Matie 1
1
Zezwii Kliisɩ a dɩba a dɩbawa 'a nglɩɩ
(Lwiikö 3.23-38)
1 Zezwii Kliisɩ, Ablaamö ‑nyɛ Daviidɩ 'sɔ, 'wa ngëyii 'mö ‑mä ɔ 'bhöönɩɛ. Ɔ dɩba a dɩbawa 'wuë, 'wa nglɩɩ miɛ dɛ'ɛ.
2Ablaamö mɔɔ gwälɩɛ Yizaakö,
Yizaakö mɔɔ gwälɩɛ Zakɔɔbö,
Zakɔɔbö mɔɔ gwälɩɛ Zwidaa ‑nyɛ ɔ ‑daayuë 'sɔ.
3Zwidaa ‑nyɛ ɔ 'lɛnglɛ Tamaa 'sɔ,
mʋa gwälɩɛ Falɛɛsɩ ‑nyɛ Zalaa 'sɔ.
Falɛɛsɩ mɔɔ gwälɩɛ Ɛzlɔɔmö,
Ezlɔɔmö mɔɔ gwälɩɛ Aghlamö,
4Aghlamö mɔɔ gwälɩɛ Aminadaabö,
Aminadaabö mɔɔ gwälɩɛ Naasɔɔ,
Naasɔɔ mɔɔ gwälɩɛ Salɩmɔɔ,
5Salɩmɔɔ ‑nyɛ ɔ 'lɛnglɛ Ghlaabö 'sɔ mʋa gwälɩɛ Boozɩ,
Boozɩ ‑nyɛ ɔ 'lɛnglɛ Ghlitɩ 'sɔ mʋa gwälɩɛ Obɛɛdɩ,
Obɛɛdɩ mɔɔ gwälɩɛ Yizayii.
6Yizayii mɔɔ gwälɩɛ 'bhlɩlowli Daviidɩ.
Daviidɩ ‑nyɛ nglɔɔ ɔ ‑sɛɛ Wilii yɔwʋ 'sɔ
mʋa gwälɩɛ Salomɔɔ.
7Salomɔɔ mɔɔ gwälɩɛ Ghlobʋamö,
Ghlobʋamö mɔɔ gwälɩɛ Abia,
Abia mɔɔ gwälɩɛ Azaa.
8Azaa mɔɔ gwälɩɛ Zʋzafaatɩ,
Zozafaatɩ mɔɔ gwälɩɛ Zolaamö,
Zolaamö mɔɔ gwälɩɛ Oziasɩ.
9Oziasɩ mɔɔ gwälɩɛ Zʋataamö,
Zʋataamö mɔɔ gwälɩɛ Akaazɩ,
Akaazɩ mɔɔ gwälɩɛ Ezekiasɩ,
10Ezekiasɩ mɔɔ gwälɩɛ Manasee,
Manasee mɔɔ gwälɩɛ Amɔɔ,
Amɔɔ mɔɔ gwälɩɛ Zoziasɩ.
11Dɛ wa gwanɩ a‑a Yizlaɛlɩ 'a ngëyii 'mö a ‑nʋa swɩ nimï 'n wa yuëë ‑mä Babilɔɔnɩ‑bhölɩɩ 'mö kwää, ‑lɛ a 'tɛnyɩ 'la 'mö, ‑lɛ Zoziasɩ gwälɩnɩɛ Zekoniasɩ ‑nyɛ ɔ ‑daayuë 'sɔ.
12Yizlaɛlɩ 'a ngëyii ‑wʋ ‑bhlɛ ‑mä Babilɔɔnɩ‑bhölɩɩ 'mö
'n Zekoniasɩ yiɛ Salatiɛlɩ gwälɩ.
Salatiɛlɩ mɔɔ gwälɩɛ Zolobabɛɛlɩ.
13Zolobabɛɛlɩ mɔɔ gwälɩɛ Abiudɩ,
Abiudɩ mɔɔ gwälɩɛ Eliakiimö,
Eliakiimö mɔɔ gwälɩɛ Azɔɔ.
14Azɔɔ mɔɔ gwälɩɛ Sadɔɔkö,
Sadɔɔkö mɔɔ gwälɩɛ Akiimö.
Akiimö mɔɔ gwälɩɛ Eliudɩ.
15Eliudɩ mɔɔ gwälɩɛ Eleazaa,
Eleazaa mɔɔ gwälɩɛ Mataa,
Mataa mɔɔ gwälɩɛ Zakɔɔbö.
16Zakɔɔbö mɔɔ gwälɩɛ Zezwii Kliisɩ
a ‑da Malii a 'luwlii Zɩzɛɛfʋ.
17Zaa, yɩ 'wuë 'mö a dɔ'wʋ, tɛɛnɩ ‑mä Ablaamö a 'tɛnyɩ 'mö ‑këë ‑n 'kä Daviidɩ a 'tɛnyɩ 'mö ghlɛ, ngäya kʋgbä ‑mʋäna mɩɩ ‑wʋä ‑lɛ jijo'wʋ. Tɛɛnɩ ‑mä Daviidɩ a 'tɛnyɩ 'mö ‑këë, 'tɛnyɩɩ wa kwää Yizlaɛlɩ 'a ngëyii 'mö a ‑nʋa ‑mä Babilɔɔnɩ‑bhölɩ 'mö, ‑n 'kä ‑lɛ ghlɛ, ngäya kʋgbä ‑mʋäna mɩɩ ‑wʋä ‑lɛ. Tɛɛnɩ'ɛ ‑lɛ a 'tɛnyɩ 'la 'mö ‑këë ‑n 'kä Kliisɩ a gwälɩtɛnyɩ 'mö ghlɛ, ngäya kʋgbä ‑mʋäna mɩɩ ‑wʋ'ɛɛ ‑lɛ.
Wa yɛ Zezwii Kliisɩ gwälɩ
(Lwiikö 2.1-7)
18Sɛ wa gwälɩɛ Zezwii Kliisɩ ‑sɩbhä ma‑a dɛ'ɛ. Ɔ ‑da Malii, Zɩzɛɛfʋ a bhibhenglɔ ɔ glɩnɩ a‑a. ‑Maa wa'aa ‑bhlɛ yɔwʋ 'diodionɩ 'n 'Wugɔmʋʋ 'Wlɩlɩ 'a 'mötɛɛnɔɔ yiɛ Malii ‑gömö yi, 'n ɔ yiɛ nɩkplokwë 'plɩ. 19Zɩzɛɛfʋ, Lagɔ a 'yila 'klʋ a dɔ'wʋ, nɩkpɛ a ‑mɔ zlɔnɩ 'mö, 'mö ɔ glɩnɩɛ. Zaa, ɔ 'yɩbhä ɔ ‑nyɛ Malii 'sɔ wa 'kä 'wi 'mö 'ylimö ‑sɛnɩ, ɔ tɔa nɩkpabhë a 'yila 'klʋ zʋ 'lɩbhanɩ. 20Ɔ ‑wʋ sa'a dlɩ 'pä dɔ'wʋ, 'n Lagɔzuzukwë ‑bhlʋ yoo 'yɛla 'mö 'ylimö ghlɛ 'n a yoo 'dɩ 'nyɛ, a lɛ naa: «Daviidɩ a 'yu a 'yu Zɩzɛɛfʋ, ‑n 'kä Malii kwä a dɔ'wʋ, tɩ ‑gu, ‑maa nɩkplokwë 'la ɔ ‑gää, 'Wugɔmʋʋ 'Wlɩlɩ 'a 'mötɛɛnɔɔ mʋʋ yoo ‑gömö 'n ɔ yeaa 'plɩ. 21Nyɩbhɛlʋyuu ɔ 'kää gwälɩɩ, 'pɔ Zezwii. Ɛ'ɛ ‑bhö nyɩasɛ, ‑maa mɔɔ 'kää 'ɔ ngëyii 'mö a ‑nʋa puë, miɛ nɩɩ, mɔɔ 'kʋää 'wa 'nyinylolii a gbʋʋ ‑gömö ‑sɛ.»
22Wɛlɩ 'la 'wuë, 'fʋ yɩ'ɩɛ ‑sɩbhä 'wʋ 'plɩ, ‑maa wɛlɩɩ ‑Alowli Lagɔ bhïlanɩ a‑a ɔ 'möbhïlanɩnyɔ Ezayii 'möö, yɩ 'kä 'yli 'wlʋnɩ a za, nza yɩ 'plɩɛ ‑sɩbhä 'wʋ. 23Sɛ'ɛ Ezayii gbä a‑a nɩɩ:
'Dumöwʋyu a ‑mɔ ‑ɔɔɔ ‑bhlɛ tɛkäsɛ nyɩbhɛlʋ yɩbhlɩnɩɩ,
ɔ yi nɩkplokwë 'plɩ,
ɔ yi nyɩbhɛlʋyu gwälɩ.
Yu 'la, 'mö wa 'kää Emanwiɛlɩ 'pä. # 1.23
Ezayii 7.14.
Nglɩ 'la, mɩɩ sɛɛ zɛmö nɩɩ: «Lagɔ ‑wʋnyɩ jijo'wʋ.»
24Zɩzɛɛfʋ gɔlɔɔ, sɛɛ Lagɔzuzukwëa nyɔɔ 'yɛla 'mö 'dɩɩ, ‑sɩbhä ɔ 'zʋä 'klʋkpamö 'n ɔ yiɛ Malii kwä. 25‑Maa ɔ ‑nyɔɔ 'nɩɛ ‑lɛ ‑wʋ, ‑këë 'n Malii yiɛ 'ɔ tɛkäyuu gwälɩ. 'N Zɩzɛɛfʋ yoo Zezwii 'pä.
Iliyochaguliwa sasa
Matie 1: bet
Kuonyesha
Shirikisha
Nakili
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fsw.png&w=128&q=75)
Je, ungependa vivutio vyako vihifadhiwe kwenye vifaa vyako vyote? Jisajili au ingia
© (Active), Wycliffe Bible Translators, Inc. All rights reserved.