ማ̈ቶ̈ሳ 16
16
ኣሳን ዬሱ̈ሲ ኢንታ̇ ኣፋፖ̇ ማላ̇ ቤይሳምፔ̈ን ኦይጪ̇ዴ
ማ̈ርቆ̈ሳ 8፡11-13፤ ሉቃ̈ሳ 12፡54-56
1ፋራሳ̈ዋንኬ ሳዱቃን ዬሱ̈ሳክ ዬ̈ሪ ኢያ ፋታ̇ናንዳብ ኮያሪ ኢ̈ኮ “ኣፋፖ̇ ኑ̈ና ማላ̇ ቤይሳቤ” ጋ̈ሪ ኦይጪ̇ዴ። 2ኢያር ኢንታ̇ኮ፥ [“ኦማ ኣፋ ሳ̈ዚን ዞ̈ቄጌዪን ዪንቲ̇ ቤቃሪ ‘ሳ̈ዚ ኣዊ̈ቲሬ’] ጌዪሬ። 3ማ ሳ̈ዚ ዎንቲ̇ን ጌ̈ሽ ኣፋ ሳ̈ዚን ሻ̈ሪታ ካርቴ̇ጌይንዶ̇ ‘ዓታ̇̈ብ ኢሪ ኬዲ̇̈ሬ’ ጌይሬ። ዪንቲ̇ ኣፎ ሳ̈ዚን ጋልዳ ዎ ማሊ̇ን ቤቃ̇ሪ ‘ዓታ̇ብ ኢሪ ኬዲ̇̈ሬ’ ዎይ ‘ዓታ̇ብ ኣዉቲ̇̈ሬ’ ጌዪ ሶ̈ላንዳ̇ብ ዳንዳኢ̈ርዶሪ፥ ዓና̇ ላይን ጋርታ̇ ማ̈ቂ̇ሙታ̇ ዎ ማላ̇ን ቤቂ̇ሙታ̇ ኢንቲ̇ ኣብዝ ቤይሲ̈ርኮ ዪንቲ̇ ኤሪባ̈ሴ። 4ዓታ̇ባሮ ኣማ̇ኒንቲ̇ባ̈ሶ ዉጫ ኣሳን ማላ̇ ቤቃ̇ንዳ̇ብ ኮዪ̈ሬ። ዎቲናካሬ ናባ ዮ̈ና̈ሳ ጋልዳ ዬሊ̇ኖን ማይጻዝ ማሊ̇ምፖ̇ ኣቲ̇ን ሜላ ማላ̇ ኢሚ̇ንቲባ̈ሴ” ጌይዴ። ዪኒ̇ፖ ዎሃ ዬሱ̈ሲ ኢንታ̇ ኣሻ̇ር ሜላ ቤስ̇ ሉኪ̇ዴ።
ፋራሳ̈ዋንኬ ሳዱቃን ታማ̈ርሳዝ ቲሚርቲ̇ን ጋልዳ̇ፖ ዪንቲ̇ ዪንታ̇ ና̈ጊብቴ̇
ማ̈ርቆ̈ሳ 8፡14-21
5ዬሱ̈ሳ ታማ̈ራን ጌዳ ባሃ̈ሪን ፊ̈ጚ̈ርዶሪ ሶ̈ላ̇ ኤ̈ካይ ቦቲጚዴ። 6ኢያር ኢንታ̇ኮ “ቆፒ̇ብቴ፥ ዪንቲ̇ ፋራሳ̈ዋንኬ ሳዱቃን ሹ̈ሚን ጋልዳ̇ፖ ና̈ጊንቲ̇ብቴ̇” ጌይዴ። 7ኢንታ̇ሬ “ኢ ዪኖ̇ ጌይኖንዳ̇ ኑ̈ኒ ሶ̈ላ̇ ኤ̈ካ̇ዮንኮታ̇ቦ ማይጻ̈ሬ” ጋ̈ሪ ዎልዎልኣ ሶ̈ሊንቲ̇ዴ።
8ዬሱ̈ሲ ኢንታ̇ ቆፊን ኤራሪ ኢንታ̇ኮ “ዪንቲ̇ ኣማ̇ና ዪንታ̇ብ ጉ̈ጺ̇ኖ ኣሳን! ‘ኢ ዪኖ̇ ጌይኖንዳ̇ ኑ̈ኒ ሶ̈ላ̇ ኤ̈ካ̇ዮንኮታ̇ቦ’ ጋ̈ሪ ኣባብ ዎልዎልኣ ሶ̈ሊንቲ̇̈ራ? 9ዓኖ̇ ዬላ̇ራ ዪንታ̇ብ ጌላካ̇ያ? ኢሺ̇ን ሶ̈ሊ̇ን ኢሺ̇ን ሙኩላ ኣሳብ ጊዳራ ሺኖ ዶካ̇ ኣ̈ፊን ሌ̈ማታ ኩም ሺ̈ሺ̇ ዲንኖኮ ዪንቲ̇ ቦቲጚቴ? 10ዪና̇ ኢዝፌ̈ኒ ታብዛ ሶ̈ሊ̇ን ኦይዲ̇ ሙኩላ ኣሳብ ጊዳራ ሺኖ ዶካ̇ ኣፊን ሌ̈ማታ ኩም ሺ̈ሺ̇ ዲንኖኮ ዪንቲ̇ ቦቲጚቴ? 11ዪዚ ፋራሳ̈ዋንኬ ሳዱቃን ሹ̈ሚን ጋልዳ̇ፖ ና̈ጊንቲ̇ብቴ! ጋ̈ራ ዪንታ̇ብ ሶ̈ሊኖን ሶ̈ላ̇ኮታ̇ቦ ጊዳካ̇ዮን ዎዛርታ̇ር ዪንታ̇ብ ጌላካ̇ይ ኣታ̇?” ጌይዴ። 12ኢ ታማራንሬ ዬሱ̈ሲ ኢንታ̇ክ ናጊንቲ̈ብቴ ጌይኖንዳ ፋራሳ̈ዋንኬ ሳዱቃን ታማ̈ርሳዝ ቲሚርቲ̈ን ጋልዳፖዶኬ ሙኒቃ̇ብ ማ̈ቂ̇ዝ ሹሚ ጎይ ጊዳካዮን ዪና̇ ኢዝባራ ኤሪዴ።
ዬሱ̈ሲ ኦ̈ናኮ ጴ̈ጥሮ̈ሲ ኢ ባዝ ማርኪ̇ቲዴ
ማ̈ርቆ̈ሳ 8፡27-30፤ ሉቃ̈ሳ 9፡18-21
13ዬሱ̈ሲ ፊልጶ̈ስ ቂሳ̈ራ ጌይዝ ቤስ̇ ጋርታ̇ ዬላ̇ር ፌ ታማ̈ራንኮ “ኣሳን ታ̈ና ኣሳ ናኣ̈ዳ ኦ̈ና ጌይራ?” ጋ̈ሪ ኦይጪ̇ዴ።
14ኢንታ̇ር ኢ̈ኮ “ፔታ̇ን ፔታ̇ናን ኔ̈ና ‘ጻማ̇ቂዛ ዋ̈ኒ̇ሳ’ ጌይሬ ሜላን ‘ኤ̈ላ̈ሳ’ ጌይሬ ማ ሜላን ‘ኤርማ̈ሳ ዎይ ናባን ጋርታ̇ፖ̇ ፔታ̇ና̈ዳ’ ጌይሬ” ጌይዴ።
15ዬሱ̈ሲ ኢንታ̇ኮ “ዓት ዪንቲ̇ሽ ታ̈ና ኦ̈ና ጌይራ?” ጌይዴ።
16ዪና̇ ኢዝባራ ሲሞ̈ን ጴ̈ጥሮ̈ሲ ኢ̈ኮ “ኔ̈ኒ ሜናብ ዶኢዝ ጾ̈ሳ̇̇ ናኣ ክርስቶ̈ሳ” ጋ̈ር ማሂዴ። 17ዬሱ̈ሳር ኢ̈ኮ “ዮ̈ና ናኣ ሲሞ̈ኖ! ዓኖ̇ ኔ̈ና ቤይሲኖ̈ዲ ኣፋ ዎ ቴ ባ̈ባ̈ዲዶኬ ኣስ ጊዳካዬ። ዪ̈ኮታ̇ቦ ኔ̈ኒ ኣንጂንቲ̇ኖ̈ዳ። 18ታ̈ና̈ሬ ኔ̈ክ ጋ̈ሬ ኔ̈ኒ ጴ̈ጥሮ̈ሳ ዛ̈ላ̇̈ዳ፥#16፡18 ጴ̈ጥሮ̈ሳ ጌንቲ̇ ዛ̈ላ̇ ጌንቴ̇ ታ̈ኒ ዓና ዛ̈ሊ̇ን ጋልዳ ቴ ዎ̈ሳ ኬ̈ን ኬ̈ጻ̇ንዳ፤ ዪኖ̇ ዎ̈ሳ ኬ̈ን ዓይቃ̇ ዎልቃር ማ̈ቂ̇ን ኢዞ ጋማንዳብ ዳንዳኢባ̈ሴ። 19ታ̈ኒ ጾ̈ሳ̇̇ ካቲ̈ቲን ፊርቂዝ ቁልፋን ኔ̈ብ ኢማ̇ንዳ፤ ኔ ሳ̈ዳ̇ ቃቺ̇ኖ ባዚ ዎይ ኣፋ ቃቺንቲ̈ሬ፤ ኔ ሳ̈ዳ ቢሊ̇ኖ ባዚ ዎይ ኣፋ ቢሊንቲ̈ሬ” ጌይዴ። 20ዪኒ̇ፖ ዓኒ ፌ ታማራንኮ “ታ̈ኒ ክርስቶ̈ሳ ማ̈ቂ̇ኖን ኦ̈ባካር ሶ̈ላፒ̇ቴ” ጋ̈ር ኢንታ̇ ኪ̈ቲ̇ዴ።
ዬሱ̈ሲ ፌ̈ና ዬላ̇ዝ ሜቲንዲኬ ፌ ዓይቂን ቲ̈ኒታር ሶ̈ሊዴ
ማ̈ርቆ̈ሳ 8፡31-33፤ ሉቃ̈ሳ 9፡22-27
21ዪኒ̇ፖ ኤ̈̇ሪ ዬሱ̈ሲ ፌ ታማ̈ራንኮ፥ ኢ ዬሩሳ̈ላም ሉካ̇ንዳብ ኮሻ̇ዚንዶ̇፥ ኢና ጋዳ ጪጛሻን፣ ቄ̈ሳ ኣላቃንኬ ሙ̈ሳ ሂጋ̇ ታማ̈ርሲዛን ኢ ጋልዳ̇ ሜታ ዬልዚንዶ̇፥ ኢያ ዎዚንዶ̇ ማ̈ቂ̇ናካሬ ዓይዚ̇ ቃምባራ ኢ ዓይቃ ጋርታ̇ፖ̇ ዲንዳዚንዶ̇ ሶ̈ሊ ኤ̈̇ዴ።
22ጴ̈ጥሮ̈ሲ፥ ዬሱ̈ሳ ጌዳ ዱማ ኢያ ኤ̈ጛሪ ኢ̈ኮ “ጎዳ̈ዶ! ዪ̈ፌ̈ኖ ባዝ ጋ̈ፔ̇፥ ዪ̈ፌ̈ኖ ባዚ ዉርሲ ኔ̈ና ዬሊ̇ባ̈ሴ!” ጋ̈ሪ ኢያ ጎይሊዴ።
23ዬሱ̈ሲ ጌዳ ቢሪንቲ̇ ጴ̈ጥሮ̈ሳኮ “ኣን ዓ̈ ሴ̈ጣና! ቴ ላፋፖ̇ ጌዳ ፋካ̇ቤ! ኔ̈ኒ ኣሲ ቆፒ̇ዛ̈ዲፌ̈ንዶኬ ጾ̈ሳ̇̇ ቆፓ̇ዚን ቆፓ̇ባሶኮታ̇ቦ ኔ ታ̈ብ ፊ ማ̈ቃ̇ዴ” ጌይዴ።
24ኢናፖ̇ ዬሱ̈ሲ ፌ ታማ̈ራንኮ “ቴ ዎሂን ዬ̇ንዳብ ኮዪዝ ኣሲ ፌ ቆሚ̇ምቦ̇ ቆፓ̇ዚን ዉርሲ ኣሾ̇ጋ̈ቤ፤ ፌ ማስቃሊን ቶ̈ካ̇ሪ ቴ ዎሂን ዬጋ̈ቤ። 25ፌ ሼምፒ̇ን ጋዳ̇ንዳብ ኮዪዝ ኣሲ ዎይ ኢዞ ይሲ̇̈ሬ፤ ፌ ሼምፒ̇ን ቴኮታ̇ቦ ጋ̈ሪ ይሲ̇ዛ̈ዲ ኢዞ ፋ̈ሬ። 26ኣሲ ኣላማ ጋልዳ ዎ ቆሊን ዎይ ቆላሪ ፌ ሼምፒ̇ን ይሴጌይን ኢያ ኣ ማ̈ዳ̇̈ራ? ዎይ ኣሲ ፌ ሼምፒ̇ምቦ ማ̈ቂ̇ዝ ባዝ ኣብዝ ጪጋ̇ንዳ̇ብ ዳንዳኢ̈ራ? 27ታ ኣሳ ናኣ̈ዲ ቴ ባ̈ባ ቦንቺ̇ንባራ፥ ኪታ̇ንቻ̇ንባር ዎልኣ ማ̈ቃር ዬ̈ሬ፤ ዪኖ̇ ኢዝባራ ታ̈ኒ ዎይንቦ ኢንታ̇ ኦ̈ሲንዲፌ̈ን ኢንታ̇ብ ጪጋ̇̈ሬ። 28ቴ ዪንታ̇ክ ኪን ጋ̈ሬ፥ ቴ ኣሳ ናኣ̈ዲ ቴ ካ̈ቲቲን ቦንቺ̇ንባራ ዬ̈ዚን ቤቂ̇ዝ ዲራ̈ስ ዓንዳ ኤቂ̇ኖን ጋርታ̇ፖ ዓይቂ̇ባ̈ሶ ኣሳ̈ን ዎ” ጌይዴ።
Iliyochaguliwa sasa
ማ̈ቶ̈ሳ 16: ኦጫ̈ቃማ
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia