MAKI 9
9
1Mbɛ Chisɔsi ɔ te to an ma, “N ni a ma din wo tena, mbɛ mɔɛ dɔ nu nɛ sɔ ɔ sanche, an mbe ma‑a wan fɔɛ ɔ aan an ni chɛ ɔ yen. An mbe a ɔ yen‑da wan Yataa 'a mansaya ɔ ni yian, gbasaya wandi a.”
Chisɔsi kamaya‑a, kɔnkɔɛ kun tɛ
(Matiu 17:1-13; Duku 9:28-36)
2Tee wɔdɔ gbakɔ, mbɛ Chisɔsi‑a Pita ya, ni Chimisi an fea Chɔn na. Mbɛ a sɛ‑a an na kɔnkɔ a yansama dɔndɔ ɔ, an dechee. Chisɔsi kamaya‑a nɔ wan an boo ɔ. 3Mbɛ a ma doma bun‑da man‑da, a gbɛenɛ ɛ fo fo. A gbɛen ni buɛ min dɔ, mɔ ɔ mɔ nii che a ma‑a koa ni gbɛ ka. 4Mbɛ Mosisi an fea Idaicha a,#9:4 Mosisi an fea Idaicha a, an ni Yataa 'a gbonka chɛ mɔɛ n fan na, san chɛmɛ sɛsɛ ko a, Chisɔsi e na to suun‑da. An na‑a ka banda bu ɔ wan ka, an mbe chia ɔ bɔɛ chɛ‑a, an bɛ Chisɔsi a. an bɔ‑a fɛ den sawa chɛ n ya a, an mbe chia ɔ bɔɛ chɛ‑a, an bɛ Chisɔsi a. 5Mbɛ Pita‑a a fɔ, a ɔ, “Kan mɔ, a nyan‑da wan mmɔ ɛ nɛ chɛ. Ka nn mbe ku sawa bun. Ku dɔndɔ i ko a, dɔndɔ kai Mosisi ko a, mbɛ dɔndɔɛ ma‑a kai Idaicha ko a.” 6Pita na‑a chɛ fɔ, koe min na mu, chiandia na‑a an gboo fa wan gban, a gbu nii ma a ɔ sɔn a ni fen fɔ.
7Mbɛ dingbii yii‑a an kun na, mbɛ Yataa koɔ‑a an dingbii chɛ ɔ. A ɔ, “N 'na denɛ an nɛ, a ko a di n ye kaka. Wo a da a kuiɛ a min.” 8Mbɛ a ya kɔɔɛ a, an‑na an ya a ben ben. An mbe e na mɔɛ min yen gbɛ dechee, mɔɔ Chisɔsi.
9Mbɛ an‑na a kuu sɔ kɔnkɔɛ yii‑a. An mbe yii tena kɔnkɔɛ chɛ an na, mbɛ Chisɔsi‑a dasi be an ma gbau gbau. A ɔ, an‑na koe min dɔ yen ka, a ɔ, an ma a ɔ yian mɔ dɔ mende kan kɔ kan na, a ɔ, aan a na tee ni che. A ɔ, tee chɛ, a wan Mɔ Gbu 'a Denɛ, ɛ a kɔɔ sɔ‑a tee min kɔɔ a ka saya ɔ.
10An‑na a ma wan yɔ Chisɔsi‑a an na si buɛ min dɔ. Chɛɛ an‑na bai chɛ tɛnsɛ wan an dechee tɛ ɔ, a si Chisɔsi kɔɔ sɔ koe ma a ka saya ɔ. A mu min na, a na‑a an na fii wan. 11Mbɛ an‑na Chisɔsi ɔ tisa, an dɔ, “Chɛɛ mmɔ 'a sawa kan mɔɛ chɛ n mbe a fɔ wan, mbɛ Idaicha ɛ na‑a pɛn, kunka mansa e na na. Fen‑na a ma gbɛ Idaicha ma na nin bɛ?”
12Mbɛ Chisɔsi ɔ, “Tea gbu mu, Idaicha an mu ya ɔ sɔɛ a. An mbe ko ɔ ko sɔ‑a a chia ma. Chɛɛ a nyɛnden fan mu gbɛ Yataa 'a gboo ɔ, mbɛ n fan, Mɔ Gbu 'a Denɛ, n mbe mɔnɛ sɛsɛ ɔ bia‑a wan, mbɛ an ban‑da n dɔ. Fen ko a mu chɛ ɛ ma? 13Chɛɛ n ni a ma din wo tena, mbɛ Idaicha gbu ban‑da na‑a. A sin, an ban‑da koe gbɛɛ sɛ‑a a ma, an toen ni an ni miin sɛ a ma. An na‑a a ma a a, yɔ Yataa 'a gboo na‑a a fɔ buɛ min dɔ.” #9:13 Chisɔsi ɛ bai sa tena ka, a si Chɔn fan ma, min ni yii chɛ mɔɛ n kunɛ ɔ, Yataa chia a (Matiu 11:13-14, 17:10-13). Mansa Ɛdɔdi Andipasi na‑a Chɔn chɛ an fa.
Chisɔsi‑a nyina yama gbain, kaienɛ fɛ
(Matiu 17:14-21; Duku 9:37-43a)
14Chisɔsi n yɛ‑a kɛn, a fɛ denɛ tɔɛ chɛ n tena, an‑na fanka fanka tan fan an 'na tindanɛ. A tima chɛ a, an ni wan bai tɛnsɛ tena an nyɔn tɛ ɔ, an bɛ Chu mɔɛ n 'na sawa kan mɔɛ dɔ n na. 15Mɔɛ chɛ n gbɛɛ, an‑na Chisɔsi yen kɛn dechee na‑a, an da ɔ gbaa‑a wan gbechee. Mbɛ an‑na bui sa a a a tena, an ta‑a a kɔndɔn. 16Mbɛ Chisɔsi ɔ a fɛ den chɛ n ma, a ɔ, “Wo e fen kɔɔsa bia ɔ, wo bɛ mɔɛ chɛ n na?”
17Mbɛ kamin dɔndɔ, fanka chɛ ɔ, a ɔ, “Ticha, n na‑a ka n 'na den kainɛ an na i tena, nyina yama ɛ min fɛ. A‑a a ma wan, den chɛ ee che koɔ‑a. 18Ni nyina yama chɛ na‑a a baima tima ɔ tima, ɛ a a bea wan, mbɛ a da a yii fɔnfɔnɛ bun‑da bɔ‑a. A sin to, ɛ a nyinɛ a daun daun fan, mbɛ a gbɛa‑a gbau. N‑na i fɛ denɛ n dɔ tisa wan, an ni nyina yama chɛ gbain a fɛ, chɛɛ an ma kun ni.”
19Mbɛ Chisɔsi ɔ, “A sin, wo e ka buɛ min dɔ, wo ee dan ko a. A ɔ yansan gbɛ mmɔ bɛ ɛ mmɔ nyɔn fɛ, fen mu wo ee dan n na? N ma a ɔ sɔn n mbe fen ma to wo ko a. Na i 'a denɛ a.” 20Mbɛ an na‑a denɛ gbu a a tena.
Nyina yama chɛ‑a Chisɔsi yen kɛn dechee, a ya kɔɔɛ a, a‑a denɛ gbu bondan duu ma, gbɔgbɔi chɛ‑a a ɔ. Mbɛ a bun‑da a ma chɛɛ chɛ‑a, a da a yii fɔnfɔnɛ ɛ ta‑a bɔ‑a. 21Mbɛ Chisɔsi ɔ den chɛ fa ma, a ɔ, “Gbandi chɛ‑a den chɛ bia sɔyɔ?”
Mbɛ a ɔ, “A den mɛsɛ tɔɛ a. 22A sin, tima sɛsɛ ko a, nyina yama chɛ ɛ a a bea wan ta a. Dɔ n na, ɛ a a dɛ yii wɛɛ ɔ, a fa koe a. Chɛ an fɛ mu, ni e kun fan i ni nn deman, chinchin nn ma, i ni basan nn ma.”
23Mbɛ Chisɔsi ɔ, “N ta bai ma chɛ a, ni n mbe kun fan. Mɔ ɔ mɔ i wɛn mbe i kai fa‑a n na, Yataa ɛ ko ɔ ko chɛ wan i ye.”
24Mbɛ a ya kɔɔɛ a, den chɛ fa chɛ ɔ, “Danaya ɛ wan n dɔ, chɛɛ a ma gbɛ, n ni che n kai fa‑a i a, basan n ma!”
25Chisɔsi‑a a ɔ yen kɛn mɔ fanka da ɛ koa‑a tun, mbɛ a‑a a fɔ wan nyina yama chɛ ma, a ɔ, “I wan nyina chɛ, i wɛn mbe mɔɛ too gbee, e mɔɛ ma to mumunɛ a, ka den chɛ fɛ fion. A sin, i ma bea to a fɛ kuɔ fɔ.”
26A ya kɔɔɛ a, nyina yama chɛ‑a yee tɛ gbankon, a‑a a ma, gbɔgbɔi‑a den chɛ bondan bin, mbɛ a ka‑a a fɛ. Kaienɛ gbu ma‑a yɔ su, min‑na a ma, mɔɛ sɛsɛ‑a a fɔ, an dɔ, a fa‑a. 27Chɛɛ Chisɔsi‑a a bia wan a boo ma, mbɛ a‑a a kɔɔ sɔ, a sɔ‑a sa.
28Chisɔsi don‑da kɛn chenɛ a, an dechee, mbɛ a fɛ denɛ n‑na a ɔ tisa. An‑na a fɔ wan, an dɔ, “Nn toen fan ni nn ni nyina chɛ gbain kaien chɛ fɛ, chɛɛ nn ma kun ni. Fen mu chɛ ma‑a nn na?”
29Mbɛ a ɔ an ma, “Samunɛ dechee, an mbe a ma, wo ni kun ko bonda chɛ ma‑a.”
Chisɔsi‑a bai sa to, a si a 'a saya ma
(Matiu 17:22-23; Duku 9:43b-45)
30Chɛ gbakɔ, mbɛ Chisɔsi n ka‑a an kaina chɛ, an ben‑da Kadidi chia a. Chisɔsi nii ma to ni mɔ ɔ mɔ ni a ɔ sɔn, an mbe kaina min, 31koe min na mu, a ni a fɛ denɛ n fan kan tena a tima chɛ a. A‑a a fɔ wan an ye, a ɔ, “N fan, Mɔ Gbu 'a Denɛ, an mbe na tena wan n ma tachɛ‑a, mɔɛ n ma. An mbe n fa‑a wan, chɛɛ tee fea ni a sawan bɔɛ gbakɔ, n mbe n kɔɔ sɔ‑a wan a ka saya ɔ.”
32Chɛɛ an nii ma a gbu ɔ gbɛ ni, a ni bai min fɔ tena. Chɛɛ an chianden fan ni dechee a ɔ tisa koe a.
Chisɔsi‑a mɔ chenama yian, a fɛ denɛ n tɛ
(Matiu 18:1-5; Duku 9:46-48)
33Mbɛ Chisɔsi n che‑a Kapanaun duu ɔ. An don‑da kɛn chenɛ a, a‑a a fɛ den chɛ n dɔ tisa, a ɔ, “Wo ni wan chia ɔ bɔɛ chɛ‑a, mmɔ ɛ kɛn na‑a chia a. A sien ni fen ma?”
34Chɛɛ an‑na a ɔ maun fan don. Koe min na mu, an na‑a chia ɔ bɔɛ chɛ wan, mɔ chenama wa koe ma an tɛ ɔ. 35Chisɔsi si‑a, mbɛ a‑a a fɛ den tan kun ma fea chɛ n chee. Mbɛ a ɔ, “Mɔɛ min toen mu yaɔsɔya a, mɔɔ ni a sɔ‑a pɛn gbaa chia a, a ni ma bɔi denɛ a, a bɔɛ n ko a.” 36Mbɛ Chisɔsi‑a den denɛ ya, a‑a a ma a sɔ‑a an ya kɔɔ. A‑a a si a nɔnkɔnɛ ɔ, mbɛ a‑a chɛ fɔ an ye, a ɔ, 37“Mɔ ɔ mɔ min mbe a boo si‑a den mɛsɛ bonda chɛ kɔɔ, a‑a a boo si ka n fan kɔɔ. A sin, mɔ ɔ mɔ min mbe a boo si‑a n kɔɔ, a‑a a boo si ka Yataa an kɔɔ, min‑na n sɔ.”
Chisɔsi‑a bai sa, a si mɔɛ ma, min mbe bea‑a a fɛ
(Duku 9:49-50)
38Mbɛ Chɔn‑na a fɔ Chisɔsi ye, a ɔ, “Kan mɔ, nn‑na kamin dɔndɔ yen fan, min mbe nyina yama n gbain tena mɔɛ n fɛ i 'a gbasaya ɔ. Nn‑na a a si wan nn dɔ a ni sɛmbɛ, koe min na mu, mmɔ bɛ ma a a.”
39Chɛɛ Chisɔsi ɔ, “Wo ma a a gban. Koe min na mu, ni mɔ ɔ mɔ ɛ kamaya koe ma tena wan n tɔɛ ɔ, a ee kun a ni mun a ɔ wuuma a, a ni bai yama sa n ma. 40Koe min na mu, ni mɔ ɔ mɔ min mbe ee mmɔ chɛɛ tena, mmɔ bɛ mu a a. 41Ka n mbe chɛ ma din wo tena. Mbɛ ni mɔ ɔ mɔ‑a yii be wo ma, n tɔɛ ɔ, a ɔ koe min na mu, n fan kunka mansa, n fɛ mɔɛ mu wo a, a gbu an mbe a tɔnɔnɛ ma sɔn‑da.”
Chisɔsi ɔ te, mɔ ma i bɔɛ sɔ ko yama ma‑a
(Matiu 18:6-9; Duku 17:1-2)
42Chisɔsi ɔ, “A sin, den mɛsɛ chɛ nu, miin‑na an kai fa ka n na, mɔ ɔ mɔ ma a ma, an ni ko yama ma. Ni mɔ ɔ mɔ‑a chɛ ma, ɛ nyan‑da wan an mɔɛ chɛ ko a, an ni sen fanka ma chii a kanɛ a, an ni a a dɛ yii wa ɔ. 43-44A sin, ni i boo‑a i a dɛ ko yama ɔ, a tɛ a a, i ni a a dɛ. Koe min na mu, tamban tɔɛ wɛɛ ɛ kuɔ fɔ fɔɛ ma sɔn‑da wan, ni a ma dɛ ni ko yama ɔ. Chɛɛ ni i dɛ‑a ko yama ɔ, i boo fea a kandenɛ ni ma wɛɛ, e ta ta an dɔ, min mbe ee dufɛn kuɔ fɔ ko a.#9:43-44 Bai chɛ n fan saen mu a kun ma Maki 'a gboo kɔma dɔ n dɔ. Bai chɛ n dɔ: Tɔnɛnɛ n bɛɛ, miin mbe nɔ mɔɛ daun koe a, an mbe ee fa kuɔ fɔ ko a. Ta wɛɛ min mbe nɔ, a ɛ ka wan. 45-46A sin to, ni i chenɛ wɛɛ‑a i a dɛ ko yama ɔ, a wɛɛ tɛ a a. Koe min na mu, tamban tɔɛ wɛɛ ɛ kuɔ fɔ fɔɛ ma sɔn‑da wan, ni a ma dɛ ni ko yama ɔ. Chɛɛ ni i dɛ‑a ko yama ɔ, i chen fea a kandenɛ ni ma wɛɛ, e ta ta an dɔ, min mbe ee dufɛn kuɔ fɔ ko a.#9:45-46 Bai chɛ n fan saen mu a kun ma Maki 'a gboo kɔma dɔ n dɔ. Bai chɛ n dɔ: Tɔnɛnɛ n bɛɛ, miin mbe nɔ mɔɛ daun koe a, an mbe ee fa kuɔ fɔ ko a. Ta wɛɛ min mbe nɔ, a ɛ ka wan. 47Ni i ya nan fan bɛɛ‑a i a dɛ ko yama ɔ, a bɔ, i ni a a dɛ. A nyin i ni kuɔ fɔ fɔɛ ma sɔn, i ya dɔndɔɛ wɛɛ a. Chɛɛ a yau, i ya a kandenɛ ni ma, mbɛ i ta‑a ta ɔ. 48Tɔnɛnɛ n bɛɛ, miin mbe nɔ mɔɛ daun koe a, an mbe ee fa kuɔ fɔ ko a. Ta wɛɛ min mbe nɔ, a ɛ ka wan.
49“A sin, mɔ ɔ mɔ ɛ dɔsimanɛ ɔ bia‑a wan, min kɔ gbɛ yɔ ta. 50Wo a ma kuiɛ ni ma wo wandi gbu ɔ, wo ni ma faachima ɔ wo nyɔn na. Kuiɛ nyin fan, ni a ɔ ma sɛ ni. Chɛɛ ni a ɔ sɛ‑a, mɔ ee che to, i ni a ma a dia ni yɛ a ɔ.”
Iliyochaguliwa sasa
MAKI 9: KONONT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kono © The Bible Society of Sierra Leone, 2006.
MAKI 9
9
1Mbɛ Chisɔsi ɔ te to an ma, “N ni a ma din wo tena, mbɛ mɔɛ dɔ nu nɛ sɔ ɔ sanche, an mbe ma‑a wan fɔɛ ɔ aan an ni chɛ ɔ yen. An mbe a ɔ yen‑da wan Yataa 'a mansaya ɔ ni yian, gbasaya wandi a.”
Chisɔsi kamaya‑a, kɔnkɔɛ kun tɛ
(Matiu 17:1-13; Duku 9:28-36)
2Tee wɔdɔ gbakɔ, mbɛ Chisɔsi‑a Pita ya, ni Chimisi an fea Chɔn na. Mbɛ a sɛ‑a an na kɔnkɔ a yansama dɔndɔ ɔ, an dechee. Chisɔsi kamaya‑a nɔ wan an boo ɔ. 3Mbɛ a ma doma bun‑da man‑da, a gbɛenɛ ɛ fo fo. A gbɛen ni buɛ min dɔ, mɔ ɔ mɔ nii che a ma‑a koa ni gbɛ ka. 4Mbɛ Mosisi an fea Idaicha a,#9:4 Mosisi an fea Idaicha a, an ni Yataa 'a gbonka chɛ mɔɛ n fan na, san chɛmɛ sɛsɛ ko a, Chisɔsi e na to suun‑da. An na‑a ka banda bu ɔ wan ka, an mbe chia ɔ bɔɛ chɛ‑a, an bɛ Chisɔsi a. an bɔ‑a fɛ den sawa chɛ n ya a, an mbe chia ɔ bɔɛ chɛ‑a, an bɛ Chisɔsi a. 5Mbɛ Pita‑a a fɔ, a ɔ, “Kan mɔ, a nyan‑da wan mmɔ ɛ nɛ chɛ. Ka nn mbe ku sawa bun. Ku dɔndɔ i ko a, dɔndɔ kai Mosisi ko a, mbɛ dɔndɔɛ ma‑a kai Idaicha ko a.” 6Pita na‑a chɛ fɔ, koe min na mu, chiandia na‑a an gboo fa wan gban, a gbu nii ma a ɔ sɔn a ni fen fɔ.
7Mbɛ dingbii yii‑a an kun na, mbɛ Yataa koɔ‑a an dingbii chɛ ɔ. A ɔ, “N 'na denɛ an nɛ, a ko a di n ye kaka. Wo a da a kuiɛ a min.” 8Mbɛ a ya kɔɔɛ a, an‑na an ya a ben ben. An mbe e na mɔɛ min yen gbɛ dechee, mɔɔ Chisɔsi.
9Mbɛ an‑na a kuu sɔ kɔnkɔɛ yii‑a. An mbe yii tena kɔnkɔɛ chɛ an na, mbɛ Chisɔsi‑a dasi be an ma gbau gbau. A ɔ, an‑na koe min dɔ yen ka, a ɔ, an ma a ɔ yian mɔ dɔ mende kan kɔ kan na, a ɔ, aan a na tee ni che. A ɔ, tee chɛ, a wan Mɔ Gbu 'a Denɛ, ɛ a kɔɔ sɔ‑a tee min kɔɔ a ka saya ɔ.
10An‑na a ma wan yɔ Chisɔsi‑a an na si buɛ min dɔ. Chɛɛ an‑na bai chɛ tɛnsɛ wan an dechee tɛ ɔ, a si Chisɔsi kɔɔ sɔ koe ma a ka saya ɔ. A mu min na, a na‑a an na fii wan. 11Mbɛ an‑na Chisɔsi ɔ tisa, an dɔ, “Chɛɛ mmɔ 'a sawa kan mɔɛ chɛ n mbe a fɔ wan, mbɛ Idaicha ɛ na‑a pɛn, kunka mansa e na na. Fen‑na a ma gbɛ Idaicha ma na nin bɛ?”
12Mbɛ Chisɔsi ɔ, “Tea gbu mu, Idaicha an mu ya ɔ sɔɛ a. An mbe ko ɔ ko sɔ‑a a chia ma. Chɛɛ a nyɛnden fan mu gbɛ Yataa 'a gboo ɔ, mbɛ n fan, Mɔ Gbu 'a Denɛ, n mbe mɔnɛ sɛsɛ ɔ bia‑a wan, mbɛ an ban‑da n dɔ. Fen ko a mu chɛ ɛ ma? 13Chɛɛ n ni a ma din wo tena, mbɛ Idaicha gbu ban‑da na‑a. A sin, an ban‑da koe gbɛɛ sɛ‑a a ma, an toen ni an ni miin sɛ a ma. An na‑a a ma a a, yɔ Yataa 'a gboo na‑a a fɔ buɛ min dɔ.” #9:13 Chisɔsi ɛ bai sa tena ka, a si Chɔn fan ma, min ni yii chɛ mɔɛ n kunɛ ɔ, Yataa chia a (Matiu 11:13-14, 17:10-13). Mansa Ɛdɔdi Andipasi na‑a Chɔn chɛ an fa.
Chisɔsi‑a nyina yama gbain, kaienɛ fɛ
(Matiu 17:14-21; Duku 9:37-43a)
14Chisɔsi n yɛ‑a kɛn, a fɛ denɛ tɔɛ chɛ n tena, an‑na fanka fanka tan fan an 'na tindanɛ. A tima chɛ a, an ni wan bai tɛnsɛ tena an nyɔn tɛ ɔ, an bɛ Chu mɔɛ n 'na sawa kan mɔɛ dɔ n na. 15Mɔɛ chɛ n gbɛɛ, an‑na Chisɔsi yen kɛn dechee na‑a, an da ɔ gbaa‑a wan gbechee. Mbɛ an‑na bui sa a a a tena, an ta‑a a kɔndɔn. 16Mbɛ Chisɔsi ɔ a fɛ den chɛ n ma, a ɔ, “Wo e fen kɔɔsa bia ɔ, wo bɛ mɔɛ chɛ n na?”
17Mbɛ kamin dɔndɔ, fanka chɛ ɔ, a ɔ, “Ticha, n na‑a ka n 'na den kainɛ an na i tena, nyina yama ɛ min fɛ. A‑a a ma wan, den chɛ ee che koɔ‑a. 18Ni nyina yama chɛ na‑a a baima tima ɔ tima, ɛ a a bea wan, mbɛ a da a yii fɔnfɔnɛ bun‑da bɔ‑a. A sin to, ɛ a nyinɛ a daun daun fan, mbɛ a gbɛa‑a gbau. N‑na i fɛ denɛ n dɔ tisa wan, an ni nyina yama chɛ gbain a fɛ, chɛɛ an ma kun ni.”
19Mbɛ Chisɔsi ɔ, “A sin, wo e ka buɛ min dɔ, wo ee dan ko a. A ɔ yansan gbɛ mmɔ bɛ ɛ mmɔ nyɔn fɛ, fen mu wo ee dan n na? N ma a ɔ sɔn n mbe fen ma to wo ko a. Na i 'a denɛ a.” 20Mbɛ an na‑a denɛ gbu a a tena.
Nyina yama chɛ‑a Chisɔsi yen kɛn dechee, a ya kɔɔɛ a, a‑a denɛ gbu bondan duu ma, gbɔgbɔi chɛ‑a a ɔ. Mbɛ a bun‑da a ma chɛɛ chɛ‑a, a da a yii fɔnfɔnɛ ɛ ta‑a bɔ‑a. 21Mbɛ Chisɔsi ɔ den chɛ fa ma, a ɔ, “Gbandi chɛ‑a den chɛ bia sɔyɔ?”
Mbɛ a ɔ, “A den mɛsɛ tɔɛ a. 22A sin, tima sɛsɛ ko a, nyina yama chɛ ɛ a a bea wan ta a. Dɔ n na, ɛ a a dɛ yii wɛɛ ɔ, a fa koe a. Chɛ an fɛ mu, ni e kun fan i ni nn deman, chinchin nn ma, i ni basan nn ma.”
23Mbɛ Chisɔsi ɔ, “N ta bai ma chɛ a, ni n mbe kun fan. Mɔ ɔ mɔ i wɛn mbe i kai fa‑a n na, Yataa ɛ ko ɔ ko chɛ wan i ye.”
24Mbɛ a ya kɔɔɛ a, den chɛ fa chɛ ɔ, “Danaya ɛ wan n dɔ, chɛɛ a ma gbɛ, n ni che n kai fa‑a i a, basan n ma!”
25Chisɔsi‑a a ɔ yen kɛn mɔ fanka da ɛ koa‑a tun, mbɛ a‑a a fɔ wan nyina yama chɛ ma, a ɔ, “I wan nyina chɛ, i wɛn mbe mɔɛ too gbee, e mɔɛ ma to mumunɛ a, ka den chɛ fɛ fion. A sin, i ma bea to a fɛ kuɔ fɔ.”
26A ya kɔɔɛ a, nyina yama chɛ‑a yee tɛ gbankon, a‑a a ma, gbɔgbɔi‑a den chɛ bondan bin, mbɛ a ka‑a a fɛ. Kaienɛ gbu ma‑a yɔ su, min‑na a ma, mɔɛ sɛsɛ‑a a fɔ, an dɔ, a fa‑a. 27Chɛɛ Chisɔsi‑a a bia wan a boo ma, mbɛ a‑a a kɔɔ sɔ, a sɔ‑a sa.
28Chisɔsi don‑da kɛn chenɛ a, an dechee, mbɛ a fɛ denɛ n‑na a ɔ tisa. An‑na a fɔ wan, an dɔ, “Nn toen fan ni nn ni nyina chɛ gbain kaien chɛ fɛ, chɛɛ nn ma kun ni. Fen mu chɛ ma‑a nn na?”
29Mbɛ a ɔ an ma, “Samunɛ dechee, an mbe a ma, wo ni kun ko bonda chɛ ma‑a.”
Chisɔsi‑a bai sa to, a si a 'a saya ma
(Matiu 17:22-23; Duku 9:43b-45)
30Chɛ gbakɔ, mbɛ Chisɔsi n ka‑a an kaina chɛ, an ben‑da Kadidi chia a. Chisɔsi nii ma to ni mɔ ɔ mɔ ni a ɔ sɔn, an mbe kaina min, 31koe min na mu, a ni a fɛ denɛ n fan kan tena a tima chɛ a. A‑a a fɔ wan an ye, a ɔ, “N fan, Mɔ Gbu 'a Denɛ, an mbe na tena wan n ma tachɛ‑a, mɔɛ n ma. An mbe n fa‑a wan, chɛɛ tee fea ni a sawan bɔɛ gbakɔ, n mbe n kɔɔ sɔ‑a wan a ka saya ɔ.”
32Chɛɛ an nii ma a gbu ɔ gbɛ ni, a ni bai min fɔ tena. Chɛɛ an chianden fan ni dechee a ɔ tisa koe a.
Chisɔsi‑a mɔ chenama yian, a fɛ denɛ n tɛ
(Matiu 18:1-5; Duku 9:46-48)
33Mbɛ Chisɔsi n che‑a Kapanaun duu ɔ. An don‑da kɛn chenɛ a, a‑a a fɛ den chɛ n dɔ tisa, a ɔ, “Wo ni wan chia ɔ bɔɛ chɛ‑a, mmɔ ɛ kɛn na‑a chia a. A sien ni fen ma?”
34Chɛɛ an‑na a ɔ maun fan don. Koe min na mu, an na‑a chia ɔ bɔɛ chɛ wan, mɔ chenama wa koe ma an tɛ ɔ. 35Chisɔsi si‑a, mbɛ a‑a a fɛ den tan kun ma fea chɛ n chee. Mbɛ a ɔ, “Mɔɛ min toen mu yaɔsɔya a, mɔɔ ni a sɔ‑a pɛn gbaa chia a, a ni ma bɔi denɛ a, a bɔɛ n ko a.” 36Mbɛ Chisɔsi‑a den denɛ ya, a‑a a ma a sɔ‑a an ya kɔɔ. A‑a a si a nɔnkɔnɛ ɔ, mbɛ a‑a chɛ fɔ an ye, a ɔ, 37“Mɔ ɔ mɔ min mbe a boo si‑a den mɛsɛ bonda chɛ kɔɔ, a‑a a boo si ka n fan kɔɔ. A sin, mɔ ɔ mɔ min mbe a boo si‑a n kɔɔ, a‑a a boo si ka Yataa an kɔɔ, min‑na n sɔ.”
Chisɔsi‑a bai sa, a si mɔɛ ma, min mbe bea‑a a fɛ
(Duku 9:49-50)
38Mbɛ Chɔn‑na a fɔ Chisɔsi ye, a ɔ, “Kan mɔ, nn‑na kamin dɔndɔ yen fan, min mbe nyina yama n gbain tena mɔɛ n fɛ i 'a gbasaya ɔ. Nn‑na a a si wan nn dɔ a ni sɛmbɛ, koe min na mu, mmɔ bɛ ma a a.”
39Chɛɛ Chisɔsi ɔ, “Wo ma a a gban. Koe min na mu, ni mɔ ɔ mɔ ɛ kamaya koe ma tena wan n tɔɛ ɔ, a ee kun a ni mun a ɔ wuuma a, a ni bai yama sa n ma. 40Koe min na mu, ni mɔ ɔ mɔ min mbe ee mmɔ chɛɛ tena, mmɔ bɛ mu a a. 41Ka n mbe chɛ ma din wo tena. Mbɛ ni mɔ ɔ mɔ‑a yii be wo ma, n tɔɛ ɔ, a ɔ koe min na mu, n fan kunka mansa, n fɛ mɔɛ mu wo a, a gbu an mbe a tɔnɔnɛ ma sɔn‑da.”
Chisɔsi ɔ te, mɔ ma i bɔɛ sɔ ko yama ma‑a
(Matiu 18:6-9; Duku 17:1-2)
42Chisɔsi ɔ, “A sin, den mɛsɛ chɛ nu, miin‑na an kai fa ka n na, mɔ ɔ mɔ ma a ma, an ni ko yama ma. Ni mɔ ɔ mɔ‑a chɛ ma, ɛ nyan‑da wan an mɔɛ chɛ ko a, an ni sen fanka ma chii a kanɛ a, an ni a a dɛ yii wa ɔ. 43-44A sin, ni i boo‑a i a dɛ ko yama ɔ, a tɛ a a, i ni a a dɛ. Koe min na mu, tamban tɔɛ wɛɛ ɛ kuɔ fɔ fɔɛ ma sɔn‑da wan, ni a ma dɛ ni ko yama ɔ. Chɛɛ ni i dɛ‑a ko yama ɔ, i boo fea a kandenɛ ni ma wɛɛ, e ta ta an dɔ, min mbe ee dufɛn kuɔ fɔ ko a.#9:43-44 Bai chɛ n fan saen mu a kun ma Maki 'a gboo kɔma dɔ n dɔ. Bai chɛ n dɔ: Tɔnɛnɛ n bɛɛ, miin mbe nɔ mɔɛ daun koe a, an mbe ee fa kuɔ fɔ ko a. Ta wɛɛ min mbe nɔ, a ɛ ka wan. 45-46A sin to, ni i chenɛ wɛɛ‑a i a dɛ ko yama ɔ, a wɛɛ tɛ a a. Koe min na mu, tamban tɔɛ wɛɛ ɛ kuɔ fɔ fɔɛ ma sɔn‑da wan, ni a ma dɛ ni ko yama ɔ. Chɛɛ ni i dɛ‑a ko yama ɔ, i chen fea a kandenɛ ni ma wɛɛ, e ta ta an dɔ, min mbe ee dufɛn kuɔ fɔ ko a.#9:45-46 Bai chɛ n fan saen mu a kun ma Maki 'a gboo kɔma dɔ n dɔ. Bai chɛ n dɔ: Tɔnɛnɛ n bɛɛ, miin mbe nɔ mɔɛ daun koe a, an mbe ee fa kuɔ fɔ ko a. Ta wɛɛ min mbe nɔ, a ɛ ka wan. 47Ni i ya nan fan bɛɛ‑a i a dɛ ko yama ɔ, a bɔ, i ni a a dɛ. A nyin i ni kuɔ fɔ fɔɛ ma sɔn, i ya dɔndɔɛ wɛɛ a. Chɛɛ a yau, i ya a kandenɛ ni ma, mbɛ i ta‑a ta ɔ. 48Tɔnɛnɛ n bɛɛ, miin mbe nɔ mɔɛ daun koe a, an mbe ee fa kuɔ fɔ ko a. Ta wɛɛ min mbe nɔ, a ɛ ka wan.
49“A sin, mɔ ɔ mɔ ɛ dɔsimanɛ ɔ bia‑a wan, min kɔ gbɛ yɔ ta. 50Wo a ma kuiɛ ni ma wo wandi gbu ɔ, wo ni ma faachima ɔ wo nyɔn na. Kuiɛ nyin fan, ni a ɔ ma sɛ ni. Chɛɛ ni a ɔ sɛ‑a, mɔ ee che to, i ni a ma a dia ni yɛ a ɔ.”
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kono © The Bible Society of Sierra Leone, 2006.