Luukeꞌ 6
6
Doong Uaana'mung-koo Jiisuu' Turampau'na' Sinang Kavaio'
(Mat 12:1-8; Mak 2:23-28)
1Nii'na'mung Doong Uaana'mung Jiisuu' bakaning ninka nari' uite'naue˜ tankinaama bakaninge barevare-nupoonge nii'ning bii'da'pau'nung uite'koong sinang-koo untu'noo', ee'noko naako'paara maa'au' tamung tankinaama Ju'nupoong biikaang aarumo-koo taura'pari otoina'. 2Teka nii'ninge Boto Keperuu'navitue˜ aa'pau', “Dii' aming-koo mintoontarimaang boto toto'peritaa' Doong Uaana'mung-koong?”
3Ee'noko Jiisuu'ke maku'urima aa'puru', “Dii'ke aming-koo tee' tuumpimerimaang? Tampa' noru'eri otong tee kapoo' Deevita'ke nkovuu'nung tenang tee peeravora, tee Deevita' ee'noko teing nari' otoroko'ning ninka. 4Kumponing bakanava-koo Deevita'ke koinura nkavura naiau' tee taamang meekung, nii'ninge nai-koo taura'parava', teka piristi'nuka nainge deeko' nai-koo makosi. Ee'noko teie Deevita'ke teing nari' otoroko'ning avurio' boto toto'koo tuumpiaava'.” 5Ee'noko napo' aa'puru'nung teing, “Ning Tee Naning-naumpo' Paning-etaing tee Ovoring Doong Uaana'mung-koong.”
Doong Uaana'mung Duuai' Taare-antavuu'na' Jiisuu'ke
(Mat 12:9-14; Mak 3:1-6)
6Napo' nii'na'mung Doong Uaana'mung pava dootuu'nava-koo tumparara Jiisuu'ke nau-antavuriko'nung narung naning teke otoko bireng tampavine duuai'. 7Ee'noko boto naunuka ee'noko Boto Keperuu'navitu dovange tareaako' ooaava'naang taare-antavuko deeko' Doong Uaana'mung kapoo' tee tuumpiaavaing daa'aava'naang. 8Teka teie noru'uru' biikaang norunoru' ee'noko aa'puu' tee naning duuai', “Deto donkoniko ooraavai.” Ee'noko teketa daa'arara donkonuu'.
9Ee'noko Jiisuu'ke aa'puru' teing, “Ninge ee' tana'dampimang: Arekee' oro' aarumo taura'pari otong Doong Uaana'mung nko-koo, ai' naning tampa' nko-koo ai' oraka' nko-koo; ai' domaang moo'koo ai' dupisi'koo makosie?”
10Ee'noko teie oo'oovuru'nung teing ookara, ee'noko teka aa'puu', “Bireng tovoro'daravai.” Ee'noko tee' nkoaru', ee'noko bakaang bireng tamparu'kuu'. 11Ee'noko teing karinsi'orora bii'ka minkuarima kapoo' Jiisuu'koo oraka' nkoaavaing minkuaako'.
Jiisuu'ke Nanai'keta Kenaankara Miru'uru'na'
(Mat 10:1-4; Mak 3:13-19)
12Ee'noko teing doong-koo Jiisuu' osi sipura beu'nung iu'aape kunsiaraa'naang; muung ookutuna'mung Kumponing-koo kunsiarama otou' teke. 13Ee'noko tenang tane'puio' teie bokuvuru'nung bakaning barevare-nupoong ee'noko teing-koo nanai'keta kenaanka miru'uru', teing kara okovuri nkanuka tampuru'ning, miring aing aa'ning: 14-16Saimoni', nii'noo' Piita tampuu', ee'noko Aanduru', teie baara'ma'nung, ee'noko Jeemisi, ee'noko Jooni, ee'noko Pilipi', ee'noko Baatolomiu', ee'noko Maatiu', ee'noko Toomasi, ee'noko Jeemisi, Alopeasi bauring, ee'noko Saimoni', nii'noo' Sieloti' miring dama' ere'au'nung,#6:14-16 Sieloti'navitu-koong deemparako, teing bii'ka Ju'nupoong Rooma'keta keta'koo paaravariko'navitu-koong. ee'noko Judasi, Jeemisi bauring, ee'noko Judasi, Kerio'nara, tee ee'nara Ovoring baavevuu'nung.
Jiisuu'ke Mmau' Nantoong Taare-antavuru'na'
(Mat 4:24-25; Mak 3:7-12)
17Ee'noko tee siaru' doonko teing ninka, ee'noko donkonau' duumpanoo' deepo' nantoong karika' barevare-nupoong ninka. Ee'noko nantoong miatara porou'nung taaravaava'naang ee'noko biikaning siipa-ita taare-antavurii'naang. Teing osi aa'ning-eta porou': ookara Judia'navaro-eta, Jerusalema'keta ee'noko pirung due'nairu-eta (Taia'koonairu-eta ee'noko Saidoni'keta). 18Ee'noko teing napo' ma'nari orenge pore'antavaariko'ning unaavorou'. 19Ookara nantoonge Jiisuu' tanka'ke kompaava'naang kevi'ariko' ai' purinto' Jiisuu'keta pare'arama teie ookara taare-antavuriko'nung.
Biraankenavung Nau-antavuru'na' Jiisuu'ke
(Mat 5:1-12)
20Ee'noko Jiisuu'ke dutai keenavuri oovurira bakaning barevare-nupoong aa'puru'nung,
“Biraanke-nupoong dii' enang ata'erima baitorarimaing, ai' Kumponing bakaang muu' tee dii' okoruriaing.
21“Biraanke-nupoong dii' enang peerarorima baitorarimaing, ai' dii' teing pooruriaining.
“Biraanke-nupoong dii' enang birontarimatomaing, ai' dii' teing benkenirimatoaining.
22“Biraanke-nupoong napo' dii' tenang nantoonge munte'daariko, poka'daariko deu'daarima diikaang miring oraka' tantaarima ning Naning-naumpo' Paning-etaing siomerimaung-koo. 23Te'mung tee' tavo'arako doturoturariritaa' dinkitoo'dariaing doturoturarima, ee' noru'erima, ‘Niikaang moo' pankaing otong teke paning-koo,’ ai' tee tee' nari' biumaraange temu'nupoong Kumponing-etaing nakaro-nupoong nkoaariko'na'.
24“Teka dii' kavo mmau'nuka baka' piaaru'nuka, tora'kiriaing, ai' dunsirunsi-anta˜ tero nkaveru'nung.
25“Dii' enang pooruri otoining piaaru'nukai, dii' teing peeraroriaining.
“Dii' enang benkenirimatomaing piaaru'nukai, dii' teing orarunsi ninka birontariaining.
26“Dii' nantoonge tampa' nari' minkuraarimaatomaing piaaru'nukai, tora'kiriaining, ai' dii' teing urikupoong tositosinanka nakaro-nupoong-pina' oro'nanka. Diumaraange tee' nkoaariko'.”
Kare-nupoong Piaavarampiaina'
(Mat 5:38-48)
27“Teka ninge aa'dampimang dii' tampa' taaramerimaing: Diikaning kare-nupoong piaaverererimaatoaing, tampa' nkovererima teing dii' munte'daarimaing. 28Teing barakosi'daarimaing biraanke-antavererimaatoai. Teing oraka' nkoraarimaing kunsi-koo pakuererimaatoai. 29Baa naning dii' amo'koo tanko'duriaing napo' bari'nameng naueriai napo' tanko'durii'naang. Baa tee dii' mononopa' daunanaa' pari'duriaing tee-koo orokoveriauka' napo' boonanaa' pari'duriko. 30Ookara eentaraarimaatoaining averererimaatoai ee'noko teing baata diikaning kapoo'nanka pari'daariaining dii'ke napo' eentaverereriauka' teing. 31Ee'noko nantoonge dii' tampa' nkoraarii'naang piarorimana' tee' nari' nkovererimaatoaing teing dii'ke. 32Dii'ke teing nantoong piaaraarimaing naing piaaverererimaatoaing deeko' arekee' tee-koo Kumponinge tampa' ooruripeu'? Ai' aa' orenge piaavaarikoo' teing piaavaarimaing napo'. 33Ee'noko dii'ke tampa' nkovererima teing dii' tampa' nkoraarimaing arekee' tee-koo Kumponinge tampa' ooruripeu? Ai' aa' orenge tee' nari' nkoaakoo'. 34Ee'noko komaaru˜ nka-koo taura'perererima teing dii'ke maku'daariaining-pina' noru'ererimaing arekee' Kumponinge tampa' noru'duripeu', ai' aa' orenge tee' nari' nkoaakoo'.
35Teka dii'ke piaaverererimaatoaing dii'koo kare-nupoong tampa' nkovererima, ee'noko komaaru eentaraariko averererima tamung teka siperimaatoai maku'koo noru'eria'. Tee'koo diikaang moo' bakei pankaing ee'noko dii' teing tee Ovoring Deto Basi baurukaa' deentariaing, ai' teie tee tampa' nkovurimaung teing oreng, tampa' tang noru'aavaing. 36Piaae maanto'dariri otorimaatoaing Diuma paning-koong piaae maanto'ari otomana'.
Nantoong Birevire' Pote-koonaare
(Mat 7:1-5)
37Nantoong koong-anta-koo oioi'daria' otoai Kumponinge nari' koong-antaruriauka'na'. Kiimata-koo tamperereria' otoai Kumponinge kiimata-koo tanturiauka'na'. Tonta'antareeri otorimaatoai dii' tonta'antaruiaina'. 38Avuavu' nkoverimatoai arurimaatoaina'. Tampoo' basinoo' dankarankampuma meenki'ora piaampura aruriaina'. Tee' dii'ke avereriaina' tee' basina' napo' dii' aruriaing.”
39Ee'noko teie napo' kara dikito' nauvuru'nung, aa'puu'nung, “Kaputu'ke ee napo' kaputu' taung nau-antavupeu'? A, makotua'. Tenaanka ookaanka dua'arepeu' dinkung-koo. 40Ai' tee naning barevare-nung tee bakaang nau-anta-koo dau basi deea', teka ookara barevare-nupoong tenang dupeario' nau-antavaariko biikaning nau-antanuka-pina' otoroaing. 41Tee' oro' nau-anta baka tasi'paravaung aa'pampii'naang, ‘Aming-koo dake nanki' daara'ma'nung-koo duta-koo oovemaunge teka daka noru'darava' da'koo duta-koo konkinarong otoing?’ 42Nii'na', ‘Arekee' dake aa'pepeu' tee daara'ma'nung, “Ntara' ee, ninge nankang moo'dampai da'koo duta-koo otoing,” tenang daka oorarava' tee konking da'koo duta-koo otoing. Da' ampirinung˜, iro' tutung daka-koo moo'daravaing tee konking duta-koo ee'noko tenang daara'ma'nung-koo siraka'pei oovera moo'eai tee nanki' daara'ma'nung-koo duta-koo otoing.’
Koi'navari Ee'noko Bakaning Sinananka
(Mat 7:16-20; 12:33-35)
43“Ee'noko koi' tampara sinang orara bi'umaung otoa', ee'noko napo' koi' orara sinang tampara bi'umaung otoa'. 44Koi'navarina' biikaang sinang-koo tasi'paarimaung. Tee sinang piiki' too'murintaa'po'navari-koo kavaavarupeu', ee'noko karikau' napo' mo'ming nana'mosirii'koo kavaavarupeu'. 45Teie naning tamparai tee teieta tampara domang-koong kore'nang-eta tampara tavo'antavumaung ee'noko teie naning orarai tee teieta orara domang-koong kore'nang-eta orara tavo'antavumaung, teieta bakaang domang-koo otoining piamparako bakaang karange minkuvurimaung.”
Matauna' Ee'noko Kanu'na' Pava Kani-koo
(Mat 7:24-27)
46“Aming-koo ning dii'ke ‘Ovoring, Ovoring’ tammerimaunge kapoo' ninge naurampimaung nkoveria'? 47Ookara nantoong ning-koo poroma aung nkaang kara taaravaama siompaamaing naurampii'naang ninge, teing oro'parimana'. 48Teing tee-pina' naning-pina' oro'nanka pava kanivuu'nung-pina' dinkung isikung nenke'ura natuku boia'koo e'mang-antavuu'. Ee'noko tenang doua pora teva-ankoi koo'ura biru'ua' teva, aming-koo nna' tampa' kaninii'nava deemparako. 49Ee'noko baata teing nkaang kara tamung taaravaama siompaavarukoo' teing teing tee-pina' naning-pina' oro'nuka pava kanivuu'nung-pina' tamung piisi'koo dau e'mang-antavua', ee'noko doua teva-ankoi koo'ura namu'ke dua'antavuu' ee'noko bakei aa'na' masika' orariaru' teva.”
Iliyochaguliwa sasa
Luukeꞌ 6: nasNTpo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 1994, Wycliffe Bible Translators, Inc. All rights reserved.