luka 1
1
asa 1
ŋuɽun ŋun ŋar ŋaŋinijo gworo gwun gwila
1na liji lutu iḏeije ga gi ḏulio ŋuɽuna nanu nanu ŋeḏi ŋɩru ŋun ŋərrinu kɩlɩgi ganu lagəri, 2ŋiro gi liji lun laŋəḏɩlo uro gwerre muma nalro jaḏam jeḏi ŋuɽun nijiliḏəḏə, 3ṯaubilus ŋa gwun gwiŋir gworki, na nyi gwarno ŋiŋir dino nyi ŋun ŋilɩŋiḏɩlo uro gwerre wutiwuti ŋalulijo muma wei, 4kani ŋalɩŋe ŋuɽuna ŋiro gwerkwe ŋun ŋuməḏɩjaŋalŋe.
ḏilɩŋino ḏeḏi yuwana mamadan ḏuməḏu ḏe gwerre
5na ŋwamon ŋwono ŋweḏi gwele gwun gwan ərudus gweḏi yauḏia, gɩsis gijo gete gan sakaria, gwun gwaṯape ŋɩru gi lamon lun laṯɩli abiya ape ŋɩru. na gwa gwuŋun gwiro gwumən gweḏi arun na gwan ilisabaṯ. 6na luŋa berene liŋir gi jei ganu jeḏi elo, naṯɩlwele muma ŋuɽun wei ŋun ŋɩbunyɩlo gwele gwun gwiro elo late ləṯi ḏare no. 7na late ləṯi ŋaɽe no, ilisabaṯ gwɩro ludum, na luŋa berene lɩməṯi jɩḏilio jutu.
8na gi gwune na sakaria je gi ḏapa ŋɩru gi jei ganu jeḏi elo gi lamon lun lɩdəḏəcu 9ŋuɽun ŋeḏi jɩsis ŋɩru ŋagin, na ŋu məṯɩnu gwəḏi kwu dunu gweḏi gwele gwun gwiro elo gwun gwubuḏo, nugele ŋɩlun kigo ŋuŋijeije. 10na liji wei nalɩje gi ḏuməḏɩjo eloŋu kɩluḏo kaja geḏi jeijo. 11na gwiji gweḏi kanyin gweḏi gwele aŋinijo, nuḏuḏɩni ga gi ḏi ḏun ḏiro ḏiŋir gi lobo leḏi jeijo. 12gwune na sakaria aŋu, na ḏugwor mɩɽi nuḏonye gworki. 13na gwiji gweḏi kanyin eicɩno, ŋaḏonyɩḏa sakaria no; gi gwune elo madiŋɩni ḏiɽoṯeḏa ḏuŋa, na gwa gwuŋa gwan ilisabaṯ gwaŋalɩŋijo ŋaɽe ŋun ŋiro gwəmɩnyo naŋaḏəḏə jiri jan yuwana; 14na ŋa gwəṯi ḏidila ganu na ŋuɽun ŋun ŋiŋir, na lutu ləḏile ganu ḏilɩŋino ḏe ḏuŋun. 15gi gwune ŋu ŋabuḏe gi jei ganu jeḏi gwele gwun gwiro elo, na ŋɩmidiə na ŋɩdi ŋədi ŋun ŋaṯɩrləliḏi ŋate ŋunyu no. na uro kare ganu geḏi nana gwuŋun ŋenyeḏo gwuɽɩwə ganu gwun gwɩpiḏo pɽul. 16na ŋouwəɽeico liji lutu leḏi isreiyil kwele gwun gwiro elo gwagin. 17na ŋaṯɩdikaḏaṯa kɩɽelo gwuɽɩwə gwe gweḏi iliya na ŋɩma ŋe ŋuŋun, ŋouwəɽeico dugwor deḏi babaŋa gi nyaɽe, na lun laṯete nəni ganu no gi ḏilɩŋeḏa ḏeḏi liji lun liŋir, kani nugelijo gwelɩnya gwun gwiro elo liji lun ligelɩnu muma. 18na sakaria eico gwiji gweḏi kanyin no, nyi gwalɩŋe ŋuɽuna ŋeno galakwe? gi gwune nyi maro gwuɽun na gwa gwinyi məṯi jɩḏilio juṯu. 19na gwiji gweḏi kanyin wɩrlijo ŋuɽuna nueicɩno, nyi gwiro gwan jibraʼil gwun gwuḏuḏɩnu gi jei ganu jeḏi elo. na wəjɩŋi nyi gwaŋuməḏɩjo ŋaŋaŋijo ŋuɽuna ŋeno ŋun ŋiŋir. 20na ŋa gwəməḏini linyu, a gwate gwəṯi ŋɩma ŋa gwanumə no kəbe lamon ləwei lali ŋuɽun wila ŋeno, gi gwune ŋa gwate gwudiŋɩnu ŋuɽuna ŋinyi ŋun ŋuməḏɩjaŋaŋe, ŋun ŋɩṯɩmi gi lamon lun ligelɩnu no. 21na liji lijo gi ḏiḏuḏɩnɩjo sakariaŋ nalobaga ṯuṯ gi gwune gwijo gɩttən kwu dunu gweḏi elo gwun gwubuḏo. 22na gwune nuduḏo nate nuəṯi ŋɩma luluməḏɩjo no, na luŋa nallɩŋe nalarno maŋu ŋuɽuna ŋun ŋaŋinu gi ŋwume kwu dunu gweḏi elo gwun gwubuḏo. naṯuluməḏɩjo di de na gwijɩre gwuməṯɩnu linyu. 23na gwune na ŋwamon ṯɩmi ŋweḏi ŋɩru ŋuŋun nuwele dunu lugwun.
24na gwune na ŋwamon ete ŋweno na ilisabaṯ gwuli gwun gwiro gwa gwuŋun, ki nulɩbɩji aŋɩna yuŋun luwəŋe ṯoḏɩne nuarno, 25na ŋiro dino nyil gwele ḏuḏɩjo gwun gwiro elo kaja kono guŋalaḏəṯɩŋwinge ganu lugwi kani ŋwiəbɩri ḏare gi jei ganu jeḏi liji.
ḏilɩŋino ḏeḏi yecu ḏuməḏu ḏe gwerre
26na gwune na luwə ro nyəɽɩl na elo wəjo gwiji gweḏi kanyin gwun gwan jibraʼil nuwele kamɩɽigen yeḏi jalil yun yan nasɩra. 27nuwele ŋera ŋun ŋate ŋɩmɩɽiḏi ganu no, ŋun ŋar ŋa gwiji ago gwun gwan yusib, gwun gwiro əriḏ yeḏi ḏauuḏɩŋa. na ŋera ŋan mariam. 28nuəḏi lugwun nueicɩno, ŋa gwiŋir a? gwa gwun gwəṯi ḏiŋiriḏa, gwele gwijanyagwe. 29gwune nuaŋu na ḏugwor mɩɽi ŋuɽun ŋuŋun, nuuməḏɩni gi ḏugwor ganu nuarno ḏɩmɩɽəḏo ṯeno ḏɩrṯa. 30na gwiji gweḏi kanyin eicɩno, mariam, ŋaḏonyɩḏa no; gi gwune ŋa gwumabuje ḏiŋiriḏa ḏi elo. 31ŋa gwaje gwagwuli, na ŋa gwalɩŋe ŋaɽe ŋun ŋiro gwəmɩnyo, na ŋaḏəḏə jiri jan yecu. 32ŋeno ŋanəne na ŋaṯɩleico ŋaɽe ŋeḏi gwun gwolenelo, na ŋa gwele gwun gwiro elo ḏəḏə gɩḏoɽ geḏi ŋele ŋeḏi gwumən gwun gwan ḏauuḏ. 33ŋəṯi ŋelɩnya ŋeḏi liji leḏi yagubŋa gi gɩḏilio; na ŋele ŋuŋun ŋate ŋete no. 34na mariam eico gwiji gweḏi kanyin no, ŋuɽun ŋeno ŋəṯi jei ganu galakwe, gi gwune nyi gwore gwate gwumele kwəmɩnyo no? 35na gwiji gweḏi kanyin wɩrlijo ŋuɽuna nueicɩno, gwuɽɩwə gwun gwɩpiḏo pɽul gwagwulə lugwuŋa, na ŋɩma ŋeḏi gwun gwolenelo ŋaŋaŋelejo gɩḏiḏɩŋilo, na gi gwune dino gwun gwɩpiḏo pɽul gwun gwilɩŋinu lugwuŋa gwaṯɩleico ŋaɽe ŋeḏi elo. 36na gwunəlo gwun gwan ilisabaṯ magwuli dino gwiro gəbɩrru, magwuli luwəŋe nyəɽɩl gwun gwaṯɩleico gwiro ludum. 37gi gwune ŋatɩn ŋetɩdo ŋun ŋate ŋandro elo gwe no. 38na mariam uməḏɩjo nueicɩno, nyi gwiro wainy gweḏi gwele gwun gwiro elo; ouwɩrico ŋuɽuna ŋuŋa alɩje jei ganu lugwi. nan gwiji gweḏi kanyin walane nuwele.
mariam gwuwiḏi lanaŋiḏa ilisabaṯ gwe; na ḏorṯeḏa ḏuŋun
39na mariam diɽi ŋwamon ganu ŋwono nuwele kamɩrɩgen yun yəṯi ŋwurgwoma ŋwutu yeḏi yauḏa; 40nuəḏi kwu dunu gweḏi sakaria numɩɽənyo ilisabaṯŋ. 41gwune na ilisabaṯ diŋɩni ḏɩmɩɽəḏo ḏeḏi mariam, na ŋaɽe upiḏi ga kare ganu guŋun na ilisabaṯ enyeḏe gwuɽɩwə ganu gwun gwɩpiḏo pɽul. 42nuəri gwula ŋwal ŋwɩbuḏo nuarno, ŋa gwəṯano ḏɩmoreḏa gi la wei, na ḏɩmorəḏa ŋaɽe ŋuŋa ŋun ŋijo kare. 43na galakwe ŋuɽun ŋeno na nana gweḏi gwele gwi gwun gwiro elo nuwila lugwi?
44gi gwune nidiŋɩni ŋwal ŋweḏi ḏɩmɩɽəḏo ḏuŋa kəni gi na ŋaɽe upiḏi ga ŋuɽun ŋeḏi dila ganu kare ganu ginyi. 45na ḏɩmoreḏa ḏaje lugwun gwun gwəmɩnyu nuarno ŋwulṯɩni ŋwun ŋeicɩŋe gwele gwun gwiro elo. 46na mariam arno,
dugwor ḏinyi ḏaṯɩbuḏi gwelɩnya,
47na gwuɽɩwə gwi gwidilo ganu ḏi elo gwun gwikədəḏi ga.
48gi gwune ŋələḏəṯu kwu wainy gwuŋun ganu gwun
gwaṯɩtiene,
na uro gwunnɩno na liji wei leḏi jɩḏilio jun jiro kajakaja
liŋiŋiri,
49gi gwune gwun gwəṯi ŋɩma gwiminyilḏuḏɩjo ŋun ŋɩbuḏo,
na jiri juŋun jɩpiḏo pɽul.
50na ŋino ŋuŋun ŋaje gi liji leḏi jɩḏilio jun jiro kajakaja
lun laṯɩḏonye ŋuŋu.
51maŋini ŋɩma ŋuŋun ḏi ḏe ḏuŋun,
nulwɩreiji elo lun laṯɩbuṯiane gi ḏuməḏo ḏeḏi dugwor dagin;
52nugwuleje lelɩnya ga gi jɩḏoɽ jeḏi ŋele ŋagin,
nulmɩni abuje lun laṯɩduji lula lagin lɩtilɩiti;
53nulpi lun liro jaŋu ŋɩdi ŋe ŋiŋir,
nulmɩni kuwa lun ləṯi ŋɩdio ŋutu luḏu ganu;
54nuwila nugelejo liji uwə leḏi isreiyil lun liro jaḏam juŋun,
nuaḏɩŋane ŋino ŋuŋun.
55gi gwune uməḏɩju lɩgwumɩnyo lage
na ibraim na lɩgwumən gi gɩḏilio.
56na mariam jiga lugwun luwəŋə ṯəɽɩl ca ki nuaɽuwe kwu dunu gwuŋun.
ḏilɩŋino ḏeḏi ŋuwəna mamadan; na ḏorṯeḏa ḏeḏi sakaria
57namɩni ilisabaṯ ṯɩmi gaja guŋun gun gar gugilɩŋe nulɩŋeḏa ŋaɽe ŋun ŋiro gwəmɩnyo. 58na liji lun ləṯilijaḏe ga na əriḏ yuŋun diŋɩni gwima gwele gwun gwiro elo ino gworki, naldile ganu luŋaŋale. 59na gi lamon lun ləduji loro dubə nalwila lar louɽo ŋaɽe, nalar ŋalḏəḏə jiri jeḏi baba gwuŋun gwan sakaria. 60nal nana gwuŋun wɩrlijo nuɽuna nuleicɩno, awe, ŋate ŋan dino no, namɩni ŋileico yuwana. 61nalmɩni eicɩno, gwiji gwatɩn gwetɩdo lagaloŋ əriḏo gwatɩn jiri ceno no. 62naluməḏɩjo babaŋ gwuŋun di de gwaluməḏɩjo ŋar neico əḏi. 63na ŋu nuɽoṯeḏe gɩḏolia gun guwɩra ganu nuuli dino, ŋan yuwana. na liji wei obaga ṯuṯ. 64na cou na linyu iḏini na ḏiŋɩla ḏuŋun kədəḏɩni ganu, nuumə, nuorṯeḏa eloŋu. 65na ŋɩḏe e liji lun laṯɩlijaḏe ga, na ŋuɽun ŋeno wei nalouwɩreḏelo ŋwurgwom wei ŋweḏi yauḏia. 66na wei lun lɩḏiŋɩnu naldɩme ŋuɽuna ŋeno gi dugwor ganu dagin, nalarno, aŋ gwiro gwar gwaro ŋaɽe ŋeno? na ḏi ḏeḏi gwele gwun gwiro elo ḏijɩlḏe gwerkwe.
67na sakaria gwun gwiro baba gwuŋun enyeḏe gwuɽɩwə ganu gwun gwɩpiḏo pɽul nuaŋiḏi ŋuɽuna ŋeno dino, nuarno,
68ḏɩbuḏia ḏaje kwele gwun gwiro elo gweḏi isreiyil,
gi gwune nuwila gi liji luŋun lulkədə ga jili je.
69namɩni nuijəbuḏɩjo luba leḏi kədəḏɩnə ga
kwu dunu gweḏi ḏauuḏ gwun gwiro gaḏam guŋun,
70gi gwune uməḏu gi linyu leḏi nebɩŋa lun lɩpiḏo pɽul lun
lijo uro gwerre,
71nijikədə ga gi lun lɩkiḏiḏɩle
na gi di deḏi luŋa wei lun lidonyije.
72na ŋuɽun ŋeno nuaŋiḏi ŋino gi lɩgwumɩnyo lage,
na gwaḏɩŋane ŋuɽuna ŋuŋun ŋun ŋɩkaiilo ŋun ŋɩpiḏo pɽul,
73gi ḏərɩmiə ḏun ḏərɩmijuḏe ibraimŋ gwun gwiro gwumɩnyo
gwage.
74nuarno ḏijiḏəḏə gi gwune ilkədəḏɩnu ga gi di deḏi liji lun
lɩkiḏiḏɩle,
iləpijo ŋɩru ilate ləṯi ŋɩḏe no
75na ḏipiḏa ḏe pɽul na ŋuɽun ŋiŋir gi jei ganu lugwun
ŋwamon wei ŋwe ḏɩmiḏa ḏage.
76na ŋa ŋaɽe ŋe, laŋeico nebi gweḏi gwun gwolenelo
gi gwune ŋa gwadara kɩɽelo kwele gwagelijo daṯ duŋun
muma.
77na gwaḏəḏə liji luŋun ḏilɩŋeḏa ḏe ḏɩkəḏəḏɩnə ga
gi ḏəbɩrio ŋuɽun ganu ŋagin ŋun ŋɩki
78ŋino ŋe ŋun ŋamuli ŋeḏi elo gwage,
na ŋiro dino bure gwun gwaṯabuḏa gwun gwiro lɽa
nijaŋinijo,
79kani ŋwuləɽəḏɩjo ga lun lijoga kirɩm na gɩḏiḏɩŋil ge ḏaiya,
kani gwijiḏərəḏɩjo kɩɽelo ŋwara ŋwage gi ṯaṯ ḏe ḏouwɩɽiḏa.
80namɩni ŋaɽe ŋaṯubuḏe naŋabɩɽene nanu gwuɽɩwə gwe-naṯujaḏaṯa kiḏɩwer kəbe gi lamon lun lɩmuləŋinijo liji leḏi isreiyil.
Iliyochaguliwa sasa
luka 1: OTR1966
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nuba, Otoro New Testament
© British and Foreign Bible Society, 1966.
luka 1
1
asa 1
ŋuɽun ŋun ŋar ŋaŋinijo gworo gwun gwila
1na liji lutu iḏeije ga gi ḏulio ŋuɽuna nanu nanu ŋeḏi ŋɩru ŋun ŋərrinu kɩlɩgi ganu lagəri, 2ŋiro gi liji lun laŋəḏɩlo uro gwerre muma nalro jaḏam jeḏi ŋuɽun nijiliḏəḏə, 3ṯaubilus ŋa gwun gwiŋir gworki, na nyi gwarno ŋiŋir dino nyi ŋun ŋilɩŋiḏɩlo uro gwerre wutiwuti ŋalulijo muma wei, 4kani ŋalɩŋe ŋuɽuna ŋiro gwerkwe ŋun ŋuməḏɩjaŋalŋe.
ḏilɩŋino ḏeḏi yuwana mamadan ḏuməḏu ḏe gwerre
5na ŋwamon ŋwono ŋweḏi gwele gwun gwan ərudus gweḏi yauḏia, gɩsis gijo gete gan sakaria, gwun gwaṯape ŋɩru gi lamon lun laṯɩli abiya ape ŋɩru. na gwa gwuŋun gwiro gwumən gweḏi arun na gwan ilisabaṯ. 6na luŋa berene liŋir gi jei ganu jeḏi elo, naṯɩlwele muma ŋuɽun wei ŋun ŋɩbunyɩlo gwele gwun gwiro elo late ləṯi ḏare no. 7na late ləṯi ŋaɽe no, ilisabaṯ gwɩro ludum, na luŋa berene lɩməṯi jɩḏilio jutu.
8na gi gwune na sakaria je gi ḏapa ŋɩru gi jei ganu jeḏi elo gi lamon lun lɩdəḏəcu 9ŋuɽun ŋeḏi jɩsis ŋɩru ŋagin, na ŋu məṯɩnu gwəḏi kwu dunu gweḏi gwele gwun gwiro elo gwun gwubuḏo, nugele ŋɩlun kigo ŋuŋijeije. 10na liji wei nalɩje gi ḏuməḏɩjo eloŋu kɩluḏo kaja geḏi jeijo. 11na gwiji gweḏi kanyin gweḏi gwele aŋinijo, nuḏuḏɩni ga gi ḏi ḏun ḏiro ḏiŋir gi lobo leḏi jeijo. 12gwune na sakaria aŋu, na ḏugwor mɩɽi nuḏonye gworki. 13na gwiji gweḏi kanyin eicɩno, ŋaḏonyɩḏa sakaria no; gi gwune elo madiŋɩni ḏiɽoṯeḏa ḏuŋa, na gwa gwuŋa gwan ilisabaṯ gwaŋalɩŋijo ŋaɽe ŋun ŋiro gwəmɩnyo naŋaḏəḏə jiri jan yuwana; 14na ŋa gwəṯi ḏidila ganu na ŋuɽun ŋun ŋiŋir, na lutu ləḏile ganu ḏilɩŋino ḏe ḏuŋun. 15gi gwune ŋu ŋabuḏe gi jei ganu jeḏi gwele gwun gwiro elo, na ŋɩmidiə na ŋɩdi ŋədi ŋun ŋaṯɩrləliḏi ŋate ŋunyu no. na uro kare ganu geḏi nana gwuŋun ŋenyeḏo gwuɽɩwə ganu gwun gwɩpiḏo pɽul. 16na ŋouwəɽeico liji lutu leḏi isreiyil kwele gwun gwiro elo gwagin. 17na ŋaṯɩdikaḏaṯa kɩɽelo gwuɽɩwə gwe gweḏi iliya na ŋɩma ŋe ŋuŋun, ŋouwəɽeico dugwor deḏi babaŋa gi nyaɽe, na lun laṯete nəni ganu no gi ḏilɩŋeḏa ḏeḏi liji lun liŋir, kani nugelijo gwelɩnya gwun gwiro elo liji lun ligelɩnu muma. 18na sakaria eico gwiji gweḏi kanyin no, nyi gwalɩŋe ŋuɽuna ŋeno galakwe? gi gwune nyi maro gwuɽun na gwa gwinyi məṯi jɩḏilio juṯu. 19na gwiji gweḏi kanyin wɩrlijo ŋuɽuna nueicɩno, nyi gwiro gwan jibraʼil gwun gwuḏuḏɩnu gi jei ganu jeḏi elo. na wəjɩŋi nyi gwaŋuməḏɩjo ŋaŋaŋijo ŋuɽuna ŋeno ŋun ŋiŋir. 20na ŋa gwəməḏini linyu, a gwate gwəṯi ŋɩma ŋa gwanumə no kəbe lamon ləwei lali ŋuɽun wila ŋeno, gi gwune ŋa gwate gwudiŋɩnu ŋuɽuna ŋinyi ŋun ŋuməḏɩjaŋaŋe, ŋun ŋɩṯɩmi gi lamon lun ligelɩnu no. 21na liji lijo gi ḏiḏuḏɩnɩjo sakariaŋ nalobaga ṯuṯ gi gwune gwijo gɩttən kwu dunu gweḏi elo gwun gwubuḏo. 22na gwune nuduḏo nate nuəṯi ŋɩma luluməḏɩjo no, na luŋa nallɩŋe nalarno maŋu ŋuɽuna ŋun ŋaŋinu gi ŋwume kwu dunu gweḏi elo gwun gwubuḏo. naṯuluməḏɩjo di de na gwijɩre gwuməṯɩnu linyu. 23na gwune na ŋwamon ṯɩmi ŋweḏi ŋɩru ŋuŋun nuwele dunu lugwun.
24na gwune na ŋwamon ete ŋweno na ilisabaṯ gwuli gwun gwiro gwa gwuŋun, ki nulɩbɩji aŋɩna yuŋun luwəŋe ṯoḏɩne nuarno, 25na ŋiro dino nyil gwele ḏuḏɩjo gwun gwiro elo kaja kono guŋalaḏəṯɩŋwinge ganu lugwi kani ŋwiəbɩri ḏare gi jei ganu jeḏi liji.
ḏilɩŋino ḏeḏi yecu ḏuməḏu ḏe gwerre
26na gwune na luwə ro nyəɽɩl na elo wəjo gwiji gweḏi kanyin gwun gwan jibraʼil nuwele kamɩɽigen yeḏi jalil yun yan nasɩra. 27nuwele ŋera ŋun ŋate ŋɩmɩɽiḏi ganu no, ŋun ŋar ŋa gwiji ago gwun gwan yusib, gwun gwiro əriḏ yeḏi ḏauuḏɩŋa. na ŋera ŋan mariam. 28nuəḏi lugwun nueicɩno, ŋa gwiŋir a? gwa gwun gwəṯi ḏiŋiriḏa, gwele gwijanyagwe. 29gwune nuaŋu na ḏugwor mɩɽi ŋuɽun ŋuŋun, nuuməḏɩni gi ḏugwor ganu nuarno ḏɩmɩɽəḏo ṯeno ḏɩrṯa. 30na gwiji gweḏi kanyin eicɩno, mariam, ŋaḏonyɩḏa no; gi gwune ŋa gwumabuje ḏiŋiriḏa ḏi elo. 31ŋa gwaje gwagwuli, na ŋa gwalɩŋe ŋaɽe ŋun ŋiro gwəmɩnyo, na ŋaḏəḏə jiri jan yecu. 32ŋeno ŋanəne na ŋaṯɩleico ŋaɽe ŋeḏi gwun gwolenelo, na ŋa gwele gwun gwiro elo ḏəḏə gɩḏoɽ geḏi ŋele ŋeḏi gwumən gwun gwan ḏauuḏ. 33ŋəṯi ŋelɩnya ŋeḏi liji leḏi yagubŋa gi gɩḏilio; na ŋele ŋuŋun ŋate ŋete no. 34na mariam eico gwiji gweḏi kanyin no, ŋuɽun ŋeno ŋəṯi jei ganu galakwe, gi gwune nyi gwore gwate gwumele kwəmɩnyo no? 35na gwiji gweḏi kanyin wɩrlijo ŋuɽuna nueicɩno, gwuɽɩwə gwun gwɩpiḏo pɽul gwagwulə lugwuŋa, na ŋɩma ŋeḏi gwun gwolenelo ŋaŋaŋelejo gɩḏiḏɩŋilo, na gi gwune dino gwun gwɩpiḏo pɽul gwun gwilɩŋinu lugwuŋa gwaṯɩleico ŋaɽe ŋeḏi elo. 36na gwunəlo gwun gwan ilisabaṯ magwuli dino gwiro gəbɩrru, magwuli luwəŋe nyəɽɩl gwun gwaṯɩleico gwiro ludum. 37gi gwune ŋatɩn ŋetɩdo ŋun ŋate ŋandro elo gwe no. 38na mariam uməḏɩjo nueicɩno, nyi gwiro wainy gweḏi gwele gwun gwiro elo; ouwɩrico ŋuɽuna ŋuŋa alɩje jei ganu lugwi. nan gwiji gweḏi kanyin walane nuwele.
mariam gwuwiḏi lanaŋiḏa ilisabaṯ gwe; na ḏorṯeḏa ḏuŋun
39na mariam diɽi ŋwamon ganu ŋwono nuwele kamɩrɩgen yun yəṯi ŋwurgwoma ŋwutu yeḏi yauḏa; 40nuəḏi kwu dunu gweḏi sakaria numɩɽənyo ilisabaṯŋ. 41gwune na ilisabaṯ diŋɩni ḏɩmɩɽəḏo ḏeḏi mariam, na ŋaɽe upiḏi ga kare ganu guŋun na ilisabaṯ enyeḏe gwuɽɩwə ganu gwun gwɩpiḏo pɽul. 42nuəri gwula ŋwal ŋwɩbuḏo nuarno, ŋa gwəṯano ḏɩmoreḏa gi la wei, na ḏɩmorəḏa ŋaɽe ŋuŋa ŋun ŋijo kare. 43na galakwe ŋuɽun ŋeno na nana gweḏi gwele gwi gwun gwiro elo nuwila lugwi?
44gi gwune nidiŋɩni ŋwal ŋweḏi ḏɩmɩɽəḏo ḏuŋa kəni gi na ŋaɽe upiḏi ga ŋuɽun ŋeḏi dila ganu kare ganu ginyi. 45na ḏɩmoreḏa ḏaje lugwun gwun gwəmɩnyu nuarno ŋwulṯɩni ŋwun ŋeicɩŋe gwele gwun gwiro elo. 46na mariam arno,
dugwor ḏinyi ḏaṯɩbuḏi gwelɩnya,
47na gwuɽɩwə gwi gwidilo ganu ḏi elo gwun gwikədəḏi ga.
48gi gwune ŋələḏəṯu kwu wainy gwuŋun ganu gwun
gwaṯɩtiene,
na uro gwunnɩno na liji wei leḏi jɩḏilio jun jiro kajakaja
liŋiŋiri,
49gi gwune gwun gwəṯi ŋɩma gwiminyilḏuḏɩjo ŋun ŋɩbuḏo,
na jiri juŋun jɩpiḏo pɽul.
50na ŋino ŋuŋun ŋaje gi liji leḏi jɩḏilio jun jiro kajakaja
lun laṯɩḏonye ŋuŋu.
51maŋini ŋɩma ŋuŋun ḏi ḏe ḏuŋun,
nulwɩreiji elo lun laṯɩbuṯiane gi ḏuməḏo ḏeḏi dugwor dagin;
52nugwuleje lelɩnya ga gi jɩḏoɽ jeḏi ŋele ŋagin,
nulmɩni abuje lun laṯɩduji lula lagin lɩtilɩiti;
53nulpi lun liro jaŋu ŋɩdi ŋe ŋiŋir,
nulmɩni kuwa lun ləṯi ŋɩdio ŋutu luḏu ganu;
54nuwila nugelejo liji uwə leḏi isreiyil lun liro jaḏam juŋun,
nuaḏɩŋane ŋino ŋuŋun.
55gi gwune uməḏɩju lɩgwumɩnyo lage
na ibraim na lɩgwumən gi gɩḏilio.
56na mariam jiga lugwun luwəŋə ṯəɽɩl ca ki nuaɽuwe kwu dunu gwuŋun.
ḏilɩŋino ḏeḏi ŋuwəna mamadan; na ḏorṯeḏa ḏeḏi sakaria
57namɩni ilisabaṯ ṯɩmi gaja guŋun gun gar gugilɩŋe nulɩŋeḏa ŋaɽe ŋun ŋiro gwəmɩnyo. 58na liji lun ləṯilijaḏe ga na əriḏ yuŋun diŋɩni gwima gwele gwun gwiro elo ino gworki, naldile ganu luŋaŋale. 59na gi lamon lun ləduji loro dubə nalwila lar louɽo ŋaɽe, nalar ŋalḏəḏə jiri jeḏi baba gwuŋun gwan sakaria. 60nal nana gwuŋun wɩrlijo nuɽuna nuleicɩno, awe, ŋate ŋan dino no, namɩni ŋileico yuwana. 61nalmɩni eicɩno, gwiji gwatɩn gwetɩdo lagaloŋ əriḏo gwatɩn jiri ceno no. 62naluməḏɩjo babaŋ gwuŋun di de gwaluməḏɩjo ŋar neico əḏi. 63na ŋu nuɽoṯeḏe gɩḏolia gun guwɩra ganu nuuli dino, ŋan yuwana. na liji wei obaga ṯuṯ. 64na cou na linyu iḏini na ḏiŋɩla ḏuŋun kədəḏɩni ganu, nuumə, nuorṯeḏa eloŋu. 65na ŋɩḏe e liji lun laṯɩlijaḏe ga, na ŋuɽun ŋeno wei nalouwɩreḏelo ŋwurgwom wei ŋweḏi yauḏia. 66na wei lun lɩḏiŋɩnu naldɩme ŋuɽuna ŋeno gi dugwor ganu dagin, nalarno, aŋ gwiro gwar gwaro ŋaɽe ŋeno? na ḏi ḏeḏi gwele gwun gwiro elo ḏijɩlḏe gwerkwe.
67na sakaria gwun gwiro baba gwuŋun enyeḏe gwuɽɩwə ganu gwun gwɩpiḏo pɽul nuaŋiḏi ŋuɽuna ŋeno dino, nuarno,
68ḏɩbuḏia ḏaje kwele gwun gwiro elo gweḏi isreiyil,
gi gwune nuwila gi liji luŋun lulkədə ga jili je.
69namɩni nuijəbuḏɩjo luba leḏi kədəḏɩnə ga
kwu dunu gweḏi ḏauuḏ gwun gwiro gaḏam guŋun,
70gi gwune uməḏu gi linyu leḏi nebɩŋa lun lɩpiḏo pɽul lun
lijo uro gwerre,
71nijikədə ga gi lun lɩkiḏiḏɩle
na gi di deḏi luŋa wei lun lidonyije.
72na ŋuɽun ŋeno nuaŋiḏi ŋino gi lɩgwumɩnyo lage,
na gwaḏɩŋane ŋuɽuna ŋuŋun ŋun ŋɩkaiilo ŋun ŋɩpiḏo pɽul,
73gi ḏərɩmiə ḏun ḏərɩmijuḏe ibraimŋ gwun gwiro gwumɩnyo
gwage.
74nuarno ḏijiḏəḏə gi gwune ilkədəḏɩnu ga gi di deḏi liji lun
lɩkiḏiḏɩle,
iləpijo ŋɩru ilate ləṯi ŋɩḏe no
75na ḏipiḏa ḏe pɽul na ŋuɽun ŋiŋir gi jei ganu lugwun
ŋwamon wei ŋwe ḏɩmiḏa ḏage.
76na ŋa ŋaɽe ŋe, laŋeico nebi gweḏi gwun gwolenelo
gi gwune ŋa gwadara kɩɽelo kwele gwagelijo daṯ duŋun
muma.
77na gwaḏəḏə liji luŋun ḏilɩŋeḏa ḏe ḏɩkəḏəḏɩnə ga
gi ḏəbɩrio ŋuɽun ganu ŋagin ŋun ŋɩki
78ŋino ŋe ŋun ŋamuli ŋeḏi elo gwage,
na ŋiro dino bure gwun gwaṯabuḏa gwun gwiro lɽa
nijaŋinijo,
79kani ŋwuləɽəḏɩjo ga lun lijoga kirɩm na gɩḏiḏɩŋil ge ḏaiya,
kani gwijiḏərəḏɩjo kɩɽelo ŋwara ŋwage gi ṯaṯ ḏe ḏouwɩɽiḏa.
80namɩni ŋaɽe ŋaṯubuḏe naŋabɩɽene nanu gwuɽɩwə gwe-naṯujaḏaṯa kiḏɩwer kəbe gi lamon lun lɩmuləŋinijo liji leḏi isreiyil.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nuba, Otoro New Testament
© British and Foreign Bible Society, 1966.