Luke 9
9
1ထွို့မဲ့ ကိုယ်တော်အွယ့် ဟောင့်စုသာဝက အစီ့ငြီ့ပလား ထွို့ ဖီအပ်ဖီတန်ခိုနောင် အခွင်အာဏာ ဖီးကာဝါစွာ့တန်း တလီခိုဟဖုန်းကားကအို နောင် ဖီးကာကူ့တမာ တစာ့ရောဂါဖုန်း။ 2ထွို့မဲ့အာအွယ့် ဖီကြွလေအာက ဖီးစဟိုကာ ဗွယ်ဖရာသာသနာခရာ နောင် ကုဖီး တစာ့ရောဂါဖုန်း။ 3ကိုယ်တော်အွယ့် "နာက့ကျန်လေကျိ့မာ တစွိုစွိုမာ။ နမ်ထို့၊ တန်ပွို့၊ တအမ်း၊ ကွမ့်၊ အမ်းလေခရာ ကန်ကျိန်းလွို့ ဖုန်း အွယ့်ဟို ကျန်လေကျိကာမာ။ 4နားက့မေကျိန်နျူး ယွမ်ကမားမာယောဝ် တွိုတွို့ စစွာ့ထန်းရပ်အွယ့်ကူ့ အိုတယ်ကာဘို့ ယွမ်အွယ့်မာကူ့။ 5အေ့ချန်း ပလားမေလီကြိုဟ နားက့အွယ့် နားက့မေစာစွာ့ထန်ဝိန်းကုခါ့ ဗွမ့်နောင်ငြင်းပယ်အာကာ ဖဖုန့်ဟမ်ဖွမ်အိုနားက့ခင်လောင်ထွို့ဖီး စစွာ့ထန် ကာလုဲင်" မိန့်လေနိန်းအွယ့်။ 6အာကာလဲ့ စာစွ့ထန်ကာထွို့ လေးကာ အနယ်နယ်အရပ်ရပ်ကုထွို့ ဟိုဖီကာဖရာနှုတ်ကပါတ်တော် စတင်းခိုဖုန်းထွို့ ကုတမာဖီကာ တစာ့ရောဂါ ဝေဒနာစာဖုန်း။ 7ပလူးကာကအုပ်ချုပ်ဒါ ဂါလိလဲဒေသ ခွမ့်ခံဟေရုဒ်အွယ့် ထွိုင်းဟွမ့်ထွို့ ကိုယ်တော်ယေရှုစတင်းတပျန့် ဖုန်းထွို့ နန်ထွို့ ကူလားထန်။ ကွက်တဟနာ မေဒေါင့်အွယ့် ပလူးပိန်ပလားပလားအွယ့် "ငွတ်သျှီ့မင်္ဂလာ ဆရာယောဟန် ဆက်ပြန်မွမ့်ချာလိ"ဖုန်း၊ 8ပလားလငါ့အွယ့် "ပရောဖက်ဧလိယ ကြွာ့လေချာဒါ့လိ" ဖုန်း၊ ပလူးလငါ့အွယ့် "ထျက်အကီကီခါ့ ကအိုဒါ အရိယာဆူတော်ကောင်ဖုန်းကု အပါးအွယ့် ဆက်ပြန်မွမ့်ချာဒါ့လိထွို့" ဒေါင့်လိုကာနိန်းအွယ့်ဖုန်းဟနေ။ 9ဒေါင့်မာလဲ့ ဟေရုဒ်ခွမ့်အွယ့် "ငါးဒွိုး အန်ချန့်ဒွူးထွို့လိယောဟန်ခူး။ ငါးကအိုဟွမ့်ဘာဒါ စတင်းဖုန်းအွယ့်ပလား ပြန့်ဒါလမား" ဒေါင့်နိန်းအွယ့်ထွို့ အာသကူ့ ဘာသခွယ်ယွမ်ထန်တွို့ ကိုယ်တော်။ 10သာဝကဖုန်း ထွိုင်ကျိန်းကာထွို့ လျှောက်ကာကိုယ်တော်ယေရှု အာကားကမိုးဘာဒါတာဖုန်း။ ထွို့မဲ့ ကိုယ်တော်အွယ့်ဟောင်လေပါအာကာထွို့ လေးကာ ဗက်ဇဲဒဒုန့်ကု။ 11ဒေါင့်မာလဲ့ ပလူးဖုန်းအွယ့် သိကာအကြောင်ခရာအွယ့်ဘာထွို့ လေးတွဲ့လိုကာ ကိုယ်တော်ကမ်စာ့။ကိုယ်တော်လဲ့ ကြိုအာကာထွို့ ဟိုရှင်ဖီး ဗွယ်ဖရာသာသနာတော်ခရာဖုန်းထွို့ ပလူးအိုလူ တခရိုင်ဆန်စာဖုန်းလဲ့ အာမိုခရိုင်ဖီ။ 12မွိုင့်နိုင့်လင်းထွို့ တပည့်အာစီ့ငြီ့ပလားအွယ့် တွိုလေးကာ ကိုယ်တော်ဆောင့်ထွို့ " ဒွိုးရပ်ဒွို ပျန့်တို ပလူဖုန်းလီတွိုဟရပ်အွယ့်မဲ့ ကြွလေပလူးဒွိုးစွိုဖုန်း ဒုန့်ကအိုဘို့ဒါ ရပ်ဒွို့။ အာကာဒွို အိုလူခမ်းလန်အိုနာနောင် တအန်ဖုန်း" လျှောက်လိုကာနိန်းအွယ့်။ 13ကိုယ်တော်အွယ့် "နားကဖီး အာကာ တအမ်ခရာတစွိုစွိုလုဲင်" မိန့်လင်း အာကာနိန်းအွယ့်ထွို့အာကာအွယ့်လဲ့ "ကားဆောင့်ဒွိုး အိုဘို့တကိုးပီပီအမ်ငေးမာ့ နောင်သားအမ်ငြီ့ဘာဟို့။ မေဖီးအန်ပလူးကားကအိုအွယ့် အီလေအန်ပလီးဘာ တအန်ဖုန်း" လျှောက်လေနိန်းအွယ့်။ 14ပလူးစွိုကုအွယ့် ပခူ့အိုတွို့ အန်းငေးရိန့်အာ့။ ကိုယ်တော်အွယ့် "ဒေါင့်ပလူးစွိုဖုန်း အစုစုဒွို အိုနန်းကာ ပလူးအန်ငေစီ့ပလားလုဲင်" မိန့်အာတပည့်ဖုန်းနိန်းအွယ့်။ 15တပည့်ဖုန်းလဲ့ အန်ချန်လိုကာပလူးဖုန်း အိုနင်းကာနိန်းအွယ့်။ 16ကိုယ်တော်အွယ့် ချွော်တကိုးအန်ငေးမာ့နောင် သားအမ်ငြီ့ဗားထွို့မဲ့ဟွိုင်ထန် ဝိန်းခမ်းထွို့ အမ်ဖရာဆုတောင်လေဗွယ်ဖရာဂုဏ်တော်ဖုန်းထွို့ အာပီတကိုးနောင်သား နောင်အာကျွေ့ာ်ထွို့ အိုအာတပည့်ဖုန်းဆောင့် ထွို့ ဝေးဖီပလူးဖုန်းကားကအို။ 17ပလူးကားကအိုအွယ့် အန်ဘာကွို့ထွိုကာဟ အာတပည့်ဖုန်ထွိုင်ဆျန် တအန်အိုကေ့အွယ့်ဟိုအွယ့် လဝေ့ဒါ့တွို့ ခရောင် အစီ့ငြီ့ခရောင်။ 18ကိုယ်တော်ယေရှုဆုတောင်တိုးတာ အပလားခါ့ တပည့်ဖုန်းတွိုလေးလိုကာထွို့ ကိုယ်တော်အွယ့် "ပလူးဖုန်းဒေါင့်လိုကာ ငါးခရာတဟနာ။" တစီ့အာကာနိန်းအွယ့်။ 19အာကာအွယ့် "ပိန်ပလားပလားအွယ့် ဒေါင့်ကာကိုယ်တော်နုဲင့် ပျန့်တို ငွတ်သျှီ့မင်္ဂလာဆရာယောဟန် မကောင်၊ပျန့်တိုဧလိယ မကောင်၊ အကီကီခါ့ အရိယာဆူတော်ကောင်အပါး ဆက်ပြန်မွမ့်ချာဒါ မကောင် ဒေါင့်လိုကာနိန်းအွယ့်" လျှောက်လိုကာနိန်းအွယ့်။ 20ထွို့မဲ့ ကိုယ်တော်အွယ့် " နားက့ ဘာတဒေါင့်ကာ ငါးပျန့်လာမာ" တစီ့နိန်းအွယ့်။ ပေတရုအွယ့် "ဗွယ်နုဲင့် ပျန့်တို ဗွယ်ဖရာက ကြွလင်ဒါ ဗွယ်ကယ်ဆယ် မေရှိယတို" လျှောက်လေနိန်းအွယ့်။ 21ကိုယ်တော်အွယ့် ဖီးကျန်းဒေါင့်မာ အကြောင်ခရာဒွို့ဘာ လမားမားဆောင့်မာ ရေးခရိန်စေကန်းနိန်းအွယ့်။ 22ကိုယ်တော်အွယ့် "ကန်စာပဒူဖုန်း၊ ဂျူးဖာစာရေပဒူဖုန်း နောင် မောရှေကျမ်ဒါးပညာစာဖုန်းအွယ့် အီနိတ်စက်လိုကာ ဗွယ်ဖရာဖုခု။ အာကာအွယ့် အီငြင်းပယ်ကာအာထွို့ အီမိုးစီ့ကာအာ။ ဒေါင့်မာလဲ့ မေလအန်တွမ့်ငြီးကုအွယ့် အာအီပြန်မွမ့်ချားဒါတို" မိန့်လေ အာတပည့်ဖုန်းနိန်းအွယ့်။ 23ထွို့မဲ့ ကိုယ်တော်အွယ့် "လမားမားယောဝ်း တွဲ့ငါးကန်စာ့ထွို့ မေဘာသပျန့် ငါးတပည့်စာအွယ့် ငြင်းပယ်ချာတိုးနန်ထွို့ ယိုးချာတို့ နန်တို့ကျွော့်အျန်တထွမ်ထွို့ တွဲ့လေးဒါဘာ ငါးကမ်စာ့ကျွမ်ငြီးငြီးမဲ့။ 24နားကမေဘာသကယ် နားကဆက်လဲ့ အီစွမ့်ကေ့ဘာတာ။ ဒေါင့်မာလဲ့ ပလူးခံစွမ့်ဖဝငါးတာစာဖုန်းအွယ့် နောင် အီခံဘာ တကယ်အာဆက်။ 25နားကာ့ဒွို ပွိုင်ခွင်လတွို့ ကမ်ဖာဒူးအမာအာ့လဲ့ နားကဖဝမေကေ့ထွို့ ဆက်မေစွမ်ကေ့အွယ့် အကျိုအီအိုတဟနား။ 26ကွက်ငါး နားက့မေကတာ့ စကမ်ကာလဲ့ ဗွယ်ဖရာဖုခုအွယ့် မေကြွလေနောင် ဖဖရာဘုန်းတန်ခိုတော်၊ လွှော်မြတ်ဖုန်းခါ့လဲ့ အီကတာ့။ 27ငါးဒေါင့်နားက့ တမှန်ဒွို့ ပလူးအိုထွိုင်းတာ ဒွိုးကုစာပိန်ပလားပလားအွယ့် မေခသျှီဘာကောင်းဗွယ်ဖရာသာသနာပွား ဒွို လီစီ့ဒါကောင်းဟာ" မိန့်လေပရိသတ်ဖုန်းနိန်းအွယ့်။ 28မိန့်နိန်းအွယ့်ထွို့ ကြာထွို့အန်စူးငြီးအာ့အွယ့် ကိုယ်တော်ဒီ့ ဟောင့်ပေတရု၊ ယောဟန်နောင် ယာကုပ်ကားထွို့ အီဝယ်ဆုတောင်တာတား ကြွထန်လိုကာ ခေါင်လောင်။ 29ကိုယ်တော်ဆူတောင်တာခါ့ အာရုပ်ယောင်ဆင်အွယ့် ပလောင်ထန်ထွို့ အာကန်ကျိန်းထော့်ခုနောင်ဖုန်းလဲ့ ဖောင်ပလင်ပလီးထန်တွို့။ 30အလိုင်ချင်ကု မောရှေနောင် ဧလိယကာအွယ့် ဒေါင်စူ့ကျွို့နောင်ကိုယ်တော်။ 31အာကာအွယ့် ဘုန်းတန်ခိုတော်ဖုန်းခါလက်ထန်ထွို့ ဒေါင့်လိုကာ ဂျေရှဆလင်ဝိန်းကု အီဝေ့စွမ်းထွို့ ကိုယ်တော်အီးစစွာ့ထန် ကမ်ဖာဒွိုးဘာကုခရာ။ 32ပေတရု နောင် တပည့်အန်ငြီ့ပလား အွယ့် အိုငြီ့ပိန်းလိုကာတာ။ အာကာမေးထွိုင်ကျို့ထွို့အလိုင်ချင် အာကာသျှီလိုကာဘာ ကိုယ်တော်အွယ့် အိုဝေ့စွမ်းနောင် ဘုန်းတန််ခိုတော်ဖုန်း။ အာကာအွယ့် သျှီလိုကာဘာ အရိယာဆူတော်ကောင် အန်တငြီ့ အိုဒေါင့်စူ့နောင် ကိုယ်တော်။ 33မောရှေနောင် ဧလိယစာစွာ့ထန်းခိန်း ပေတရုအွယ့် "ဗွယ်၊ ဒွိုးရပ်ဒွို ပျန့်တို့ရပ်ဘာသအိုခရာ။ ဖီးစူ့က့
ကိုယ်တော်တာနန်ကျာ အမာ့၊ ဧလိယတာ နန်ကျာအမာ့၊ မောရှေတာနန်ကျာအမာ့" လျှောက်ကိုယ်တော်နိန်းအွယ့်။ ဒေါင့်မာလဲ့ အာအွယ့် အာနန်နောင် အာနန် ဒေါင်တဟနာ သိချာဟ။ 34ပေတရု လျှောက်နိန်းအွယ့်ခါ့ မုအီဒူအဘာအွယ့် အိုပါအာကာခလွို့ထွို့ အယောင်းအိုလင်း။အာကာအွယ့် မုအီဒူအိုပါအာကာခလွို့ အွယ့်ကြားမဲ့ စကန်လွမ်ထန်လိုကာ။ 35အွယ့်ခအွယ့် အိုမုအီဒူအဘာကုထွို့ "ဒွိုးပလားဒွို ပျန့်ငါးဖုခု။ နားကာအာငိုလုဲင်" ငိုစင်ထန်နိန်းအွယ့်။ 36ငိုအွယ့်ဘာ ထွိုင်စင်ထန်ထွို့ခါ့ ပေတရု၊ ယောဟန် နောင် ယာကုပ်ကာအွယ့် သျှီလိုကာဘို့ ကိုယ်တော်ယေရှုအပါးဟို့။ အာကာအွယ့် ဒေါင့်နေ့ဟလမားမား အာကာကသျှီဒါတာ အကြောင်ခရာဖုန်းထွို့ အိုကျွော်လိုကာဘို့တာ။ 37ဒါ့အငြီးကူ့ ကိုယ်တော်နောင် အာတပည့်အမ်တတျန့်အွယ့် အိုခေါင့်လောင်လင်းလင်ကာထွို့ သျှီလိုကာ ပလူးကျွိုဒူဖုန်း။ 38ပရိသတ်ကု ပလူးအပလားအွယ့် "ဆရာ၊ ကုခိုဖီ ငါးဖုခု။ အာဒီပျန့်တို ငါးဖုခုအပလားတိုး။ 39တလီခိုဟနွူးထွို့နိတ်စက်အာအွယ့်မဲ့ အာက့ကျွို့ထန်တာ။၊ အာနန်အဘားအာ့ စွိုထန်ထွို့ နာပလောင်ကုအွယ့် အဗွူ့ဖုန်းထန်းဒါ။ တလီခိုဟအွယ့်ဘာအွယ့် မိုးရွိုးမိုးစာ့အာထွို့မဲ့ အိုအာကု စစွာ့ထန်ကလွူ့ဟာ။ 40ငါးအွယ့် တောင်ပလန်ကိုယ်တော်တပည့်ဖုန်းထွို့ဖီးကာဝါစွာထန်တလီခိုဟလဲ့ အာကာမိုးဖီးဒါဟ" လျှောက်လေနိန်းအွယ့်။ 41ကိုယ်တော်အွယ့် "တယွမ်အန်လီအိုဟထွို့ တယွမ်အန်ဆျန်စာနားက့ဖုန်း၊ ငါ့ဒွို အီအိုကိုဘာနားက့ထွို့ အီသေခံဘာ နားက့ တျာမာ" မိန့် တပည့်ဖုန်း နိန်းအွယ့်။ ထွို့မဲ့ ကိုယ်တော်ယေရှုအွယ့် "ဟောင့်လေးနားဖုခု ငါးဆောင့်လုဲင်" မိန့် ပလူးအွယ့်ပလားနိန်းအွယ့်။ 42ပသာပီအွယ့်ပလား အိုလေတာခါ့ တလီခိုဟပူအာထွို့ မိုးစီစွိုအာနန်အဘားအာ့။ ကိုယ်တော်စွမ့် တလီခိုဟထွို့ ကုဖီပသာပီထွို့မဲ့ ပြန်အပ်ချာဒါ့ အာဖဆောင့်။ 43ပလူးကျွမ်ပလားပလားအွယ် သျှီကာဘာထွို့ ဗွယ်ဖရာတန်ခိုတော်အနန္တဖုန်း ဟွမ့်ဆန်လိုကာစွက်ဒါဒွမ်တွို့။ ပလူးဖုန်းအိုဟွမ်ဆန်လိုကာ ကိုယ်တော်ကမိုးဒါတာဖုန်းတွင် ကိုယ်တော်အွယ့် 44"ငါးကဒေါင်ဒါနားကဒွို နားကာကြိုင်ကြိုင်ကာလုဲင်။" အီခံအပ်ဘာလိ ဗွယ်ဖရာဖူခူ ရန်ဆူကျွော့်ကု" အာမိန့်လေ အာတပည့်ဖုန်းနိန်းအွယ့်။ 45ဒေါင့်မာလဲ့ တပည့်ဖုန်းအွယ့် ကိုယ်တော်ဘာသဒေါင့်ဟနာ သိလိုကာဟ။ အွယ့်ဘာအဓိပ္ပာယ်လူးလူးအွယ့် ဖီဒင်အွိုကေ့ အာကာဆောင့်အွယ့်မဲ့ အာကာသိနာဒါကာဟလဲ့ အီတစီ့ တာခရာအွယ့်ဘာတာ အာကာစကန်လိုကာ။ 46အခိန်းထွိုင်ငိထွို့ အာတပည့်ဖုန်းအွယ့် အာကာကုဒီ လမာအီပျန့် အဒူမြတ်စွက်အွယ့် အိုငြင်းလိုကာ။ 47ဒေါင်မာမဲ့ ကိုယ်တော်ယေရှုအွယ့် အိုသိ ပလူးအွယ့်ဟို အိုငြင်းလိုကာတာအွယ့်ကြားမဲ့ အန်ချန်ပသာပီအပလား အိုထွိုင်းတာ အာတီး။ ထွို့မဲ့ ကိုယ်တော်အွယ့် "ပသာပီအွယ့်ပလား နောင်ငါးနျန်းကူ့ ပလူးလက်ခံစားအွယ့် ပျန့်တိုပလူးလက်ခံငါး။ 48ထွို့မဲ့ကိုယ်တော်အွယ့်" နောင်ငါးနျန်းကူ့ ပလူးလက်ခံ ပသားပီးဒွိုးပလားစာဒွို ပျန့်တိုပလူးလက်ခံငါးစာ။ ပလူးကလက်ခံငါးစာဒွို ပျန့်တိုပလူးလက်ခံဗွယ် ကကြွလေးဒါငါးစာ။ နားက့ကူနုဲင့် ပလူးကခံအောက်စွက်စာဒွို ပျန့်တိုပလူးအဒူမြတ်စွက်စာ" မိန့်အာတပည့်နိန်းအွယ့်။ 49ထွို့မဲ့ ယောဟန်အွယ့် "ဗွယ်၊ က့သျှီဘာ ပလူးအပလား စုံနောင်ဗွယ်နျန်းထွို့ ဝါစွာ့ဖီးတလီခိုဟ အိုပလူးကူ့။ ပလူးအွယ့်ပလားအွယ့် အာလီတွဲ့လေဟက့အွယ့်ကြားမဲ့ က့ရေးကာအာ" လျှောက်နိန်းအွယ့်။ 50ဒေါင့်မာလဲ့ ကိုယ်တော်အွယ့် "ကျန်ရေးမာအာမာ။ ပလူးဆန့်ကျင်ဟနားက့စာအွယ့် ပျန့်တိုပလူးထောက်ခံနားက့" မိန့်လေနိန်းအွယ့်။ 51ကိုယ်တော်အွယ့် အီထန်ဝိန်းခမ်းကု အခိန်လီယားဒွမ့်အွယ့်ကြားမဲ့ အာချသ လေးလေဂျေရုဆလင်ဝိန်းကု။ 52အာအွယ့်ကြွလေးကီ တပည်ဖုန်း ရှမာရိဒုန့်ကုထွို့ အန်ချန်ရျန်းထွိုစေကန်း အာတာ။ 53ဒေါင့်မာလဲ့ ကိုယ်တော်အွယ့် လေးတိုဂျေရုဆလင်ဝိန်းအွယ့်မဲ့ ရှမာရိဒုန့်စာဖုန်းအွယ့် ကြိုစွမ်ကာဟ ကိုယ်တော်။ 54ယာကုပ်နောင်ယောဟန်ကာ ထွိုင်သျှီတပျန့်အွယ်ဟိုထွို့ "ဗွယ်၊ ကာ့ကျွူကာ ဗွယ်ဖရာ မီးအိုမုလောင်ထွို့ ဖီမိုးလင်တေထွို့မဲ့ ဖီမိုးကေ့ဘာကေ့ အာကာနောဝ်"လျှောက်ကာနိန်းအွယ့်။ 55ဒေါင့်မာလဲ့ ကိုယ်တော်အွယ့် လှည့်လေအာကာဒိုင့်ထွို့ စွမ့်အာကာ မာတိုထွို့မဲ့ 56အာကာကားကအို့အွယ့် စစွာ့လေကာဒါ့ ဒုန့်လငါ့အဒုန့်ကူ့။ 57ကိုယ်တော်နောင် အာတပည့်ဖုန်းကလေးဒါ ကလေ့လောင်ကူ့ ပလူးအပလားအွယ့် " ငါးအီလေးတွဲ့ ဗွယ်ကကြွကူ့" လျှောက်လေကိုယ်တော်နိန်းအွယ့်။ 58ကိုယ်တော်အွယ့် "ချွူဟန်ဖုန်းဒီ အိုနောင်အောင့်။ ထူဖုန်းဒီ အိုနောင် ဟျူ့။ ဒေါင့်မားလဲ့ ဗွယ်ဖရာဖုခုအွယ့် ချခူတာ ခမ်းလန်အိုဟ" မိန်းလေနိန်းအွယ့်။ 59ကိုယ်တော်အွယ့် ဟောင့်ပလူးလငါ့အပလား ဖီးကလေးတွဲ့အာထွို့ ပလူးအွယ့်ပလားအွယ့် "ဗွယ်၊ အိုပွိုင်းဖီးအစင်းအာ့။ခွင်ဖီးငါး အီလေစင်ကြိုကီ ငါးဖကုမ့်" လျှောက်လေနိန်းအွယ့်ဟနေ။ 60ထွိုမဲ့ ကိုယ်တော်အွယ့် " ဖီပလူးသသာစီ့စာဖုန်း စင်ကြိုတိုး ပလူးစီ့။ နာအွယ့် စဟိုဘို့ ဗွယ်ဖရာသာသနာတော်ခရာဖုန်းလုဲင်"မိန့်နိန်းအွယ့်။ 61ပလူးလငါ့အပလားအွယ့် "ဗွယ်၊ ငါးအီလေးတွဲ့ တိုဗွယ်ကမ်စာ့။ ဒေါင့်မာလဲ့ ခွင်ဖီငါးအီကျိန်းယွမ်ထွို့ ကျိန်နှုတ်ဆက်ကီယွမ်စာဖုန်း" လျှောက်လေနိန်းအွယ့်။ 62ကိုယ်တော်အွယ့် "ပလူးပန်ထုဲင်းထွို့ ဟွိုင့်ကျိန်းချာဒါကန်စာ့စာဒွို လီထွိုက်ဟာနောင် ဗွယ်ဖရာသာသနာတော်ဟာ" မိန့်လေနိန်းအွယ့်။
Iliyochaguliwa sasa
Luke 9: ltpv-rv
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.