¿Peta'a nache 'am Elías?

Nache so Juan 'enapeco':

–Saishet; saishet da aỹem Elías.

Qaq somayepi qaltaq ỹe'eguelaxalec da inat, 'eeta':

–¿Peta'a nache 'am que'eca na'aqtaxanaxanec maye qaỹa'axatta'aguet da naỹa'acna?

Nache somaye ỹasat, 'eeta':

–'A'i, saishet da nachaỹem.
Nache somayepi 'eetega somaye, 'eeta':

–Qaq ¿negue'to' 'am qone'?

–Cha'aye qomi' sauoqtaique da huo'o ca qaya'ac 'ara'aqtaxanaxac da seraxa ñim qomi' nama'q. ¿Ña qomi' 'aua'aqtaxanemactaxa chaq negue't 'am?

Nache so Juan 'enapeco':

–Qomye nachaỹem, maye aỹem ỹa'axatta'aguet so la'aqtaxanaxanec Ñim Lo'onatac 'Enauacna. Qaq nachaỹem maye aỹem chemaqtapeguelec ca toolec 'alhua, qaq da iỹaxanaxac, sheeta': «Qauqataxañiỹai' ca ỹataqta ỹashectec nqa'aic Ñim Lca'aguishec Ñim Nataxala'.»

Qaq se'eso lamaxashecpi na fariseopi inattac so Juan, 'eeta':

–Da saishet da 'am Lca'aguishec Ñim Lo'onatac 'Enauacna, huo'otaq 'am Elías, huo'otaq ca lỹa la'aqtaxanaxanec Ñim Lo'onatac 'Enauacna. Qalaq ¿ta'ainco' qone' ye 'auachelaxanataxaatac?

Nache so Juan 'enapeco':
–Aỹem sachelaxanataxana na 'etaxat. Qalaxaye da qoñiita huo'o dam qami' huetanguilo maye saishet da qauauattoñi. Na'aictaxa da aỹem hua'auñi da ñevi', qalaxaye damaye ỹataqta ỹactec da la'amaqchec. Na'aictoxo' da choche aỹem l-latac ỹataqta sa yaloua'a.
Qaq 'enauac de'era huaña ye nỹecpi ye Betania, maye pa'aigue da nala' lliguisheguem ye tala Jordán, yem huaña co'ollaq dachelaxanataxaatac so Juan.

Qaq so lỹa na'a'q, nache so Juan ila'aguet So Jesús da naỹaxaama somaye, nache somaye 'enapega so shiỹaxauapi 'eeta':

–Ña qauloỹeeguet, 'ena cha'aguet na Jesús, nachena na 'eeta'am ca nachetaqtaxanaxat Qagueta Llalec maye ỹachegoxotchigui Ñim Lo'onatac 'Enauacna da ỹapalaxat na lasouaxashetpi na shiỹaxauapi. Qaq aỹem sa'axattac namaye co'ollaq sheeta': «Huo'o na aỹem nca'attalec, namaye aỹem napacalec da la'amaqchec, cha'aye namaye nale'ena da huo'o co'ollaq saxanaxa ñañiguiñi.» Qaq aỹem saishet da ỹoqta sauattoota chaq negue't Namaye. Qalaxaye aỹem ñanacto'ot da sachelaxanataxaatega na 'etaxat, yaqto' na Israel le'ecpi ishet da ỹauatton Namaye.
Nataqa'en so Juan 'enapeco':
–Aỹem sauaateguet So Saqcha'a Na'añaxac Qui'itta da chegoqtot na piguem, 'eeta'am na qoto', nache talec Namaye. Qaq aỹem ñaq saxanaxa da sauatton co'ollaxa Namaye. Qalaxaye Ñim aỹem namaq da yaqto' sachelaxanataxana na 'etaxat, Ñimaye aỹem 'enapega co'ollaxa, 'eeta': «Qom 'am 'auauaachigui So Saqcha'a Na'añaxac Qui'itta da huo'otaq anac, nache talec ca shiỹaxaua, qaq que'eca shiỹaxaua, nacheca ca dachelaxanataxana So Saqcha'a Na'añaxac Qui'itta.» Qaq aỹem mashe sauaachigui Namaye, nache sa'axattac da Namaye, nachena na Llalec Ñim Lo'onatac 'Enauacna.

Qaq so lỹa na'a'q, nache so Juan qaltaq hueta'a yi'iye 'alhua, qataq soua dos soua lapaxaguenataqa. Qaq co'ollaq ỹauaateguet So Jesús, nache 'enapeco':
–Ña qauloỹa, 'ena cha'aguet na Jesús, nachena na 'eeta'am ca nachetaqtaxanaxat Qagueta Llalec maye chegoqo'ot Ñim Lo'onatac 'Enauacna.
Nache soua dos lapaxaguenataqa so Juan co'ollaq hua'aqchiguilo de'era, nache ca'atregue So Jesús. Qaq So Jesús co'ollaq namatapec, nache ila'agueta soomaye da nca'attrauo, nache inatta'ape, 'eeta':
–¿Negue't ca qoñiitapeguec?
Nache soomaye 'ena'apo':
–'Am Napaxaguenataxanaq, ¿hua'ague ca qoneta'ague?
Nache So Jesús 'enapeco':
–Qauanaqui, ña qaumeenaxañiỹa.
Nache soomaye je'c da demeenaxara, nache ỹauanalo ca netaña Somaye. Nache huetra'asop Somaye se'eso avit, cha'aye mashe huo'o ca las cuatro se'eso avit.
So 'oonolec soomaye, nacheso so Andrés maye lqaỹa so Simón Pedro. Qaq so Andrés somaye ỹataqta ỹa'auaxaachiguiñi da nqo'ona so lqaỹa Simón, nache 'enapega, 'eeta':
–Qomi' ñauanaxai' Ñim Lca'aguishec Ñim Lo'onatac 'Enauacna maye qaiuattaique le'enaxat Cristo.
Ime, nache so Andrés ỹauec so Simón da ỹauega ca netaña So Jesús. Qaq So Jesús co'ollaq ila'aguet somaye, nache 'enapega, 'eeta':
–'Am Simón maye 'am llalec so Jonás, 'am qaỹamata'ac da 'are'enaxat Cefas. (De'era ne'enaxat naigui da Pedro, nataqa'en naigui da Coma'.)

Qaq so lỹa na'a'q nache So Jesús taigue da 'alhua Galilea. Nache huaña yemaye da natenalec so Felipe, nache 'enapega, 'eeta':
–Aỹem qoquegue.
Qaq se'eso Felipe, somaye lma' ye Betsaida, yem nataqa'en lma' so Andrés qataq so Pedro. Nache so Felipe jec da nmitaique so Natanael. Nache da'aqtaxanem, 'eeta':
–Qomi' mashe ñauanaxai' ñim ỹale maye ỹa'axattac co'ollaxa so Moisés maye huetalec ana lere, ñim nataqa'en ỹa'axatta'aguet co'ollaxa so la'aqtaxanaxanecpi Ñim Lo'onatac 'Enauacna. Ñimaye nacheñi Ñi Jesús, ñim llalec so José maye lma' ye Nazaret.
Nache so Natanael 'enapeco':
–¿Peta'a isheto' da huo'o ca no'on da lataxac da chegoqchiguiña ye Nazaret?
Nache so Felipe 'enapeco':
–'Aỹala, ña 'ameenaxana Ñimaye.
Nache So Jesús co'ollaq ila'aguet so Natanael da naỹaua'a, nache 'enapega, 'eeta':
–'Ena na ỹoqta 'eesa da Israel le'ec, namaye saishet da tenataxanaxaic.
Nache so Natanael denataxan, 'eeta':
–¿Ca hua'ague co'ollaxa, qaq aỹem 'auauatton?
Nache So Jesús 'enapeco':
–Qomye 'am selota'a can saxanaxa da 'am iỹaxana da Felipe, can qoueto'ot ara higo lcheyec.
Nache so Natanael 'enapeco':
–'Am Napaxaguenataxanaq, nache 'am Llalec Ñim Lo'onatac 'Enauacna, qataq nache 'am Lta'a na Israel le'ecpi.
Nache So Jesús 'enapeco':
–¿Aỹem 'aua'amaqten peta'a, souaxat da sheetega da 'am selota'a can qoueto'ot ara higo lcheyec? Qalaxaye nagui 'am sa'aqtaxanem da ỹataqta ỹactec da lyac, qataq lta'araic ca 'arauanaqchec qome saq 'ena'am de'era.
Nataqa'en 'enapeco' So Jesús:
–Ỹataqta 'eesa de'era, qami' sa'axatema nagui, da qami' qauloỹa'a qome na piguem qom nauatoigui, qataq na lamaxashecpi Ñim Lo'onatac 'Enauacna naỹaña Aỹem Shiỹaxaua Llalec qaltaq ỹe'eguelaxasheguem.

Sikiliza Juan 1