प्रेषित 16
16
लुस्र इंदू तीमथ्य पौलकी फोई मिलास्ताड
1मग पौल दर्बे इंगा लुस्र इंदू किंदीक वच्या; इंगा सूडना, आंदू तीमथ्य फेरोड येवाडो ओगाड शिष्य उंड्या; वाड विश्वास फेटेदान यादो ओगा यहुदी आंडीदान कोडकु उंड्या, वान आबाड हेल्लेनी उंड्या. 2वांदी लुस्रलोन इंगा इकुन्या लोनटोर विश्वास फेटेटोर तम्मूळ बागा स्वागत शेशीर. 3तिमती मना संगा दावाला इल्ला पौलदी इच्छा उंड्या; आप्पुड आ जागाला यवार यहुदील उंडीर वार इचांग वाड वान तीस्कोनी वादी सुंता शेश्या; येनटीक की वान आबाड ग्रीक उंडाड इदी आंदारकी यरका उंड्या.
4आप्पुड वार नगरकेल फोता-फोता यरुशलेम शहरलोन प्रेषित इंगा आब्बागार इर याद ठराव शेशिनीर वारकी पाळायदेंक नेमाशी इच्चीर. 5दिन मिंदकेल मंडळील विश्वासला स्थिर आय्या इंगा दिवसान दिवस वाढास्का नडश्या.
पौल्द दर्शन
6यंक्सार आशिया प्रांतला वचन शपिदेंक वारकी पवित्र आत्मा तीकेल प्रतिबंध आईने इचांग वार फुग्रीया इंगा गलतिया इ प्रांत लोन्केल फोईर. 7इंगा मुसिया प्रांत नंताक वचीनेन्का बिथुनिया प्रांतला फोयेद वार प्रयत्न शेशीर; पण येशुन आत्मा वारनि फोनीयाल्या. 8मग वार मुसिया देगारकेल फोई त्रोवस शहरकी किंदीक फोईर. 9आंदू मोबुला पौलकी इल्ला दृष्टांत आय्या की, मासेदोनियाला यवार तरी वगा मणशी नीला फडी मनालनी विनंती शेस्तुनाळ की, “इकाड मासेदोनीयाला वची माक मदत शेय.” 10वांकी इल्ला दृष्टांत आयनेंका आ मंदीक सुवार्ता शपदेंक द्यावार मंमलान कुतेशिनाड इल्ला अनुमान शेशी मिम मासेदोनीयाला फोयेदेंक लगेच विचार शेस्तीम.
पौल मासेदोनीया लोंदी फिलीप्पिक फोताळ
11आप्पुड त्रोवसाकेल जहाज ला कुसनी मिम शिंगार समथ्राकेस बेटकी फोतीम इंगा दुसरा नाळ नियापुलीस शहरकी फोतीम. 12आंदकेल फिलीप्पी शहरकी फोतीम; आदी मासेदोनियालोन इ भागलोंदी पहिलादे नगर उंडी आंदू रोमन मंदीद वसाहत उंडाद आ नगरला मिम तोडेम नाळ नीलस्तिम. 13मग शब्बाथ नाड मिम वेशी बेटीक वंका कंटामकी, यंदू प्रार्थना आतूनटाद इल्ला माक वाटाश्या आंदू फोई कुसुंटीम; इंगा या आंडेर आंदू जमा आयनीर वार संगा माटलाड देंक आंटतीम. 14आंदू लुदिया फेरूद यादो ओगा आंडीद उंड्या; आदी थुवतीरा नगरदी उंडी जांभळाय बटाल आंमदु; आदी द्यावार्दी उपासना शेशेद उंड्या, आदी माद भाषण ऐकाश्या; दांदी अंतकरण प्रभूड इल्ला तयार शेशाकी पौल शप्काम तीकुड आदी लक्ष्य इच्या. 15मग दांदी इंगा दान घरानाद बाप्तिस्मा आयनेंका आदी इल्ला विनंती शेश्या की, “नीन प्रभून मिंदा विश्वास फेटेदान उंडान इल्ला जर मीर मानास्तुनार तर ना ईलकाडा वची निलूना.” दान आग्रह इचांग आदी विनंती माक मान्य शेय्या बेक आय्या.
पौल इंगा सिला न जेलला
16मग इल्ला आय्या की, मिम प्रार्थना जागा तीकुड फोयेताप्पुड येवात तरी ओगा दृष्ट आत्मा आंटीनेद आन्बीडा माक कमशा, दान फईला वच्चू, आदी भविष शपी दान धन्यालकी संगेम दुडलु कमाशी इच्चू. 17आदी पौल इंगा मा यंका वची बेग्गे आन्या, “इ मंदी परात्पर द्यावार दास उंडार, इर मनाक तारणदी दावा शेप्तार.” 18इल्ला आदी संगेम नाळ शेयदू; मग पौलकी संगेम खराब वाटाश्या इंगा यंकाक तीरगी वाड आ दृष्ट आत्मान आन्या, “येशु ख्रीस्तन फेरता नीन नीक आज्ञा शेस्तान की, नु दिन लोन्केल येली फो.” इंगा आदी लगेच येली फोया.
पौल इंगा सिला इर्दी बंदीवास इंगा ईडकाम
19मग मनाद कमाशेद आशा फोया इल्ला सुशी दान धन्याल पौल इंगा सिला इरनि फटी बाजार अधिकारीला तीकुड जगुका फोइर. 20इंगा वार वारणी अधिकारीला मुंदार नीला फडा मती आनीर, “इ मंदी यहुदी उंडी मा नगरकी त्रास इस्तार. 21इंगा मा रोमन मंदीक याद रिती रिवाज स्वीकार शेशेदेंक इंगा आचरायदेंक योग्य लेद वार इदी शप्तार.” 22आप्पुड मंदी वार मिंदा लेशीर इंगा अधिकारील वारी बटाल शिंपी इंगा वारनि छडील मतेद आज्ञा इच्चीर. 23मग संगेम फटकाल मतीनेन्का वारणी बंदी शाळाला येशी वार बंदी शाळा नायककी वारणी बंदोबस्तला फेटेद हुकुम इच्चीर. 24वांकी इल्ला हुकुम शिकीनेन्का वाड वारणी बंदी खानाला येशी वारी काळलु खोडाला अडका मत्या.
25आर्दाम मबुला पौल इंगा सिला इड प्रार्थना शेस्तापुड इंगा फदुल फाडी द्यावार्दी स्तुती शेस्तापूड उंगो बंदीवान वारदी ऐकादूर. 26आप्पुड येकायेक इल्ला फेदाद भूकंप आय्या की बंदीशाळाय काळलु डगमगाश्या, आन्नी दरवाज्याल लगेच उघडाश्या इंगा आंदारि बंधनलु तेगी फोया. 27आप्पुड बंदीशाळा नायक लेशिगास बंदीशाळाय दरवाजाल उघडा उंडाय सुशा; इंगा बंदिटोर फारी फोईर इल्ला विचार शेशी वाड तलवार उपसाशी स्वताद घात शेशेतोड उंड्या. 28इंताळला पौल बेग्गे कीरली आन्या नु स्वताक येमी नुकसान शेस्कोनाक; येनटीक की मिम आंदार इंदे उंडाम. 29मग दिवा येकोची वाड नोनिक फारका फोया, नडगुका-नडगुका पौल इंगा सिला इरी काळलु मोक्या. 30इंगा वारणी बेटीक तिशी आन्या “साहेब, नाद तारण कावाला दांचांग नीन येम शैया बेक?” 31वार आनीर, “प्रभू येशुन मिंदा विश्वास फेट आंटे नीद इंगा नि घराणाद तारण आय्यी.” 32वार वान इंगा वान इंटलोन आंदारकी प्रभुंदी वचन शपीर. 33इंगा आ मबुलोन आद्दे टाईम वाड वारणी देगार तीस्कोनी वारी जखमलु कडग्या; इंगा आपुडे वाड इंगा वान इलुटोर आंदार मनुष्यल बाप्तिस्मा तीस्कीनीर. 34इंगा वाड वान इल्लुक एका फोई तिना मत्या इंगा द्यावार मिंदा विश्वास फेटी वाड इंगा वान इलूटोर मंडळी आनंद शेशीर.
35फदु फुटी नेन्का अधिकारील शिपायीलान आंपडीची शपीर की, “आ मन्सूलान इडस्काड.” 36आप्पुड बंदीशाळालोन नायक पौलकी इल्ला बातमी शपीर की, “मिमलान इडवाला आन्कान अधिकारी मन्सूल आंपिनाड; तर इपुड शांतीता फो.” 37पण पौल वारणी आन्या, “मिम रोमन मन्सूल उंडीगास अपराधी ठरायान्दे वार मंमलान उघडपणे देबाल मती बंदीशाळाला येशीर इंगा इपुड वार मंमलान तेपांग आम्प्तार येम? इदी नडवाद; तर वार स्वता वची मंमलान बेटीक तीयाला.” 38इंगा शिपाईल इदी बातमी आधिकारिक शपीर, आप्पुड वार रोमन उंडार इदी ऐकाशी वार आद्री फोईर. 39इंगा वार वच्ची वारकी समजा मतीर; इंगा वारणी बेटीक येकोची नगर लोन्केल येली फोयेद विनंती शेशीर. 40मग वार बंदी शाळाकेल येलीगास लुदियान इल्लुक फोईर, बंधूजनलान भेटाशी वार वारकी धीर इच्चीर इंगा आंद नुस वार फोईर.
Iliyochaguliwa sasa
प्रेषित 16: Wrr
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
CC BY SA