Jan 15
15
Li ñiali leni i beni
1Mini n tie duven tibu ñiamoanli. N Baa n tie bu kubido. 2Yaa benu n tuugi leni nni ki naa luoni kuli, o pedi u. Yaa benu n luoni mo kuli, o kpendi ki ŋanbidi u, wun yaa luoni ki pugidi. 3Moala yi tuodi ki ŋanbi, kelima min maadi yi yaa maama ŋanbi yi no. 4Yin yaa ye n niinni, nmo baa yaa ye yi niinni. Nani u benu n kan fidi ki luoni u yuceli po, kali wun yaa tuugi leni li ñiali yeni, li tie yene leni yimoko. Yi kan fidi ki luoni, yi yàá tuugi leni nni. 5Mini n tie bu duventibu ñiali, yinba mo n tie bu beni. Yua n ye n niinni, ke nmo ye o niinni, o baa luoni li bonluonkaala boncianla. N yàá ye leni yi, yi kan fidi ki tieni puu. 6Yua n kaa tuugi leni nni ki ye n niinni kuli, bi baa lu o niinpo nani ban luni u benu maama, ke u kuodi. Bi taagi yaa beni n kuodi ki lu u mu nni, ke i buodi. 7Yi yaa tuugi leni nni ki ye n niinni, ke n maama mo ye yi niinni, mia mani yin bua yaala kuli, yi baa baa la. 8Yi yaa luoni li bonluonkaala boncianla, n Baa baa yaa baadi ti kpiagidi li po. Yeni, yi baa doagidi ke yi tie n ŋoadikaaba moko.
9Nani Baa n bua nni maama, nmo bua yi yene. Yin yaa ye mani n buama nni. 10Yi yaa kubi n bali maama, yi baa ye n buama nni, nani nmo n kubi n Baa yaa bali maama ki ye o buama nni maama. 11N maadi yi laa maama, ke yin yaa pia n yaa pamanli, ke yi pamanli n pugini ki dagidi.
12N bali maama tie line: Yin bua mani yiyaba nani min bua yi maama. #Jan 13.34; 15.17; 1Jan 3.23; 2Jan 5. 13Oba kuli ki pia yaa buama n cie mine, o nilo n pa o miali o danlinba po. 14Yi yaa tuo ki tiendi min bili yi po yaala, yi tie n danlinba. 15Mii go yi yi bi naacenba ka, kelima o naacemo naa bani o canbaa n tiendi yaala. Ama n yi yi n danlinba, kelima n waani yi min gbadi yaala n Baa kani kuli. 16Laa tie ke yinba ka den gandi nni. Ama mini n den gandi yi, ki go gagidi yi, ke yin gedi ki yaa luoni li bonluonkaala, ke yi bonluonkaala mo n yaa ye. Lanwani, Baa baa pa yi yin mia o yaala kuli, kelima n yeli po. 17Min bili yaa bali maama tie line: Yin yaa bua mani yiyaba.
Ŋanduna yaaba nani Jesu leni o ŋoadikaaba
18Ŋanduna yaaba yaa nani yi, yin tiadi ke bi den kpa nani mini hali ke bi daa nani yinba. 19Ŋanduna bi baa bua yi, yi yaa bi tie o yaaba. Ama, nani yin ki tie ŋanduna yaaba, ke n nan gandi yi, ki paadi leni ŋanduna yeni, n teni ke ŋanduna yaaba nani yi. 20Yin tiadi mani min den maadi yi yaa maama, naacemoba kuli ki cie o canbaa. Bi yaa waani mini o falaciamo, bi baa waani yinba moko o falaciamo. Bi yaa kubi n maama, bi baa kubi yimoko yaa maama. #Mat 10.24; Luk 6.40; Jan 13.16. 21Bi baa yaa tiendi yi lani kuli n yeli nni, kelima baa bani yua n soani nni. 22N yàá bi den cua ki maadi leni ba, bi kan bi yaa pia tuonbiadi. Ama moala, bi kan baa ki nia ke baa pia tuonbiadi. 23Yua n nani nni, nani n Baa moko. 24N yàá den soani bi siiga nitoa kuli n daa soani yaa tuona, bi kan bi yaa pia tuonbiadi. Moala, bi laa laa tuona ki nani mini leni n Baa kuli. 25Li tieni yeni ke yaa maama n diani bi bali maama nni na, n tieni ki dudi: ‹Bi den nani nni fanma fanma.› #Ps 35.19; 69.4. 26O Todika yaa cua, min baa soani yi po yua, wani i moamoani Fuoma, yua n ñani Baa kani yeni, wani n baa yaa tiendi n po siedi. 27Yinba moko baa yaa tiendi n po siedi, kelima yi den ye leni nni hali mi cilima.
Iliyochaguliwa sasa
Jan 15: BGP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Gulmancema Protestant Bible © Bible Society of Burkina Faso, 2013.