ማ̈ቶ̈ሳ 28
28
ዬሱ̈ሲ ዓይቃ ጋርታ̇ፖ̇ ዲንዲ̇ዴ
ማ̈ርቆ̈ሳ 16፡1-10፤ ሉቃ̈ሳ 24፡1-12፤ ዋ̈ኒ̇ሳ 20፡1-10
1ዎጊ̇ ጋላስ ጌ̈ሽ ጌላፋ ማ̈ራማ ማግዳሎንዲኬ ማ ሜላ ኣሲን ማ̈ራሚባር ዎልኣ ዱ̈ፊን ቤቃ̇ንዳብ ሉኪ̇ዴ። 2ጎዳ ኪ̈ታ̇ንቻ̇ ኣፋፖ̇ ሶ̈ቢኖኮታ̇ቦ ሳ̈ዚን ኤንኣዴ። ዪ ኪ̈ታ̇ንቻ̇̈ዲ ዬ̈ሪ ዱ̈ፊን ካሪን ጋልዶ ሹቺ̇ን ጴቺ̇ን ፊርሳክ ሚሻር ኢዝ ጋልዳ ዶኢዴ። 3ዪ ኪ̈ታንቻ̇ ኣ̈ፋ̈ባር ዜ̈ሊንፌ̈ን ፎ̈ኢ̈ሬ፥ ኢ ኣፊላዳር ሻችፌ̈ን ቦ̈ርሴ። 4ና̈ጊዝ ዎታ̇ዳራን ኪ̈ታንቻ̇̈ቦ ኢ̈ጪ̇ኖኮታ̇ቦ ኢንታ̇ ጋሊ̇ን ጋንዳ̇ራ ዓይቂ̇ኖ ኣስፌ̈ን ማ̈ቂ̇ዴ። 5ኪ̈ታንቻ̇̈ዲ ማጫ̇ንኮ “ዪንቲ̇ ኢ̈ጫፒ̇ቴ! ዪንቲ̇ ኣሳን ኢያ ማስቃ̇ላ ጋልዳ ሶቲ̇ኖ ዬሱ̈ሳ ኮያዚን ቴ ኤራ̈ሬ። 6ኢ ዓይዲ ባዬ፥ ቲ̈ን ፌ ሶ̈ሊኖንዲፌ̈ን ዲንዲ̇ኔ። ዪንቲ̇ ዓይ ዬ̈ሪ ኢ ዱ̈ኪንቲ̇ኖ ቤሲ̇ን ቤቂ̇ብቴ። 7ዪዚ ዪንቲ̇ ኤሊ̇ባር ሉካ̇ሪ ኢ ታማ̈ራንቦ ‘ኢ ዓይቃ ጋርታ̇ፖ̇ ዲንዲ̇ኔ። ማ ዪንታ̇ፖ̇ ቲ̈ኒታር ጋሊላ ሉኪ̇̈ሬ፤ ዪንቲ̇ ኢና ኢያ ዲጚ̈ሬ!’ ጋ̈ሪ ኢንታ̇ብ ሶ̈ሊብቴ፤ ቴ ዪንታ̇ብ ዪኖ̇ ሶ̈ሊኔ!”
8ዪኒ̇ፖ ዓኒ ማጫ̇ን ኢ̈ች̇ባርኬ̇ ዎይሊን ኡፋይስባራ ዱ̈ፊምፖ̇ ኤሊ̇ባር ኬስካ̇ሪ ኢ ታማ̈ራንቦ ሶ̈ላንዳ̇ብ ዎባር ሉኪ̇ዴ። 9ዬሱ̈ሲ ኢንታ̇ ጎይም ጋልዳ ዬላ̇ሪ ኢንታ̇ኮ “ሳሮ!” ጌይዴ። ኢንታ̇ር ኢ̈ክ ኡካ̇ሪ ኢ ቶሂን ኤ̈̇ ኢ̈ብ ሞ̈ኪንቲ̇ዴ። 10ዪና̇ ኢዝባራ ዬሱ̈ሲ ኢንታ̇ኮ “ኢ̈ጫፒ̇ቴ! ሉካ̇ሪ ታ ታማ̈ራን ጋሊላ ሉካ̇ምፔ̇̈ን ኢንታ̇ብ ሶ̈ሊብቴ፥ ኢንቲ̇ ታ̈ና ኢና ዲጚ̈ሬ” ጌይዴ።
11ማጫ̇ን ጎይም ጋልዳ ዬ ጋልዳ ዎዶን ዎታ̇ዳራን ጋርታ̇ፖ̇ ፔታ̇ን ፔታ̇ናን ካታማ ሉካ̇ሪ ኦ̈ንቲ̇ኖ ባዛን ዎይ ቄ̈ሳ ኣላቃንቦ ሶ̈ሊዴ። 12ቄ̈ሳ ኣላቃን፥ ጋድ ጪጛሻንባር ሺ̈ቃሪ ዎል ዎልኣ ዞሪንታ̇ሪ ዎታ̇ዳራንቦ ዎይሊን ሚ̈ሺ̇ ኢማ̇ሪ ኢንታ̇ኮ፥ 13“ ‘ኑ ሱርቂ̇ን ኢ ታማ̈ራን ቃም ዬ̈ሪ ዉ̈ቃ̇ር ኤኪ̇ ሉኪ̇ዴ’ ጋ̈ር ዎርዣ̈ቦ ሶ̈ሊብቴ̇ ጌይዴ። 14ዪና̇ ሶ̈ሊን ጋድ ኣቂሲዛ ሲስካምፔ̈ን ዎቴጌይን ኑ ኢ̈ብ ሶ̈ሊ ኢያ ኣማ̇ንር ዪንታ̇ ጋልዳ ሜታ ዬልካ̇ይፌ̈ን ዎታንዳ̇” ጌይዴ። 15ኢናፖ̇ ዎታ̇ዳራን ሚ̈ሺ̇ን ኤካ̇ሪ ኢንታ̇ብ ሶ̈ሊኖንዲፌን ዎቲ̇ዴ። ባዝ ዪናሬ ዓኖ ዬ̈ላር ኣይሁዳን ጊዳ̇ ሶ̈ሊንታ̇ሙታ̇ ዎ።
ዬሱ̈ሲ ፌ ታማ̈ራንባር ቤንቲ̇ዴ
ማ̈ርቆ̈ሳ 16፡14-18፤ ሉቃ̈ሳ 24፡36-49፤ ዋ̈ኒ̇ሳ 20፡19-23፤ ሃዋ̈ 1፡6-8
16ዬሱ̈ሳ ታማ̈ራን ታጶ̇ ፔታ̇ናን ኢ ኢንቲ̇ ሉካ̇ምፔ̈ን ኪ̈ቲ̇ኖ ቤሲ̇ን ጋሊላ ጋዶ̇ ኢንዲን ጋልዳ̇ ሉኪ̇ዴ። 17ኢያ ቤቃ̇ር ኢ̈ብ ሞ̈ኪንቲ̇ዴ፤ ፔታ̇ን ፔታ̇ናን “ኢያ ባይዶኔ?” ጌይ ቆፒ̇ዴ። 18ዬሱ̈ሲ ኢንታ̇ክ ዬ̈ዪ ኡካ̇ሪ “ሲልጣ̈ና ዎይ ኣ̈ፋር ማ̈ቂ̇ን ሳ̈ዳ̇ሬ ታ̈ብ ኢሚንቲ̇ኔ። 19-20ዪዚ ዪንቲ̇ ሳ̈ዝ ጋልዳ ዎ ዎርዣ ዎይ̈ኮ ሉ̈ኪ̇ብቴ። ሉካ̇ር ባ̈ባ፣ ናኣ፣ ጌ̈ሻ̇ ኣያ̇ና ሱምባራ ኢንታ ጻማቂሙታ̇፥ ቴ ዪንታ̇ ኪቲ̇ኖ ባዛን ዎይ ፎታ̇ምፔን ኢንታ̇ ታማ̈ርሲሙታ̇፥ ታ̈ብ ታማ̈ሪ ማሂብቴ̇። ታ̈ናሬ ኣላሚን ዉርሲን ዬሊ̇ዝ ዲራ̈ስ ዎይ ጋላስ ዪንታ̇ባር ዎ” ጌይዴ።
Iliyochaguliwa sasa
ማ̈ቶ̈ሳ 28: ኦጫ̈ቃማ
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia