ማ̈ርቆ̈ሳ 4
4
ዜር ዜርቂ̇ዝ ኣስ ሚሳ̇̈ሊ
ማ̈ቶ̈ሳ 13፡10-17፤ ሉቃ̈ሳ 8፡4-8
1ሜላ ጋላስ ዬሱ̈ሲ ባሃ̈ሪን ቡጊድ ጋልዳ ታማ̈ርሲ ኤ̈̇ዴ። ዎይሊን ዎርዦ ኢ̈ክ ሺ̈ቂኖኮታ̇ቦ፥ ኢ ባሃ̈ሪን ጋልዳ ዎ ጎጚን ጋርታ̇ ጌላር ዶኢዴ። ዎርዣ̈ዳር ዎይ ባሃ̈ሪን ቡጊዲምባ̇ር ሺ̈ቂዴ። 2ኢያሬ ዎይሊን ባዝ ሚሳ̇̈ሊባር ኢንታ̇ ታማ̈ርሲ̇ዴ። ታማ̈ርሲ̈ርዶሪ፥ 3“ሲስኪ̇ብቴ̇! ፔቲ̇ ኣሲ ዜር ዜርቃ̇ንዳብ ኬስኪ̇ዴ። 4ኢ ዜ̈ርቃ̇ዚምባራ ዜርን ጋርታ̇ፖ̇ ዶካ̇ን ጎይ ቡጊድ ኬዲ̇ን ካፊ ዬ̈ሪ ሱ ሙይዴ። 5ፔታ̇ኒን ቁ̈ኣ ጋልዳ ኬዲ̇ን ዎይሊን ሳ̈ዚ ባዮ̇ኮታ̇ቦ ኤሊ̇ባር ፉዳዴ። 6ጳሪን ጻጳ ሳ̈ዳ̇ ሚሻካ̇ዮኮታ̇ቦ ኣዋ ኬስኪ̇ን ሹላ̇ር ሜላዴ። 7ፔታ̇ኒን ኣጚ ባላ ጋርታ̇ ኬዳ̇ር ፉዲን ኣጚን ዲጫ̇ራ ፉዲኖን ባቂ̇ን ኣ̈ፍ ኤ̈ካ̇ይ ኣታ̇ዴ። 8ዶካ̇ን ኢጊስ ሳ̈ዝ ጋልዳ ኬዳ̇ር ፉዲዴ፤ ዪን ዲጫ̇ሪ ፔታ̇ኒ ዓይዚ̇ ታጳ̇፣ ፔታ̇ኒ ሌሂ ታጳ̇፣ ፔታ̇ኒ ጼ̈ታ ኣ̈ፍ ካጺ̇ዴ” ጌይዴ።
9ኢናፖ̇ ዬሱ̈ሲ “ሲስኪ̇ዝ ዋይ ዎ ኣሲ ዓኖ̇ ሲስካ̇ጋ̈ቤ” ጌይዴ።
10ዬሱ̈ሲ ሶ̈ላምባ̇ር ሲስኪ̇ኖ ኣሳንኬ ኢ ታማ̈ራን ታጶ̇ ናምኣን ኢ ፌ̈ብ ዎዶ̈ን ኢ̈ክ ሺ̈ቃሪ ኢ ዓታር ሶ̈ሊኖ ሚሳ̇̈ሊምቦ̇ ኢዝ ቢርሺቺ̇ን ኣብዝኮ ኦይጪ̇ዴ። 11ዬሱ̈ሳር ኢንታ̇ኮ “ታ̈ኒ ጾ̈ሳ̇̇ ካ̈ቲቲምፖ̇ ዛ̈ና ዎንቦ ሚሳ̇̈ሊባር ሶ̈ላ̈ርዶኬ ዪንታ̇ብ ማ̈ቄ̈ጌይንዶ ጾ̈ሳ̇̇ ካ̈ቲቲ ሚስጢሪን ኤራምፔ̈ን ኢሚ̇ንቲ̇ኔ። 12ዪ̈ዳሬ ኣባቦ ጌዬጌይንዶ ‘ኢንቲ̇ ቤቂ̇ሙታ̇ዶ̈ር ፌ ቡ̈ዳ ጋርታ̇ ኤ̈ካ̇ይፌ̈ኒ፥ ሲስኪ̇ሙታ̇ዶ̈ር ቆፒ̇ ቤቃካ̇ይፌ̈ኔ፥ ጾ̈ሳ̇̇̈ክ ማ̈ቃሪ ኢንታ ናጋራ ኣቶ̇ ጌዪንታ̇ካ̇ይፌ̈ኒዬ።#4፡12 ኢሳ̈ሳ 6፡9-10’ ”
13ኢናፖ̇ ዬሱ̈ሲ ኢንታ̇ኮ “ሚሳ̇̈ሊን ዓና̇ ዪንታ̇ብ ጌላካ̇ያ? ዓት ዪዶኮ ሜላ ሚሳ̇̈ላን ዎይ ዪንቲ̇ ዎዛርታ̇ር ኤራንዳ̇ብ ዳንዳኢ̈ራ? 14ዜርቂ̇ዝ ና̈ሳ̈ዲ ጾ̈ሳ̇̇ ቃ̈ሊን ዜርቂ̈ሬ። 15ፔቲ̇ ፔቲ̇ ኣሳን ጎይም ጋልዳ ኬዲ̇ኖ ዜርን ማይጺ̈ሬ። ዪን ጾ̈ሳ̇̇ ቃ̈ሊን ሲስካ̇ምባ̇ራ ሴ̈ጣኖ ኤሊ̇ባር ዬ̈ሪ ኢንታ̇ ጋርታ̇ ጌሊኖን ጾ̈ሳ̇̇ ቃ̈ሊን ቦቲን̈ሬ። 16ዶካ̇ንር ቁ̈ኣ ቤስ̇ ጋልዳ ዜርቂንቲ̇ኖ ዜርን ማይጺ̈ሬ። ዪን ጾ̈ሳ̇̇ ቃ̈ሊን ሲስኪ̈ርዶሪ ኡፋይስባር ኤኪ̇̈ሬ። 17ማ̈ቂ̇ናካሬ ዪንቦ ጻጳ ባዮ̇ኮታ̇ቦ ዎይሊን ዶኢባ̈ሴ። ጾ̈ሳ̇̇ ቃ̈ሊን ጊሽ ሜታኬ ዳስ̇ፌ̈ኖ ባዝ ኢንታ̇ ጋል ዬያፌ̈ን ዎቴጌይን ፌ ኣማ̇ኒን ኤሊ̇ባር ኣሺ̇̈ሬ። 18ማ ዶካ̇ን ኣጚ ባላ ጋርታ̇ ዜርቂ̇ንቲ̇ኖ ዜርን ማይጺ̈ሬ። ዪን ጾ̈ሳ̇̇ ቃ̈ሊን ሲሲ̇ን ሲስኪ̈ርዶ̈ን፥ 19ዓና̇ ኣላሚን ጋልዳ ዎ ቲ̈ሪሲ፣ ዱሪቲ ካ፣ ዱማ ዱማ ባዛብ ኢና̇ ኢንታ ቡ̈ዳ ጋርታ ጌላሪ ጾ̈ሳ̇̇ ቃ̈ሊን ሚሪ ኤ̈̇ር ኢንታ̇ ኣ̈ፍ ባዪ ኣሺ̇̈ሬ። 20ዶካ̇ን ኢጊስ ሳ̈ዝ ጋልዳ ዜርቂ̇ንቲ̇ኖ ዜርን ማይጺ̈ሬ። ዪን ጾ̈ሳ̇̇ ቃ̈ሊን ሲስካ̇ሪ ፌ ቡ̈ዳ ጋርታ̇ ኤኪ̇ዛን። ዪንሬ ዓይዚ̇ ታጳ̇፣ ሌሂ ታጳ̇፣ ጼ̈ታ ኣ̈ፍ ኣ̈ፊዛን” ጌይዴ።
ሾክ̇ ጌይኖ ቤስ̇ ጋልዳ ጋዲ̇ኖ ፎኢን
ሉቃ̈ሳ 8፡16-18
21ማ̈ቃ̇ር ዬሱ̈ሲ ኢንታኮ “ኣሲ ታማ ፎ̈ኢሳሪ ፎኢንን ቤ̈ንታምፔ̈ኒ ሾክ̇ ጌይኖ ቤስ̇ ጋልዳ ጋዲ̇ርዶኬ፥ ኦት ጋርታ ዎይ ኣርሳ ጻና ጋዲ̇̈ራ? 22ዪና̇ ኢዝፌ̈ኒ ባዪንታ̇ር ቤንታ̇ካ̇ይ፥ ኣ̈ቺንታ̇ር ኤሪንታ̇ካ̇ይ ኣቲ̇ዝ ባዚ ባዬ̇። 23ዪዚ ሲስኪዝ ዋይ ዎ ኣሲ ዪኖ̇ ሲስካ̇ ጋ̈ቤ” ጌይዴ።
24ማ̈ቃ̇ሪ “ዪንቲ̇ ሲስኪ̇ዝ ባዛን ዎይ ኮሺንቻ̇ር ሲስኪብቴ! ዪንቲ̇ ማኪ̇ዝ ኢቂ̇ንባር ዪንታ̇ብ ማ̈ቃ̇ር ማኪንቲ̈ሬ፤ ኢዝፓ̇ር ሺሻር ዪንታ̇ብ ጉጂንቲ̈ሬ። 25ዎ ና̈ሳቦ ዓኒ ኢ̈ብ ጉጂንቲ̈ሬ፤ ባዮ̇ ና̈ሳፖ̇ ኢ̈ብ ዎ ጊሊ̇ን ኢዛር ጌዳ ኤኪንታ̈ሬ።
ዜር ፉዳር ዲጪ̇ዝ ጎይ ሶ̈ሊኖ ሚሳ̈̇ሊ
26ኢናፖ̇ ዬሱ̈ሲ ኢንታኮ “ጾ̈ሳ̇̇ ካ̈ቲቲንዳ̇ ኣሲ ሳ̈ዝ ጋልዳ ዜርቂ̇ኖ ዜር ማይጻ̈ሬ፤ 27ዜርቂ̇ኖ ና̈ሳ ቃም ሱርቂ፥ ጋላስ ዲንዲ̇ ዎታምባራ ኢዛ ዎዛርታ̇ር ዲጫ̇̈ርኮ ኢ̈ብ ኤሪንታ̇ካ̇ይዶ̈ን ዜርን ፉዳ̇ር ዲጫ̇̈ሬ። 28ኢዝ ጋልዳ ዜርቂኖ ካንዶ ሳ̈ዚን ፌ̈ብዶ̈ራ ቲ̈ን ጫ̈ች ማሃ̈ሪ፣ ኢናፖ̇ ጫ̈ቺ̇ን ፊልጺጛሬ፣ ፊልጺን ጋልዳ ማ ኣ̈ፍ ኤ̈̇̈ሬ። 29ኢናፖ̇ ካን ካጻ̇ራ ሺ̈ሺ̇ዝ ኬሊ̇ ዬሊ̇ ና̈ሳ ቴይሲ ኤ̈̇̈ሬ” ጌይዴ።
ሳና̈ፊጫ ጋ̈ዝ ታ̈ኪልቲ̇ን ኣ̈ፊን ሚሳ̇̈ሊ
ማ̈ቶ̈ሳ 13፡31-34፤ ሉቃ̈ሳ 13፡18-19
30ማ̈ቃ̇ር ዬሱ̈ሲ “ኑ̈ኒ ጾ̈ሳ̇̇ ካ̈ቲቲን ኣብዝ ማይጻ̈ሬ ጋ̈ኔ? ኣብዝ ሚሳ̇̈ሊ ኤካ̇ር ሶ̈ላኔ? 31ጾ̈ሳ̇̇ ካ̈ቲቲንዳ̇ ሳ̈ዝ ጋልዳ̇ ዜር ዎይፖ̇ ጉ̈ጻዚን ሳና̈ፊጫ ጋ̈ዝ ሚ ኣ̈ፊን ማይጻ̈ሬ። 32ኢዛ ዜርቂ̇ንታር ዲጪ̇ኖፖ̇ ዓኒ ዱጫ ጌይዛ ዎይፖ̇ ሺ̈ሬ። ካፊ ዎይ ኢዝ ጋልዳ ዶኣምፔ̈ን ዳንዳኢሲዝ ሻቃ ኬሳ̇̈ሬ” ጌይዴ።
33ዬሱ̈ሲ ኣሳንቦ ጌሊዝ ጎይባራ ዪን ፌ̈ኖ ዎይሊን ሚሳ̈ሊባራ ቃ̈ላ ሶ̈ሊዴ። 34ሚሳ̇̈ሊ ባዪ ኢንታብ ኣባካር ሶ̈ሊባ̈ሴ። ማ̈ቂ̇ናካሬ፥ ፌ ታማ̈ራንቦ ኢንታኬ ኢያክ ሙታ̇ ዎ ቤሲ̇ ኢንታቦ ዎይ ባዝ ቢላ̇ር ሶ̈ሊሬ።
ዬሱ̈ሲ ባሃ̈ራ ጋልዶ ዉርጊን ኤሲ̇ዴ
ማ̈ቶ̈ሳ 8፡23-27፤ ሉቃ̈ሳ 8፡22-25
35ዪና̇ ኢዝ ጋላስ ኦማ ዬሱ̈ሲ ፌ ታማ̈ራንኮ “ባሃ̈ሪምፖ̇ ጌዳ ፊ̈ን ፊ̈ጚስቶ” ጌይዴ። 36ኢንታ̇ሬ ዎርዣ ኣሻ̇ሪ ዬሱ̈ሲ ዎ ጎጚን ጋርታ̇ ጌላሪ ኢዝባር ኢያ ኤኪ̇ ሉኪ̇ዴ። ሜላ ዎይሊን ጎጛንር ኢንታባር ሉኪ̇ዴ። 37ሉካ̇ምባራ ባሃ̈ሪን ጋልዳ ጴች ዉርጊ ዲንዳሪ ጎጚንባር ዋ̈ ኩማንዳብ ዎቲዝ ዲራ̈ስ ጎጚን ዡጪች ኤ̈̇ዴ። 38ዬሱ̈ሲ ጎጚን ጋርታ ጋስ ኣ̈̇ሪ ቲራ̈ሳ ፌ ቆም ኣቻ ጋዳ̇ር ሱርቂንዶ̈ን፥ ኢ ታማ̈ራን ኢያ ዲንር ጌዪ “ኣስታማ̈ራ̈ዶ! ኑ ያምባ̇ር ኔ ዚምዶኣ̈ራ?” ጌይዴ።
39ኢያር ዲንዳር ዉርጊን ቆዲ̇ዴ። ባሃ̈ሪንኮ “ዚምዶኣቤ!” ጌይን ዉርጊን ዚክ ጌይን ባሃ̈ሪን ዚምዶኣዴ።
40ኢያር ፌ ታማ̈ራንኮ “ዪ̈ፌ̈ን ዎይ ዪንቲ ኣባብ ኢ̈ጪ̇̈ራ? ኣማ̇ና ዪንታ̇ብ ዎዛርፌ̈ን ዬ?” ጌይዴ።
41ኢንታ̇ር ዎይሊን ኢ̈ጫ̇ሪ ዎልዎልኣ “ናኣ̈ዶ! ዉርጊሬ ባሃ̈ራሬ ኢ̈ብ ኪ̈ቲንቲዛ ዓ̈ ኢ ኦ̈ኖ?” ጌይዴ።
Iliyochaguliwa sasa
ማ̈ርቆ̈ሳ 4: ኦጫ̈ቃማ
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia